რამდენიმე რჩევა, რაც დამწყებებისთვის შემიძლია დავწერო:
ამ მომენტისთვის სარჩილავების ძალიან დიდი არჩევანია ბაზარზე, თუმცა რადიოელექტრონიკისთვის (განსაკუთრებით პლატებთან სამუშაოდ) ყველა მათგანი არ არის გამოსადეგი. პირველ რიგში არ გირჩევთ კლასიკური სპირალიანი სარჩილავების გამოყენებას (თუ სხვა გზა არ არის), ისინი მორალურად უკვე მოძველებული და საკმაოდ არაკომფორტულია თანამედროვე ნიმუშებთან შედარებით.
თანამედროვე სარჩილავები ჩვეულებრივ კერამიკული გამათბობელი ელემენტებით არის აღჭურვილი, თუმცა მხოლოდ ეს საკმარისი არ არის. კრიტერიუმები რასაც რადიოელექტრონიკაში გამოსადეგი სარჩილავი უნდა აკმაყოფილებდეს:
1. უნდა გააჩნდეს ტემპერატურის რეგულატორი (არსებობს უკუკავშირით PID რეგულატორიანი და უბრალო, ცალმხრივი რეგულირებით)
2. უნდა ეცვლებოდეს თავაკები/კარტრიჯები (არსებობს რამდენიმე სისტემა, ზომები ყველა მათგანისთვის სტანდარტიზებულია)
3. უნდა აკმაყოფილებდეს ხარისხის მინიმალურ მოთხოვნას მაინც (არ ღირს ზედმეტად იაფიანი ნიმუშის აღება).
მაგალითად, დღეისთვის ფართოდ გავრცელებული რამდენიმე ნიმუში:
1. გამოსაცვლელთავაკებიანი, ტემპერატურის ცალმხრივი ანალოგური რეგულატორით. ზოგი მეტნაკლებად დამაკმაყოფილებლად მუშაობს, ზოგი ძალიან ცუდად. მაგალითად ამ კონკრეტულ ნიმუშზე ვერ ვიტყვი რომ ცუდია, მაგრამ არც ძალიან კარგია, ასე ვთქვათ ყველაზე უფრო კომპრომისული ვარიანტია რითიც მუშაობა შესაძლებელია:
მაგრამ არის ვიზუალურად მსგავსი მოდელები, რომლებიც ამერიკული სტანდარტის ძაბვაზეა გათვლილი (110ვ), მაგრამ რატომღაც ევრო სტანდარტის ჩანგალი აქვს დაყენებული და ჩვენს ბაზრებზე ხვდება. ასეთი სარჩილავით შეუძლებელია მუშაობა, რადგან ტემპერატურა ნორმალურად ვერ რეგულირდება. ან ძალიან ცივია ან პოტენციომეტრის ოდანვი გადაწევით დაუშვებელ ტემპერატურებზე ადის და ლამის დნება კორპუსი.
მთლიანობაში, მსგავსი უბრალო ანალოგური ტემპერატურის რეგულატორები არც ევრო სტანდარტის (220ვ) სარჩილავებზე მუშაობს მთლად დამაკმაყოფილებლად. ამ შემთხვევაშიც, სახელურის მცირე მოტრიალებით საკმაოდ ფართო საზღვრებში ცვლის ტემპერატურას და საჭირო დონეზე დაყენება საკმაოდ საწვალებელია... გაქვს ვითომ რეგულატორი, მაგრამ ვერ იყენებ რეალურად )))
2. გამოსაცვლელთავაკებიანი, ტემპერატურის ცალმხრივი ციფრული რეგულატორით. ბევრი ასეთი მოდელია ბაზარზე. ბიუჯეტური ვარიანტებიდან ამ მოდელს გავუწევდი რეკომენდაციას:
ძალიან კარგად მუშაობს, თითო გრადუსით რეგულირდება ტემპერატურა და საკმაოდ მყარადაც უჭირავს მიუხედავად იმისა, რომ ცალმხრივი რეგულატორი აქვს. მთლიანობაში შევაფასებდი როგორც საკმაოდ კარგ ბიუჯეტურ (დაახლოებით 12 ლარის ეკვივალენტი ღირს ტაობაოზე) სარჩილავს.
3. სარჩილი სადგურები. ასევე ფართო არჩევანი გვაქვს ამ შემთხვევაშიც. საკმაოდ ბევრი სხვადასხვა სარჩილი სადგური მაქვს ნაცადი, დაწყებული წამყვანი ბრენდებიდან (მაგალითად Hakko), სხვადასხვა იაფიანი კლონებით დამთავრებული. გეტყვით, რომ არც თუ იშვიათად, კარგად გაკეთებული იაფიანი კლონები არაფრით ჩამოუვარდება ძვირადღირებულ ბრენდებს!... მაგალითად დღეს ძალიან პოპულარულია Hakko T-12 სერიის კონცეპტის კარტრიჯებზე აგებული სარჩილი სადგურები (ცალკე სარჩილავებიც არსებობს). ეს კონცეპტი წარმოადგენს გამოსაცვლელი კარტრიჯების სერიას, რომლებშიც ჩაშენებულია კერამიკული გამათბობელი და თერმოწყვილი უკუკავშირისთვის. ერთ-ერთი შედარებით იაფიანი კლონ-ვერსია, რომელსაც შემიძლია გავუწიო რეკომენდაცია არის Quecoo T12-956
ასეთი სახელურით (Quecoo T12-m8, სხვა სახელურებიც აქვს, მაგრამ ეს ყველაზე კარგია):
შევაფასებდი როგორც მაღალი კლასის ძალიან კარგ სარჩილ სადგურს. აქვს ორმხრივი ციფრული ტემპერატურის რეგულატორი PID კონტროლით, უამრავი ოფციები მენიუში და ათასნაირი კარტრიჯები... (მთლად ნოლიდან დამწყებებს არ გირჩევთ მის ყიდვას, დასაწყისისთვის აბსოლუტურად საკმარისია მე2-ე პუნქტის სარჩილავი ან რამე მსგავსი).
ერთი რაც სარჩილი სადგურების ყიდვისას უნდა გაითვალისწინოთ - აუცილებლად გადახედეთ რევიუებს, ზოგიერთ მოდელს ბაგები აქვს პროგრამულ უზრუნველყოფაში და არ მუშაობს ისე როგორც უნდა მუშაობდეს.
კიდევ ერთი რეკომენდაცია, რაც ეხება როგორც სარჩილავებს, ისე სარჩილ სადგურებს - არ ამუშაოთ მაღალ ტემპერატურებზე!... მოუფრთხილდით თავაკებს/კარტრიჯებს. მაქსიმუმ 280-300 გრადუსი (ზოგჯერ უფრო მაღალი ტემპერატურებიც გვჭირდება, მაგალითად SMD მიკროსქემების დარჩილვისას პლატაზე. ასეთ შემთხვევაში დასაშვებია ტემპერატურის აწევა, მაგრამ სულ რამდენიმე წამით... დიდხანს გადაბმით არ ამუშაოთ), თუ ასეთ ტემპერატურებზე კალა კარგად არ დნება, გადააგდეთ, ნაგავია ასეთი კალა.
მუშაობისას ხშირად არის საჭირო კარტრიჯის/თავაკის წმენდა, რისთვისაც სხვადასხვა საშუალებები არსებობს. საამისოდ სპეციალური რბილი ლითონის ბურბუშელას გავუწევ რეკომენდაციას. ასევე გამოიყენება სველი ღრუბელიც, მაგრამ არ გირჩევთ მის გამოყენებას, აფუჭებს წყალი თავაკებს/კარტრიჯებს. გამოყენების მერე მთლად ბოლომდე ნუ გააპრიალებთ, პირიქით, მოკალეთ და ისე შეინახეთ.
This post has been edited by RedShark on 19 Jul 2024, 19:54