Ghia
Super Member
ჯგუფი: Registered
წერილები: 682
წევრი No.: 17500
რეგისტრ.: 21-February 06
|
#3631342 · 21 Aug 2006, 10:25 · · პროფილი · პირადი მიმოწერა · ჩატი
მართალია, ეს IMF-ის საგანგაშო დასკვნაზე დაყრდნობით შედგენილია სტატიაა, მაგრამ, ალბათ, ამ ტოპიკს უფრო მოუხდება...
ლარი გაკუპონების ზღვარზე
" სავალუტო ფონდის შემაშფოთებელი დასკვნა "
საერთაშორისო სავალუტო ფონდის მისიამ საქართველოს მთავრობის ყოველდღიური მტკიცება, რომ ქვეყანაში ეკონომიკური ზრდაა, თავდაყირა დააყენა. ფონდის მისიის დასკვნით, საქართველოში ინფლაციის ტემპი კატასტროფულ ზღვარს უახლოვდება.
სავალუტო ფონდმა ქვეყნის მთავრობას ინფლაციის ტემპის შეჩერების მიზნით ქმედითი ზომების მიღება ურჩია. მისიის დასკვნით, თუკი ხელისუფლება საჭირო ღონისძიებებს არ გაატარებს, სიტუაცია საგანგაშო გახდება.
საერთაშორისო სავალუტო ფონდის მისიის ხელმძღვანელმა ჯონ ვეიკმან ლინმა განაცხადა, რომ თუ მთავრობა დროულად რაიმეს არ მოიმოქმედებს, ქვეყანაში ეკონომიკური პროცესები კონტროლს აღარ დაექვემდებარება.
”საქართველოს მთავრობასთან გამართული კონსულტაციების დროს მივაღწიეთ შეთანხმებას მონეტარული და ფისკალური პოლიტიკის ყველა მიმართულებასთან დაკავშირებით. მიუხედავად იმისა, რომ ქვეყანაში ეკონომიკური ზრდა კვლავ მიმდინარებს, საგანგაშოდ მაღალია ინფლაციის ტემპი, რომელიც წლის დასაწყისში 5 პროცენტს შეადგენდა, ხოლო ივლისის ბოლოს 14,5%-მდე გაიზარდა. ინფლაციის ასეთი სწრაფი ზრდა ქვეყნის ეკონომიკაში მოთხოვნის ზრდას ასახავს, რაც ძირითადად ჭარბი ფულის მიწოდებითაა გამოწვეული”, - განაცხადა ჯონ ვეიკმან ლინმა.
ლინის თქმით, ინფლაციის დონე სავალუტო ფონდის მიერ ადრე პროგნოზირებულ მოცულობას მნიშვნელოვნად აღემატება.
მისიის ხელმძღვანელმა მთავრობას ურჩია, შეზღუდოს ხარჯები, რათა ფულის მასა ნაკლებად გაიზარდოს. თუ ხელისუფლება სავალუტო ფონდის რეკომენდაციებს გაითვალისწინებს, მაშინ 2006 წლის ბოლოსთვის ინფლაციის მაჩვენებლის 10%-მდე დაყვანა შესაძლებელი გახდება.
მისიამ მთავრობას ასევე ურჩია, შეინახოს საგადასახადო შემოსავლები და ხარჯები არ გაზარდოს.
სავალუტო ფონდს ნოღაიდელის მთავრობა ხარჯების შემცირების პირობას რამდენად მისცემს, ძნელი სათქმელია. ბიუჯეტიდან ბოლო პერიოდში მართლაც უამრავი თანხაა დახარჯული. ალბათ, არჩევნების მოახლოებასთან ერთად ხარჯები კიდევ უფრო გაიზრდება. მით უფრო, რომ ხელისუფლებას ამომრჩევლის გულის მოსაგებად დიდი ფული სჭირდება.
ეკონომიკის ექსპერტი გია ხუხაშვილი ”ახალ ვერსიასთან” საუბრისას აცხადებს, რომ მზად არის, საქართველოს ხელისუფლების წარმომადგენლებთან ერთად გამოთვალოს რეალური ინფლაციის ტემპი და ამ ციფრზე დაყრდნობით დაასაბუთოს, რომ ქვეყანაში არა თუ სწრაფი ეკონომიკური ზრდაა, არამედ რეალურად ადგილი აქვს ეკონომიკის ვარდნას.
”იმდენად დიდია ბიუჯეტის ხარჯები და ისეთი გაუმჭვირვალე, თუ რას ხმარდება ეს ფული, რომ არ შეიძლება, ამ ყველაფერს ეკონომიკური ზრდა ერქვას. ბოლო პერიოდში ბიუჯეტმა ”შავი სალაროს” ფუნქცია შეიძინა. არ შეიძლება, უაზროდ და ვიღაცის ხუშტურებზე დახარჯული ფული ეკონომიკის ზრდად მივიჩნიოთ”, - ამბობს ხუხაშვილი.
მისი თქმით, სავალუტო ფონდმა სწორი რეკომენდაცია მისცა ხელისუფლებას, თუმცა საერთაშორისო ორგანიზაციის დასკვნა ინფლაციის მოცულობასთან დაკავშირებით რეალურ მაჩვენებელზე გაცილებით ნაკლებია.
საქართველოში მოსახლეობის ძირითადი ნაწილი მხოლოდ რამდენიმე დასახელების პროდუქტს მოიხმარს, რომელთა ფასის მატებაც ბევრად აღემატება 14 პროცენტს. სავალუტო ფონდმა ყველა პროდუქციის ფასების მატებიდან გამოთვალა ინფლაციის ტემპი, მაგრამ მოსახლეობის უმრავლესობა ნაკლებად არის საიუველირო საქონლის მუდმივი მომხმარებელი და ყოველდღიურად არც ძვირადღირებულ ტელევიზორს ყიდულობს, რომელთა ფასები მნიშვნელოვნად არ გაზრდილა.
სამაგიეროდ სტატისტიკის დეპარტამენტის მონაცემებით, სამომხმარებლო ფასების ინდექსმა ივლისში წინა თვესთან შედარებით 100,8 პროცენტი შეადგინა. დეპარტამენტის მონაცემებით, სამომხმარებლო ფასების მნიშვნელოვანი ზრდა დაფიქსირდა მწვანილზე 111%-ით, ხმელ ლობიოზე - 14,2 %-ით, პომიდორზე - 6,6%-ით, კარტოფილზე - 6%-ით, ხახვზე - 6,1%-ით, კიტრზე - 2,7%-ით, ყველზე - 7,1%-ით.
ამასთან, ფასები ალკოჰოლურ სასმელებსა და თამბაქოს ნაწარმზე 0,4%-ით გაიზარდა. იმპორტული ლუდი 1,5 პროცენტით გაძვირდა, კონიაკი - 1,8%-ით, ადგილობრივი ლუდი - 4,3%-ით, ადგილობრივი უფილტრო სიგარეტი - 2,5 %-ით.
რაც შეეხება მომსახურების სფეროს, სტატისტიკის დეპარტამენტის ინფორმაციით, 2006 წლის ივლისში წინა თვესთან შედარებით სამშობიარო მომსახურება 30,9 პროცენტით გაძვირდა, ხოლო შორი მიმოსვლის მატარებლის ფასები 15,6 პროცენტით არის გაძვირებული.
ბოლო პერიოდში საწვავის ფასების ზრდა დაფიქსირდა, მაშინ, როცა რუსეთში გასულ კვირას ბენზინის ფასების შემცირდა. რამდენიმე დღის წინ ნიუ იორკის სასაქონლო ბირჟაზე ასევე დაეცა ნავთობის ფასი, თუმცა საქართველოში ნავთობპროდუქტების ფასზე ეს არ ასახულა. როგორც გია ხუხაშვილი ამბობს, რუსეთი ნავთობის მომპოვებელი ქვეყანაა და ფასის დადგენაში ხშირად სახელმწიფოც ერევა. ამიტომ საქართველოს თავისუფალი ბაზარი მხოლოდ შემოტანილ საწვავსა და თავისუფალ კონკურენციაზეა დამოკიდებული. ნიუ იორკის ბირჟაზე ბენზინის ფასის რამდენიმე დოლარიანი გაიაფება კი საქართველოზე გავლენას ვერ მოახდენს.
ასე რომ, სანამ ნიუ იორკის ბირჟაზე ნავთობის ფასი ისე დავარდება, რომ რაიმე საქართველომაც იხეიროს, მანამდე სავალუტო ფონდის დასკვნას უნდა დავჯერდეთ. ფონდის მისიამ ყველას გასაგონად თქვა, საქართველოში ინფლაციის ტემპი შეიძლება უმართავი გახდესო. ვნახოთ, ლარი გაკუპონდება თუ ხელისუფლება რეკომენდაციებს გაითვალისწინებს და ეკონომიკურ კატასტროფას როგორმე თავიდან აიცილებს.
"ახალი ვერსია" 21.08.06
|
მსოფლიო ბანკის ინფორმაცია
