"ლელო "
# 70 (12 749)
ხუთშაბათი, 26 მარტი, 2009 წელი
ელიტრაუნდით აღარ დავკმაყოფილდებით
მერაბ მამულაშვილი
საქართველოს ფუტზალის ნაკრებმა ელიტრაუნდში ითამაშა. ეს დიდი მიღწევაა. მიუხედავად იმისა, რომ ფუტზალის მონათესავე მინიფეხბურთი ჩვენში ძლიერ პოპულარულია, ჯერჯერობით, ეს სახეობა მაინც ვერ ვითარდება. არა თუ ფუტზალის, დიდი ფეხბურთისთვისაც არ არსებობს სახსრები, პირობები და ის ხელშეწყობა, რომლის გარეშეც წინსვლაზე ფიქრი წარმოუდგენელია...
ასეა თუ ისე, ნაკრებში ავთანდილ ასათიანის დანიშვნამ საქმის ვითარება რადიკალურად შეცვალა, გუნდი უცებ მოფერიანდა და ელიტრაუნდშიც გავიდა, დანარჩენიც იცით - იტალიის, ბელარუსისა და ლიტვის კომპანიაში საქართველოს მხოლოდ მასპინძელი (ლიტვა) დაამარცხა და გათამაშებას გამოეთიშა. ამის მიუხედავად, ნაკრების გამოსვლა მაინც წარმატებულად შეიძლება შეფასდეს, რა თქმა უნდა, წინა წლების შედეგებთან შედარებით.
ავთანდილ ასათიანი ჩვენს კითხვებს პასუხობს...
- ბატონო ავთანდილ, გქონდათ უკეთესი შედეგის იმედი?
- გვქონდა და სამივე თამაშის შინაარსიდან გამომდინარე, ამას რეალურადაც ვიმსახურებდით. აქვე, მსურს, აღვნიშნო ყველაზე მთავარი ფაქტორი, რამაც განაპირობა ფუტზალის ნაკრების პროგრესი. უჩა უგულავას ძალისხმევით მაქსიმალურად კარგი პირობები გვქონდა მოსამზადებლად და გაცილებით მეტი საკონტროლო შეხვედრაც ჩავატარეთ, არა ერთ ტურნირში მივიღეთ მონაწილეობა... მერე გენმდივნად რევაზ არველაძე დაინიშნა და ისიც გვერდში დაგვიდგა. ეს არის ძალზე მნიშვნელოვანი ფაქტორი, რადგან სწორედაც რომ პრაქტიკამ და საერთაშორისო გამოცდილებამ გააძლიერა, შეათამაშა და თავდაჯერებული გახადა ჩვენი გუნდი. წინსვლა სწორედ ამის შედეგია. ვფიქრობ, ამ ყველაფრის შენარჩუნებით საქართველოს ფუტზალის ნაკრები არათუ კიდევ გავა ელიტრაუნდში, არამედ ევროპის ჩემპიონატის ფინალურ ეტაპზეც გააღწევს და თან, არა - ერთხელ. სხვაგვარად, პროგრესი შეჩერდება და კვლავ უკან-უკან წავალთ. მომავალში რაც შეიძლება მეტი შეხვედრა უნდა დავგეგმოთ და დარწმუნებული ვარ, ჩვენს გულშემატკივარს ამ სახეობით დღევანდელზე მეტად დავაინტერესებთ და გავახარებთ. კიდევ ერთხელ ვამბობ - საქართველოს ფუტზალის ნაკრებს დიდი შესაძლებლობები აქვს და იმედია, პირობები მომავალშიც გვექნება.
- როგორც ცნობილია, ლიტვაში ორი ლიდერი - დევდარიანი და თორთლაძე, სავიზო პრობლემების გამო დაგაკლდათ. ასეთი მოუგვარებელი რატომ გახდა ეს საკითხი?
- ვიზის აღება არ იყო პრობლემა. თბილისში, ლიტვის საელჩოში მოითხოვეს, რომ ორივე მათგანი უნდა გამოცხადებულიყო და ასეთ შემთხვევაში ვიზას ხელზე გასცემდნენ. ამ დროს კი დევდარიანი და თორთლაძე კვიპროსის ჩემპიონატის პლეიოფებში ძალზე პრინციპულ შეხვედრებში იღებდნენ მონაწილეობას და კლუბებმა არ გამოუშვეს. ტრაბახში არ ჩამომართვათ და, ისინი ლიტვაში რომ ყოფილიყვნენ, ევროპის ჩემპიონატის ფინალურ ეტაპზე აუცილებლად გავიდოდით. ფინალის საგზურს ხომ ორი გუნდი იღებდა, ჩვენ კი ბოლო ტურში ბელარუსთან 0:2 წავაგეთ, არადა, დარწმუნებული ვარ, ამ მატჩის მოგება შეგვეძლო. ჩვენ შორის გამარჯვებული ფინალში გადიოდა...
- მაგრამ ფაქტია, რომ ბელარუსმა გაჯობათ...
- გვაჯობა, მაგრამ ძალიან მძიმე ბრძოლის შემდეგ. არ მიყვარს წაგების მსაჯზე გადაბრალება... რა თქმა უნდა, ჯერ ჩვენ არ ვართ ბელარუსის დონის გუნდი, ბოლოს და ბოლოს, მსოფლიო რეიტინგში ისინი მე-14 ადგილზე არიან, ჩვენ კი ჯერ მხოლოდ 49-ეზე. თუმცა მსაჯმა ძალიან ცუდად ჩაატარა შეხვედრა. 1:0-ზე ძელს სამჯერ მოვარტყით ბურთი. მატჩის შემდეგ ბელარუსების მწვრთნელმა თავად აღიარა, რომ ძალიან გაუმართლათ... მაგრამ ჩვენ შედეგს უკვე მივაღწიეთ - მომდევნო შესარჩევ ციკლში ასპარეზობას პირდაპირ ელიტრაუნდიდან დავიწყებთ, ყოველგვარი საკვალიფიკაციო ეტაპის გარეშე. მიხარია, რომ ბიჭებმა დამარცხებულის ფსიქოლოგია დაძლიეს და მიხვდნენ, რომ გაცილებით მეტი შეუძლიათ. ამ ცვლილებას ჯერ კიდევ მალტიდან ვამჩნევდი, როცა საკვალიფიკაციო ჯგუფში გავიმარჯვეთ. რა დასამალია და, ელიტრაუნდში მხოლოდ ლიტვასთან მოგებაზე ვფიქრობდით, მაგრამ ბელარუსთან თამაშის დროს მეტის სურვილი გაგვიჩნდა. ხომ იცით, მადა ჭამაში მოდისო, ნათქვამია... აქვე ერთი ფაქტიც უნდა გითხრათ, ტურნირზე დამსწრე უეფას უნგრელმა დელეგატმა რომ აღნიშნა - თავიდან მეგონა, რომ ქართველებს ძალიან სუსტი გუნდი ჰყავდათ, მაგრამ ლიტვასთან და ბელარუსთან შეხვედრის შემდეგ დავრწმუნდი, რომ ძალიან ძლიერი ნაკრების ჩამოყალიბება შეგიძლიათო... სხვათა შორის, ლიტვაში არა მხოლოდ დევდარიანი და თორთლაძე, არამედ ირაკლი შელეგიაც დაგვაკლდა - პირველივე შეხვედრის მე-3 წუთზე მძიმე ტრავმა მიიღო და ვეღარ დაგვეხმარა. არც ერთი ფეხბურთელის გამოყოფა არ მსურს, ყველა ერთნაირად გულითა და მთელი მონდომებით იბრძოდა. სხვათა შორის, ბელარუსის ჩემპიონს ჩვენი მეკარე ლევან ზაქაიძე ისე მოეწონა, მასთან პირდაპირ კონტრაქტის გაფორმება გადაწყვიტა. ლევანს იტალიასთან წაგებულ შეხვედრაში არ უთამაშია. ტურნირის ბოლოს კი ლიტვის ვიცე-ჩემპიონის პრეზიდენტი მოვიდა და რამდენიმე მოთამაშის წაყვანაზე მესაუბრა...
მიმაგრებული სურათი