„ბებერი ნიანგი" - ქართულ პოლიტიკურ სივრცეში ახალი ტერმინი გაჩნდა. აშკარაა, რომ არჩევნების მოახლოებასთან ერთად პოლიტიკური დუღილის ტემპერატურა პიკს აღწევს. ალბათ, ამით აიხსნება მმართველი გუნდის წევრების ზოგჯერ „არაადეკვატური" და შეურაცხმყოფელი განცხადებები. საკუთარი თანაგუნდელები პარტია „ქართული ოცნების" პოლიტსაბჭოს წევრმა არმაზ ახვლედიანმაც გააკრიტიკა. ახვლედიანმა პარტიაში „საბჭოთა მენტალიტეტზეც" ისაუბრა და პრემიერ მინისტრს გიორგი კვირიკაშვილს „ბებერი პოლიტიკური ნიანგებისგან" პარტიის გათავისუფლებისკენ მოუწოდა.
პირადი ამბიციები თუ საქმიანი მოტივები, რა ხდება პარტია „ქართულ ოცნება - დემოკრატიულ საქართველოში", ვისი მოსაზრება გააჟღერა ახვლედიანმა, რა რესურსი აქვს „ოცნებას" ელექტორატის გულის მოსაგებად და რომელმა ახალმა სახეებმა თქვეს უარი პარტიაში გაწევრიანებაზე? - „პოლიტკომერსანტის" კითხვებს ექსპერტმა გია ხუხაშვილმა უპასუხა:
- გამიჭირდება იმის თქმა თუ რა მოტივები ამოძრავებს არმაზ ახვლედიანს - პირდაპირი ამბიციები თუ საქმის მოტივები, შესაძლოა, ორივე ერთად იყოს. ფაქტია, პარტია „ქართულ ოცნებას" განახლების ძალიან სერიოზული პრობლემა აქვს. პრაქტიკულად, ის „ნიანგების" მძევალია, რომელზეც არმაზ ახვლედიანი საუბრობდა. თუმცა, მათგან შორს არც თვითონ იმყოფება. ამდენად, არც არმაზ ახვლედიანი მიმაჩნია პომპეზურ ფიგურად.
- ზოგიერთი პოლიტიკოსი მიიჩნევს, რომ ამგვარი განცხადებით ახვლედიანი პარტიის ავტორიტეტს არყევს.
- ამაზე უარესი განცხადებები ბევრი მოგვისმენია. მარტო გოგი თოფაძის განცხადება რად ღირს, როდესაც მან თავდაცვის მინისტრი არჩევნების გაყალბებაში დაადანაშაულა. თუმცა, ისიც გასაგებია, რომ ამ განცხადებით ვიღაც უკმაყოფილო იქნება... სინამდვილეში „ქართულ ოცნებაში" სისტემური პრობლემაა. პარტია განახლებას საჭიროებას, ამას თავადაც ხვდებიან და რაღაცის გაკეთება უნდათ, მაგრამ ერთმანეთის მძევლები არიან და ამას ვერ ახერხებენ. დიდი ალბათობით, ამას ვერც მოახერხებენ. ვინც ეს უნდა გააკეთოს, თვითონ არის დიდი დინოზავრი და რანაირად შეცვლის.
- ალბათ ივანიშვილს გულისხმობთ... ამ განცხადებით ახვლედიანმა ივანიშვილის მოსაზრება გააჟღერა? კულუარებში კარგა ხანია საუბარია იმაზე, რომ საარჩევნოდ კოალიციას კვლავ ივანიშვილი უხელმძღვანელებს...
- ვერ გეტყვით, შესაძლოა, ახვლედიანმა თავისი პირადი მოსაზრებაც გააჟღერა, თუმცა, ეს მაინცდამაინც საინტერესო არ არის.
- რატომ მაინცდამაინც ახლა მსგავსი შინაარსის განცხადება? წინასაარჩევნოდ პოლიტიკური ქულების ჩაწერას ცდილობს?
- როგორც წესი, არჩევნების წინ ბრძოლა მზის ქვეშ ადგილის მოსაპოვებლად მწვავდება. ის წინააღმდეგობები, რაც პარტიის შიგნით არსებობს, შიგნით ვეღარ ეტევა და საჯარო სივრცეში ინაცვლებს. ბუნებრივია, არჩევნების წინ ტემპერატურა იმატებს.
- როგორც აღნიშნეთ, „ოცნებას" განახლების პრობლემა აქვს, კონკრეტულად რომელი პოტენციური ახალი სახეებისგან მიიღო პარტიამ უარი?
- პარტიაში გაწევრიანების თაობაზე მოლაპარაკებები მიმდინარეობდა საზრიანთა კლუბის „რა, სად, როდის" წევრებთან, მაგრამ მათგან უარი მიიღეს. ზოგადად, ყველასგან უარი მიიღეს. დღეს „ქართულ ოცნებაში" მიზიდულობის ცენტრი არ არსებობს. პირიქით, ე.წ. პოლიტიკური საფრთხობელები ახალ ადამიანებს აფრთხობენ. როდესაც ეს ადამიანები „ქართული ოცნების" სპიკერებს უყურებენ, მათთან თანამშრომლობის სურვილი არ უჩნდებათ. ადამიანს, რომელსაც ამბიციები აქვს, მძიმე პოლიტიკური წარსულით დამძიმებული არ არის, წესიერია, ქვეყნის მშენებლობაში მონაწილეობის მიღება სურს, ბუნებრივია, „ქართული ოცნების" ცნობადი სახეების ცქერისას მათთან თანამშრომლობა ვერ წარმოუდგენია. შესაბამისად, „ქართულ ოცნებაში" ყოფნა მოდური არ არის. ამიტომ, მასში გაწევრიანებაზე ყველა უარს ამბობს. ბიძინა ივანიშვლის დილემა ზუსტად იმაში მდგომარეობს, რომ მას პარტიის განახლება სურს, მაგრამ არ გამოსდის. უბრალოდ, ალტერნატივა არ არსებობს. შესაძლოა, ფასადზე ორი-სამი ახალი სახე გამოჩნდეს, მაგრამ ხარისხის გაუმჯობესების იმედი არ მაქვს. არამგონია ახალი სახეები წინამორბედებზე უკეთესები იყვნენ.
- „ოცნების" აღმასრულებელმა მდივანმა ირაკლი კობახიძემ აღიარა, რომ ამომრჩეველთან კომუნიკაცია დაკარგეს, მაგრამ არსებობს რესურსი, რომ ეს ხარვეზი გამოასწორონ...
- დღეს „ქართულ ოცნებას" ადმინისტრაციული რესურსის გარდა აღარაფერი აქვს. თუმცა სხვა პარტიებისგან განსხვავებით, „ქართულ ოცნებას" განუზომლად დიდი რესურსი აქვს - მატერიალური თუ ძალაუფლებითი. გარდა ამისა, მისი ამომრჩეველი „ნაციონალების" მიმართ უარყოფითად განწყობილია. შესაბამისად, ამ ადამიანებისთვის „ოცნების" ხმის მიცემის მოტივატორი „ნაციონალებისადმი" ზიზღია. მეორე მხრივ, „ოცნების" მხარდამჭერები საჯარო სექტორში დასაქმებულები არიან. თუმცა, ნატურალური მხარდამჭერები, ვინც „ოცნების" მიმართ პოზიტიურად განწყობილი იქნება, ფაქტობრივად, აღარ არსებობს.
- იმასაც თუ გავითვალისწინებთ, რომ „ოცნებაში" აშკარა დაპირისპირებაა, წინასაარჩევნოდ პარტიას მართლაც რთული პერიოდი უდგას.
- მიუხედავად იმისა, რომ პარტიის წევრებს ერთმანეთი არ უყვართ და ხშირ შემთხვევაში კიდეც ეზიზღებათ, ბიძინა ივანიშვილის მხრებიდან ჩამოსვლა არავის სურს, რადგან იქ თავს კარგად გრძნობენ. ივანიშვილის მხრებზე მსხდომებს სურთ ერთმანეთს მუჯლუგუნები ასე უბრახუნონ. ამის იქით არ მიდიან. შესაბამისად, თეორიულად არ გამოვრიცხავ, რომ კოალიციაში სერიოზული რყევები დაიწყოს. რამდენადაც მათი გამაერთიანებელია საკუთარი უსუსურობა და ივანიშვილის მხრებზე პარაზიტირებაა. შესაბამისად, არაჯსანსაღი ვითარებაა.
სამწუხაროდ, ჩვენი პოლიტიკური ელიტა, ხელისუფლების ჩათვლით, ძალიან ღრმა კრიზისშია. ფაქტობრივად, ქვეყანას არჩევანის გაკეთება ცუდსა და უარესს შორის უწევს. კარგი არჩევანი არ გვაქვს. რაც სავალალო სურათს გვაძლევს.
სალომე გოგოხია
- See more at:
http://politcommersant.ge/detalpage.php?ne...h.GClLIZml.dpuf 
· 
დღეს რომ არჩევნები იყოს ვის მისცემთ ხმას 
