გავიგეთ, რომ პოლიტიკოსებს ბავშვები ძალიან უყვართ!
ამის დასტურად, საქართველოში არსებულ, ერთადერთ საბავშვო ტელევიზიას რომ დაეხმაროს ვინმე, არ უნდათ?
მაშინ, როდესაც მილიონები იხარჯება ვიღაცეების "ფავორიტი" ტელევიზიების დაფინანსებაზე.
მაშინ, როდესაც სხვა ტელევიზიებზე დავალიანებების ჩამოწერა ხდება, ჩვენ საგადასახადო გვამოწმებს, შემთხვევით რამის გადახდა რომ არ დაგვავიწყდეს.
მაშინ, როდესაც ამ ტელევიზიამ ბავშვები მოწყვიტა უფროსებისათვის განკუთვნილ სერიალებს, საეჭვო წარმომავლობისა და შინაარსის ფილმებს, აგრესიის შემცველ მულტფილმებსა და მსგავს მაკულატურას და სანაცვლოდ შეთავაზა მათი ასაკისა თუ ესთეტიკური განვითარებისათვის აუცილებელი და შესაფერისი გასართობი, შემეცნებითი თუ საგანმანათლებლო პროგრამები, მშობლებს კი საშუალება მისცა შიშისა და უხერხულობის გარეშე დაეტოვებინათ ბავშვები ტელეეკრანთან.
მაშინ, როდესაც ამ ტელევიზიას უყურებენ საქართველოს ყველა ოჯახში, სადაც ერთი ბავშვი მაინც იზრდება. უფრო მეტიც: ქართული ემიგრაციის მოზარდებისთვის ქართულენოვანი საბავშვო ტელეარხი ეროვნული იდენტობის მატარებელი ერთადერთი ყველაზე სანდო წყაროა მშობლიურ ენასთან, ისტორიასა და კულტურასთან ზიარებისთვის.
მაშინ, როდესაც მსგავსი კონცეფციის საბავშვო მაუწყებელი, პრიორიტეტული უნდა იყოს სახელმწიფოსთვის, რომელიც 21-ე საუკუნის მსოფლიოში ინტეგრირებას საკუთარი კულტურულ-ტრადიციული ღირებულებების შენარჩუნებით აპირებს (ყოველ, შემთხვევაში, ასე გვეუბნებიან). ეს კი შეუძლებელია მომავალი თაობის სწორი იდეოლოგიური აღზრდის გარეშე, რისთვისაც ტელევიზია ყველაზე ეფექტური და უალტერნატივო საშუალებაა გლობალიზაციისა და ტექნოლოგიური რევოლუციების ასწლეულში.
ამ ყველაფრის ფონზე, როდესაც ივანიშვილის პრეს-ცენტრს მივმართეთ, რომ პრემიერის მედიასაშუალებეთან უამრავი შეხვედრებიდან, რომელიმეზე მაინც მივეწვიეთ, გვიპასუხეს, რომ მხოლოდ იმ ტელევიზიების წარმომადგენლებს ხვდება, რომელთაც საინფორმაციო გამოშვებებიც პოლიტიკურ ამბებს აშუქებენ.
ამ ტელევიზიამ თუ ვეღარ გაუძლო მონოპოლიზირებულ სარეკლამო ბაზარზე ბრძოლას და შეწყვიტა მუშაობა, წლების შემდეგ, საზოგადოებას აღარ უნდა გაუკვირდეს, საპრეზიდენტო კანდიდატების 34 კაციანი სიიდან ხმის მისაცემს თუ ვერავის აარჩევს!
რადგანაც ამ ტელევიზიას უყურებს საქართველოს მომავალი პრეზიდენტი და მას საქართველოს ისტორიის შესახებ გადაცემეზე გაზრდი თუ ბრაზილიურ საპნის ოპერებზე, დიდი მნიშვნელობა აქვს!
ამიტომაც, პატივცემულო პოლიტიკოსებო!
ბავშვებით პიარის გაკეთებას როცა გადაწყვეტთ, გაიხსენეთ, რომ თქვენი ერთი ჯიპით საბავშვო ტელევიზიის მთლიანი ტექნიკური აღჭურვილობისა და საბავშვო ფილმების ლიცენზიების შეძენა შეიძლება და ეს ყველაზე კარგი საჩუქარი იქნება მათთვის!
და საერთოდაც! თუ თავს დაანებებთ ბავშვების "პოლიტიზირებას" და ბავშვობას აცლით, ფასდაუდებელ სამსახურს გაუწევთ მომავალ თაობას!
უკვე ზედმეტები მოსდით ამ ნაციონალებს რა
