samxara91
ეგ პოსტი წაშლი აქვს მგონი უკვე ეტყობა დავტრები აერია
zaza34 ეს სად მოქექე
გაჭირვებული ადამიანების ფოტოების გავრცელებასთან დაკავშირებული სკანდალის გაგრძელება
გუშინ სოციალურ ქსელში მთავრობის ადმინისტრაციის უფროსის მოადგილემ ნინა კობახიძემ შემდეგი შინაარსის პოსტი გამოაქვეყნა:
“ბევრჯერ შემხვდა ინფორმაცია სხვადასხვა ბავშვების ფოტოებით, რომ თითქოს სჭირდებათ დახმარება სამედიცინო მომსახურების მისაღებად. ამ გვერდზე მითითებული ყველა ინფორმაცია არის ტყუილი და ნომრები არასწორი… ვესაუბრეთ ამ ნომრების მეპატრონეებს და გაოგნებულები არიან, არანაირი დახმარება მათ არ ჭირდებათ. ინფორმაციას ამ გვერდის შესახებ გადავცემთ შინაგან საქმეთა სამინისტროს, რომელიც დარწმუნებული ვარ, იმოქმედებს ოპერატიულად.
P.S. საქართველოს მთავრობის სოციალური პოლიტიკის შედეგად არც ერთი ბავშვი არ რჩება სამედიცინო მომსახურების გარეშე. დავამატეთ სოლიდარობის ფონდიც, რომელიც უცხოეთში უზრუნველყოფს მკურნალობას ბავშვებისას. მინდა გთხოვოთ ყველას, ნებისმიერი ინფორმაცია, რომელიც გექნებათ, რომ ბავშვებს ჭირდებათ დახმარება, მიაწოდოთ მერიას, ჯანდაცვის უწყებას და სოლიდარობის ფონდს, ხოლო ასეთ თაღლითურ საიტებზე ინფორმაცია მიაწოდოთ შინაგან საქმეთა უწყებას.”
აქვე მითითებული იყო იმ ადამიანის ფეისბუქ-პროფაილი, ვისაც ეს პოსტი ეძღვნებოდა.“ბუსა მურკა ბუსუნა”, – ასე შეგიძლიათ მოძებნოთ ადამიანი, რომელსაც ბრალს თაღლითობაში სდებენ. ჩვენ რასაკვირველია, სოციალური ქსელის მეშვეობით დავეკონტაქტეთ ამ ადამიანს და ვთხოვეთ ამ თემასთან დაკავაშირებით კომენტარი გაეკეთებინა. ბატონი მამუკა ცოტა მოგვიანებით დაგვიკავშირდა და გაგვესაუბრა:
– მე გახლავართ მამუკა როხვაძე, ამჟამად ვარ ქუთაისში… გუშინწინ ღამით გვიანობამდე სწორედ იმ თამუნას ოჯახში ვიყავი, ვის დახამარებასაც “ფეისბუქის” საშუალებით საზოგადოებას ვთხოვ, ეს ფოტოებიც იმ ღამეს გადავუღე, ძალიან ცუდად იყო ბავშვი.
მე თვითონ დედა მყავს ავად, ჩვენი პრობლემის შესახებ ჟურნალისტებმა არაერთი სიუჟეტი გააკეთეს, ხალხი დამეხმარა და დედას ჯანმრთელობა შედარებით უკეთეს მდგომარეობაშია. რასაკვირველია, მე უდიდესი მადლობა გადავუხადე მათ, ვინც დამეხმარა და დავწერე, დედაჩემს დახმარება აღარ ესაჭიროება და ახლა სხვა გაჭირვებულ ადამიანებს დავეხმაროთ-მეთქი. ერთ-ერთი ასეთი გახლდათ დალილა აშვეთიას ოჯახი. დალილას დედა სიმსივნით დაავადებულია, ოჯახი თბილისში ვორონცოვის ქუჩაზე ცხოვრობს. თქვენ შეგიძლიათ ფეისბუქზე მოძებნოთ დალილა აშვეთია და ჰკითხოთ ჩემს შესახებ,
ბევრი ცნობილი ადამიანი, მათ შორის თამრიკო ჭოხონელიძეც ჩართული იყო ჩემს საქმეში და გვეხმარებოდა. მე ყველანაირად სუფთა ვარ. დახმარების გაწევა რომ გადავწყვიტეთ, მივუთითეთ ჩემი ანგარიში, ჩაირიცხა თანხა და გადავეცით. ზუსტად ასე რამდენიმე შემთხვევაში გამოვიყენეთ ჩემი ანგარიში. ესეც იმიტომ, რომ მე მქონდა ანგარიშზე წვდომა და შემეძლო მარტივად შემემოწმებინა, რამდენი ირიცხებოდა და საერთოდ, ირიცხებოდა, თუ არა თანხა. მე მაქვს ყველა საბუთი, სად წავიდა და სად დაიხარჯა თითოეული თეთრი და ვინც დაინტერესდება, შემიძლია, ვაჩვენო. გარდა ამისა, მე წავალ თამუნას ოჯახში, გადავიღებ ვიდეოს და გამოვაქვეყნებ ჩემი სიმართლის დასამტკიცებლად, ამ ქალბატონის წინააღმდეგ კი საჩივარს შევიტან.
ქუთაისში ჩამოდით და ვისაც გინდა ჰკითხეთ ჩემს შესახებ, ყველამ იცის მამუკა, მურკა როხვაძე. ორივენაირად მეძახიან. ნებისმიერი გეტყვით, ვინ ვარ და რას ვსაქმიანობ და როგორ ვცდილობ, დავეხმარო ადამიანებს. ძმა დიალიზზე მყავს შეერთებული და ეგეც გამოქვეყნებული მქონდა, დედის ამბავი მოგახსენეთ ზემოთ. ქალბატონ ნინას ამ ამბავს არ ვაპატიებ, აუცილებლად ვიჩივლებ და რომელი რომელს მოუგებს და ვინ დაამტკიცებს თავის სიმართლეს, საზოგადეობას გავაგებინებ.
უკვე დღეს აღმოჩნდა, რომ ქალბატონ ნინა კობახიძეს ზემოხსენებული პოსტი წაშლილი აქვს საკუთარი ფესიბუქპროფილიდან, მამუკამ კი გვითხრა, შევეხმიანე ნინას, გვქონდა მიწერ-მოწერა, გამოვხატე ჩემი პოზიცია მისი არასწორი საქციელის გამო, მაგრამ მან დამბლოკაო.
ფაქტი ის არის, რომ ამგვარი მოვლენების გარშემო ძალიან ბევრი ეჭვი ჩნდება, ისიც ფაქტია, რომ ბევრი თაღლითობს და სარგებლობს გაჭირვებული ადამიანების მდგომარეობით. ამ კონკრეტულ შემთხვევაშიც ძალიან ძნელია მტყუან-მართალის გარჩევა და ისევ ჩვენით უნდა გადავწყვიტოთ, ინტუიციით, გულის კარნახით თუ დამატებით ინფორმაციაზე დაყრდნობით, რამდენად მართალია ესა თუ ის პოსტი დახმარების თხოვნასთან დაკავშირებით და უნდა დავეხმაროთ თუ არა.
· 
მაკა კოხრეიძე:, შვილმკვდარი დედა თუ ფსიქოპატი და თაღლითი?
