კონკურენციის სააგენტომ ნავთობპროდუქტების ბაზრის შესწავლა დაიწყო
ონკურენციის სააგენტომ, მაღალი საზოგადოებრივი ინტერესიდან გამომდინარე, საკუთარი ინიციატივით, ნავთობპროდუქტების ბაზარზე არსებული მდგომარეობის შესწავლა დაიწყო. სააგენტოს თავმჯდომარის, გიორგი ბარაბაძის შესაბამისი ბრძანებით განისაზღვრა მოკვლევის ჯგუფი.
ამასთან, კონკურენციის სააგენტო კანონმდებლობის შესაბამისად, საკუთარი ინიციატივით ახორციელებს ცალკეულ სასაქონლო ბაზრებზე დაკვირვებას. ამ ეტაპზე მიღებულია გადაწყვეტილება ყავის სასაქონლო ბაზრის შესწავლის შესახებ.
ამავდროულად, კონკურენციის სააგენტოში ოფიციალურად შესულია ორი განცხადება, ფქვილის პრობლემატიკასა და წყალტუბოში თერმული წყლების შესაძლო მონოპოლიზაციის საკითხებთან დაკავშირებით.
ამ ეტაპზე აღნიშნული განცხადებების დასაშვებობის განხილვა მიმდინარეობს. კანონით დადგენილ ვადაში, მიღებულ იქნება გადაწყვეტილება კანონმდებლობით განსაზღვრული შემდგომი პროცედურების შესახებ, რაზეც საზოგადოებას მიეწოდება შესაბამისი ინფორმაცია.
მოკვლევისთვის სააგენტოს ეძლევა 3 თვემდე ვადა, განსაკუთრებული სირთულის საქმის შემთხვევაში, ეს ვადა, შესაძლოა, გაგრძელდეს 10 თვემდე.
ერთ-ერთი პირველი, ვინც კონკურენციის სააგენტოს ნავთობიმპორტიორთა საქმიანობის შესწავლის მოთხოვნით მიმართა არასამთავრობო ორგანიზაცია „ადამიანი, კანონი, თავისუფლებაა“. ორგანიზაციაში აცხადებდნენ, რომ ამ სფეროში კარტელური გარიგების რეალური ნიშნები მას შემდეგ გაჩნდა, რაც ბაზარზე "სან პეტროლიუმ ჯორჯია" გამოჩნდა "გალფის" ბრენდით და ბაზრიდან გააძევა რამდენიმე მოთამაშე, კერძოდ, "მაგნატი", "სენტა" და "ეკო ჯორჯია".
„გარდა ამისა, წლების განმავლობაში საწვავის და ბუნებრივი აირის ექსკლუზიურ იმპორტს ახორციელებდა "სოკარი", - ნათქვამი იყო ორგანიზაციის განცხადებაში.
კონკურენციის სააგენტო სრულყოფილად მხოლოდ თვე-ნახევარია, რაც ამოქმედდა. კონკურენციის სააგენტოს თავმჯდომარე პრემიერმინისტრმა ირაკლი ღარიბაშვილმა 15 აპრილს დანიშნა. თანამდებობა დაიკავა პროფესიით სამართალმცოდნე ასოცირებულმა პროფესორმა გიორგი ბარაბაძემ, რომელიც პრემიერ-მინისტრთან არსებული ეკონომიკური საბჭოს აპარატის იურიდიული სამსახურის პირველი კატეგორიის მრჩეველი იყო.
კონკურენციის სააგენტოს თავმჯდომარის დანიშვნიდან სააგენტომ ფუნქციონირება 5 თვის შემდეგ დაიწყო.
სააგენტო „კონკურენციის შესახებ" საქართველოს კანონის შესაბამისად შეიქმნა და მისი ძირითადი მიზანია საქართველოში ბაზრის ლიბერალიზაციის, თავისუფალი ვაჭრობისა და კონკურენციის ხელშეწყობა. კონკურენციის სააგენტო დამოუკიდებელი საჯარო სამართლის იურიდიული პირია და ანგარიშვალდებულია უშუალოდ საქართველოს პრემიერ-მინისტრის წინაშე.
http://commersant.ge/?menuid=11&id=17185&lang=1ვითომ იზავენ რამეს?
აი როგორ გვძარცვავენ!, 50 თეთრიანი, რეკორდული სხვაობა!
