kardinali
Super Crazy Member
ჯგუფი: Members
წერილები: 6802
წევრი No.: 105777
რეგისტრ.: 24-November 09
|
#28250272 · 10 Nov 2011, 17:06 · · პროფილი · პირადი მიმოწერა · ჩატი
რატომ აღარ აქვს ბერას ნათლიას ახლო ურთიერთობა ივანიშვილების ოჯახთან
დიდი ხანია, რაც თამრიკო ჭოხონელიძე ასეთი გულახდილი არ ყოფილა. თავადაც აღნიშნა, რომ პრესიდან თუ ტელევიზიიდან ერთგვარი ტაიმაუტი აიღო. გასულ კვირას ინფორმაცია გავრცელდა, რომ ხელოვანთა გარკვეულმა ნაწილმა პრეზიდენტს ბიძინა ივანიშვილისთვის მოქალაქეობის აღდგენის თხოვნით მიმართა. წერილს ხელს აწერენ მაია ჯაბუა, ნატო მეტონიძე, ზაზა მამალაძე, ზურა მანჯავიძე და სხვები. როდესაც ხელმომწერებს შორის ქალბატონი თამრიკოც აღმოვაჩინე, ინტერვიუზე დავურეკე. დიდი ხნის დუმილი დააარღია და ბიძინა ივანიშვილის ოჯახთან ნათესაობაზე საჯაროდ პირველად ისაუბრა.
- პირველ რიგში, თქვენს მუსიკალურ სიახლეებზე გკითხავთ...
- არასოდეს გავჩერებულვარ. უბრალოდ, იყო პერიოდი, როდესაც რაღაც მიზეზების გამო ისე აქტიურად აღარ ვჩანდი. ბევრი კარგი მიზეზი იყო, ზოგი ცუდი, მაგრამ მე უფრო კარგს ვიხსენებ. ჩემს ცხოვრებაში გაჩნდა შვილიშვილი ელენე, რომელსაც ჩემს საჩუქარს ვეძახი. ახლა კომპოზიტორ არჩილ კერესელიძის მუსიკაზე ვმუშაობ.
შარშან ჩემი საოცნებო პროექტი განვახორციელე. კომპოზიტორმა რევაზ ლაღიძემ ცნობილ სიმღერებთან ერთად უამრავი ლამაზი მელოდია შექმნა, რომელიც სხვადასხვა საორკესტრო ნაწარმოებსა თუ ქართულ კინოფილმებში იყო გაბნეული. ცენტრალურ არქივში მუშაობა დავიწყე და აღმოვაჩინე, რომ ამ გენიალურ კომპოზიტორს მართლაც საოცარი მარგალიტები ჰქონდა.
- ვინმე დაგეხმარათ ამ პროექტის განხორციელებაში?
- კომპოზიტორ ნიკა ნიკვაშვილს მივაკითხე, რომელიც ბიძინა კვერნაძის შეგირდი გახლდათ. ბატონი ბიძინა მაშინ ცოცხალი იყო და მითხრა, დიდი საქმე გაქვს წამოწყებული, ღმერთმა ხელი მოგიმართოთ შენც და ნიკასაცო. ნიკა სიღრმისეულად ჩასწვდა ბატონი რეზოს შემოქმედებას და არაჩვეულებრივად გააორკესტრა ყველა ნიმუში. პროექტი საქართველოს პატრიარქის ლოცვა-კურთხევით გაიმართა, რისთვისაც კიდევ ერთხელ ქედს ვიხრი მის წინაშე. სიმღერებს ძირითადად მე ვასრულებდი, მაგრამ მინდოდა, ბევრი ახალგაზრდა დამეკავებინა. ჩემთან ერთად მღეროდნენ ჩემი დებიც, მარიამი, "თეატრალურის კვარტეტი", დათუნა სირბილაძე, გიორგი ბოკუჩავა, სანდრო კობახიძე, "შვიდკაცა" და სამების საკათედრო ტაძრის მგალობელთა გუნდი.
ეს სიმღერები ისე არ შეიქმნებოდა, რომ არა ლექსები. დიდი მადლობა მინდა ვუთხრა უნიჭიერეს ქალბატონებს ნანა ცინცაძესა და მანანა გურგენიძეს. ერთ-ერთი სიმღერა რთულად გასაკეთებელი აღმოჩნდა, რადგან არქივში ნაპოვნი ერთი ფრაზიდან ავაგეთ. უნიჭიერეს ადამიანს ნიკო გომელაურს მივაკითხე, რომელიც უკვე ძალიან ცუდად გრძნობდა თავს. დიდი პასუხისმგებლობით მოეკიდა ამ ყველაფერს. როდესაც დავინახე, რომ ცუდად იყო, შევწუხდი და ვუთხარი, არ მეჩქარება-მეთქი, თუმცა კი მეჩქარებოდა. ამომხედა და მითხრა, მე მეჩქარებაო. როდესაც ნიკო აღარ იყო, მაშინ მივხვდი, რას გულისხმობდა. ისეთი ლექსი დაუწერა ამ სიმღერას, რომ ყოველთვის უკვდავი დარჩება.
- გაგიჭირდათ კონცერტის ჩატარება?
- გვერდში დამიდგნენ დათო დოიაშვილი და ნიკა მემანიშვილი თავისი ორკესტრით. იყო რაღაც წინააღმდეგობები, თუნდაც ის, რომ როდესაც ფინანსური მხარდაჭერა მჭირდებოდა, რამდენიმე ბიზნესმენს მივმართე და ცოტა უცნაური ფრაზები მითხრეს. ჩვენი მკითხველის გონებაში, პირველ რიგში, ბიძინა ივანიშვილის სახელი გაიელვებს, მთელი პასუხისმგებლობით ვაცხადებ, რომ მათ შორის ბიძინა არ ყოფილა. თამრიკო, დღეს ცოტა რთული ვითარებაა და შეიძლება, საკუთარი თავი გავიფუჭოთ იმის გამო, რომ თავის დროზე შენ განსხვავებული აზრი გქონდაო. მთხოვეს, რომ გამეგო და მეც გავუგე. საბედნიეროდ, უცხოელების ერთ-ერთმა კომპანიამ მაინც დამაფინანსა.
- კიდევ რა წინააღმდეგობას შეხვდით?
- მე ის კატეგორია არ ვარ, რომ ვიბრძოლო, არ შემიძლია. რადგან ბიზნესმენებისგან ასეთი პასუხი მივიღე, მერე "რუსთავი 2"-ს მივმართე, მხოლოდ საინფორმაციო მხარდაჭერისთვის, რაზეც, რა თქმა უნდა, უარი მითხრეს, როგორ ფიქრობთ, ამის შემდეგ მივაკითხავდი მერიას ან კულტურის სამინისტროს?!
არც იმ კატეგორიას ვეკუთვნი, რაც დასანახია, არ დავინახო და არ დავაფასო. ჩემი კონცერტი სრულიად მოულოდნელად ერთი ადამიანის მიზეზით ჩაშლის პირას დადგა, მან თქვა, რომ ნიკა რურუა უცხოეთში აგზავნიდა. ეს ჩემთვის შოკი იყო. სიმართლე გითხრათ, დავინტერესდი, უშუალოდ კულტურის მინისტრისგან მიმეღო პასუხი და მივედი ბატონ ნიკასთან, რომელმაც დიდი პატივისცემით მიმიღო და გაოგნდა, როდესაც ვუთხარი, თქვენ ამ ადამიანს საფრანგეთში აგზავნით-მეთქი. არავის არ ვაგზავნი და, თამრიკო, თქვენ არ ინერვიულოთ, კონცერტი შედგებაო. დასძინა, თუ რამე გჭირდებათ, მე მზად ვარ, დაგეხმაროთო.
ამ კონცერტის სცენის მოწყობილობის ერთი მნიშვნელოვანი ნაწილი სწორედ ქალაქის მერიამ გამომიგზავნა და კონცერტს ბატონი გიგი უგულავაც დაესწრო. ვერ წარმოიდგენთ, როგორ მესიამოვნა და სურვილი გამიჩნდა, მიუხედავად განსხვავებული აზრებისა, ყველა ერთად ვყოფილიყავით, ჩვენ ისევ რეზო ლაღიძის საოცარმა მუსიკამ გაგვაერთიანა. ამის შემდეგ კიდევ ერთხელ დავრწმუნდი, რომ ბევრ საკითხს ქვედა ფენა ძაბავს და შესაბამისად აფუჭებს. იმდენად მეტიჩრები არიან, უნდათ, რომ ზემდგომებს ასიამოვნონ და ამით ძირს უთხრიან მათ. არ მინდა, ვინმემ ისე გაიგოს, რომ განაწყენებულის პოზიციიდან ვლაპარაკობ. დიდი ხანია, რაც ხალხს არ მოუსმენია და არ წაუკითხავს ჩემი ასეთი ინტერვიუ. გავჩუმდი, მხოლოდ იმიტომ, რომ აზრი არ ჰქონდა არაფერს. ვიფიქრე, იქნებ, რაღაც გამოსწორებულიყო.
პეტრე გრუზინსკისადმი მიძღვნილ საღამოზე, რომელიც თბილისობის დღესასწაულზე გაიმართა, გამოვიდა ძალიან ნიჭიერი ადამიანი ნიკა მემანიშვილი და თქვა, ამ კონცერტში უკლებლივ ყველა ის მომღერალია დაკავებული, ვისაც ქართული ტრადიციული სიმღერისთვის არ უღალატიაო. ცოტა უხერხული ხომ არ იყო მის მიერ ნათქვამი ეს ფრაზა?.. ხმამაღლა ვამბობ, რომ იმ კონცერტში არ მონაწილეობდნენ ზუსტად ის მომღერლები, ვისაც ნამდვილად არ უღალატია ქართული ტრადიციული სიმღერისთვის.
სად იყვნენ მაია ჯაბუა, ნატო მეტონიძე, ლიზა ბაგრატიონი, ეკა კვალიაშვილი. სად და თავიანთი განსხვავებული აზრის გამო სახლში არიან. ვფიქრობ, ნიკას მხრიდან ამის თქმა ყოვლად გაუმართლებელი იყო, მაგრამ იმაშიც დარწმუნებული ვარ, მავანნი კმაყოფილი დარჩებოდნენ. დე, იყოს ასე, თუ ასეთი მცირედიც აკმაყოფილებთ, ღმერთმა შეარგოთ ჩვენთვის ასეთი სასაცილო ნაბიჯები. მე მინდა, წარმატება ვუსურვო ნიკასა და ყველა მის კოლეგას.
- ახლახან ხელოვანების გარკვეულმა წრემ წერილით მიმართა საქართველოს პრეზიდენტს, სადაც სთხოვდნენ, რომ ბიძინა ივანიშვილისთვის საქართველოს მოქალაქეობა აღედგინა. ამ წერილს თქვენც აწერთ ხელს.
- ზაზა მამალაძე დამიკავშირდა. ზაზა ის ადამიანია, რომელიც უკან არასოდეს იხევს, როდესაც ქვეყნისთვის მიუღებელი რამ ხდება. დამირეკა და მითხრა, რომ წერილი წამეკითხა. გავეცანი და ხელი მოვაწერე, იმიტომ რომ საკმაოდ მოკრძალებული წერილი იყო და ვთხოვდით, ამ ადამიანისთვის მოქალაქეობა დაგვებრუნებინა. მიმაჩნია, რომ სამართლიან წერილს მოვაწერე ხელი, მარტო მე კი არა, მგონი, მთელმა მსოფლიომ იცის ბიძინა ივანიშვილის ქველმოქმედების ამბავი.
ახლა ჩასაფრებული ადამიანები იტყვიან, რომ ისინი, ვისაც ხელფასს უხდიდა, გვერდში დაუდგებიანო. სირცხვილია ამაზე ლაპარაკი, ხალხმა მხოლოდ სამების ტაძრის მშენებლობა იცის და ამის გარდა რამდენი რამ არის, რაც ბიძინამ გააკეთა. ეს ყველაფერი ქვეყნის საკეთილდღეოდ გააკეთა და იმას არ ფიქრობდა, რომ ხვალ ან ზეგ ხელისუფლებაში მოვიდოდა. მერწმუნეთ, მე კარგად ვიცი, რას აკეთებს ეს ადამიანი და საკუთარი თვალით მინახავს, როდესაც მადლობის გადახდის შემდეგ ხალხს ეუბნებოდა, რომ არსად არ ეთქვათ.
- ელოდით მისგან პოლიტიკაში წასვლას?
- ინტერვიუს ვუსმინე და თავად თქვა, ამ ნაბიჯის გადადგმას არ ვაპირებდიო და მე როგორ ველოდი. მაგრამ ჩვენ ხომ არ ვიცით, რა ხდება, რატომ მოდის პოლიტიკაში. ერთი რამ მინდა დავიჯერო, ამას ხმამაღლა ვაცხადებ, მაშინ, როდესაც ქვეყანაში დაძაბული სიტუაცია იყო, მშვიდობის მტრედის როლი არასოდეს მითამაშია და ყოველთვის ვკითხულობდი, ხალხო, იქნებ, რაღაც გაუგებრობაა და არასწორი გზით მიდის ქვეყნის დღევანდელი მართვა. როგორ შეიძლება დავიჯერო, რომ მიხეილ სააკაშვილი საქართველოს დასაქცევად მოვიდა. არ მგონია, რომ რომელიმე ქართველს, თუ ერთხელ მაინც დაულევია ქართული წყაროდან წამოსული წყალი, შეუგრძნია მისი ზეცის მადლი, ის საქართველოს დასაქცევად მოსულიყო. შეიძლება, მე ვფიქრობ არასწორად, მაგრამ მინდა, რომ ეს დამიმტკიცონ.
- ივანიშვილის მხარდამჭერებზე ამბობენ, რომ მისგან მხოლოდ ფულადი დახმარება აინტერესებთ, თქვენ კი ამ ოჯახთან ნათელ-მირონი გაკავშირებთ.
- იმ ადამიანებზე, რომლებზეც ამბობენ, რომ მისგან მარტო ფული უნდათ, სინამდვილეში ასე არ არის, რადგან მათი დახმარება, ვისაც უდიდესი წვლილი მიუძღვის ქვეყნის წინაშე, თავად ბიძინას ინიციატივა იყო, თუ ისინი დღეს მშიერი არ არიან, მისი დამსახურებაა.
რაც შეეხება ჩვენს ურთიერთობას, მინდა, გითხრათ და გაგიკვირდებათ, ახლა ივანიშვილების ოჯახთან არანაირი ურთიერთობა არ გვაქვს. ალბათ რაღაც უცნაური მოხდა. არ ვიცი, რა, მაგრამ შეიძლება, მეც მოვერიდე, იმიტომ რომ მამაც ასეთი იყო, როდესაც მისი მეგობრებიდან ვინმე გამდიდრდებოდა, თვითონ ერიდებოდა. შეიძლება, მე გავერიდე და არ შევაწუხე, თუ ახლობელმა არ დაინდო, სხვას ეს, უბრალოდ, არ გამოუვა.
ვცდილობდი, შორს ვყოფილიყავი და ამდენი წლის განმავლობაში, ყოველ დილა-საღამოს, ჩემს ნათლულ ბერას ლოცვაში ნათლულთათვის მოვიხსენიებ. ბიძინა თავისი ოჯახით და ბერათი არსად წასულან და მე ისინი ლოცვებში მყავს მოხსენიებული. ბევრ ადამიანს, რომელიც დღეს მის შესახებ ლაპარაკობს და სხვას აქილიკებს, სწორედ ბიძინა არჩენდა წლების განმავლობაში და მინდა ვთხოვო, ნუ დაივიწყებენ, რადგან უმადურობაა მათი მხრიდან. ხშირად მიფიქრია, ასეთი ცუდი ადამიანები ვართ ჩვენ? ისეთ ბრალდებებს ვუყენებთ ერთმანეთს, რომ ნუთუ ასეთი ცუდი ყოფილა ეს ქვეყანა?
- რამდენი წლის იყო ბერა, როდესაც მონათლეთ?
- სამი-ოთხი წლის. მე და ედიკო ყიფიანმა მოვნათლეთ. მეტს ვერაფერს გეტყვით ბიძინას შესახებ, რადგან ამ ყველაფერს შორიდან ვუყურებ.
- თქვენი ნათლულები მუსიკალური კუთხით წავიდნენ. მოგწონთ ბერას მუსიკალური შემოქმედება?
- ნათლულებიდან ნინი ბადურაშვილი და დათუნა სირბილაძე მღერიან და ბერა... ძალიან საყვარელი იყო. მახსოვს, როგორ უკრავდა ვიოლინოზე და ემზადებოდა, რომ სტუმრების წინაშე წარმდგარიყო. რაც შეეხება მისი ასეთი სახით გამოჩენას, ჩემთვის მოულოდნელი იყო, რადგან არ ვიცოდი, როგორ და რას აკეთებდა. თუმცა არ გამკვირვებია, როცა მისი ინტერვიუ მოვისმინე. მე ასეთი მოკრძალება, თავდადება და კეთილშობილება ამ ასაკის ბიჭისგან ბევრი არ მინახავს. სადაც გზა ნახა ულამაზესმა ანკარა წყლის ტალღამ, სადაც მონახა კალაპოტი, იქით წავიდა, ხელოვნებაში...
- მისი შემოქმედება მაინც პოლიტიკური პროტესტია.
- მარტო პროტესტი არ არის. ბერა პირველ კლიპში ძალიან ლამაზ სიყვარულს უმღერის და მისი სიტყვები ბევრ ადამიანს გულზე მალამოდ მოედო. რაც შეეხება პოლიტიკას, მას, რა თქმა უნდა, ამ ყველაფერზე რეაქცია ექნება.
- ივანიშვილები კითხულობენ ქართულ პრესას, რას ეტყოდით, ჩვენი ჟურნალიდან თქვენს ნათლულს, რომელიც დიდი ხანია, არ გინახავთ?
- სანამ ბერაზე ვისაუბრებდეთ, მინდა, ყველას წარმატება ვუსურვო თავის საქმეში. ჩვენს ხელისუფლებასაც ღმერთმა ხელი მოუმართოს, თუ ეს ყველაფერი საქართველოს კეთილდღეობისკენ არის მიმართული და ყველა იმ ადამიანს, ვისაც დღეს ერთადერთი საფიცარი საქართველო ჰყავს. თუმცა ყველას მინდა ვუთხრა, ხელისუფლებაში მოსულსაც და მომსვლელსაც, დიდი სიბრძნე მართებთ და დიდი მნიშვნელობა აქვს გარემოცვას, რომელმაც შეიძლება ბევრი კეთილისმსურველი დაგაკარგვინოს. რაც შეეხება ბერას - მინდა ვუთხრა, რომ მე ის ძალიან მიყვარს თავისი ყველა გადადგმული ნაბიჯით. მიუხედავად იმისა, რომ ხშირად საქართველოში არ იყო, არ დაუკარგავს სამშობლოს სიყვარული. ეს ძალიან მხიბლავს მასში და მსიამოვნებს, რომ ასეთი ბიჭია. ვისურვებ, ბერას ბევრი თანატოლი იყოს ასეთი ანთებული.
- რამდენიმე ხელოვანი შეხვდა ბიძინა ივანიშვილს. თქვენ რომ დაგირეკოთ, მიხვალთ შეხვედრაზე?
- მე ჯერჯერობით ისევ განზე ვარ. არა მგონია, ისეთი რჩევა მივცე, რომელიც დასჭირდება, მაგრამ სადაც ვხედავ, რომ სამართლიანობას გვერდში უნდა დავუდგე, იქ ვარ. როდესაც საქმე მის მოქალაქეობას ეხებოდა, არ შემეძლო, ეს ყურს უკან გამეტარებინა.
- არ მიკითხავს, როგორია დღეს თქვენი ყოფილი მეუღლის პოზიცია, როდესაც ერთად ცხოვრობდით, ალბათ სწორედ იმ წლებში დანათესავდით ივანიშვილების ოჯახთან. იცით, დღეს რა პოზიცია აქვს გია როინიშვილს?
- ამ კითხვას უკომენტაროდ დავტოვებ...
|
· 
ივანიშვილის მიერ დაფინანსებულთა, საინტერესო სია
