ანა გოჩაშვილი - პრემიერმა განაცხადა, რომ დარჩენილი კაპიტალის მინიმუმ 90%–ს ქვეყანას მოახმარს
22:04 03-09-2013
ანა გოჩაშვილი - პრემიერმა განაცხადა, რომ დარჩენილი კაპიტალის მინიმუმ 90%–ს ქვეყანას მოახმარს საქართველოს პრემიერ-მინისტრ ბიძინა ივანიშვილის პრესსამსახურის თანამშრომლის, ანა გოჩაშვილის ინფორმაციით, პრემიერმა სააგენტო "ბლუმბერგთან" ინტერვიუში პირველად განაცხადა, რომ დარჩენილი კაპიტალის მინიმუმ 90%–ს ისევ ქვეყანას მოახმარს, ისევ უანგაროდ.
როგორც ანა გოჩაშვილი "ფეისბუქის" საკუთარ გვერდზე წერს, იგი თავად ესწრებოდა ინტერვიუს, რომელიც პრემიერ–მინისტრთან "ბლუმბერგის" ჟურნალისტებმა ჰენრი მაიერმა და ჰელენა ბედველმა, იგივე თათია ნიკოლეიშვილმა ჩაწერეს. მისივე თქმით, აღნიშნული ინფორმაციის გაჟღერების ექსკლუზიური უფლება ბიძინა ივანიშვილმა "ბლუმბერგს" მიანიჭა, თუმცა "დასანანია, რომ ასეთმა გავლენიანმა და პრესტიჟულმა გამოცემამ ეს უფლება ვერ ან არ გამოიყენა". ანა გოჩაშვილის ინფორმაციით, თვალშისაცემი ტენდნეციურობის გარდა, სტატიაში ფაქტობრივი შეცდომებია დაშვებული.
"საგენტოს კითხვა ასე ჟღერს: "რას უზამს ივანიშვილი თავის მილიარდებს?" "ბლუმბერგის" დასკვნით, ეს დღეს ყველაზე აქტუალური თემაა, თუმცა გასაოცარი ის არის, რომ სწორედ ამ "აქტუალურ თემაზე" მიღებულ პირდაპირ პასუხს არ აქვეყნებს. საინტერესოა, ბევრია მსოფლიოში ადამიანი, ვინც ოც წელზე მეტია თავისი ხარჯების უდიდეს ნაწილს ქველმოქმედებას ახმარს? კიდევ ვინ ჰყავს ჰელენა ბედველს ჩაწერილი მილიარდერი, ვინც ეტყოდა, რომ მისი ხარჯების 90 %-ზე მეტი მიდის ქველმოქმედებაში, ხშირ შემთხვევაში კი ეს ციფრი 97–99% –ს აღწევს? რომ ქველმოქმედებაზე დახარჯული თანხა 3 მილიარდ დოლარს აჭარბებს და რომ დარჩენილი კაპიტალის ასევე მინიმუმ 90 %–ს ისევ ქველმოქმედებას მოახმარს? როდესაც უშუალოდ პირველი პირისგან იგებ ამ ინფორმაციას, როდესაც შენს მთავარ კითხვაზე - სად წავა ბიძინა ივანიშვილის მილიარდები? რესპოდენტი გპასუხობს, რომ ის ზუსტად ასევე გააგრძელებს ქველმოქმედებას მომავალში (ანუ მისი კაპიტალის უდიდეს ნაწილს 90 %-ზე მეტს უანგაროდ თავის ქვეყანას მოახმარს) და ამას არ აქვეყნებ, ბუნებრივად მიჩნდება ეჭვები სტატიის ავტორების ტენდენციურობაზე", - წერს ანა გოჩაშვილი "ფეისბუქის" საკუთარ გვერდზე.
"საქართველოს ხელგაშლილი პრემიერ-მინისტრი ბიძინა ივანიშვილი პოლიტიკიდან წასვლას გეგმავს", - რამდენიმე დღის წინ ამ სათაურით გამოაქვეყნა ჰენრი მაიერის სტატია ამერიკულმა გამოცემა Bლოომბერგ Bუსინესსწეეკ - მა ბიძინა ივანიშვილზე.
როგორც სტატიის ავტორი აღნიშნავს, საქართველოს მილიარდერი პრემიერ-მინისტრის, ბიძინა ივანიშვილის 94 ჰექტარზე გადაჭიმული, აყვავებული ზღვისპირა ვილა ორი ელექტრონულ კარის მიღმა მდებარეობს.
"მისი ქონება საქართველოს 15,8 მილიარდ დოლარიანი ეკონომიკის 35 პროცენტს შეადგენს და სწორედ ამიტომ, ყველაზე აქტუალური თემა საქართველოში ახლა სწორედ ის არის, თუ რა იქნება შემდეგი, რასაც ივანიშვილი თავისი მილიარდებით გააკეთებს", - წერს ჰენრი მაიერი.
სტატიის ავტორი ასევე აღნიშნავს, რომ ბიზნესმენმა, რომელიც წლების განმავლობაში არ ჩნდებოდა საზოგადოებაზში, 2011 წელს გამოაცხადა, რომ პოლიტიკურ კოალიციას აფინანსებდა, 2012 წლის საპარლამენტო არჩევნებში პრეზიდენტ სააკაშვილის პარტიის დამარცხების მიზნით.
"კოლიცია "ქართულმა ოცნებამ", რომლის სახელწოდებაც პრემიერის შვილის სიმღერიდან მომდინარეობს, დაამარცხა კიდეც პრეზიდენტის პარტია და მოიპოვა კონტროლი საკანონმდებლო ორგანოზე. საპარლამენტო ოპოზიციის ამარად დარჩენილ პრეზიდენტ სააკაშვილს ისღა დარჩენოდა, რომ გასული წლის ოქტომბერში ივანიშვილის პრემიერ-მინისტრობა ეღიარებინა. მაგნატმა მინისტრთა საკუთარი კაბინეტი დანიშნა. სააკაშვილი კი თავის საპრეზიდენტო სასახლეში დარჩა იზოლირებულად", - წერს ჰენრი მაიერი.
"პოლიტიკისგან სიამოვნებას ვერ ვიღებ, ეს ჩემს ხასიათში არ ჯდება", - ციტირებს სტატიის ავტორი ბიძინა ივანიშვილის კომენტარს, რომელმაც Bუსინესსწეეკ-თან საუბრისას ასევე განცხადა, რომ გააგრძელებს მთავრობაზე დაკვირვებას და უარყო გავრცელებული სპეკულაციები იმის თაობაზე, რომ პოლიტიკიდან წასვლის შემდეგ კულისებს მიღმა დარჩება.
"რატომ უნდა ვიყო არაფორმალური ლიდერი, როცა შემიძლია ვიყო ფორმალური ლიდერი", - აცხადებს ბიძინა ივანიშვილი Bუსინესსწეეკ-თან საუბრისას.
"ივანიშვილს მართლაც არ სჭირდება პრემიერ-მინისტრის ხელფასი. შავი ზღვის სანაპიროზე მდებარე მისი ვილა კერძო პლაჟისგან, ორი აუზისგან, ორი გესთჰაუზისგან (პატარა სასტუმროსგან) და ლემურების, ზებრების, ფარშევანგების, თუთიყუშებისა და ფლამინგოების ვოლიერებისგან შედგება. თბილისის გარეუბანში მდებარე მისი მთავარი საცხოვრებელი კი, რომელიც იაპონელ არქიტექტორ შინ ტაკამასუს ეკუთვნის, 50 მილიონი დოლარი ღირს. მის 1 მილიარდ დოლარად შეფასებულ არტ კოლექციაში კი, რომელიც ლონდონში ინახება, 2006 წელს 95 მილიონ დოლარად შეძენილი პიკასოს "დორა მაარი კატასთან ერთად" შედის", - წერს ჰენრი მაიერი.
სტატიის ავტორი ასევე აღნიშნავს, რომ როგორც ბიძინა ივანიშვილმა მასთან საუბრისას განაცხადა, საკუთარი ქონებიდან 3 მილიარდი დოლარი მან საქართველოს მოახმარა და ეს თანხა სამხედროების ფეხსაცმელების, პოლიციელებისთვის კი საპატრულო მანქანების შეძენაში დახარჯა, ისევე, როგორც მუზეუმების, თეატრებისა და ეკლესიების აღდგენაში. მან ასევე აღადგინა გზები, ააშენა საავადმყოფოები და სკოლები მშობლიურ სოფელ ჭორვილაში. ბიძინა ივანიშვილის თქმით, მან 1 მილიარდი დოლარი დააბანდა 6-მილიარდიან კერძო ინვესტირების ფონდში, რომელიც ინვესტიციებს განახორციელებს ტურზში, სოფლის მეურნეობაში, მრეწველობასა და ენერგოპროექტებში მთავრობასთან ერთად.
როგორც ჰენრი მაიერი წერს, სააკაშვილისთვისთვის ივანიშვილის მილიარდებმა საქართველოს, როგორც დემოკრატიული სახელმწიფოს სტატუსი, რისკის ქვეშ დააყენა.
"თუ შენი პირადი ქონება შენივე ქვეყნის მთლიანი შიდა პროდუქტის მნიშვნელოვან ნაწილს შეადგენს, მონოპოლიის დამყარების ძალიან დიდი ცდუნება არსებობს", - მოჰყავს სტატიის ავტორს საქართველოს პრეზიდენტის მიხეილ სააკაშვილის კომენტარი.
"გარკვეულწილად, დასავლელმა ინვესტორებმა მიატოვეს კიდეც საქართველო მას შემდეგ, რაც ხელისუფლებაში მოსულმა ივანიშვილის მთავრობამ გასულ წლის ბოლოს ათობით ყოფილი მაღალჩინოსნების დაკავება დაიწყო, მათ შორის ექს-პრემიერ-მინისტრიც", - აღნიშნავს ჰენრი მაიერი და დასძენს, რომ როგორც მასთან საუბარში ბიძინა ივანიშვილმა განაცხადა, პრეზიდენტობის ვადის ამოწურვის შემდეგ, შესაძლოა, კორუფციის ბრალდებით თავად სააკაშვილიც გასამართლდეს. თუმცა, სააკაშვილი ამ ბრალდებებს "სასაცილოს" უწოდებს.
როგორც სტატიის ავტორი აღნიშნავს, უცხოური კაპიტალის კლებამ საქართველოს ეკონომიკის ზრდის ტემპი წელს 3 პროცენტამდე შეამცირა, როცა 2004-2012 წლებში აღნიშნული მაჩვენებელი 6 პროცენტი იყო. მისივე თქმით, სააკაშვილმა დასავლეთში პატივისცემა კორუფციის დამარცხებით, კერძო კომპანიების პრივატიზებითა და ბიუროკრატიის აღმოფხვრით მოიპოვა. თუმცა, მას ასევე ხშირად ადანაშაულებდნენ ოპოზიციისა და მედიის უფლებების დარღვევაში.
სტატიის ავტორი ასევე ციტირებს ანალიტიკოს ალექსანდრე რონდელის სიტყვებს, რომელიც აცხადებს, რომ ივანიშვილის მემკვიდრე, ვინც მას პრემიერ-მინისტრის პოსტზე შეცვლის, სავარაუდოდ, მისი ერთ-ერთი მოკავშირე იქნება, რომელიც მილიარდერ ივანიშვილს მისცემს შესუსტებულ მთავრობაზე გავლენის მოხდენის უფლებას.
ჰენრი მაიერს სტატიაში კახა ბენდუქიძის ციტატაც მოჰყავს.
"მას უნდა იმ საქართველოში ცხოვრება, რომელიც უსაფრთხო იქნება მისთვის, მისი ოჯახისთვისა და მისი ქონებისთვის, განსაკუთრებით თუ გავითვალისწინებთ იმას, რომ საქართველოში ის ყველაზე დიდი ქონების პატრონია", - განუცხადა ბენდუქიძემ Bლოომბერგ Bუსინესსწეეკ-ს და დასძინა, რომ "ივანიშვილი ქართული პოლიტიკის ნათლიმამა გახდება".
http://www.interpressnews.ge/ge/politika/2...-moakhmars.html 
ბ.ბ ქონების 90% საქართველოს მოვახმარო
