23 მარტს თბილისი მერიოტში ჩატარდა ღონისძიება "ოქროს არწივი 2024". მისი დამფუძნებელი, ბესო ჩუბინიძე ღონისძიებას ღირსეულ მამაკაცთა დაჯილდოებას უწოდებს.

ოქროს არწივის ჯილდოს გადაეცა 21 მამაკაცს, მათ შორის მოხვდნენ მამა შალვა კეკელია, მუსიკოსი გურამ ჯაში, თბილისის ყოფილი მერი ნიკო ლეკიშვილი, რაგბისტი მამუკა გორგოძე, იმუნოლოგი თენგიზ ცერცვაძე და სხვები.

""ჩემთვის ეს არის, პირველ რიგში, უდიდესი პასუხისმგებლობა, პასუხისმგებლობა ჩემი ქვეყნის წინაშე, ჩემი ერის წინაშე და უფლის წინაშე... შევეცდები, რომ ღვთის წინაშე კიდევ უფრო ვიღვაწო." - თქვა მამა შალვა კეკელიამ ტელეკომპანია იმედისთვის მიცემულ კომენტარში.

"ინსპირაცია რა იყო ამ ყველაფრის... ქალებს დღესაც კი დაახლოებით 15-16 დაჯილდოების ცერემონია აქვთ, მარტო ქალბატონებს სადაც აჯილდოებენ - 15 თუ 16... ბევრი, ბევრი და ენაცვალოთ ჩემი თავი... მაგრამ სადღაც, ვიღაცას, ერთხელ მაინც გული რატომ არ დასწყდა და რატომ არ თქვა: ქალებო, თქვენ მამაკაცების გარეშე ვარგიხართ იმ ადამიანებად, რა ადამიანიც უნდა იყო? ყველა ქალს ენაცვალოს ჩემი თავი... მაგრამ დაფიქრდით აბა, განა თქვენს ცხოვრებას აზრი აქვს ჩვენ გარეშე? ეს ჩვენ ვართ, ის მამაკაცები, რომლებსაც შეცდომები ოხრად გვაქვს, ისევე, როგორც თქვენ, ქალბატონებო, ბევრ რამეში. ეს ხომ არ გაძლევთ იმის თქმის საფუძველს, რომ ჩვენც არ მოგვეფეროთ და ჩვენც არ დაგვაფასოთ. მარტო მოძალადეები ხომ არ ვართ? მარტო მკვლელები ხომ არ ვართ ეს ქართველი კაცები და მარტო ძალადობის მომხრეები და მარტო ჰომოფობები?... ჩვენც ხომ რაღაც გაგვიკეთებია?" - ამბობდა დაჯილდოების დამფუძნებელი, ბესო ჩუბინიძე ტელეკომპანია თრიალეთის ეთერში ცერემონიიდან რამდენიმე დღით ადრე.
https://www.facebook.com/photo/?fbid=823529933152379&set=a.489877669850942