ანაკლიაში დაგეგმილ ღონისძიებაზე მოსახლეობა ფოთიდან ყვითელი ავტობუსებით წაიყვანეს [Video] ნაკლიაში ჩერქეზულ დღეებისადმი მიძღვნილ ღონისძიებაზე ფოთიდან საბიუჯეტო სამსახურში დასაქმებული მოსახლეობა ყვითელი ავტობუსებითა და სამარშუტო ტაქსებით წაიყვანეს. ანაკლიაში დაგეგმილ ღონისძიებაზე ყვითელი ავტობუსებით მოსახლეობის წაყვანას "ნაციონალური მოძრაობის" ახალგაზრდული ფრთის წარმომადგენელი, თეონა ახალაია ხელმძღვანელობდა, მერიის ადმინისტრაცია კი საბიუჯეტო სამსახურის თანამშრომელთა მობილიზებაზე იყო პასუხისმგებელი. ღონისძიებაზე სამსახურეობრივი ავტომანქანებით გაემგზავრნენ ქალაქის მერი, საკრებულოს თავმჯდომარე და სხვა წევრებიც.
ანაკლიაში გამგზავრების მიზეზზე უმრავლესობამ საუბარი არ ისურვა. საკრებულოს თავმჯდომარე, ვანო საღინაძემ მოუცლელობა მოიმიზეზა და აღნიშნულ საკთხზე სხვა დროს საუბარი ითხოვა. –"არ მცალია, მეჩქარება სხვა დროს იყო"– თქვა მან ჩვენი კამერის დანახვისას.
–"თავისუფალი მოქალაქე ვარ და სადაც მინდა იქ წავალ, საკრებულოს წევრს არ ევალება დილიდან საღამომდე საკრებულოში ჯდომა"– განაცხადა საკრებულოს წევრმა, კახა გუგუჩიამ.
შესვენების დროის გამოყენება მოიმიზეზა, საფინასო და ეკონომიკური სამსახურის უფროსმა სულხან თოლორდავამ, თუმცა შესვენების დროის ამოწურვის შემდეგ დაბრუნდებოდა თუ არა სამსახურში, გადაწყვეტილი არ ჰქონდა.
ანაკლიაში წასვლის მიზეზებსა და მნიშვნელობაზე ისაუბრა ქალაქის მერმა, ვახტანგ ლემონჯავამ.
-"რუსეთის იმპერიის ბოროტი ნამოქმედარის დაფიქსირების პროცესი ხდება ახლა, როცა დიდი ხნის წინ მოახდინეს ჩერქეზთა გენოციდი. მილიონი ადამიანი მოსპეს და ეს ფიქსირდება ისტორიულად"– განაცხადა მერმა. თუმცა მას არ დაუკონკრეტებია რა საჭიროებას წარმოადგენდა მოსახლეობის ავტობუსებით წაყვანა და რამდენად მისაღებია სამუშაო საათების დროს საჯარო სამსახურში დასაქმებულების სამსახურში არ ყოფნა.
ვინ უზრუნველყო მოსახლეობის ტრანსპორტირება და დამატებით რა მომსახურეობაა გათვალისწინებული, რა დაუჯდა ბიუჯეტს მოსახლეობისა და ხელისუფლების წარმომადგენლების ღონისძიებაზე დასწრება, მერიის საფინანსო და ეკომომიკური განვითარების სამსახურის უფროსის, სულხან თოლორდავასთვის უცნობია. ის პასუხისმგებლობას ირიდებს და ამბობს, რომ მის სამსახურს ხარჯი არ გაუწევია. მისი თქმით, შესაძლებელია მომსახურეობისთვის ხელშეკრულება შესყიდვების სამსახურმა გააფორმა. შესყიდვების სამსახურში კი აცხადებენ, რომ აღნიშნულზე ისინი ინფორმაციას არ ფლობენ და "ჯერ არაფერი" აქვთ.
ქალაქ ანაკლიაში ჩერქეზული დღეები უკვე მეორე დღეა მიმდინარეობს. ღონისძიების ორგანიზატორია დიასპორის საკითხებში საქართველოს სახელმწიფო მინისტრის აპარატი. დღეს, ამ დღეებთან დაკავშირებით, დილით მოეწყო ტრადიციული ხელნაკეთი ჩერეზული ნივთების გამოფენა, გაიმართა სპორტული ღონისძიებები, ცხენბურთი, ისინდი, დოღი და ჩერქეზული საბრძოლო ხელოვნების ჩვენება. 12 საათზე კი სასტუმრო ,,ოქროს საწმისში’’ გაიხსნა სამეცნიერო კონფერენცია ,,ჩერქეზთა გენოციდის აღიარების შედეგები." ანაკლიაში ჩერქეზული დღეები, საღამოს, 19 საათზე ჩერქეზული და ქართული ანსამბლების მონაწილეობით გასამართი საზეიმო გალა-კონცერტით დასრულდება.
შეგახსენებთ, რომ რუსეთ-კავკასიის ომის პერიოდში ჩერქეზების (ადიღელების) მასობრივი განადგურება და მათი იძულებითი განდევნა ისტორიული სამშობლოდან საქართველოს პარლამენტმა 2011 წლის 20 მაისს გენოციდად შეაფასა და შესაბამისი აქტი და რეზოლუცია მიიღო.
აი როგორ ჰკიდია ახლა ლემონჯავას ჩერქეზების ამბავი წარმომიდგენია
http://tspress.ge/ka/site/articles/11956/ 
ჩერქეზი ხალხის გენოციდის უკდავსაყოფად, ანაკლიაში მეომრიალის გახსნა 1 მაისსაა დაგეგმილი.
