პროვოკაცია კოდორის ხეობიდან
Monday, 12 September 2011 00:00 ერეკლე სტურუა
E-mail Print PDF
კრემლში ახალი გეგმა მუშავდება. გეგმის მიხედვით, მთავარი მოქმედი პირი ამ თამაშში დიდი ხნის წინათ გამქრალი ემზარ კვიციანი იქნება. „პრაიმტაიმს“ ინფორმირებული წყარო უყვება კოდორის ხეობიდან მოსალოდნელ პროვოკაციაზე, რაშიც აქტიურ როლს სწორედ ამ ხეობის „ექსმეთაური“ ემზარ კვიციანი ითამაშებს. როგორც ჩანს, რუსები დარწმუნდნენ, რომ რევოლუციის გზით ხელისუფლების შეცვლა საქართველოში შეუძლებელია. მიუხედავად იმისა, რამდენი მილიონიც არ უნდა ჩადონ ქართულ ოპოზიციაში. როგორც ჩანს, რევოლუციური სქემა კრემლში ტერორისტული სქემით შეიცვალა. კომპეტენტური წყაროს თქმით, ახალ გეგმაში ერთ-ერთ მთავარ როლს, ემზარ კვიციანთან ერთად, ოქრუაშვილიც ასრულებს. კვიციანს კი, თავის მხრივ, საქართველოდან გაქცეულმა ბონდო შალიკიანმა უნდა გაუწიოს დახმარება. ეს, როგორც ჩანს, ახალი ერთობაა, რომელიც რუსულმა ინტერესებმა ან, გნებავთ, რუსულმა ფინანსებმა დააჯგუფა. უფრო სწორად, აიძულა, რომ დაჯგუფებულიყვნენ. კულუარული ინფორმაციით, რუსების გეგმა შემოდგომაზე უნდა ამუშავდეს. უფრო კონკრეტულად კი ემზარ კვიციანი კოდორის ხეობაში საკუთარ რაზმთან ერთად დაზამთრებამდე უნდა გამოჩნდეს და იქიდან საომარი რიტორიკით ულტიმატუმები დააყენოს. ამას კი, ბუნებრივია, სამხედრო ტიპის პროვოკაციები მოჰყვება. სწორედ გეგმის ამ მონაკვეთში ჩნდება შალიკიანი თავისი ფინანსებითა და იარაღით. სხვათა შორის, რუსეთის მმართველი ელიტა საკმაოდ დიდი ხნის მანძილზე ცდილობდა, დაერწმუნებინა მსოფლიო, რომ პანკისის ხეობაში ტერორისტთა ბანაკები არსებობდა და საჭირო იყო ანტიტერორისტული ოპერაციის ჩატარება. თუმცა მაშინ არაფერი გამოუვიდათ და ახლა, როგორც ჩანს, ერთხელ უკვე გადაგდებული გეგმის ხელახლა ამუშავება აქვთ ჩაფიქრებული...
რუსული ფულის ძალა, თორემ თავის დროზე ბონდო შალიკიანიცა და ემზარ კვიციანიც საკუთარ ნომერ პირველ მტრად სწორედ ოქრუაშვილს ასახელებდნენ. მიზეზი ორივეს საკმარისზე მეტი ჰქონდა.
ირაკლი ოქრუაშვილის მინისტრობის პერიოდში კოდორის ხეობაში შეიარაღებული ფორმირება – „მონადირე“ არსებობდა. მას ემზარ კვიციანი ხელმძღვანელობდა და თან ცდილობდა, საკუთარი ფორმირება თავდაცვის სამინისტროს შემადგენლობაში შეეყვანა. ამაზე მაშინდელი მინისტრის, ირაკლი ოქრუაშვილის ნებართვა სჭირდებოდა, რასაც ვერაფრით მიაღწია კვიციანმა. მეტიც, მაშინ ოქრუაშვილმა ბრძანება გასცა და „მონადირე“ მთლიანად განაიარაღეს. მინისტრის ბრძანების შესრულებას კვიციანის პროტესტი და დაუმორჩილებლობის გამოცხადება მოჰყვა. შეიძლება ითქვას, რომ მაშინ კვიციანი ოქრუაშვილთან ბრძოლაში დამარცხდა და თავი ოკუპირებულ აფხაზეთს შეაფარა. მისი დის, ნორა კვიციანის დაპატიმრების შემდეგ კი ის საერთოდ გაქრა. სწორედ კვიციანის მხარდაჭერისთვის აღმოჩნდა მაშინ ციხეში ირაკლი ბათიაშვილიც. დღეს კი ორივე ირაკლი ოპოზიციაშია და ორივესთვის ბევრისმთქმელია ემზარ კვიციანის სახელი და გვარი. ბათიაშვილისთვის თუ ის წარსულია, ოქრუაშვილისთვის მოქმედი პარტნიორი ხდება...
რაც შეეხება ბონდო შალიკიანს, მის ცხოვრებაში ყველაზე მწარე წუთები სწორედ „ოქროს“ უკავშირდება. ალბათ, სრულიად საქართველომ იხილა თავის დროზე ოქრუაშვილის შუაღამის „შევარდნა“ შალიკიანის სახლში მისივე დასაპატიმრებლად... წესით, არც შალიკიანს უნდა უნდოდეს ოქრუაშვილთან შეთანხმებულად მოქმედება, მაგრამ, როგორც ჩანს, ეს სავალდებულოა. რუსული გამოთქმისა არ იყოს, ვინც იხდის, მუსიკასაც ის უკვეთს. ჰოდა, ამჯერად რუსეთი იხდის და მას ოქრუაშვილისა და კვიციან-შალიკიანის „ამღერებაც“ ერთად სჭირდება...
http://www.ptpress.ge/index.php?option=com...litika&Itemid=2 
· 
ოკუპირებული აფხაზეთი და სამაჩაბლო
