დრონი.ჯი“-ს საგამოძიებო ჯგუფმა „ვისოლისა“ და „სოკარის“ საიდუმლო გარიგება გაშიფრა
გაზეთ „დრონი.ჯი“-ს საგამოძიებო ჯგუფმა კომპანია „ვისოლის“ შესახებ სენსაციური ინფორმაცია მოიპოვა. ჩვენ მიერ მოძიებული დოკუმენტებითა და სპეციალური საგადასახადო ანგარიშფაქტურებით დასტურდება, რომ „ვისოლი“ ბენზინს მისი კონკურენტისგან – „სოკარ ჯორჯია პეტროლიუმისგან“ ყიდულობს და ბაზარზე როგორც იტალიურ პროდუქციას, ისე ასაღებს.
მეტიც, საგადასახადო სამსახურებში დევს კონკრეტული დოკუმენტები, რომლის თანახმადაც „ვისოლი“ აზერბაიჯანული „სოკარის“ მიერ შემოტანილი საწვავის მომხმარებელია, რის გამოც კომპანია „ვისოლი“, რომელიც თავს იტალიური „აპით“ იწონებს, შესაძლოა თაღლითობასა და მომხმარებლის მიზანმიმართულ მოტყუებაში ამხილონ.
მაგალითად, „დრონი.ჯი“-ს საგამოძიებო ჯგუფის მიერ მოპოვებულ ანგარიშ-ფაქტურებში მითითებულია, რომ „ვისოლ პეტროლიუმ ჯორჯია“ საწვავს „სოკარ ჯორჯია პეტროლიუმისგან“ ყიდულობს. თუ ამაში ვინმეს კიდევ ეჭვი ეპარება, აი კონკრეტული მტკიცებულებაც...
1. ანგარიშფაქტურა ნომერი 676119, გამყიდველი, შპს „სოკარ ჯორჯია პეტროლიუმი“ (თბილისი, ბურძგლას ქუჩა ნომერი 56), საიდენტიფიკაციო ნომერი, 202352514, მყიდველი – სს „ვისოლ პეტროლიუმ ჯორჯია“ (ჭავჭავაძის ქუჩა 4ბ), საიდენტიფიკაციო ნომერი – 202161098, საქონლის დასახელება – დიზელის მოტ. საწვავი, დღგ-ს სარეგისტრაციო სერტიფიკატის ნომერი: 075645, გადახდის პირობები – უნაღდო.
ამ ანგარიშფაქტურის მიხედვით „ვისოლმა“ „სოკარისგან“ ათეულობით ტონა დიზელის საწვავი შეიძინა, ხოლო 2010 წლის 5 ივნისს „სოკარს“ თანხაც გადაურიცხა.
2. ანგარიშფაქტურა ნომერი: 701093, 12 მაისი, გამყიდველი, „შპს სოკარ ჯორჯია პეტროლიუმი“, მყიდველი – „ვისოლ პეტროლიუმ ჯორჯია“, საქონლის დასახელება – ბენზინი, „რეგულარი“, საქონლის მთლიანი ღირებულება დღგ-სა და აქციზის ჩათვლით – 205808.73, ანგარიშსწორების თარიღი – 11.06.2010.
„დრონი.ჯი“-ს აქვს ინფორმაცია კონკრეტული პიროვნებებისა და არასამთავრობო ორგანიზაციებისგანაც, რომლებიც ხაზგასმით, ყოველგვარი ქვეტექსტის გარეშე ამტკიცებენ, რომ ე.წ. იტალიური „აპი“ სინამდვილეში „სოკარის“ მიერ შემოტანილი აზერბაიჯანული საწვავის სინთეზია.
„ვისოლთან“ დაკავშირებით პრეტენზიები აქვთ პოლიტიკურ პარტიებსაც. მაგალითად, ლეიბორისტები აცხადებენ, რომ ეს კომპანია ხალხის გატყავების ხარჯზე, თაღლითობით მდიდრდება. საყურადღებოა სამართალდამცველების ბოლოდროინდელი გააქტიურებაც. კომპანია „ენერჯი ინვესტის“ ირგვლივ განვითარებული მოვლენები და მისი გენერალური დირექტორის, გენო მალაზონიას გადასახადების განსაკუთრებით დიდი ოდენობით დამალვის ბრალდებით დაკავება, შესაძლოა მიჩნეული იქნას როგორც სიგნალი...
„დრონი.ჯი“-ს საგამოძიებო ჯგუფი დიდი ხნის განმავლობაში იკვლევდა ნავთობკომპანიების საქმიანობას. ჩვენ ვესაუბრეთ როგორც „სოკარის“, ისე „ვისოლის“ წარმომადგენლებსაც.
„ვისოლის“ თანამშრომლები მთელი ხმით გვარწმუნებდნენ თავიანთი კომპანიის კეთილსინდისიერებაში. ჩვენ მათი ფიცი გვწამს, მაგრამ ანგარიშფაქტურები, კონკრეტული დოკუმენტები და საგადასახადო სამსახურების წარმომადგენელთა კომენტარები გვაკვირვებს.... მითუფრო მაშინ, როცა „სოკარში“ არც მალავენ, რომ „ვისოლი“ მათი კლიენტია...
„დრონი.ჯი“-ს საგამოძიებო ჯგუფმა შეძლო ინფორმაციის მოპოვება და იმის დადგენაც, თუ რა სქემით თამაშობს „ვისოლი“ ბაზარზე... სქემა ასეთია: კომპანია „ვისოლი“ საწვავს ყიდულობს „სოკარისგან“, შემდეგ კი საწვავის ნაწილს ასაღებს როგორც იტალიურ „აპს“, ნაწილს კი – როგორც აზერბაიჯანულ ბენზინს.
არასამთავრობოებს პრეტენზიები აქვთ იმაზეც, რომ „ვისოლი“ მომხმარებელს ლიტრაჟშიც ატყუებს. თუ თქვენს ავტომობილში 10 ლიტრი „ვისოლის“ საწვავის ჩასხმა გადაწყვიტეთ, არასამთავრობოების მტკიცებით, დარწმუნებული არ უნდა იყოთ იმაში, რომ „ვისოლში“ 10 ლიტრის ნაცვლად 9 ლიტრს არ ჩაგისხამენ.
„დრონი.ჯი“-ს საგამოძიებო ჯგუფი განაგრძობს ამ საკითხზე მუშაობას. მტკიცებულებებით გამყარებულ ჩვენ მიერ მოძიებულ მასალებს უფრო ვრცლად უახლოეს ნომერში გამოვაქვეყნებთ...
ბექა კემულარია, ორგანიზაცია „პროტესტი ბენზინის ქართულ ფასებს“ წევრი: „სოკარშიც“ ამბობენ, რომ ბაზარზე ნავთობპროდუქტების სამოცდაათი პროცენტი ჩვენ შემოგვაქვსო. ამ დროს კი „ვისოლის“ ხელმძღვანელობა აცხადებს, ოცდაერთი პროცენტი ჩემი შემოტანილიაო. გამოდის, რომ ბაზარზე სხვა კომპანიებს ადგილი აღარ რჩებათ. ეს და სხვა ინფორმაციები გვაძლევს იმის თქმის საფუძველს, რომ „ვისოლი“ ბენზინს „სოკარისგან“ ყიდულობს“.
„დრონი.ჯი“ სტატისტიკის დეპარტამენტსაც დაუკავშირდა. მათი მონაცემებიდან გამომდინარეც შეიძლება ითქვას, რომ „ვისოლს“ ნავთობპროდუქტები იტალიიდან არ შემოაქვს (ან კვალის დაფარვის მიზნით, მხოლოდ მცირე რაოდენობით შემოაქვს). რეალობა კი ისაა, რომ „სოკარის“ მიერ აზერბაიჯანიდან შემოტანილ საწვავს „ვისოლი“ ყიდულობს და იტალიურ საწვავად გვასაღებს...
კითხვაზე, რატომ ყიდულობს საწვავს „სოკარისგან“ „ვისოლი“, მისი წარმომადგენლებისგან შემდეგი შინაარსის პასუხი მივიღეთ: „ვისოლი“ მაღალოქტანური პროდუქტების იმპორტს საქართველოში იტალიიდან ახდენს. სწორედ ერთი თვის წინ იტალიელმა პარტნიორებმა ანკონაში, „აპის“ გადამამუშავებელ ქარხანაში ჟურნალისტების ჯგუფთან ერთად მიგვიწვიეს იმ ახალი ტექნოლოგიების გასაცნობად, რომლითაც უახლესი ევროპული სტანდარტის – „ევრო ხუთის“ იტალიური საწვავი იწარმოება.
პროდუქტების სერტიფიკატები, რომლის იმპორტსაც „ვისოლი“ იტალიიდან ახდენს, კომპანიის ვებგვერდზე საჯაროდაა ხელმისაწვდომი.
ამას გარდა, საქართველოში, ფოთის პორტში შემოსული ტანკერიდან იტალიური საწვავის გადმოტვირთვა არ ხდება მანამ, სანამ შGშ-ის საერთაშორისო დამოუკიდებელი ლაბორატორია არ დაადასტურებს, რომ პროდუქტების ხარისხობრივი მაჩვენებლები შეესაბამება იტალიაში გაცემულ თანმხლებ სერტიფიკატებს.
მაღალოქტანური საწვავის წარმომავლობას მომხმარებელი ადვილად გრძნობს და ამიტომაც სარგებლობს „აპი“-ს იტალიური პროდუქტები პოპულარობით“.
ალბათ შეამჩნიეთ, რომ „ვისოლის“ მიერ „დრონი.ჯი“-თვის გადმოგზავნილ ამ კომენტარში კომპანიას არ უარუყვია „სოკარისგან“ საწვავის ყიდვის ფაქტი.
კომპანიის წარმომადგენლები თავისივე კომენტარში აპელირებენ არა „სოკარისგან“ საწვავის შესყიდვის უარყოფაზე, არამედ იტალიური „აპის“ განსაკუთრებულობაზე. შეიძლება თქვენ ადვილად დარწმუნდეთ იმაში, რომ იტალიური „აპი“ მართლაც განსაკუთრებულია, თუმცა უკვე აღარავის სჯერა ის, რომ ამ „განსაკუთრებული საწვავის“ რეალიზაციის წყარო „ვისოლია“.
„დრონი.ჯი“, როგორც უკვე აღვნიშნეთ, მომავალშიც გააგრძელებს ნავთობკომპანიებთან დაკავშირებული დაფარული მაქინაციების გამოაშკარავებასა და გაშუქებას. ვიმედოვნებთ, რომ ჩვენ მიერ მოძიებულ მტკიცებულებებზე „ვისოლი“ აღიარებით უპასუხებს, ხოლო მისი ხელმძღვანელი – ფხაკაძე მეტ პასუხისმგებლობას იგრძნობს მომხმარებლის წინაშე.
http://www.#####.##/?article_id=692&lang=geo 
· 
პროტესტი საწვავის ქართულ ფასებს!, 8 მაისი, 14:00 საათი, ვარდების მოედანი!
