ალასანიას რევანში
სიახლე — თავფურცელი
20:41 05.12.2008
ალასანიამ განცხადება მანამდე დაწერა, სანამ ამას ვაშაძე, ანუ, სააკაშვილი მოითხოვდა. ფოტო: daylife.com
ვერსია პრინტერისთვის •
დაამატე რჩეულებში •
[როზი ჯღამაია]
მოხდა ის, რაც უნდა მომხდარიყო და რასაც სულმოუთქმელად ელოდა ქართული ოპოზიციური სპექტრი. გაეროში საქართველოს მუდმივი წარმომადგენელი ირაკლი ალასანია თანამდებობიდან გადადგა. როგორც ცნობილია, გადადგომას იგი დიდი ხნით ადრე ფიქრობდა, მაგრამ სამიტის დასრულებას ელოდებოდა. გუშინ კი განცხადება დაწერა და თანამდებობაც დატოვა.
მას შემდეგ, რაც ალასანიას გადადგომის შესახებ ინფორმაცია გავრცელდა, მთავრობაში სასწრაფოდ, ახალი ”კარუსელი” დატრიალდა. ეტყობა, ხელისუფლება ალასანიას გადადგომის შესახებ გავრცელებული ინფორმაციის გადაფარვას ცდილობს. ეჭვებს ამძაფრებს საგარეო საქმეთა ახალი მინისტრის გრიგოლ ვაშაძის განცხადება:
-”მე თხოვნით მივდივარ სამინისტროში, რომ მინისტრის ყველა მოადგილემ და ყველა ელჩმა დაწეროს განცხადება. ჩვენ მათ განვიხილავთ და ამის შემდეგ მივიღებთ გადაწყვეტილებას... როგორც საქართველოს ყველა ელჩი, თანამდებობას საქართველოს მუდმივი წარმომადგენელი გაეროში ირაკლი ალასანიაც დატოვებს... აგვისტოს მოვლენების დროს სამინისტროში ვიყავი და კარგად ვიცი, ვინ რას აკეთებდა”.
როგორც ვხედავთ, ვაშაძის ამ განცხადების მიზანი, ოფიციალურად, ომის პერიოდში ჩინოვნიკების საქციელის გადაფასება იქნება, მაგრამ ფაქტია, სააკაშვილის ხელისუფლების მცდელობა ალასანიას გადადგომის მოტივაციის მიფინთიხება უფროა. გამორიცხული არაა, საკაშვილმა ალასანიას კონრეტული ბრალიც კი წაუყენოს. აშკარაა, ქვეყნის პირველი პირი აგონიაშია და თავის გადასარჩენად უკან არაფერზე დაიხევს.
სხვა მხრივ, გაუგებარია ის სულმოუთქმელობა, რაც დღევანდელ დღეს გამოიჩინა ხელისუფლებამ. შეიძლება ითქვას, სააკაშვილმა ეკა ტყეშელაშვილი პირდაპირ ჰაერში მოხსნა. ეს უკანასკნელი ჰელსინკში, ეუთოს საგარეო საქმეთა მინისტერიალზე იმყოფება და ალბათ, ჯერ არც კი იცის რა უბედურება დაატყდა თავს.
სხვათა შორის, მაშინ, როცა მთელს თბილისს მოედო ინფორმაცია ალასანიას თანამდებობიდან გადადგომის შესახებ, პარლამენტის თავდაცვისა და უშიშროების კომიტეტის თავმჯდომარის პირველმა მოადგილემ, ნიკა რურუამ ალასანიას გადადგომის შესახებ, პრესა.გე-სგან შეიტყო. მისი თქმით, იგი საქართველოში არ იმყოფება და პირველად ჩვენგან გაიგო ალასანიას გადადგომის ფაქტი.
სიმართლე რომ ვთქვათ, ალასანიას გადადგომა მოულოდნელი არავისთვის ყოფილა. ხმები მისი შესაძლო გაოპოზიციონერების შესახებ დიდი ხანია ვრცელდება. პოლიტიკურ წრეებში იმასაც ადასტურებდნენ, რომ ირაკლი ალასანია სააკაშვილის ჩასანაცვლებლად დასავლეთისთვისაც მისაღები ფიგურა იყო. თუმცა, ანდობს თუ არა ქართველი ხალხი ალასანიას ქვეყნის ბედს, ეს საქართველოს მოსახლეობის გადასაწყვეტია.
რაც შეეხება ხელისუფლებას, ტრადიციულად, მათ არ სურთ ფაქტი რეალობად აღიქვან. უმრავლესობის წევრი და ”ნაცმოძრაობის” ერთ-ერთი სახე, გოკა გაბაშვილი ”ფაქტთან” საუბრისას ალასანიას შესაძლო გადადგომისა და ოპოზიციაში წასვლის შესახებ გავრცელებულ ხმას არასერიოზულად მიიჩნევს და კატეგორიულად უარყოფს. გაბაშვილის თქმით, ირაკლი ალასანია გაერო-ში დაკისრებულ მისიას აგრძელებს და გადადგომას არ აპირებს.
იმის გამო, რომ ალასანიას ჯერ, ხმამაღლა არ გაუკეთებია განცხადება გადადგომის შესახებ, უცნობია მოისურვებს თუ არა იგი აქტიურ პოლიტიკაში, ანუ ოპოზიციაში წასვლას. ერთადერთი, რაც ამ ეტაპზეა ცნობილი, ირაკლი ალასანიას ოპოზიციის გარკვეულ ლიდერებთან ჰქონდა შეხვედრები.
ლევან ბერძენიშვილი ვერ ადასტურებს ალასანიას გადადგომის შესახებ ინფორმაციას, მაგრამ მისი პასუხების მიხედვით თუ ვიმსჯელებთ, პოლიტიკოსი ალასანიას მიერ ხელისუფლების დატოვების ფაქტს მოულოდნელად არ მიიჩნევს.
შეგიძლიათ დაადასტუროთ ალასანიას გადადგომის ფაქტი?
- დღეს გადადგა თუ არა ამი დადასტურება არ შემიძლია.
ანუ, თქვენს პარტიას ალასანიასთან ურთიერთობა და კონსულტაციები არ ჰქონია, რომ, ეს ფაქტი გამოპარვოდა?
- ეს შეფასება თქვენ გააკეთეთ.
მაშინ ჩაგეკითხებით, გქონდათ თუ არა ალასანიასთან მოლაპარაკებები?
- ჩავთვალოთ რომ ეს კითხვა არ დაგისვამთ.
ვფიქრობთ, კომენტირება ზედმეტია. თუმცა, ლევან ბერძენიშვილისგან განსხვავებით, ფიქრია ჩიხრაძე, რომლის პარტია ”რესპუბლიკელებთან” ალიანსს ქმნის, ადასტურებს, რომ ალასანიამ განცხადება ნამდვილად დაწერა:
- ”შემიძლია დაგიდასტუროთ, რომ ალასანიას გადადგომის შესახებ განცხადება ნამდვილად აქვს დაწერილი. თუმცა, ბრიუსელის სამიტის დასრულებამდე თავს იკავებდა. საქართველოს მაპის მისაღებად თუ მცირეოდენი შანსი ექნებოდა დარჩენილი, ფიქრობდა, თავისი გადადგომით, ზიანი არ მოეტანა ქვეყნისთვის და ეს შანსი გამოეყენებინა.”
ფიქრია ჩიხრაძე არც იმას უარყოფს, რომ ”მემარჯვენეებს” გარკვეული ურთიერთობები ჰქონდათ ირაკლი ალასანიასთან. –”მისი ასაკის მიუხედავად იგი გამოცდილი და ჭკვიანი დიპლომატია. ალასანიას ფუნდამენტალური ინიციატივები აქვს აფხაზეთის კონფლიქტის დარეგულირებასთან დაკავშირებით. ჩვენ მივესალმებით, თუ იგი ოპოზიციაში წავა, მაგრამ უმჯობესი იქნება ამის განცხადების უფლება პირადად დავუტოვოთ. ჩვენს ქვეყანას კი ნამდვილად სჭირდება ალასანიასნაერი ადამიანები.”
ალასანიას გადაგომის შესახებ ინფორმაცია გოგა ხაინდრავასთვისაც უცნობი იყო, მაგრამ პოლიტიკოსი დარწმუნებულია, რომ ადრე თუ გვიან, ეს უნდა მომხდარიყო.
-”სააკაშვილი ყველამ კარგად ვიცით რა არის, მაგრამ აქ საუბარია ქვეყნის გადარჩენაზე. ირაკლი ალასანია რთულ მდგომარეობაში იმყოფებდა. გაეროში მას დიდ პატივს სცემდნენ და იგი ისე ვერ მოიქცეოდა, რომ თავისი ქმედებით ზიანი მოეტანა ქვეყნისთვის. თუმცა, ადრე თუ გვიან, ეს მაინც მოხდებოდა, რადგან ყველა წესიერი ადამიანი გადადგამს ამ ნაბიჯს.”
არასაპარლამენტო ოპოზიციასთან კომენტარები ჯერ კიდევ ხელისუფლებაში გატარებული სამთავრობო ცვლილებებამდე ჩავწერეთ, მაგრამ ვაშაძის განცხადება უკვე ეჭვს არ ტოვებს, რომ ალასანია ნამდვილად გადადგა. უბრალოდ, აქ ერთი რამაა მნიშვნელვანი - ალასანიამ განცხადება მანამდე დაწერა, სანამ ამას ვაშაძე, ანუ, სააკაშვილი მოითხოვდა საგარეო სამინისტროში გატარებული ცვლილებების გამო.
შესაძლოა, ხელისუფლება ცდილობს, რომ მის წინააღმდეგ გადადგმული ყველა ნაბიჯი სათავისოდ შემოატრიალოს, მაგრამ ფაქტები საპირისპიროზე მეტყველებენ. ფაქტი კი ისაა, რომ სააკაშვილს ხელისუფლება თავზე ენგრევა და ზედმეტია იმის მტკიცება, რომ ომის დროსაც კი ისეთი მაგრები ვიყავით, სახელმწიფო არ ჩამოიშალა. შეიძლება ითქვას, რომ ომმა თუ ვერა, ალასაიას ნაბიჯმა მთავრობა დაშალა ეს დასასრული არ არის.
http://presa.ge/index.php?text=news&i=5149 
როგორი იქნება ალასანიას შემდეგი ნაბიჯები?, რას იზავს?
