დიმიტრი მედვედევი დარწმუნებულია, რომ 2008 წელს მის მიერ მიღებული ყველა გადაწყვეტილება სწორი იყო. როგორც რუსეთის პრემიერ-მინისტრმა "რუსთავი 2"-ის გადაცემა "პოზიციაში" განაცხადა, ანალოგიური სიტუაციის შემთხვევაში დღესაც ასევე მოიქცეოდა.
დიმიტრი მედვედევი 2008 წელს განვითარებულ მოვლენებს დრამატულს უწოდებს, თუმცა აცხადებს, რომ ამ მოვლენებზე მისი შეფასება არ შეცვლილა.
"მიმაჩნია, რომ იძულებული ვიყავით, ამგვარად გვეპასუხა შესაბამის აგრესიულ ქმედებებზე, რომლებიც მაშინ ქართულმა შეიარაღებულმა ძალებმა განახორციელეს. მოვლენების ყველა შემდგომი განვითარებაც წინასწარ იყო განსაზღვრული სწორედ ამ ფაქტით – მშვიდობიანი მოსახლეობის დაღუპვის და ვითარებაში ჩარევის აუცილებლობის ფაქტით. ამიტომ, თუ მეკითხებით იმის შესახებ, ანალოგიურად მოვიქცეოდი თუ არა ასეთ სიტუაციაში, ჩემი პასუხია - დიახ. მიუხედავად იმისა, რომ ეს უმძიმესი გადაწყვეტილებაა, რომლის მიღებაც მომიხდა, როგორც პრეზიდენტს, როგორც რუსეთის ფედერაციის შეიარაღებული ძალების მთავარსარდალს, ზუსტად ასევე მოვიქცეოდი. რაც შეეხება მომდევნო გადაწყვეტილებებს, როგორც მე წარმომიდგენია, მოვლენათა მთელი ჯაჭვი – მთელი ისტორია, რომელიც მას შემდეგ განვითარდა, ამტკიცებს, რომ მთლიანობაში ეს დაბალანსებული გადაწყვეტილებები იყო, რომლებმაც ვითარების შენარჩუნების შესაძლებლობა მოგვცა", - განაცხადა მედვედევმა.
რუსეთის პრემიერ-მინისტრის შეფასებით, არსებობდა იმის საფრთხე, რომ შეტაკებები, საბრძოლო ოპერაციები და ადამიანების დაღუპვა 2008 წლის 8 აგვისტოს შემდეგაც პერმანენტულად გაგრძელებულიყო.
"მიმაჩნია, რომ რა ზომებიც მივიღეთ – მე, როგორც ქვეყნის პრეზიდენტმა, ჩვენმა შეიარაღებულმა ძალებმა და, საერთოდ, პოლიტიკურ და დიპლომატიურ დონეზე, – საშუალება მოგვცა, სიტუაცია დაგვემშვიდებინა. დიახ, ეს არ იყო იოლი გადაწყვეტილებები, მაგრამ, ჩემი პასუხია, რომ ამ მხრივ ყველაფერი სწორად იყო გაკეთებული", - აღნიშნა მედვედევმა.
http://www.interpressnews.ge/ge/politika/2...bi-mivighe.htmlრუსეთის პრემიერ-მინისტრის, დიმიტრი მედვედევის განცხადებით, რა ვითარებაც არის დღეს, ეს პრობლემაა როგორც რუსეთისთვის, ასევე საქართველოსთვის, აფხაზეთისთვის და სამხრეთ ოსეთისთვის. ამის შესახებ რუსეთის პრემიერმა "რუსთავი 2"-ის გადაცემა "პოზიციაში" ექსკლუზიური ინტერვიუს დროს განაცხადა.
მედვედევი ამით გადაცემის წამყვანის, ნინო შუბლაძის კითხვას გამოეხმაურა, იქცა თუ არა რუსეთისთვის პრობლემად ის, რომ დღემდე საქართველოს მოსახლეობის უმეტესობა ფიქრობს, რომ ქვეყნის მთავარი საფრთხე არის რუსეთი, დასავლეთის, საერთაშორისო საზოგადოების აზრით, რუსეთის ჯარები - საოკუპაციო არმიაა. რუსეთს ასევე ადანაშაულებენ ეთნიკური წმენდის ჩატარებაში, იმაში, რომ არ ასრულებს 12 აგვისტოს შეთანხმებას.
მედევედევის განცხადებით, ეს, საერთოდ პრობლემაა და არ იქნებოდა სამართლიანი, სხვანაირად რომ ეთქვა.
"მაგრამ, მთავარი ხომ ის არის, რა კვალიფიკაციას მივცემთ ამ ქმედებებს: შეფასება შეიძლება სხვადასხვაგვარი იყოს – ისეთიც, როგორიც თქვენ ახლახანს თქვით, თუმცა ისეთიც, როგორი კვალიფიკაციაც ჩვენ მივეცით და რომელსაც, სხვათა შორის, შემდგომ დაეთანხმა მთელი რიგი სხვა სახელმწიფოებისა. ჩვენ დავეყრდენით და ვეყრდნობით იმას, რომ ამ პერიოდში რუსეთის ფედერაციამ, გაერთიანებული ერების ორგანიზაციის წესდების 51-ე მუხლის შესაბამისად, მოახდინა თავდაცვის უფლების რეალიზება, მას შემდეგ, რაც სამხედრო დარტყმები განხორციელდა ჩვენს სამშვიდობო ფორმირებებზე, დაიღუპა ხალხი და ამას ახლა, კომისიების მუშაობის შემდეგ, უკვე ყველა აღიარებს. ეს ერთი, და მეორე, ის ადამიანები, რომლებიც რუსეთის მოქალაქეები იყვნენ და იმ მომენტში იმყოფებოდენ ჩვენს ტერიტორიაზე, ასევე დაზარალდნენ და დაიღუპნენ ",-განაცხადა მედვედევმა.
რაც შეეხება ცეცხლის შეწყვეტის შესახებ შეთანხმებას, მისი თქმით, მას ხელი საფრანგეთის პრეზიდენტ ნიკოლა სარკოზისთან ერთად მოეწერა და მას "ამა თუ იმ ფორმით დაეთანხმა საქართველოს ხელმძღვანელობა".
"მისი ნამდვილი შინაარსი ვიცით მხოლოდ ჩვენ, და არა მათ, ვინც შემდგომ განმარტებებს აკეთებდა ამ დოკუმენტზე. ამიტომ, რუსეთის მხრის პოზიციაა: ჩვენი განზრახვების შინაარსი სრულიად შეესაბამება იმ ტექსტს, რომელიც არსებობს. არაერთხელ მითქვამს, რომ ჩვენ იოტისოდენადაც არ გადაგვიხვევია ე. წ. მედვედევი-სარკოზის გეგმიდან. ჩვენ გამოვიყვანეთ ჯარები და შევეცადეთ დაგვეწყნარებინა ეს სიტუაცია. იქ ცოტა სხვაგვარადაა ნათქვამი, თუმცა ჩვენ გამოვდივართ იქიდან, რომ ჩვენ გამოვიყვანეთ ჩვენი ჯარები ომამდელ პოზიციებზე, მათ დატოვეს საქართველოს ტერიტორია. ისინი საქართველოს ტერიტორიაზე არ იმყოფებიან და, ამ თვალსაზრისით, ყველაფერი შესრულებულია.
რაც შეეხება სხვა ტერიტორიული წარმონაქმნების ტერიტორიებს, ეს უკვე აფხაზეთისა და სამხრეთ ოსეთისთვის კვალიფიკაციის მინიჭების საკითხია. ჩვენთვის ისინი ამჟამად საერთაშორისო სამართლის სუბიექტები არიან, და იქ ჩვენი ჯარების ყოფნა ეყრდნობა მათი უსაფრთხოების უზრუნველყოფის შესახებ შესაბამის საერთაშორისო ხელშეკრულებებს. იქ ჩვენი სამხედრო ფორმირებები საერთაშორისო ხელშეკრულებების საფუძველზე იმყოფებიან",-განაცხადა მედვედევმა.
http://www.interpressnews.ge/ge/politika/2...s-gegmidan.htmlრუსეთის პრემიერ-მინისტრ, დიმიტრი მედვედევის მტკიცებით, მან საქართველოს პრეზიდენტ, მიხეილ სააკაშვილს პრობლემის მშვიდობიანი გზით მოგვარება შესთავაზა, რის საპასუხოდაც სამი თვის თავზე ცხინვალში "სამხედრო შეჭრა და ადამიანთა მკვლელობები მიიღო".
ამის შესახებ რუსეთის პრემიერ-მინისტრმა, დიმიტრი მედვედევმა "რუსთავი 2"-ის გადაცემა "პოზიციაში" განაცხადა.
"ჩვენ არასდროს გვქონია საომარი გეგმები, ჩვენ ეს არ გვჭირდებოდა. პირიქით, ჩვენ ყველანაირად ვცდილობდით, თავიდან აგვეცილებინა ეს კონფლიქტი, ჩვენ გვესმოდა, რომ პოტენციურად ეს შესაძლებელი იყო. და მაინც, სხვადასხვა სიტუაციებში დასმულ კითხვებზე მე არაერთხელ მიპასუხია: იმის მიუხედავადაც კი, რომ ჩვენ გვქონდა ასეთი ეჭვები, ყველაფერი, რაც მოხდა, ეს, რა თქმა უნდა, იყო ანომალია, ძალიან უხეში შეცდომა, რომელიც სამხედრო დანაშაულში გადაიზარდა. სამწუხაროდ, ბატონმა სააკაშვილმა, როცა შესაბამისი გადაწყვეტილება მიიღო, რა მდგომარეობაში, ეს უკვე აღარ ვიცი, უბრალოდ სახელმწიფოებრივი სტრატეგიული შეცდომა დაუშვა, რის შემდეგაც პრაქტიკულად აღარ დარჩა შესაძლებლობა, რომ შეეკოწიწებინა საკუთარი ქვეყანა. რადგან ჩვენ ამაზე დაწვრილებით ვსაუბრობთ, არ შემიძლია არ გავიხსენო, თუმცა არც ისე დიდი ხანია, რაც ეს ამბავიც მოვყევი, ჩემი პირველი შეხვედრა საქართველოს მოქმედ პრეზიდენტთან. ეს დანამდვილებით ჩვენი პირველი შეხვედრა იყო, პირველი კონტაქტი. მე მას სიტყვა სიტყვით ვუთხარი: პირადად მე, როგორც რუსეთის ფედერაციის ახალი პრეზიდენტი, რომელსაც არ მაქვს ურთიერთობების არანაირი ტვირთი, პერსონალური შეფასებები, რაიმე ისეთი ემოციები, რომლებიც ადამიანებს შორის ყოველთვის წარმოიქმნება, მზად ვარ გავაკეთო ყველაფერი იმისთვის, რომ შევეცადოთ გადავწყვიტოთ ეს პრობლემა მშვიდობიანი გზებით. მე ვთვლიდი, რომ ამის შესაძლებლობა ჯერ არ იყო დაკარგული, იმის მიუხედავად, რომ სიტუაცია იყო ურთულესი. ამაზე მე მივიღე პასუხი: დიახ, მეც მზად ვარ, რომ გადავწყვიტოთ ეს პრობლემა მშვიდობიანი გზებით, მე თქვენი დიდი იმედი მაქვს და გამაჩნია უდიდესი სურვილი ამის მიღწევის. და რა მივიღე სამი თვის პრეზიდენტობის შემდეგ? სამხედრო შეჭრა, ადამიანთა მკვლელობები", - აცხადებს დიმიტრი მედვედევი ტელეკომპანია "რუსთავი 2"-თან ექსკლუზიურ ინტერვიუში.
მისივე განმარტებით, კონფლიქტის მშვიდობიანად მოგვარების შანსი არსებობდა იქამდე, ვიდრე ქვემეხებს არ გაისვრიდნენ და სარაკეტო დანადგარების გაშვება დაიწყებოდა.
"ეს ახალი რეალობები, სამწუხაროდ, უკვე წინასწარ განზრახული იყო – არ მინდა მკვეთრი გამოთქმები ვიხმარო, თუმცა ასე ვიტყვი: მეტად გაუთლელი პოლიტიკით, რომელიც ტარდებოდა აფხაზეთისა და სამხრეთ ოსეთის მიმართ მრავალი წლის განმავლობაში. საქართველოს რომ გარკვეულ სიტუაციაში ისეთი პირობები შეეთავაზებინა, რომლებიც მისაღები იქნებოდა შესაბამისი ტერიტორიული ერთეულებისთვის, რომლებიც იმ მომენტისთვის ჯერ კიდევ საბოლოოდ არ იყვნენ მოწყვეტილი, მაშინ, შესაძლოა, ვითარება სხვაგვარი ყოფილიყო. მაშინ იქ არ იქნებოდნენ კოლექტიური ძალები, იქ არ იქნებოდა სამშვიდობო კონტინგენტი, ჩვენ არ მოგვიწევდა მხარეთა გაშველება და დამშვიდება, საერთოდ სულ სხვა სიტუაცია იქნებოდა. პრობლემის ფესვები ხომ 90-იან წლებშია. ყველაფერი შესაძლოა სხვაგვარად ყოფილიყო. ჩვენ ეს მდგომარეობა მემკვიდრეობით მივიღეთ და ის ჩვენ არ შეგვიქმნია. საჭირო იყო სწორი სახელმწიფო პოლიტიკა წარემართათ 90-იან წლებში. ეს, სამწუხაროდ, არა მარტო საქართველოს ტერიტორიაზე ხდებოდა, სხვა ადგილებშიც, მაგრამ ამის გამო პრობლემა, რა თქმა უნდა, ნაკლებად რთული და ნაკლებად მწარე არ ხდება. ამიტომ იმის თქმა, რომ ამ პრობლემის შექმნა რუსეთის ფედერაციის ჩარევამ განაპირობა, დიდი უსამართლობა იქნება, რადგან ეს შიდა კონფლიქტი ჩვენ არ შეგვიქმნია და არც, გულახდილად ვთქვათ, ასეთი უნიჭო მეთოდით არ ვცდილობდით მის დარეგულირებას. აღარაფერს ვამბობ 2008 წლის აგვისტოში შეიარაღებული ძალების მოქმედებებზე, რასაც, სამწუხაროდ, არ შემიძლია სხვა სახელი ვუწოდო, თუ არა სამხედრო დანაშაული.
მინდა ვთქვა, რომ ეს არ არის რუსეთსა და საქართველოს შორის პრობლემა, ეს არის ურთიერთობის პრობლემა საქართველოსა და თქვენთვისაც და ჩვენთვისაც ახლობელ ხალხებს – ოსებს, აფხაზებს შორის. ეს სწორედ ასეთი პრობლემაა, კიდევ ერთხელ ვამბობ: ეს არ არის სახელმწიფოთა შორის ურთიერთობის პრობლემა, ჩვენ ასეთი პრობლემა არ გვჭირდებოდა. სამწუხაროდ, კიდევ ერთხელ გავიმეორებ, მის გადაწყვეტას საქართველოს სხვადასხვა მმართველები (არ მინდა ცალკე არც ერთის დასახელება) ან უვარგისი მეთოდებით, ან უგუნურად, ან დანაშაულებრივად ცდილობდნენ. და ეს, სამწუხაროდ, ძლიერ დასანანია.
რაც შეეხება იმას, არსებობდა თუ არა სხვა შანსი რუსეთის მხრიდან? - შანსი ყოველთვის არის მანამ, სანამ არ გაისვრიან ქვემეხებს და სარაკეტო დანადგარების გაშვება დაიწყება. ამ მომენტამდე სრულიად ნორმალური შანსი იყო. მე ვუთხარი: ჩამოდით, ჩვენ ერთმანეთს ასტანაში შევხვდით, დავილაპარაკოთ. არანაირი გამოხმაურება, არანაირი სატელეფონო ზარი, 8 აგვისტოს კი ეს ყველაფერი დაიწყო. კიდევ ვიმეორებ, პრობლემის მშვიდობიანად მოგვარების შანსი იყო მანამდე, სანამ ცხინვალზე შეტევის ბრძანება გაიცემოდა", - განმარტავს მედვედევი.
ამასთან, რუსეთის პრემიერ-მინისტრი საქართველოს შეიარაღებულ ძალებს რუსი სამშვიდობოების დაცხრილვაშიც ადანაშაულებს და აღნიშნავს, რომ ამ ინფორმაციის მიღებამ შეძრა.
"რეალური მიზეზი ის არის, რაც მე თქვენ გითხარით – საქართველოს შეიარაღებული ძალების შეჭრა ცხინვალში და რუსეთის ფედერაციის მოქალაქეების დახოცვა. მხოლოდ ეს. სხვა დანარჩენი შეიძლება იყოს შედეგი, შეიძლება რაღაც პროექცია იყოს, მაგრამ უშუალო მიზეზი თავდაცვა იყო. და მე ამაში დღემდე მყარად ვარ დარწმუნებული. რომ არ მომხდარიყო ის, რაც მოხდა და არ დახოცილიყვნენ სამშვიდობოები და რუსეთის მოქალაქეები, რომლებიც იმ მომენტში ცხოვრობდნენ ან იმყოფებოდნენ სამხრეთ ოსეთის ტერიტორიაზე, არანაირი სამხედრო კონფლიქტი არ მოხდებოდა. ეს სრულიად ნათელია. იმის კვალობაზეც კი, რომ იქ იყო დაძაბულობა, იყო რაღაც გამოხდომები, იყო პერიოდული, შესაძლოა, კონფლიქტებიც, ჩვენ მაინც ვახერხებდით დაშოშმინებას და, საერთო ჯამში, ნორმალურ ურთიერთობებს. იცით, რამ შემძრა მაშინ, რადგან ამაზე ვსაუბრობთ? სამწუხაროდ, მომახსენეს, რომ საქართველოს შეიარაღებული ძალების ის ფორმირებები, რომლებიც სამშვიდობო კონტინგენტის შემადგენლობაში შედიოდნენ, ფაქტობრივად, რუსი სამშვიდობოების დაცხრილვაში მონაწილეობდნენ. ეს უკვე ყველა საზღვარს სცილდება! ეს, სამწუხაროდ, არა უბრალოდ დანაშაულია, ეს ყველა საერთაშორისო ნორმის ცინიკურად ფეხქვეშ გათელვაა! სწორედ ეს იყო პირდაპირი და მთავარი საბაბი", - აცხადებს რუსეთის პრემიერ-მინისტრი.
http://www.interpressnews.ge/ge/politika/2...aq-mivighe.html 
მედვედევი საქართველოს შესახებ და, აგვისტოს ომზე
