ადრინდელი ინფორმაცია.
>
სენაკის სკოლა-გიმნაზიის მოსწავლეები NASA-ს კოსმოსურ ცენტრში გაემგზავრებიან
სენაკის მუნიციპალიტეტის გამგებელი გოჩა დგებუაძე, გამგებლის მოადგილე ნატო ფულარია და შესაბამისი სამსახურების წარმომადგენლები ათასწლეულის ინოვაციის კონკურსში გამარჯვებულ წმ. ალექსი შუშანიას სახელობის სენაკის მართლმადიდებლური სკოლა-გიმნაზიის მოსწავლეთა გუნდის ,,სმართ ქიდსის’’ წევრებს, სკოლა-გიმნაზიის დირექტორს ნინო ჯანჯღავასა და გუნდის მენტორს უტა კილასონიას შეხვდნენ,- ამის შესახებ ინფორმაციას სენაკის მუნიციპალიტეტის გამგეობა ავრცელებს.
"27 თებერვალს, ათასწლეულის გამოწვევის ფონდმა ათასწლეულის ინოვაციის კონკურსში, რომელშიც 88 სკოლა მონაწილეობდა, ცამეტ ფინალისტ გუნდს შორის, პროექტით „გეოლოგიური საფრთხეები“ გამარჯვებულად სენაკელი მოსწავლეების გუნდი გამოარჩია.
გამარჯვებული გუნდის წევრები სკოლა-გიმნაზიის მე-8 კლასის მოსწავლეები: ნათია შამათავა, დეა ჩიტაია, ალექსი ტყებუჩავა, ლალი კოკაია და გვანცა ჩიქოვანი არიან. ხუთივე მოსწავლე აშშ–ში, ჰიუსტონში გაემგზავრება და NASA-ს კოსმოსურ ცენტრში უნივერსიტეტის საგანმანათლებლო პროგრამას გაივლის.
ისინი იქნებიან ამ საგანმანათლებლო პროგრამაში მონაწილე პირველი ქართველები. შეხვედრაზე ისაუბრეს მეწყერის პროგნოზირებადი ხელსაწყოს შექმნის ისტორიასა და სპეციფიკაზე, რომელიც წარმოადგენს შეტყობინების სისტემას მეწყერსაშიში ზონებისთვის.
მოცემული პრობლემის გადასაწყვეტად გამოყენებულია ჰოლის ეფექტზე დამყარებული მეთოდი. შედეგად, მიღებულია მაღალი მგრძნობელობა, სიზუსტე და საიმედოობა. ასეთი სისტემის აწყობა, წარმოება და დანერგვა საქართველოში მარტივად შესაძლებელია, რაც ცხადია, ხარჯეფექტიანია სახელმწიფოსთვის და რაც მნიშვნელოვანია, აპარატის ანალოგი არ არსებობს.
სენაკელი მოსწავლეების მიერ შექმნილმა სენსორულმა აპარატმა უკვე დიდი დაინტერესება გამოიწვია მეცნიერთა შორის. მისი უსასყიდლოდ გადაცემა და დანერგვა უკვე განსაზღვრულია ნოქალაქევის არქეოლოგიური მუზეუმ-ნაკრძალის ტერიტორიაზე. შეხვედრაზე სკოლა-გიმნაზიის დირექტორმა, გუნდის მენტორმა და მოსწავლეებმა გაიხენეს კონკურსზე გამარჯვებისას მოგვრილი ემოციები და დაჯილდოების ცერემონიალი, რომელსაც დედაქალაქის მერი და ამერიკის ელჩი ესწრებოდნენ.
აღნიშნეს, რომ უკვე მიმდინარეობს ფიქრი და მუშაობა ახალ იდეებსა და პროექტებზე. მუნიციპალიტეტის გამგებელმა მიულოცა მათ ეს დიდი წარმატება. ყოველმხრივ მხარდაჭერასა და თანადგომას შეჰპირდა მათ.
ათასწლეულის ინოვაციის კონკურსის მიზანია ახალგაზრდებში ინოვაციებისა და ახალი ტექნოლოგიების შექმნის წახალისება. კონკურსი 2015 წლიდან ხორციელდება და ჯამში 240 გუნდს აქვს მონაწილეობა მიღებული საქართველოს მასშტაბით. კონკურსს ახორციელებს ათასწლეულის გამოწვევის ფონდი აშშ-ის საელჩოს ფინანსური მხარდაჭერით. წელს, კონკურსის მეგობარი გახდა კომპანია ჯეოსელი."- აღნიშნულია სენაკის მუნიციპალიტეტის გამგეობის მიერ გავრცელებულ ინფორმაციაში.
http://www.ipress.ge/new/62741-senakis-sko...smosur-centrshi 
სენაკელი მოსწავლეები NASA-ს ცენტრში, ჟურნალისტი ქართულად და მეგრულად ესაუბრა (ვიდეოები)
