ქოოფე ართი ღალიერი კოჩი, ნამუსით ნოღვე სუმი
საკიში ეფშა ფარა. თის ყ'უნდუ სუმი სქუა; ათე სუმი
სქუალეფიშე ქაღარდი ნამუთინს ვა უჩქდ. ართიშახ მუმაქ აკოკათუ
სქუალეფი დო უწუ თინეფს: სქუალეფი, მა ღალიერი კოჩი
ვორექ დო შხვათ თენერო მიჯინე; ჩქიმო ონჯღორელე,
ართის ვარა ვა გიჩქდას ჭარუა დო კითხირინი; ართი დო
ართიქ გინოდვი დუდი დო ქიდიგურე ქაღარდი. მუჭოთი ქიგეგონეს
თენა სქუალენქნი, სუმიხოლოქ მინდომეს ოგურაფუშა ულა. მარა
მუმაქ ვაგუტუ სუმიხოლო სქუა ართო. თიმიწკმა უნჩაში სქუაქ
გეიწუღუ მუმას ართი საკი ფარა დო მიდართ ოგურაფუშა. შარას
ქაუხვად პაპაქ. გამარჯება, სქუა, სქანი! სოშარე მეურქუნი?
კითხ პაპაქ. "მა მეურქ ქაღარდიში ოგურაფუშა დო მით
დ(უ)მოგურუანსნი, ათე საკი ფარას ქუვაჩუქენქ", უწუ ღალიერიში
სქუაქ. პაპაქ უწუ: "მა ქომუჩი თე ფარეფი დო ქაღარდის მა
ქიდგოგურუანქ". ქიდაყ'უნ მეშარექ პაპას, ქიმეჩუ ფარეფი დო
მიდაყ'უნუ მუში თიშა. პაპაქ ქიგეუჭყ მეშარეს ქაღარდიში
გურაფა, მარა ქააჩინ მუჭოთი ის ქაღარდი ვადაგურედნი დო
ჭიჭე ხანიში უკული მუში თიშა გუუტუ. უკულინეშე მიდართ
ოგურაფუშა ოშქარი ჯიმაქ. შარას ქაუხვად კინი თი პაპაქ.
"გამარჯება, სოიშახ სქანი შარა?" კითხჷ პაპაქ. -- "მა მოკო
ქაღარდიში გურაფა დო მემიღუ ართი საკი ფარა, მით
ქდმოგურუანსნი, ათე ფარენს ქიმებჩანქ", უწუ მეშარექ. -- "ქომუჩი მა
ფარეფი, მოლა ჩქიმიწკმა დო ქაღარდის მა ქდგოგურუანქ",
უწუ პაპაქ დო მიდეჯუმუ ყ'უდეშა. პაპაქ ქიგეუჭყუ გურაფა, ოგურუ
ართი ხანს, მარა ვართი თე ჯიმას დააგურუ ქაღარდიქ.
ჭიჭე ხანიში უკული ფარა ქიდატებაფუ დო გუუტუ
ყ'უდეშა. დაბოლოს უკულაში ჯიმაქ გეგიწუღუ მუმას მასუმა საკი
ფარა, "ეგებ ჩქიმი ბედი ორდას ჭარუა დო კითხირიში დოგურაფა", თქუუ
დო გინილუ ყ'უდეშე. შარას თესით ქაუხვად კინ თი
პაპაქ. პაპაქ ქოძირ საკამი კოჩინი, ახიოლ, "ფარამი
ოკო ორდას თე საკი", იფირქ. საკიში ხიოლით პაპას
გამარჯებაში რაგადიქ ქაშაჭყორდ დო კითხ მეშარეს: "მუორე საკით
მეგიღუნი?" -- "ფარა"! უწუ მეშარექ. "ფარა! მიშა?" "თიშა, მით
ქაღარდის დმოგურუანსნი", უწუ მეშარექ. "ძალამი ჯგირი, ქომუჩი
ფარა მა დო ქაღარდიში გურაფა ჩქიმი საქმერე", უწუ პაპაქ.
მეშარექ დუუჯერ, ქიმეჩ ფარა დო ჟირიხოლოქ მიდართეს პაპაში
თიშა. პაპაქ ქდაგურუ ეს ქაღარდი დო ქიდეკინ დიაკონო. ართიშახ
ნოწირენს პაპაქ მოლააშქვუ ოხვამეშე დიაკონი ყ'უდეშა
დო უწუ: "დაჩხრი აკომირზი ფერი, ნამდა თაქი მატბანდასნი".
დიაკონქ მოლართ ყ'უდეშა, დააჭყ ფირქი მუნერო ოკო ორზკო თიქ
თინერი დაჩხირი, ნამდა პაპას ოხვამეს ქუმუტუბუკონი. მოლართ დო
პაპას მუთი ნადგმობა ქუუღუდუნი, არძას ართო დაჩხრი ქმუუნტუ.
ოხვამე შორს ვარდ. მიოჯინ პაპაქნი, ქოძირ მუში მახორობას
ონტუდუნი. პაპაქ რულაიათ ქუმორთ ყუდეშა დო იკითხ მუნერო
გორჩქინდ დაჩხრქუნი. დიაკონქ უწუ: მონძღვარი, გურს მუშენირე
მიყ'უნანთნი, თქვა მიწით დაჩხრი ოკომირზი ფერი, ნამდა
ოხვამეს მატბანდასიე. მა გაგიგონით დო დაჩხრი აკოგირზით".
პაპაქ გეყ'ალ, გამათხოზ დიაკონს ოყ'ვილარო, მარა დიაკონქ
ინტ. ჭიჭე ხანქ მუკილნი პაპაქ დო დიაკონქ კინი
შერიგეს დო ორდეს ართო. ართიშახ დიაკონს უწუ პაპაქ:
"მიდარალ'ი ხოჯეფი ღალშა დო წყარი ქოჩი, წოხოლენი კუჩხეფი
ვადიშოლანი თეში". დიაკონქ მიდარაუ ხოჯეფი ღალშა, წოხოლენი
კუჩხეფი ქათააკვათუ, ხოჯეფს დუდი წყარიშა ქიდნუჩანუ დო დუუძახ
პაპას: "ხოჯეფქ წყარი ვაშვეს დო ქმორთი". პაპას ექ გუუკვირდ
დო რულა-რულათ ქიმერთ ხოჯეფიშა. მიოჯინნი ქოძირ
ხოჯეფი კუჩხეფი კვათილო ღალს ქიდნოძდეს. მურთ
პაპას გურქ, მარა მუოკო ქიმინკო გინოჭყვიდ პაპაქ დიაკონიში
ნოფულო ყ'ვილუა დო დუუჭყ დარაჯუა. დიაკონქ ქეშიტყუ, მუჭოთი
პაპა თის უდარაჯნი; მოლართ დო მუში ონჯირუს თხოლოთ
ეფშა გუდა ქიგილადვუ; მუქ გუდას უკახალე ქუმკააფულუ.
პაპაქ შქასერს ქიმერთ დიაკონიში ოყ'ვილშა. პაპას
გუდა დიაკონი უჩქდ დო მუთ შეულებუდუნი არგუნი მირქუ
დო გუდას ქიგიაშქუ. გუდაქ გოხორცქ დო თხოლოქ
ირიფელამო მოწიკუ პაპა. დიაკონს ძიცაქ ვამაკენინ;
გაგიმირულუ დო ინტ მუში თიშა.
· 
EUROPE-BET.COM #3 , ევროპაბეთი
