პრესისა და ინფორმაციის დეპარტამენტის კომენტარი სააგენტო ინტერპრესნიუსის შეკითხვაზე რუსეთის ფედერაციაში მსოფლიო რუკის გამოცემასთან დაკავშირებით
კითხვა: რა შეფასებას მისცემდით რუსეთის ფედერაციაში გამომცემლობის "Дизайн. Информация. Картография" მიერ გაერო-ს სიმბოლიკით მსოფლიოს რუკის გამოცემას, სადაც ე.წ. „აფხაზეთისა და სამხრეთ ოსეთის რესპუბლიკები" დამოუკიდებელ სახელმწიფოებად არიან დატანილი?
პასუხი: 2008 წლის აგვისტოში საქართველოს წინააღმდეგ განხორციელებული სამხედრო აგრესიის, საქართველოს განუყოფელი ნაწილების - აფხაზეთისა და ცხინვალის რეგიონის ოკუპაციის, ოკუპირებულ ტერიტორიებზე მრავალჯერადი ეთნიკური წმენდის შემდეგ რუსეთს აკვიატებულ იდეად ექცა ამ ტერიტორიებზე მის მიერვე შექმნილი საოკუპაციო რეჟიმების ე.წ. „დამოუკიდებლობის" ლეგიტიმაცია.
მიუხედავად რუსეთის მრავალი მცდელობისა, ფინანსური მოსყიდვის ჩათვლით, საერთაშორისო თანამეგობრობამ ცალსახა უარი განაცხადა რუსეთის მიერ ჩადენილი დანაშაულის ლეგიტიმაციაზე.
გაუგებარია, თუ ვინ შეიძლება იყოს ამ „რუკის" ადრესატი. თუ იგი რუსეთის საოკუპაციო ჯარებზეა გათვლილი, მაშინ 4000-იანი ტირაჟი ძალზე მცირეა და გამომცემლობამ სასწრაფოდ უნდა დაბეჭდოს კიდევ 6000 ეგზემპლარი, რათა სრულად დააკმაყოფილოს საოკუპაციო ჯარების 10000-კაციანი კონტინგენტი. ხოლო თუ ადრესატი საერთაშორისო საზოგადოებრიობაა, მაშინ მილიონიანი ტირაჟებიც კი არ იქნება საკმარისი საქართველოს ოკუპირებული ტერიტორიების მიმართ დამოკიდებულების შესაცვლელად.
სახელმწიფოს, რომელსაც პრეტენზია აქვს ზესახელმწიფოს სტატუსზე და საერთაშორისო თანამეგობრობის პასუხისმგებელ წევრობაზე, რბილად რომ ვთქვათ, არ შეეფერება ყალბი „რუკებით" თაღლითობა.
2010 წლის 1 სექტემბერი
პრესისა და ინფორმაციის დეპარტამენტი
http://mfa.gov.ge/index.php?lang_id=GEO&se...9&info_id=12630 
რუსეთში გამოცემულ ატლასზე აფხაზეთი და ე.წ. სამხრეთ, ოსეთი სახელმწიფოებად არ არის აღნიშნული 
