#59862920 · 29 Nov 2022, 21:15 · · პროფილი · პირადი მიმოწერა · ჩატი
დროშა ეს ამბავი, ეროვნული მოძრაობა რომ ახალი დაწყებული იყო, მაშინ მოხდა. ჩვენი მეზობელი თემო მშენებლობაზე მუშაობდა. ვიწროდ ცხოვრობდნენ და ამიტომ კეთილისმსურველთა და სიდედრის რჩევით, გადაწყვიტა სახლის წინ რომ პატარა ბაღი ჰქონდა ის ამოეშენებინა და ბინისთვის საცხოვრებელ ფართად მიემატებინა. თემო მშენებლობის დაწყებას არ ჩქარობდა, სამსახურის შემდეგი დრო მთლიანად ქეიფში ეხარჯებოდა. ბოლოს, როცა ცოლის წუწუნი პახმელიაზე მეტად შემაწუხებელი გახდა, თემომ მშენებლობა ასე დაიწყო, სამსახურიდან სამი მაღალი ბოძი მოიტანა და სახლის წინ ბაღის პერიმეტრზე ჩაასო. მეორე დღეს, სად იყო და სად არა, ეზოში სახლმმართველობის მგელი შემოეხეტა. ასეთ სახეირო საქმეებს უტყუარი ყნოსვით აგნებდა. მართალია იმ დღეს რესტორნებში უკვე ორჯერ იყო ჩამსკდარი, მაგრამ თემოს ბოძების დანახვაზე მაინც პირზე ნერწყვი მოადგა. ჯერ ბოძები კარგად აათვალიერ ჩაათვალიერა და რომ დარწმუნდა რომ საქმე მართლაც სახეირო იყო, სოლიდურობის მოსამატებლად, ჯერ პიჯაკის შეკვრა დაიწყო, მაგრამ რაკი ღილს ვერაფრით ვერ მიაგნო, მხოლოდ ჰალსტუკის წაჭერით შემოიფარგლა. მერე ჩაახველა და სკოლის დიტექტორის ხმით იკითხა: - სახლმმართველობის უფლების გარეშე აქ რა მშენებლობა წამოგიწყიათ?! - რა მშენებლობაო, გაიკვირვა თემომ. - რადა, აი ეს ბოძები აქ რატომ ჩაგირჭვიათო? ხმას მოუმატა და თავი გაიბრაზა მგელმა. თემო ცოტათი შეყოვნდა, ეხლა ამ მგელის დაშოშმინება დამატებით ხარჯებს გამოიწვევდა და თემოს ისედაც სეკვესტრირებულ ბიუჯეტს მძიმე ტვირთად დააწვებოდა. თემოს გეგმით კი ჯერ გაძვირებამდე, დარჩენილი მასალა უნდა ეყიდა, მერე მშენებლობა რაღაცნაირად მაინც დაემთავრებინა და როცა სულს ცოტათი მაინც მოითქვამდა, მერე გადაუგდებდა მგელს კუთვნილ ლუკმას. ეხლა რაღაცნაირად დროის მოგება იყო საჭირო და რაკი თემო კარგა გონებამახვილი და ენამოსწრებული კაცი იყო, ათწამიანი პაუზის შემდეგ, მგელს მთელი სერიოზულობით ასეთი პასუცი გასცა: -ამ ეზოში სამი ეროვნების ხალხი ვცხოვრობთ: ქართველი, რუსი და სომეხე, ჰოდა ამ ბოძებზე გვინდა შესაბამისად, საქართველოს, რუსეთის და სომხეთის დროშები აღვმართოთო. მგელს კი რაღაც ეჭვი შეეპარა ამ პასუხში მაგრამ ეხლა ერთი არაზუსტი სიტყვაც კი შეიძლება უხეში პოლიტიკური შეცდომის ტოლფასი გამხდარიყო, ამიტომ ზედმეტ შარს თავი აარიდა და იქაურობას ჩუმად გაეცალა. მას მერე ბევრმა დროშამ ჩაიარა. მშენებლობის დასამთავრებლად თემოს ხან რამ შეუშალა ხელი და ხან რამ. ჯერ სამაჩაბლოში, სადაც თემოს სოფელი ჰქონდა, სიტუაცია ძალიან აირია, მერე ავადმყოფობამ შეაწუხა და ბოლოს დაზოგილი ფულიც ბანკმა შეუჭამა. სომეხმა მეზობლებმა ფული იშოვნეს და სხვა უბანში გადავიდნენ, მათ ადგილას ახლა სოხუმიდან ლტოლვილები ცხოვრობენ. მოხუცი რუსი ცოლქმარი კი შვილმა ჯერ მისკოვში და მერე პარიზში თავისთან გადაიყვანა. დღესაც დგას თბილისის ერთ ერთ ეზოში სამი ცარიელი ბოძი და ჩემს უდროშოდ დარჩენილ ქვეყანაში მხოლოდ ქარს თუ ეზუზუნება. ქარიც არ იზარებს, ხან ჩრდილოეთიდან დაჰბერს ხან დასავლეთიდა, დროშის შემკერი კი არსად ჩანს.
|