პოლიტიკა
08:14 / 07-11-2011
"ქართუ ბანკში'' ვანო მერაბიშვილმა და შსს-ს 500-მა თანამშრომელმა ანგარიში დახურა
მართალია, ბიძინა ივანიშვილის "ქართუ ბანკს'' ასობით მეანაბრემ სოლიდარობა გამოუცხადა და იქ სიმბოლური ანგარიშები გახსნა, მაგრამ ხელისუფლება ივანიშვილის მიმართ პრევენციული ღონისძიებების გატარების სერიას აგრძელებს. ბიზნესმენის პოლიტიკაში აქტიურობის პარალელურად, "ბანკი ქართუდან'' სახელფასო ანგარიშების სხვა ბანკებში გადატანის მაჩვენებელი იზრდება. აღნიშნულ ბანკში იმ ორგანიზაციებმა თუ ფიზიკურმა პირებმაც დახურეს ანგარიში, რომლებსაც წლების განმავლობაში, ყოველთვიურად, თავად ბიძინა ივანიშვილი სოლიდური თანხით აფინანსებდა.
"ქართუ ბანკში'' ანგარიშები დახურა: ეროვნულმა ბიბლიოთეკამ, მეცნიერებათა აკადემიამ, შოთა რუსთაველის სახელობის თეატრისა და კინოს სახელმწიფო უნივერსიტეტმა და შსსს ხუთასმა თანამშრომელმა. დეტალებში გარკვევისას, "ვერსიამ'' კულუარებიდან შეიტყო, რომ ზემოთ ხსნებულ ხუთას თანამშრომელს შორის, ერთერთი მინისტრი ვანო მერაბიშვილიც იყო. როგორც მოსალოდნელი იყო, ეს ინფორმაცია, შსსს ანალიტიკური დეპარტამენტის უფროსმა შოთა უტიაშვილმა არ დაგვიდასტურა და რამდენიმეწუთიანი ხმამაღალი სიცილის შემდეგ განგვიმარტა, რომ არც მერაბიშვილს და მასთან ერთად, შსსს არც ერთ თანამშრომელს "ქართუ ბანკში'' ანგარიში არასოდეს ჰქონია. მეტიც, უტიაშვილმა "ქართუ ჯგუფის'' ხელმძღვანელს, ნოდარ ჯავახიშვილს ბანკის საქმეებში გარკვევა ურჩია. მართალია, შინაგან საქმეთა სამინისტრო, არსებული კანონმდებლობის ძალით, ზოგიერთ ბანკირზე უკეთ აკონტროლებს შიდა სამზარეულოს, მაგრამ აქ საინტერესო ისაა, სოლიდური ორგანიზაციების მიერ ანგარიშების გატანის ტენდენციის გაგრძელების შემთხვევაში, დადგება თუ არა ბანკის არსებობისა და "ქართუ ჯგუფის'' მიერ დაფინანსებული სხვადასხვა პროექტების გაგრძელების საკითხი, მსგავს ვითარებაში რა დაცვის მექანიზმები აქვს შემუშავებული და რატომ ფიქრობს, რომ, შესაძლოა, მალე თანამდებობიდან გაათავისუფლონ, "ვერსიას'' ამ საკითხებზე "ქართუ ჯგუფის'' პრეზიდენტი ნოდარ ჯავახიშვილი ესაუბრა, რომელმაც ეროვნული ბანკის პრეზიდენტისთვის, ასევე შემმოწმებელთა ჯგუფის წევრ ირაკლი ზარქუასთვის გაგზავნილი წერილები ექსკლუზიურად გადმოგვცა.
- მას შემდეგ, რაც ბატონმა ბიძინამ პოლიტიკაში ჩართვის შესახებ განცხადება გააკეთა, "ქართუ ბანკიდან'' კლიენტების გადინება დაიწყო. ფაქტია, ხელისუფლება აშკარა ზეწოლას ახორცილებს და ფიზიკურ და იურიდიულ პირებს "ქართუ ბანკიდან'' ანგარიშების სხვა ბანკში გადატანას აიძულებს. სამწუხაროდ, მათ არც არავინ ეწინააღმდეგება. დღევანდელი მონაცემებით, 7 ოქტომბრიდან დღემდე 279 ანგარიში დაიხურა, თუმცა, პარალელურად, 208 ანგარიში გაიხსნა. დახურული ანგარიშები ჯამში ათეულ მილიონ ლარს შეადგენდა, გახსნილი ანგარიშების რაოდენობა კი ერთი მილიონიც არ არის, მაგრამ მთავარი საზოგადოების ღიად გამოხატული თანადგომაა. მათი მხარდაჭერა გაცილებით ფასეულია, ვიდრე მილიონები, ჩვენ მილიონები არ გვიჭირს. ვადასტურებ, რომ ბანკში ანგარიშები დახურა ეროვნულმა ბიბლიოთეკამ, მეცნიერებათა აკადემიამ, შოთა რუსთაველის სახელობის თეატრისა და კინოს სახელმწიფო უნივერსიტეტმა, შსსმ და მარიონეტების თეატრმა, რომელიც წლების განმავლობაში ჩვენი ფონდიდან ფინანსდებოდა.
- კი, მაგრამ ივანიშვილი ხომ წლების მანძილზე სოლიდურ დანამატს უხდიდა ამ უწყებების თანამშრომლებს, ანგარიშის დახურვის შემდეგ, თანამშრომლებმა პროტესტი გამოთქვეს ან მხარდაჭერა გამოგიცხადეს?
- ამ ადამიანებს ბიძინა ივანიშვილი საერთოდ რომ არ აფინანსებდეს, იმდენს ხომ უნდა მიხვდნენ, რომ პოლიტიკურ ბრძოლაში ჩართეს. ივანიშვილი შეიძლება არც მოგწონდეს, მაგრამ ხმა მაინც ამოიღე და არ მისცე უფლება, ხელისუფლების იარაღი გახდე. არ მინდა, ვინმე სინდისზე შევაგდო, ამ ანგარიშების დახურვით ნამდვილად არ დავიღუპებით, მაგრამ უსიამოვნოა, როცა ივანიშვილისგან წლების განმავლობაში სოლიდურ დახმარებას იღებ, რამდენიმე დღეში კი ივანიშვილის ბანკში სახელფასო ანგარიშს ხურავ. დაფინანსების მიღებას, დიდი ალბათობით, ეს ადამიანები მომავალშიც გააგრძელებენ.
- "ქართუ ჯგუფი'' მსახიობებსა და მეცნიერებს ამ ფაქტის გამო ყოველთვიურ დახმარებას არ შეუწყვეტს?
- ჩემი გადასაწყვეტი რომ იყოს, ამ ადამიანებს დახმარებას აღარ გავუგრძელებდი, მაგრამ ბატონი ბიძინა შინაგანად ქველმოქმედი ადამიანია, ამიტომ ის არ აპირებს დახმარების შეწყვეტას. გულწრფელად მაინტერესებს, მეცნიერთა აკადემიის პრეზიდიუმში სხედან ისეთი ადამიანები, რომლებიც რასაც ეტყვიან, იმას გააკეთებენ? შეიძლება, ამ ძალას ვერ მოერიო, მაგრამ პროტესტის გამოთქმის უფლება ხომ აქვთ? საბავშვო ბაღს ან სკოლას მოქალაქეობრივ მორალს ვერ მოვთხოვთ, მაგრამ სულ სხვაა, როცა დიდ მსახიობს ან მეცნიერს ეხება საქმე. აქ მათ დამოკიდებულებაზეა საუბარი. ასევე, ამონაგები სხვა ბანკში გადაიტანეს "პეესპემ'' და "ვისოლმა'', რომლებსაც ჩვენთან მნიშვნელოვანი საკრედიტო დავალიანებები აქვთ. ჩვენ რომ მართლა ისეთები ვიყოთ, როგორც გვექცევიან, ამ კომპანიებს უზარმაზარი ფინანსური პრობლემები შეექმნებათ.
- და სადამსჯელო მექანიზმების გატარებას "ქართუ ბანკი'' არ აპირებს? გასაგებია, რომ ბიძინა ივანიშვილისგან გამომდინარე, ბანკს ფინანსური პრობლემები შეექმნება, მაგრამ...
- სხვა ბანკებიდან განსხვავებით, ჩვენი ბანკი განსხვავებულ რეჟიმში მუშაობს. ხელშეკრულების თანახმად, კომპანიებს, რა თქმა უნდა, უფლება აქვთ, ანგარიშები სხვა ბანკში გადაიტანონ, მაგრამ მე ახლა მორალზე ვსაუბრობ. სადამსჯელო მექანიზმს რაც შეეხება, როცა რესტრუქტურიზაციაზე იქნება საუბარი, ჩვენ საპროცენტო განაკვეთს მნიშვნელოვნად ავწევთ. ეს იქნება ჩვენი საპასუხო სვლა.
- თქვენ დამიდასტურეთ, რომ "ქართუ ბანკში'' ანგარიში შსსმაც დახურა. თუმცა შოთა უტიაშვილმა ეს ინფორმაცია კატეგორიულად უარყო. თან აქვე საინტერესოა, შსსს ბიძინა ივანიშვილი სახელფასო დანამატს უხდიდა თუ მხოლოდ სახელფასო ანგარიშებზეა საუბარი?
- თუ უტიაშვილი თანახმა იქნება, ჩვენ მზად ვართ, გამოვაქვეყნოთ შსსს იმ ხუთასი თანამშრომლის სია, რომლებმაც "ქართუდან'' ანგარიში სხვა ბანკში გადაიტანეს. რა თქმა უნდა, აქ საუბარია სახელფასო ანგარიშზე და არა ბიძინა ივანიშვილის შეწირულობებზე. ბიძინა ივანიშვილი შსსს ფინანსურ დახმარებას არ უწევდა.
- ბატონო ნოდარ, თქვენ "ვერსიას'' ის წერილები გადაეცით, რომლებიც ეროვნული ბანკის პრეზიდენტ გიორგი ქადაგიძესა და შემმოწმებელთა ჯგუფის წევრს ირაკლი ზარქუას გაუგზავნეთ. ასევე წარმოგვიდგინეთ, მათი პასუხები.
რატომ გადაწყვიტეთ ახლა ამ ყველაფრის გამოქვეყნება?
- "ქართუ ბანკში'' შესვლის პირველივე დღიდან, ეროვნული ბანკი ცდილობს, ამჟამინდელი ხელმძღვანელობის დისკრედიტაციასა და ნებისმიერი კანონიერი თუ უკანონო გზებით დროებითი ადმინისტრაციის შემოიყვანას, რაც "ქართუ ბანკის'' პარალიზებას გამოიწვევს, ხელისუფლებას კი გაუქრობს შიშს, რომ ივანიშვილი ამ ბანკიდან ვინმეს დააფინანსებს.
- ბანკის პარალიზების რეალური საშიშროება არსებობს? როგორც თქვენს მიერ წარმოდგენილ წერილებშია აღნიშნული, ეროვნული ბანკი კომპლექსურ თანამშრომლობას, ამასთან, 18 ოქტომბერს დაყადაღებული თანხის ეკვივალენტს სესხის სახით გთავაზობთ.
- ეროვნული ბანკის ყველა განცხადება "ქართუ ბანკის'' პარალიზებას ემსახურება. მიუხედავად ჩვენი არაერთი მოთხოვნისა, ისინი 18 ოქტომბრის სპეცოპერაციაზე დასკვნას არ აკეთებენ. მიპასუხეთ, როგორ შეიძლება ბანკში გატარებული ფული იყოს შავი? ჩვენ ამ სპეცოპერაციაზე დასკვნა გვინდა და არა ფინანსურ საკითხში მათი დახმარება. ან მე თუ ფულის გამთეთრებელი და ბანდიტი ვარ, საერთოდ, რატომ მეხმარები? მით უმეტეს, ეროვნულმა ბანკმა კარგად იცის, რომ "ქართუ ბანკს'' ლიკვიდობა მაღალი აქვს და სესხი არ სჭირდება. რას ნიშნავს კომპლექსური თანამშრომლობის შეთავაზება თუ ეროვნული ბანკი იმას არ აკეთებს, რასაც მე ვთხოვ? მიუხედავად ყველაფრისა, შემმოწმებლებისთვის ჩვენი მხრიდან შეფერხების შექმნის არც ერთი ფაქტი ყოფილა და ეროვნული ბანკის განცხადებები გაუგებარი ბლეფია. ეროვნულ ბანკს კანონი აძლევს უფლებას, მოითხოვოს ნებისმიერი ინფორმაცია და ამის წვდომა ჩვენს ბანკში მათ აქვთ. გიორგი ქადაგიძე წერილებში ქვეტექსტებით მწერდა, რომ მათთვის დღის პროგრამა დაუყოვნებლივ მიგვეწოდებინა.
არც ერთ კანონში არ წერია, რომ რევიზორს კომპიუტერში ეს პროგრამა უნდა ჩავურთო. მას აქვს უფლება, ნახოს ბანკის მუშაობის პროცესი, მაგრამ ვერ მომთხოვს გავუხსნა დაზგა, რათა შიგნით კბილანები შეამოწმოს. ჩვენ მათ შევთავაზეთ - ნებისმიერი საბანკო ოპერაციის შესრულებისას, ადგილზე დაუჯექით და ნახეთ, რა საბუთები და ინფორმაცია შეჰყავს ჩვენს თანამშრომელს და რა ინფორმაცია გამოდის. ისინი კი ყველა ოპერაციის წინა დღით შემოწმების რეჟიმში მუშაობას გვთხოვენ, რაც არც ერთ სტანდარტში არ ჯდება, თუ ჩემი არ გჯერათ, კითხეთ ნებისმიერ მაკონტროლებელს. ამასთან, ნებისმიერ შემოწმებას უნდა ჰქონდეს საკუთარი პროგრამა, ეროვნული ბანკი კი აცხადებს, რომ თურმე შემოწმება ყველაფერს მოიცავს, მათ შორის იმის დადგენას, თუ როგორ მუშაობს ბანკის საოპერაციო პროგრამა.
- თუ ეროვნულ ბანკსა და "ქართუ ბანკს'' შორის მსგავსი ვაჭრობა გაგრძელდა და თქვენ მათ მოთხოვნებზე უარს იტყვით, რა სადამსჯელო ღონისძიების გატარების უფლება აქვს ეროვნულ ბანკს?
- კანონიერად არ აქვთ უფლება, რაიმე სადამსჯელო ღონისძიება გაატაროს ჩვენს წინააღმდეგ, რადგან თავად მათი მოთხოვნაა სათავეშივე უკანონო. მათ აქვთ უფლება, ჩემი ხელმოწერა გააუქმონ და დროებითი ადმინისტრაცია დანიშნონ, მაგრამ მსგავს ქმედებებს სამართლიანობასთან კავშირი არ ექნება. თუ მაინცდამაინც ბანკის მუშაობის ტექნოლოგია აინტერესებთ, პროგრამის შემქმნელი სპეციალური კომპანია არსებობს, რომელიც მათ ყველაფერს აუხსნის. სხვათა შორის, ბანკის ხელმძღვანელის დანიშვნის დღიდან, ეროვნული ბანკის პრეზიდენტთან შეხვედრას ვცდილობ, ეს იმ წერილშიც კარგად ჩანს, რომელიც გადმოგეცით. ქადაგიძესთან შეხვედრას იმიტომ კი არ ვითხოვ, რომ უიმისოდ ვერ ვცხოვრობ, საერთაშორისო პრაქტიკაში ურთიერთობის მიღებული ფორმაა, როცა კერძო ბანკში ახალი ხელმძღვანელი ინიშნება, ის ცენტრალური ბანკის პრეზიდენტს უნდა ეახლოს და საკუთარი პერსონა წარუდგინოს. დღის განმავლობაში ექვსჯერ დავრეკე გიორგი ქადაგიძის მდივანთან და არც ერთხელ არ მიპასუხა. წარმოუდგენელია, მთელი დღის განმავლობაში ეროვნული ბანკის პრეზიდენტის მდივანი ადგილზე არ ყოფილიყო. აქედან გამომდინარე, მაქვს თუ არა უფლება გამიჩნდეს საფუძვლიანი ვარაუდი, რომ მდივანი გააფრთხილეს ჩემი ზარისთვის არ ეპასუხა? მე მხოლოდ ეროვნული ბანკის ვიცეპრეზიდენტს შევხვდი, რომლისგანაც იყო მუქარა - თუ ჩვენს მოთხოვნას არ შეასრულებ, იძულებულები ვიქნებით, თქვენი კანდიდატურა განვიხილოთო.
- და ეს რას ნიშნავს, ვის აქვს უფლება "ქართუ ჯგუფის'' ხელმძღვანელის პოსტი დაგატოვებინოთ?
- ჩემი ყოფნაარყოფნის საკითხი, პირველ რიგში, ბიძინას გადასაწყვეტია. ეროვნული ბანკის ვიცეპრეზიდენტს ვუთხარი, რომ ყველაფრისთვის მზად ვარ. ბატონმა ბიძინამაც მითხრა, რომ აბსოლუტურად სწორი პოზიცია მაქვს. თუ მსგავს კანონდარღვევაზე წავლენ, კი, ბატონო. რთულია, განსაზღვრო ხელისუფლების მორიგი სიურპრიზები, რადგან მათი მოქმედებები არანაირ ლოგიკაში არ ჯდება. მთავარია, სიმართლე ჩვენს მხარესაა და ეს ყველაზე მნიშვნელოვანია. პარალელურად, სასამართლო დავასაც დავიწყებთ. მართალია, ქართული სასამართლო ძალიან იოლად იმართება, მაგრამ, მადლობა ღმერთს, ევროპული ინსტანციებიც არსებობენ. ამასთან, ჩვენ ყველა საფინანსო ინსტიტუტს დახმარების თხოვნით მივმართავთ. უკვე ვესაუბრე სავალუტო ფონდს, გვქონდა შეხვედრები საელჩოებთანაც, ამიტომ, როცა ყველაფერი კიდევ უფრო გამწვავდება, ჩვენი პასუხიც შესაბამისი იქნება. ნ
ოდარ ჯავახიშვილს გიორგი ქადაგიძე კვალიფიკაციას ვერ დაუწუნებს. ისე არ გამიგოთ, რომ ჩემს თავზე დიდი წარმოდგენა მაქვს. "ქართუ ჯგუფის'' პრეზიდენტთან საუბრის შემდეგ, "ვერსია'' იმ ორგანიზაციებს დაუკავშირდა, ვინც ბანკში ანგარიში გააუქმა. შოთა რუსთაველის სახელობის თეატრისა და კინოს უნივერსიტეტის რექტორმა ამ საკითხთან დაკავშირებით კომენტარის გაკეთებას თავი აარიდა - ახლა თათბირზე ვარ და მოგვიანებით დამიკავშირდითო. მოგვიანებით კი, ჩვენს ზარებს აღარ უპასუხა. კითხვაზე პასუხი ვერ მივიღეთ საქართველოს მეცნიერებათა ეროვნული აკადემიისგანაც. აკადემიის პრეზიდენტ თამაზ გამყრელიძესთან დაკავშირება, ფაქტობრივად, შეუძლებელი გახდა. როგორც მისმა მძღოლმა, მდივანმა და პრესცენტრის ხელმძღვანელმა განგვიმარტეს, ბატონ თამაზთან დაკავშირება, ამ ეტაპზე, ვერ მოხერხდება (?!). არც მარიონეტების თეატრში მოიძებნა პირი, რომელიც თეატრის ხელმძღვანელთან რევაზ გაბრიაძესთან დაგვაკავშირებდა.
სხვათა შორის, როგორც "ვერსიამ'' კულუარებიდან შეიტყო, გარდა იმისა, რომ ბიძინა ივანიშვილისგან მარიონეტების თეატრი მრავალჯერად დახმარებას იღებდა, თავად რევაზ გაბრიაძე ყოველთვიურად, დაახლოებით, ხუთი ათასი ლარით ფინანსდებოდა. ერთი სიტყვით, იმ ადამიანებისგან, რომლებმაც "ქართუ ბანკში'' ანგარიშების დახურვა გადაწყვიტეს, განმარტებები ვერ მოვისმინეთ. "ვერსიასთან'' საუბრისას მსახიობმა გივი ბერიკაშვილმა შემდეგი კომენტარი გააკეთა: უკვე ათი წელია, ბიძინა ივანიშვილისგან ფინანსურ დახმარებას ვიღებ. ახლაც ჩვეულებრივად ვიღებ "ქართუ ბანკიდან'' თანხას. დანარჩენი არაფერი ვიცი. სხვათა შორის, არ გეგონოთ, რომ მსახიობები ამ სიტუაციაში უმოქმედოდ ვართ. გროვდება ხელმოწერები და, ზუსტად ვიცი, რომ მსახიობების უმრავლესობა ამაში ჩართულია. რამდენადაც მაქვს ინფორმაცია, უკან არავინ იხევს. გარდა ანგარიშებისა, ბანკისა და ხელფასისა, ივანიშვილის ოჯახთანაც ახლოს ვარ და, მგონია, რომ მთელი თეატრია ამაში ჩართული. რამდენადაც ვიცი, დღეს, მაგალითად, თეატრი წავიდა და "ქართუში'' ანგარიში გახსნა. ეს ის ინფორმაციაა, რაც მე მაქვს. არავითარ შემთხვევაში, მსახიობები არ დავთმობთ მოქალაქეობის ჩამორთმევასაც. ალბათ, უახლოეს დღეებში შევიკრიბებით და ერთად გამოვხატავთ ჩვენს პოზიციას. მსახიობების დამოკიდებულება ვიცი და თავს ამიტომ ვაძლევ უფლებას, ეს ყველაფერი ვთქვა. სხვათა შორის, თავად ბატონმა ბიძინამ გვითხრა, ნურაფერში ჩაერევით, იყავით აპოლიტიკურები და გააკეთეთ ის, რისი ნიჭიც უფალმა მოგცათო''. ვნახოთ, კიდევ რისი ნიჭი აღმოაჩნდება ჩვენს ხელისუფლებას?!
რუსუდან შელია
გაზეთი "ვერსია"
წყარო/Source:
http://www.ambebi.ge/politika/43804-qqarth...l#ixzz1d1PgGwwB 
ბიძინას ბოლო ინტრევიუ მკვეთრად უარყოფითი, იყო ჩემთვის!
