სოციალურ ქსელ „ფეისბუქში” ტელეკომპანია რუსთავი 2-ის მხარდამჭერთა დახურული ჯგუფი შეიქმნა. ჯგუფში 24 660 ადამიანია გაერთიანებული, თუმცა როგორც კომენტარებიდან ირკვევა, მათგან ყველა რუსთავი 2-ის მხარდამჭერი არაა. ბევრმა არც კი იცის, როგორ მოხვდა ამ ჯგუფში და ვინ გააერთიანა. ჯგუფის წევრი ჟურნალისტი ლაშა ბერულავა არ გამორიცხავს ჯგუფში „შემთხვევითი” ადამიანების მოხვედრას და იტოვებს უფლებას, ასეთი წევრები ჯგუფიდან ამოშალოს.
„იმის გათვალისწინებით, რომ ჯგუფი არის „რუსთავი-2“-ის მხარდამჭერთა, დახურული ტიპის ჯგუფი, სადაც მომავალში, შესაძლოა, დაიგეგმოს საზოგადოებრივი აქტივობა, შეკრებისა და მანიფესტაციის სახით, მიუღებლად მიგვაჩნია ამ სახის აქტივობათა განხილვა „რუსთავი-2“-ის მოწინააღმდეგეთა აგრესიული სტატუსებისა და კომენტარების ფონზე.” _ წერს დახურულ ჯგუფში ლაშა ბერულავა.
თუმცა როგორც ჩანს, „ამ სახის აქტივობები” ჯგუფის აქტივისტებმა მომავლისთვის აღარ გადადეს და ქუჩაში გასვლა და მანიფესტაციების დაგეგმვა უკვე დაიწყეს. ილიაუნის პროფესორი ნოდარ ლადარია ქუჩაში გასვლას აუცილებლად მიიჩნევს და ჯგუფის წევრებს სტრატეგიას და ტაქტიკას უზიარებს:
„როგორც არ უნდა წარიმართოს მოვლენები, ქუჩაში გასვლა არის აუცილებელი. აქ კაკუნით საქმე ვერ გაკეთდება, მაგრამ ეს გასვლა უნდა იყოს: 1) ზუსტად გააზრებული; 2) კარგად ორგანიზებული; 3) მიზანმიმართული; 4) მრავალრიცხოვანი. ორგანიზაციასაც მოფიქრება სჭირდება. პარტიული ელემენტი უნდა გამოჩნდეს რაც შეიძლება მწორად.. აქციაზე მიშა მაგარიას სიმღერა ტაქტიკურად წამგებიანია. რაც შეეხება ორგანიზაციულ საქმეს, არიან ადამიანები, ბოლოს და ბოლოს, თვითონ ტელევიზიაშიც, რომლებისთვის ამგვარი საქმე არ არის უცხო და უცნობი. ჰოდა, გამოიჩინონ ფხა.“ _ წერს ლადარია რუსთავი 2-ის მხარდამჭერთა ჯგუფში.
რუსუდან ნიკურაძე აქციის მრავალრიცხოვნობას ეჭვქვეშ აყენებს და ამ მხრივ პესიმისტურადაა განწყობილი, თუმცა ბატონი ლადარია პესიმისტების დახვრეტას გამართლებულად მიიჩნევს.
რუსუდან ნიკურაძე: ზოოპარკის დირექტორის დასაცავ აქციაზე რომ იყო, ის რაოდენობა შეგროვდება რუსთავი2-ის მხარდასაჭერზე? დიდი ეჭვი მაქვს, რომ ვერა. მერე: რუსთავი2 ხელისუფლების წყალობით ისედაც პარტიული თემაა. სოლოლაკში გასცეს ბრძანება მედიასოლიდარობის განულებაზე, ანუ, ესეც არ ექნება კოლექტივს. ამიტომ ნუ გექნებათ მრავალრიცხოვანი აქციის იმედი. მე პესიმისტურად ვარ განწყობილი.თუმცა, აქცია აუცილებელია. ჩემი პესიმიზმის მუხედავად, აქ კრეატიულმა ფოკუს-ჯგუფმა უნდა იმუშაოს, რომელიც საზოგადოებამდე სხვანაირად მიიტანს თემას.
ნოდარ ლადარია: პესიმისტებს მწყობრის წინაშე ხვრეტდნენ. და სწორადაც იქცეოდნენ. ჩვენ ვიბრძვით, აქ კი დამარცხება ჩვეულებრივი ამბავია. ასე რომ…
ჯგუფის წევრმა, გოგი ქავთარაძემ ნოდარ ლადარიას საკითხისადმი მიდგომა დაუწუნა, რაზეც ლადარიასგან ასეთი პასუხი მიიღო : „რავა ყველაფერი უნდა დაგიღეჭოთ!.. ოჰ!”
ჯგუფში ახალი პარტიის დაბადების იდეაც გაჟღერდა:
ციცი მუმლაძე: რუსთავი 2-ის პარტია…. ან რაც გინდა დაარქვით.. მოცემულობაა ისეთი, დრომ მოიტანა ასე…. მგონი იბადება ახალი მოძრაობა: რუსთავი 2 -ის თავისუფლების…. სახელი დაარქვით და ბირთვი, თვითონ ჩვენი რუსთავი 2-ელები იქნებიან…
ჯგუფის ზოგიერთი წევრი უფრო შორს წავიდა და უახლოეს მომავალში გამარჯვებაც დააანონსა, თან ჯგუფის „შემთხვევით” წევრს გამარჯვების შემდგომი ანგარიშსწორებითაც დაემუქრა.
აბაკელია ნანული: მალე გაგანადგურებთ ქოცებო და ეს რუსთავი 2-ის დაცვით დაიწყება. ნაციონალები მოვუღებთ ბოლოს ქოც-ბანდიტთა მოდგმას სულ მალე, მერე რა გეშველება. ალბათ შენც მოგიწევს იმ ბინძურ ქოცებთან ერთად ამოძირკვა, ასე რომ გაიგე თუ გაიგებ რისთვისაც ხდება, ქოცების სამარე გათხრილია უკვე, შეეგუეთ ერთად მოგიწევთ გაქრობა!
რუსთავი 2, საერთო თემა
