კეთილი იყოს თქვენი ფეხი ამ ლეგენდარული თემის მეხუთე ნაწილში
ეს არის თემა სადაც ჩვეულებრივი ადამიანები ერთმანეთს საკუთარ გამოცდილებას ვუზიარებთ ფიტნესის სფეროში. გამხნევებაც მოსულა. გოგოებიც გვყავს და ბიჭებიც. ზოგს წონაში დაკლება უნდა, ზოგს კუნთების მომატება, ზოგს მუცლის შეწევა, ზოგს ფეხების დაწვრილება, ზოგს ტაკოს გაზრდა და ზოგსაც უბრალოდ უსწორდება ვარჯიში.
ბევრ თქვენგანს არ ეცოდინება, მაგრამ ადამიანი რომელმაც ამ თემას სათავე დაუდო
აი ასე გამოიყურებოდა. მას შემდეგ ექვსი წელი გავიდა და ახლა არავინ იცის რა ბედია ეწის მას. თუმცა ჩვენ დღემდე მადლიერები ვართ და არასდროს დავივიწყებთ მის ღვაწლს.
იმ დროს არავის ეგონა, რომ ეს ერთი შეხედვით არაფრით გამორჩეული თემა უკვდავებას მოიპოვებდა ფორუმის ისტორიაში. გაისმა შეძახილები "რა დროს ვარჯიშია", "ღადაოოობთ", "ნეტა არ გცხელოდეთ", "ჩემი ვარჯიში პივაა", "გოგოებს კუნთებით ვერ დაკერავთ"... ფორუმელებს ეგონათ რომ ვარჯიში დროის კარგვა იყო, დაკუნთვის და გოგოების დაკერვის მცდელობა. ძლიერ ცდებოდნენ ისინი. დამიჯერეთ, ვარჯიში გაცილებით უფრო მეტია ვიდრე ესთეტიკა.
ხშირად მეკითხებიან, ნიკალას, რატომ უნდა დავიწყოთ ვარჯიში? ვარჯიშის გარეშეც მშვენივრად ვგრძნობთ თავს. მე კი მათ ვპასუხობ: ეს ახლა, სანამ ახალგაზრდები ხართ. ისინი კიდევ მეკითხებიან: კი მაგრამ, არ ვეწევით, ხშირად არ ვსვამთ, ნორმალურად ვიკვებებით, რა საჭიროა ვარჯიში? მე კი მათ ვპასუხობ: ის სარგებელი რასაც სწორი ცხოვრების წესით იმკით, შეგიძლიათ გააათმაგოთ. რამეთუ ჰომო საპიენსები ხართ, პრიმატების ერთერთი სახეობა, მოძრაობა თქვენი ყოველი უჯრედისთვის უმნიშვნელოვანესია.
ვვარჯიშობთ ყველა - ნაწილი 1ვვარჯიშობთ ყველა - ნაწილი 2ვვარჯიშობთ ყველა - ნაწილი 3ვვარჯიშობთ ყველა - ნაწილი 4წინა თემის ტოპ მპოსტავები:
» სპოილერის ნახვისთვის დააწკაპუნეთ აქ «
უამრავი კვლევით არის დადასტურებული ვარჯიშის დადებით ეფექტი ადამიანის ორგანიზმზე. ტვინიდან დაწყებული ფეხის თითებით დამთავრებული ყველაფრის მკურნალია ვარჯიში. აქ არავინ არავის აძალებს ვარჯიშის დაწყებას. მაგრამ თუ გსურთ, რომ ცხოვრება გაიუმჯობესოთ როგორც მოკლე ისე ხანგრძლივ პერსპექტივაში მაშინ იმ სარგებელს გადახედეთ რაც აუცილებლად მოაქვს ვარჯიშს
1. ტვინის ფუნქციონირება აგიმაღლდებათ, უფრო ადვილად გადაჭრით ინტელექტუალურ პრობლემებს
2. მეხსიერება გაგიძლიერდებათ
3. იმუნიტეტიც გაგიძლიერდეთ და იშვიათად გახდებით ხოლმე ცუდად
4. ენერგიის მარაგი გაგეზრდებათ და დღის განმავლობაში უფრო პროდუქტიული გახდებით
5. უკეთესი კანი გაგიხდებათ
6. უფრო თავდაჯერებული გახდებით
7. ძილი გამოგისწორდებათ
8. დიაბეტის, ალცჰაიმერის და კიდევ ბევრი სხვა დაავადების თავიდან აცილების შანსები გაიზრდება
9. გულსისხლძარღვთა სისტემა გაგიძლიერდებათ და ინფა(რ?)ქტის რისკი შემცირდება
10. ბევრად უფრო დიდხანს იცოცხლებთ ვიდრე ვარჯიშის გარეშე
11. სტრესისადმი უფრო ამტანი გახდებით
12. დეპრესიის სიმპტომები შეგიმსუბუქდებათ
ალბათ თქვენც ხვდებით, რომ ეს ყველაფერი არაა. რაც ამ სიაში არ წერია ჩვენს გენებშია ჩადუღებული.
ათეულობით მილიონი სპერმატოზოიდიდან მაინცდამაინც თქვენმა სპერმატოზოიდმა მიაღწია კვერცხუჯრედამდე, თქვენ ჩაისახეთ დედის სხეულში, შიგ გაიზარდეთ, მერე დაიბადეთ, აქამდე ჯანმრთელებმა მოაღწიეთ და ახლა ამას კითხულობთ. ძალიან გაგვიმართლა. ვსუნთქავთ, ვჭამთ, ვსაუბრობთ, გვიყვარს - ამ ყველაფრის გამოცდის შესაძლებლობა გვებოძა სრული შემთხვევითობის წყალობით. წყალს არ გაატანოთ ეს შესაძლებლობა, იმოძრავეთ, მადლიერები და ბედნიერები იყავით. ყოველდღიური ცხოვრების წვრილმანებით ტკბობის უნარს გისურვებთ
ზაფხულის თემაა და არ გვაწყენს საღამოს პლიაჟი დასამშვიდებლად
» სპოილერის ნახვისთვის დააწკაპუნეთ აქ «
თემის მეხუთე ნაწილს გახსნილად ვაცხადებ