ესეც იყოს, სამხედრო ექსპერტი, ბრიგ გენერალის ამირან სალუქვაძის მდგომარეობის შეფასება/მიმოხილვა.
https://www.facebook.com/profile.php?id=100002302390101უკრაინა-რუსეთის დაძაბულობის შესახებ
⭕ მოცემულობა
▪️ანექსირებული ყირიმი;
▪️ორად გახლეჩილ დონბასი, ცხინვალ-აფხაზური სცენარით (ადგილობრივი ფორმირებების ჩამოყალიბება, პასპორტიზაცია და ა.შ.)
⭕ საერთაშორისო ფონი, ფაქტები, ფაქტორები, რომლებიც ერთი მხრივ გავლენას ახდენენ რუსეთ-უკრაინის ურთიერთობებზე, მეორე მხრივ ახასიათებენ რუსეთის საგარეო პოლიტიკისვტენდენციებს.
▪️მინსკი-2-ს ჩიხში შესვლა (ბევრჯერ დავწერე, წამგებიანი შეთანხმებაა უკრაინისთვის);
▪️რუსეთის მხრიდან უკრაინაზე ჰიბრიდული ზეწოლა წლების განმავლობაში;
▪️აშშ-ში ადმინისტრაციის, შესაბამისად საგარეო პოლიტიკის ცვლილება;
▪️ნატო-რუსეთის ურთიერთობების გართულება;
▪️შეიარაღების კონტროლის და საერთაშორისო უსაფრთხოების არქიტექტურის ფუნდამენტური შეთანხმებების მოშლა;
▪️ბოლო წლებში რუსეთის გააქტიურება კავკასიის და ახლო აღმოსავლეთის მიმართულებით;
▪️ცვლილებები კავკასიაში (ყარაბაღის ომის შემდგომი რეალობა, ინიციატივა 3+3 და სხვა);
▪️თურქეთის ფაქტორის გაძლიერება ახლო აღმოსავლეთში, კავკასიაში, უკრაინასა და შავ ზღვაზე. ახალი ინიციატივა, ბოსფორის საპირწონედ სტამბოლის სრუტის გაჭრის შესახებ;
▪️ჩინეთის გააქტიურება აბრეშუმის გზის მარშრუტზე;
▪️"ჩრდილოეთ ნაკადი-2"-ს ირგვლივ განვითარებული პროცესები;
▪️პანდემიის გამო გამოწვეული უმძიმესი მსოფლიო ეკონომიკური კრიზისი, რაც მ.შ. მძიმედ აისახა რუსეთის ეკონომიკასა და მოსახლეობის სოციალურ მდგომარეობაზე;
▪️სხვა ფაქტორები.
⭕ რუსეთ-უკრაინის დაძაბულობის ინდიკატორები
ა) ძალისმიერი სცენარის:
▪️ გამძაფრებული რიტორიკა ოფიციალურ პირების და მედიის მხრიდან;
▪️სამხედრო ძალების და საშუალებების კონცენტრირება ორთავე მხრიდან, საზღვრისპირა, ფრონტისპირა რაიონებში;
▪️რუსეთ-ბელარუსის მასშტაბური სამხედრო სწავლებები, რუსეთის შეიარაღებული ძალების საბრძოლო მზადყოფნის შემოწმება;
▪️საინფორმაციო ომის გაძლიერება, საზოგადოებრივი აზრის მომზადება, განწყობების შექმნა და სხვა.
▪️დონბასში 4 წლის ბავშვის დაღუპვის თემის წამოწევა. რფ ადანაშაულებს უკრაინას. უკრაინა გამოძიებას ითხოვს.
▪️რუსეთის განცხადებები, რომ დაიცავს რუსეთის მოქალაქეებს უკრაინაში (ცნობილი "არგუმენტია").
▪️კიევი უარს ამბობს მინსკში ჩასვლაზე ბელარუსის ბოლოდროინდელი განცხადებების გამო.
ბ) მშვიდობიანი სცენარის
▪️ჯერ-ჯერობით ნარჩუნდება ნორმანდიული ოთხეულის ანუ სამშვიდობო ფორმატი, მიუხედავად მინსკი-2-ის ჩავარდნისა.
▪️შედგა რფ, გერმანია და საფრანგეთის ლიდერების სატელეფონო მოლაპარაკებები. წინასაომარი გაფრთხილებები ჯერ-ჯერობით, არ იგრძნობა, გარდა ლავროვის დასავლეთისადმი მოწოდებისა, დაამშვიდონ უკრაინა, სანამ გვიანი არაა.
▪️ინდოეთში ლავროვი-კერის შეხვედრა. დეტალები არ საჯაროვდება, თუმცა თავად ფაქტი იძლევა ვარაუდის საშუალებას, რომ განიხილეს უკრაინის თემაც. შეხვედრის შემდეგ დუღილის ტემპერატურის მატება არ შეიმჩნევა.
▪️22 აპრილს ჯო ბაიდენი კლიმატის სამიტს ჩაატარებს, რომელზეც მან პუტინიც მიიწვია. ვვარაუდობ, რომ მათ შეხვედრამდე დაძაბულობა უფრო აქტიურ ფაზაში არ გადავა.
▪️ამ დღეებში შედგება მერკელის, მაკრონისა და ზელენსკის მოლაპარაკებები.
▪️რუსეთი ალბათ ათვითცნობიერებს, რომ უკრაინის ჯარი, 2014 წელთან შედარებით, წესით, უკეთ უნდა იყოს მომზადებული, ხოლო საომარი მოქმედებები გაცილებით მასშტაბური იქნება, ვიდრე 2014-ში. ასევე, ომის წარმოება მოუწევთ იმ მოქალაქეებით დასახლებულ სივრცეში, რომელთა დაცვას აგრესიის მიზეზად გამოიყენებს, რაც მათ შორის მსხვერპლს გამოიწვევს. ან მოუწევთ მილიონობით რუსი ეროვნების ან რუსეთის პასპორტის მქონე პირის დევნილად მიღება.
▪️სხვა ფაქტორები.
⭕ ანალიზი
ანალიზის შესახებ ტექსტის ბოლოს, შენიშვნაში წაიკითხეთ.
⭕ შეფასება
ყოველივე ზემოთ ჩამოთვლილის საფუძველზე შეიძლება ვივარაუდოთ, რომ:
▪️სულ მცირე, ბაიდენ-პუტინის შეხვედრამდე სამხედრო მოქმედებების დაწყებას არ უნდა ველოდოთ. ბევრი გაირკვევა აღნიშნული შეხვედრის შემდეგ გაკეთებული განცხადებებიდან.
▪️არსებობს როგორც ომის დაწყების, ასევე მისი შემაკავებელი გარემოებები.
▪️ამავე დროს, რუსეთის წამყვან მედია საშუალებებში იკვეთება ანტიუკრაინული ისტერიის გაძლიერება და მოსახლეობაში საომარი განწყობების შექმნა, რაც, ერთი მხრივ, შესაძლოა, უკრაინაზე ფსიქოლოგიური ზეწოლის მიზნით კეთდება, მეორე მხრივ იყოს ომისათვის სამზადისი.
▪️ფართომასშტაბიანი საბრძოლო მოქმედებების დაწყების შემთხვევაში, ორთავე მხარეს სერიოზული ზიანის მოლოდინი უნდა ჰქონდეს. ის გასცდება დონბასის ფარგლებს და ესეც, სანამ შესაძლებელი იქნება, წესით, შემაკავებელ როლს შეასრულებს.
▪️კრემლის ცხელ ლაბირინთებში არ მგონია მთელი უკრაინის დაპყრობის ჩანაფიქრები იწერებოდეს. ამავე დროს, საომარი მოქმედებების პროვოცირებისგან სამხრეთ აღმოსავლეთ უკრაინაზე, აზოვის ზღვის ჩათვლით, სრული კონტროლის დამყარების მიზნით, უარს არ იტყვიან.
▪️სეპარატისტ პუშილინის განცხადება, ომის დაწყების შემთხვევაში, კიევამდე ჩავალთო, რუსეთის არა უბრალოდ მხარდაჭერის, არამედ რუსეთის ჯარის მონაწილეობის გარეშე, სასაცილოა.
▪️ამავე დროს რფ გააგრძელებს სეპარატისტული განწყობების შექმნას/გაძლიერებას სხვა რეგიონებშიც.
▪️ჯერ-ჯერობით, იმის მიუხედავად, რომ ვითარება ფეთქებადსაშიშია, ომის განახლების მოლოდინი არ მაქვს. საკმარისი არც რუსეთის მხრიდან ძალთა კონცენტრირება, არც კრემლისთვის ხელსაყრელი საინფორმაციო და საერთაშორისო ფონია შექმნილი, ომის დასაწყებად.
▪️დაძაბულობის ესკალაცია გაგრძელდება. აფეთქდება თუ არა, დღეს ვერავინ იტყვის, რადგან საიდუმლო საბუთების (გეგმების) სეიფებთან წვდომა არავის აქვს, ვერც პირველი პირების თავებში ჩავიხედავთ.
▪️ომი დაიწყება თუ არ, დამოკიდებულია არა მხოლოდ დღევანდელ გარემოებებზე, არამედ შემდგომ პროცესებზეც. ასევე დამოკიდებულია სამხედრი შტაბების გათვლებზე. გარედან, შესაძლოა, ერთი სურათი ჩანდეს, ისინი სხვაგვარად ხედავდნენ.
▪️ისიც ფაქტია, რომ რუსეთი უკრაინას მხოლოდ ომის გზას უტოვებს.
▪️ყარაბაღის კონფლიქტს თუ გავიხსენებთ, ბოლო წლების დაძაბულობების დროს, ბევრჯერ დავწერე, რომ არ მქონდა ომის მოლოდინი, იმ კონკრეტულ მომენტში და მართალიც აღვმოჩნდი. შემდეგ, გავიდა თვეები და მოულოდნელად დაიწყო. იმავე დღეს დავწერე, რომ ეს აღარ იყო წინანდელი შეტაკებები და ფართომასშტაბიან ომს ჰგავდა. შესაძლოა დონბასშიც ასე მოხდეს.
⭕ კიდევ ერთი დეტალი. ცივი ომის დროსაც კი, საბჭოთა კავშირი ისე არ იქცეოდა, როგორც რუსეთი დღეს. როცა საზღვრისპირა რაიონებში სამხედრო სწავლებები ტრადებოდა, იმისათვის რომ მეზობელ სახელმწიფოს მანევრები მის წინააღმდეგ მიმართულ საფრთხედ არ აღექვა, წინასწარ ატყობინებდა დაგეგმილი ღონისძიებების შესახებ, ასევე იწვრვდნენ ხოლმე სამხედრო ატაშეებს. დღეს, როცა დასავლეთი პრეტენზიას გამოთქვამს, რომ შეშფოთებულები არიან მასშტაბური მანევრებით უკრაინის და ევროპის საზღვრებთან, კრემლი პასუხობს, რომ მის ტერიტორიაზე რას გააკეთებენ, მათი საქმეა. ეს ისე...
_______
შენიშვნა:
ანალიზი არ დავწერე, რადგან საკმაოდ ვრცელი გამოვა. ანალიზი ნიშნავს, რომ ზემოთ ჩამოთვლილი, ასევე უამრავი სხვა ფაქტორი, მათი კავშირები ვრცლად აღიწეროს. ამ პროცესში ხდება ტენდენციების, მხარეთა შესაძლო მოქმედებების გააზრება.
ამ პოსტში ნიმუში დავწერე, როგორ კეთდება ანალიზი და რას ეყრდნობა ხოლმე . გამოადგებათ სტუდენტებს, ახალგაზრდა სპეციალისტებს.
This post has been edited by David_Gale on 8 Apr 2021, 17:51 
· 
ა.შ.შ-ს ევროპულმა სარდლობამ განგაშის დონე აწია
