კავკასიის ქვეყნებს მხოლოდ გაერთიანება გადაარჩენს«რუსეთმა კავკასიის დაპყრობა მას შემდეგ შეძლო, რაც კავკასიელი ხალხების ერთმანეთთან დაპირისპირება მოახერხა»
აჰმედ ზაკაევი, ჩეჩნეთის თავკაცი რუსეთ-საქართველოს ომში ჩეჩენთა საგანგებო რაზმის მონაწილეობაზე და სხვა საყურადღებო საკითხებზე «კვირის პალიტრა» რუსეთის მტრად შერაცხილ აჰმედ ზაკაევს ესაუბრა.
- ე.წ. ჩეჩნური საგანგებო რაზმი, ძირითადად, დანაშაულებრივი წარსულის მქონე პირებითაა შედგენილი.
- გასაკვირი არც არის, რუსეთის მოძალადე ხელმძღვანელობა დაპყრობითი მიზნების მისაღწევად დამნაშავეებს იყენებს.
- ბატონო აჰმედ, თქვენ უთუოდ ყურადღებით ადევნებდით თვალს ორი კვირის განმავლობაში საქართველოში განვითარებულ ომს, როგორ შეაფასებდით?- არათუ თვალყურს ვადევნებ იმას, რაც თქვენთან ხდება, პირად ტკივილად და უბედურებად აღვიქვამ. ის, რაც კავკასიაში ხდება, შეუძლებელია მე და ჩემს თანამებრძოლებს არ გვეხებოდეს. კავკასიის ქედი არა მარტო ყოფს, არამედ აერთიანებს კავკასიელ ხალხებს.
საქართველოში განვითარებული მოვლენები ჩეჩნეთში მომხდარის ანარეკლია. ჩვენ საქართველოს ხელისუფლებას ვეუბნებოდით, თუ რუსეთი ჩეჩნეთის დაპყრობას შესძლებს, მერე ამიერკავკასიის ქვეყნებს - საქართველოსა და აზერბაიჯანს მიუბრუნდება. ეს ცალკე თემაა და ამაზე მსჯელობის დრო ახლა არ არის.
საქართველოში მოვლენათა ასეთ განვითარებას მას შემდეგ ველოდით, რაც დასავლეთმა კოსოვოს დამოუკიდებლობა აღიარა, თანაც, გაეროს უშიშროების საბჭოს გვერდის ავლით. რუსეთსაც სწორედ ეს სჭირდებოდა. იცის, რომ გაერო მის წამოწყებას აფხაზეთისა და ე.წ. "სამხრეთ ოსეთის" (სამაჩაბლო) დამოუკიდებლობის აღიარების თაობაზე მხარს არ დაუჭერს. ამიტომ მოსკოვი ახლა ხშირ-ხშირად გაიმეორებს მსოფლიოს გასაგონად, რომ კოსოვოს დამოუკიდებლობა გაეროს გვერდის ავლით მოხდა და მასაც აქვს უფლება აღიაროს აფხაზეთისა და ოსების დამოუკიდებლობა.
რუსეთის საგარეო საქმეთა ხემძღვანელ ლავროვის განცხადება, რომ დამოუკიდებელ საქართველოში, სააჩაბლოს ირგვლივ, უნდა იყოს ე.წ. მომიჯნავე ზოლი და რუსეთის სამხედრო ძალების საგუშაგოები, სხვა არაფერია, თუ არა რუსეთის დანაშაულებრივი მმართველების დაცინვა და თავგასულობა.
რუსეთი ურცხვად ცდილობს ყველაფერი მშვიდობისმყოფელობით შენიღბოს და საქართველოს მიწები ასე მიიტაცოს. გასახარია, რომ ბოლოს და ბოლოს, დასავლეთის ქვეყნები მიხვდნენ, ვისთან აქვს საქმე. მიხვდა, რომ რუსულ ურჩხულს მადა სულ უფრო და უფრო ეზრდება. რუსეთმა საქართველოში ომი მას შემდეგ დაიწყო, რაც დარწმუნდა, რომ ჩეჩნეთის საკითხი საბოლოოდ გადაწყვიტა და ახლა აფხაზეთის, სამაჩაბლოს და დნესტრისპირეთის მიტაცებით მტაცებლური ჟინის დაკმაყოფილება სურს.
საბედნიეროდ, ამეიკა და ევროპა მიხვდა, - თუ რუსეთს საქართველოში რუსული სამხედრო ბანაკების განლაგების საშუალებას მისცემდა, მოსკოვი ამას აღარ დასჯერდებოდა და სულ მალე რუსული სამხედრო ბანაკები კუბაშიც გაჩნდებოდა.
მინდა დაგარწმუნოთ, რომ მთელი მსოფლიოს ყველა კეთილი ნების ადამიანი, მათ შორის ჩეჩნებიც, საქართველოს უჭერენ მხარს. ყველა ცდილობს, რამეთი დაეხმაროს ან სულიერი მხარდაჭერა გამოუცხადოს საქართველოს.
- ყოფილმა მებრძოლებმა, რომლებიც კადიროვის ხელისუფლებას არ ემორჩილებიან, რუსეთის შეიარაღებული ძალების საგანგებო დანიშნულების ე.წ. ჩეჩნური რაზმების «ზაპადისა» და «ვოსტოკის» მეომრებს მოუწოდეს, არ მიეღოთ მონაწილეობა საქართველოში მიმდინარე საომარ მოქმედებებში. რა იცით ამის შესახებ? - რადიო «თავისუფლებით» ამგვარი მოწოდება მეც გავაკეთე. ჩვენ უნდა გვესმოდეს, რომ რუსეთი რუსეთის სხვადასხვა სახელმწიფო დარგში მომუშავე ჩეჩნებს მხოლოდ თავისი ვერაგული მიზნებისთვის იყენებს. ყველამ იცის, რომ რუსულ ლაშქარში, ჩეჩნების გარდა, მრავალი ეროვნების ხალხი, მათ შორის ქართველებიც მსახურობენ, მაგრამ ისინი მახვილს საგანგებოდ მხოლოდ ჩეჩნებზე აკეთებენ. ამით მოსკოვი ცდილობს რაც შეიძლება გააღრმავოს კავკასიელ ხალხებს შორის დღეს არსებული გაუცხოება. კარგად იცის, რომ კავკასიელი ხალხების გაერთიანების შემთხვევაში რუსეთს კავკასიის დატოვება მოუწევს.
რუსეთი კარგად იყენებს «დაყავი და იბატონეს» ძველ და გამოცდილ ხერხს და ისევე როგორც მე-19 საუკუნეში, ახლაც ცდილობს კავკასიაში დამპყრობლური მიზნების გატარებას. რუსეთმა კავკასიის დაპყრობა მას შემდეგ შეძლო, რაც კავკასიელი ხალხების ერთმანეთთან დაპირისპირება, მათი ერთიანობისა და მოკავშირული ურთიერთობის დარღვევა მოახერხა.
- როგორც ცნობილია, გორში პირველი ჩეჩნური სპეცრაზმი და მისი მეთაური იამადაევი შევიდნენ. გასაკვირი ისაა, რომ ამ მოვლენების დაწყებამდე იამადაევი რუსეთში ძებნილად იყო გამოცხადებული. ახლა კი საქართველოს ომში მონაწილეობა «რუსეთის გმირმა», ძებნილმა იამადაევმაც მიიღო...
- ეს ის ყაჩაღური რაზმია, რომელთაც რუსეთის ხელმძღვანელობა იყენებს. «ზაპადსა» და «ვოსტოკს» მე ჩეჩნური საგანგებო დანიშნულების დანაყოფად არ მივიჩნევ და თქვენც ამავეს მოგიწოდებთ. ორივე ქვედანაყოფი რუსებმა ეროვნული ნიშნით შექმნეს. ე.წ. ჩეჩნური საგანგებო რაზმი, ძირითადად, დანაშაულებრივი წარსულის მქონე პირებითაა შექმნილი. ჩეჩნეთის დღევანდელმა რუსეთიდან მართვადი თვითმარქვია ხელისუფლებამაც კი ისინი ძებნილებად გამოაცხადა და დევნის. ასე რომ, მათ ჩეჩნურ ქვედანაყოფებად მოხსენიებას რუსული ვერაგობის განსახიერებად ვაფასებ.
- თქვენი აზრით, როგორ შეიძლება განვითარდეს მოვლენები საქართველოში?- რუსეთი სრულიად გამოუცნობი ქვეყანაა. ვფიქრობ, ან ევროპა და ამერიკა ბოლომდე დაიცავს საქართველოს და საქართველოში თავის მიზნებს, ან მისცემს რუსეთს კავკასიელ ხალხებზე შურისძიების შესაძლებლობას. ეს კი უკვე არა მარტო კავკასიელი ხალხების, არამედ მთელი საერთაშორისო თანამეგობრობის საქმეა. ვიმედოვნებ, ამერიკა-ევროპა რუსეთს არ მისცემს საქართველოს შემდგომი დაპყრობის შესაძლებლობას.
- რუსული ცნობით, რამზან კადიროვმა თქვენ სამშობლოში დაბრუნება შემოგთავაზათ. აპირებთ თუ არა კადიროვის წინადადების მიღებას?- მე არავის მივუწვევივარ. რუსულმა საცნობარო გვერდმა და მათთან დაკავშირებულმა გამოცემებმა შეიძლება ბევრი სხვადასხვა ცნობა გაავრცელონ, მაგრამ ყველაფერი სიმართლე როდია.
მე ჩეჩნეთის რესპუბლიკა იჩქერიის მეთაური ("პრემიერ-მინისტრი") ვარ. მე და ჩემს თანამებრძოლებს იმისთვის არ გვიბრძოლია, რომ ევროპული ქვეყნების დედაქალაქებში გვეცხოვრა. ჩვენ სამშობლოში ცხოვრება და სახელმწიფოს მშენებლობა გვინდოდა. ამ მიზანზე უარი არასოდეს მითქვამს. ყველაფერს ვიღონებ, რომ რუსეთ-ჩეჩნეთის ურთიერთობა სამართლებრივი გზით გადაწყდეს. ამაზე ვმუშაობ და საქმიანობას მომავალშიც გავაგრძელებ. ჩემს პირად კეთილდღეობაზე ლაპარაკი ზედმეტია, ვიდრე არ გადაწყდება რუსეთსა და ჩეჩნეთს შორის ომისა და მშვიდობის საკითხი.
კობა ბენდელიანის წერილის მიხედვით
· 
როცა ჩეჩნეთს ბომბავდნენ - თურმე თბილისს ეძინა ..., ხიზრი ალდამოვი კიდე ჩვენ გვაბრალებს ყველაფერს ????
