ქართული ხინკლის ბრენდი NAMU, რომელიც ამერიკის ბაზარზე ერთი წელია წარმატებით ოპერირებს, 2026 წლის მეორე ნახევრიდან აშშ-ის ნაციონალურ სუპერმარკეტების ქსელებში შევა.
როგორც კომპანიის თანადამფუძნებელი, ლევან კახაძე BM.GE-სთან ამბობს, აშშ-ს ბაზარზე ქართულ ხინკალზე მოთხოვნამ მოლოდინს მნიშვნელოვნად გადააჭარბა და ბრენდი აქტიურად ემზადება ახალი ეტაპისთვის.
„რიცხვები კონფიდენციალურია, თუმცა ჩვენ პროდუქტზე მაღალი ინტერესია. ამის გამო, მოგვიწია დამატებითი ლოგისტიკური ქსელების შექმნა, როგორც აღმოსავლეთ, ისე დასავლეთ სანაპიროზე. ჩვენი მიზანია, 2026 წლიდან ხინკალი ისეთ ქსელებში შევიდეს, როგორიცაა Kroger, Walmart, Target და Publix.
NDA-ზე გვაქვს ხელი მოწერილი და შესაბამისად, დეტალებზე ვერ ვისაუბრებ, თუმცა სერიოზული სამუშაო პროცესი ამ მიმართულებით უკვე დაწყებულია, რომ ნაციონალურ მარკეტებში შევიდეთ. ვინაიდან, ამერიკის ქსელში დღეს ხინკალი არსად არ დევს“, - თქვა მან.
NAMU რამდენიმე ასეული ათასი დოლარის ინვესტიციით შეიქმნა და ქართული ნახევარფაბრიკატების მწარმოებელ კომპანიასთან „ქართველი“ თანამშრომლობს, რომელიც ამერიკის ბაზარზე უკვე ხუთი წელია ოპერირებს და 50 შტატში ხინკლისა და ხაჭაპურის დისტრიბუციას უზრუნველყოფს.
ბრენდის თანადამფუძნებელია ასევე UFC-ის ქართველი ჩემპიონი მერაბ დვალიშვილი, რომელიც პროექტის პოპულარიზაციაში აქტიურადაა ჩართული.
„მერაბი ჩვენი ოფიციალური პარტნიორია და ახლა ძირითადი აქცენტი სწორედ იმაზე გვაქვს, რომ ხინკალი უფრო ფართო - არა მხოლოდ ქართველ, არამედ ამერიკელ მომხმარებლებსაც გავაცნოთ“, – ამბობს ლევან კასრაძე.
მისივე ინფორმაციით, NAMU ამჟამად ელექტრონული კომერციის მოდელით მუშაობს. მომხმარებლებს შეუძლიათ ხინკლის შეკვეთა ონლაინ და პროდუქტი ორ-სამ დღეში მიეწოდებათ. თუმცა, როგორც კასრაძე განმარტავს, საცალო ვაჭრობის ქსელში შესვლა პროდუქტის ხელმისაწვდომობასა და ფასსაც გააუმჯობესებს. ამასთან, სანდოობასაც გაზრდის.
“ლოგისტიკა ამ ბიზნესში ძალიან ძვირი ჯდება, იმიტომ რომ სახლში მოტანითაა და როდესაც საცალო ვაჭრობის ქსელებში ვიქნებით, მაგალითად Target-ში ან Kroger-ში, ფასი მომხმარებლისთვის უფრო ხელმისაწვდომი იქნება”, - აცხადებს ბრენდის თანადამფუძნებელი.
ამჟამად, ოფიციალურ ვებგვერდზე, NAMU-ს 12-ცალიანი შეფუთვის ღირებულება $39.99-ია, მისი შეძენა კი EatNamu.com-ზეა შესაძლებელი.
რაც შეეხება გუნდის მოცულობას, NAMU-ს გუნდში ამჟამად 15-მდე ადამიანი მუშაობს. კომპანიამ უკვე დაიწყო ახალი პროდუქტების განვითარება – ხაჭაპური, სოკოს ხინკალი და მხოლოდ საქონლის ხორცის ხინკალი ასორტიმენტს მალე დაემატება.
https://bm.ge/news/faqtobrivad-teqstilis-da...mpania-unistili
Мелочь, но приятно XCIII, რეფერენდუმი რეგიონებს!, უკრაინის არმიის რუსული ქვედანაყოფები გააქტიურდნენ
