http://accent.com.ge/ge/news/details/26084„აქცენტი“ სახელმწიფო უწყებების მიერ ხელშეკრულებების გაფორმების კუთხით წარმოებული საქმიანობის მონიტორინგს აგრძელებს. ამჯერად სპორტისა და ახალგაზრდობის საქმეთა სამინისტროს მიერ გაფორმებული ხელშეკრულებებით დავინტერესდით და რამდენიმე საინტერესო ფაქტი აღმოვაჩინეთ.
ასე, მაგალითად, 2016 წლის 16 სექტემბერს სპორტისა და ახალგაზრდობის საქმეთა სამინისტრომ გააფორმა ხელშეკრულება „Autokomodex Trnava spol.sro"-სთან (სლოვაკეთი) თანხით 9 410 000 ევრო თბილისში, რუსთავსა და ქუთაისში 20 ერთეული საფეხბურთი/რაგბის სტადიონისა და დამხმარე ნაგებობების საპროექტო-სამშენებლო სამუშაოების შესრულებაზე.
2016 წლის 4 ოქტომბერს იმავე სამინისტრომ გააფორმა ხელშეკრულება შპს „BeldenIndustries LP"-სთან (კანადა) თანხით 54 350 000 აშშ დოლარი ბათუმში, თელავსა და ქუთაისში მრავალპროფილიანი, ორდარბაზიანი სპორტის სასახლეების პროექტირება/მშენებლობაზე, თბილისსა და ქუთაისში ჭიდაობისა და სპორტული მედიცინისა და რეაბილიტაციის ცენტრის პროექტირება/მშენებლობაზე.
ორივე ზემოაღნიშნული ხელშეკრულება გაფორმდა გამარტივებული (უტენდერო) შესყიდვის გზით.
სააგენტო დაინტერესდა, რა საფუძველი არსებობდა ამ ხელშეკრულებების უტენდეროდ გასაფორმებლად, რატომ შეირჩა ეს კომპანიები და რატომ დაფიქსირდა ასეთი თანხები.
მთავარი დასახელებული არგუმენტი ასეთია: 2017 წელს საქართველოში უნდა ჩატარდეს სხვადასხვა საერთაშორისო ტურნირები (ხელბურთი, რაგბი..). თუმცა ამ ჩემპიონატების შესახებ ჯერ კიდევ 3-4 წლის წინ იყო ცნობილი და ხელშეკრულებები მაინც ტენდერების გარეშე გაფორმდა.
2015 წლის 6 ნოემბერს მთავრობის #564 დადგენილებით საქართველოში სპორტული ინფრასტრუქტურის განვითარების მიზნით კომისია შეიქმნა, რომელსაც დაევალა, მოემზადებინა ასაშენებელი ობიექტების სია, პირობები, შეფასების კრიტერიუმები და ასე შემდეგ. ამ დროისთვის 2017 წლისთვის ჩასატარებელი ღონისძიებები უკვე ცნობილია. მივყვეთ თანმიმდევრობით:
2015 წლის 25 დეკემბერს სპორტისა და ახალგაზრდობის საქმეთა სამინისტრომ სახელმწიფო შესყიდვების და სპორტის სამინისტროს გვერდებზე ინტერესთა გამოხატვის თაობაზე განცხადება განათავსა. წინადადების წარდგენის ბოლო ვადად 2016 წლის 23 იანვარი იყო განსაზღვრული. ამ განცხადებას აქვე გთავაზობთ (დანართი 1):
ინტერესთა გამოხატვის დოკუმენტში შესასრულებელი სამუშაოების სავარაუდო ღირებულებად 205 000 000 ლარია გაწერილი და ეს თანხა გაყოფილია 2 ლოტად. დაინტერესებულ კომპანიებს უნდა წარმოედგინათ განფასებული წინადადება მინიმუმ, 1 ლოტზე, უზრუნველეყოთ პროექტის დაფინანსება საკუთარი სახსრებით და წარმოედგინათ დამკვეთისაგან ამ სახსრების მიღების 4-წლიანი (2017-2021) გეგმა-გრაფიკი. ამავე დროს, კომპანიებს უნდა წარმოედგინათ 5%-იანი საბანკო გარანტია, უნდა ჰქონოდათ მინიმუმ, 300 და 100-მილიონიანი გამოცდილება (ლოტების მიხედვით) მსგავსი ობიექტების მშენებლობის და/ან მასალების წარმოების. ანუ, მოთხოვნები ასე გამოიყურება:
როგორც „აქცენტს“ ა/ო შესყიდვების მონიტორინგის ცენტრის ხელმძღვანელმა გიორგი ბაჯელიძემ განუცხადა, „ინტერესთა გამოხატვის მეთოდით, კომპანიების შერჩევა ბუნებაში არ არსებობს“.
„პირველ რიგში, უნდა აღინიშნოს, რომ ინტერესთა გამოხატვის მეთოდით კომპანიების შერჩევა ბუნებაში არ არსებობს, საქმე გვაქვს სპორტის მინისტრ ხეჩიკაშვილის და მაშინდელი პრემიერის - ღარიბაშვილის მანიპულირებებთან. დოკუმენტი ისეა შედგენილი, რომ ნებისმიერ ფირმას შეეძლოს გამარჯვება და შეფასებაც მოხდეს დიდწილად კომისიის წევრების ნებასურვილით. ასე, მაგალითად, ამ დოკუმენტის მიხედვით, გამარჯვებული გამოვლინდება ფასის, ვიზუალის, გადახდის პირობების და განხორციელების ვადების მიხედვით. გაუგებარია, როგორ? ვთქვათ, ერთი კომპანია სთავაზობს 1 000 000 ლარად, 6 თვეში მშენებლობის დასრულებით და გადახდას 4 წელიწადში, წლიური 3%-ით, ხოლო მეორე - 1 200 000 ლარად 3 თვეში განხორციელებით, გადახდით 5 წელიწადში წლიური 2 %-ით. დავამატოთ ვიზუალი... ეს როგორ? ერთის ვიზუალი მომეწონა და მეორესი – ფასი?!“ – განაცხადა ბაჯელიძემ.
ამასთან, მისივე ინფორმაციით, 2016 წლის 16 სექტემბერს ხელშეკრულება გაუფორმდა კომპანიას, რომელმაც ვერც ერთი წაყენებული პირობა ვერ დააკმაყოფილა.
„ვნახოთ, რა კომპანიები შემოვიდნენ. დავიწყოთ იმით, რომ მეორე ლოტზე კომპანიას საბანკო გარანტია არ ჰქონდა წარმოდგენილი. ამასთან, ვისაც ამ ლოტში მიანიჭეს გამარჯვება - “Autokomodex Trnava spol.sro”-ს არანაირი გამოცდილება არ აქვს და დაკავებულია მანქანების ბიზნესით, ისევე, როგორც სპორტის მინისტრი ხეჩიკაშვილი. გარდა ამისა, ამ კომპანიამ არ განაფასა მთლიანი ლოტი და წარმოადგინა ფასი მხოლოდ სტადიონებზე, რითაც ინტერესთა გამოხატვის პირობა დაირღვა. სპორტის მინისტრმა მთავრობასთან ერთად ყველაფერი გააკეთეს იმისთვის, რომ ეს პროცესი გაჭიანურებულიყო, ტენდერი არ ჩაეტარებინათ და საბოლოოდ დაეკონტრაქტებინათ მათ მიერ ლობირებული კომპანიები. 4 წელი იცოდნენ, რომ ჩემპიონატი ტარდება და შეგნებულად მიიყვანეს საქმე იქამდე, რომ მანქანების ბიზნესით დაკავებული კომპანია აშენებს სტადიონებს! რეალურად, რომ ეს უცხოური კომპანია აქვე დააფინანსებს ხეჩიკაშვილის მიერ ლობირებულ კომპანიებს და ნაცვლად დაახლოებით 15 მილიონი ლარისა, რაც შეიძლება, დამჯდარიყო ეს სტადიონები, გადავიხდით 25 მილიონ ლარს!» - ამბობს ბაჯელიძე.
იგივე ეხება, მისივე თქმით, პირველ ლოტს:
«ამ შემთხვევაში უტენდეროდ შესყიდული ობიექტები 53 მილიონი აშშ დოლარი გვიჯდება. გაგიკვირდებათ და ეს კომპანია კანადური Behlen Industries-ია. გასათვალისწინებელია, რომ აქ პროექტირებასაც და მშენებლობასაც ეს კომპანიები ახორციელებენ. ხეჩიკაშვილის სამინისტრომ უნდა შეითანხმოს გადაუდებელ რეჟიმში პროექტი თავისი ხარჯთაღრიცხვებით. გასაგებია, რა ფასებსაც დაადებენ და რას შეითანხმებს მანქანების ბიზნესში მყოფი მინისტრი მანქანების ბიზნესის მქონე კოლეგა კომპანიისგან: როგორც ზემოთ აღვნიშნეთ, სლოვაკური კომპანია მანქანების ბიზნესით არის დაკავებული. რაც მთავარია, რისთვისაც მთელი ეს ორომტრიალი იყო - რომ ბიუჯეტში თანხები არ არის, ამიტომაც კომპანიას თავად უნდა დაეფინანსებინა პროექტი და მერე გადაგვეხადა, ეს პირობაც დაირღვა და კანადურ კომპანიას წინასწარ ვუხდით ავანსის სახით გარკვეულ თანხებს! სამწუხაროა, რომ ეს მაქინაციები საბოლოოდ პრემიერმა კვირიკაშვილმაც მისაღებად სცნო და «მწვანე შუქი აუნთო». აი, ასე გროვდება ის 500 000 000 ლარი, რომელსაც ვკარგავთ ყოველწლიურად. სწორედ ამ დიდი ხარჯების გამო გარბის ლარის კურსი ზევით!“ – დასძინა ბაჯელიძემ.
«აქცენტი» საკითხის შესწავლას განაგრძობს.
საინტერესო სტატიაა
· 
ლარის (დოლარის, ევროს)კურსის საერთო თემა. VOL IV, სხვა თემის გახსნა სასტიკად აკრძალულია!!! 1$=2.48ლ
