Fabian
წოლხვრელის აჩრდილი
ჯგუფი: Moderators
წერილები: 20847
წევრი No.: 115438
რეგისტრ.: 11-May 10
|
#28495226 · 27 Nov 2011, 11:58 · · პროფილი · პირადი მიმოწერა · ჩატი
თბილისის უკანასკნელი "მწვანე კუნძული" საფრთხეშია
"ვაპირებ, ბოლომდე ვიბრძოლო იპოდრომის გასხვისებისა და განადგურების პროცესის შესაჩერებლად, რაც დიდ საფრთხეს უქმნის ჩვენი მოქალაქეების ჯანმრთელობას", - განგვიცხადა "კონსერვატიული პარტიის" დედაქალაქის საქმეთა მდივანმა, პროფესიით ეკოლოგმა ლაშა ჩხარტიშვილმა, რომელიც ამ საკითხზე უკვე რამდენიმე წელია მუშაობს:
- ჯერ კიდევ შევარდნაძის მმართველობის პერიოდში იპოდრომის ტერიტორია იჯარით გადაეცა კომპანია "ჟოკეი კლუბს", რომლის დამფუძნებლებიც იყვნენ მეტად საეჭვო წარსულის მქონე პირები. 2006 წელს იპოდრომის მფლობელ კომპანიებს შორის გამოჩნდა კიდევ ერთი - "თბილისის იპოდრომი", 2007 წელს კი დაიწყო ტოტალური შეტევა იპოდრომის ტერიტორიაზე. სწორედ იმხანად გასხვისდა იპოდრომის ერთი, შედარებით მცირე მონაკვეთი - 1,2 ჰექტარი. საბოლოოდ იპოდრომის დიდი ნაწილი ხელში ჩაუვარდათ კულტურის მინისტრ ნიკა რურუას ძმას, გიორგი რურუას, ვლადიმერ კვარაცხელიას, ლაშა ჯაიანს, აგრეთვე - "თბილისის იპოდრომისა" და "ჟოკეი კლუბის" დამფუძნებლებს.
ჩვენ მიერ მოპოვებული საჯარო ინფორმაციის ანალიზის საფუძველზე ჩანს, რომ მთლიანობაში, სულ რაღაც 11-12 მილიონი დოლარი გადაიხადეს უზარმაზარ ფართობში - ლაპარაკია 62,5 ჰექტარზე. ეს არის უმნიშვნელო თანხა იმასთან შედარებით, რაც ეს ტერიტორია ღირდა - დაახლოებით 20-30-ჯერ ნაკლები საბაზრო ღირებულებაზე. მათ ერთადერთი მიზანი ჰქონდათ: დაწყებულიყო იპოდრომის ტერიტორიის ათვისება. ამ პროცესში წამყვანი როლი ითამაშა ეკონომიკის სამინისტრომ, ქალაქ თბილისის მერიამ, და რა თქმა უნდა, სააკაშვილმაც, რომელიც ამ ყველაფრის ზედამხედველი იყო.
იმხანად შევძელით, შეგვეჩერებინა ეს ბარბაროსული პროექტი, რომელიც იპოდრომის ტერიტორიაზე მასობრივი მშენებლობის დაწყებას ითვალისწინებდა, კერძოდ, იქ უნდა დაწყებულიყო 56-სართულიანი ნაგებობის მშენებლობა. თუმცა, დღეს ხელისუფლებამ გაბედა და მშენებლობა წამოიწყო ვაკე-საბურთალოს მხარეს მდებარე მოზრდილ ტერიტორიაზე, სადაც უკვე მოჭრილია ოცი ხე, ხოლო ფესვები დაუზიანეს 50-ამდე მწვანე ნარგავს, სულ მცირე, ასამდე ხეს კი გაჩეხვის საფრთხე ემუქრება. ეს პროცესი დაიწყო დაახლოებით ორი კვირის წინ და ჩვენც პირველი დღიდანვე დავიწყეთ აქტიური ბრძოლა ამ უკანონობის წინააღმდეგ. ამასთანავე, ვცდილობთ, სასამართლოსაც მივმართოთ, გავასაჩივროთ ეს დანაშაულებრივი მოქმედება და შევაჩეროთ ბარბაროსობა.
- ბატონო ლაშა, თუ იცით, ვინ აწარმოებს ამ მშენებლობას?
- აშკარაა, რომ ამ მშენებლობასთან კავშირი უნდა ჰქონდეს გიორგი რურუას, როგორც იპოდრომის ტერიტორიის ერთ-ერთ მფლობელს. ასევე, ჩანს გია უდესიანის მონაწილეობაც. ეს არის ყოფილი მაღალჩინოსანი, რომელიც საზოგადოებაში ცნობილია, როგორც ზონდერბრიგადირი, რომლის სინდისზეცაა საკრებულოს ოპოზიციონერ დეპუტატებზე თავდასხმა 2005 წელს. ამ ადამიანის სინდისზეა არაერთი დარბევა 26 მაისის წინა დღეებშიც... ახლა კი თბილისელებს ებრძვიან არა ტყვიითა და ხელკეტით, არამედ ირიბი მეთოდით: ცდილობენ გააუქმონ დედაქალაქში შემორჩენილი ყველაზე დიდი მწვანე კუნძული, თვითონ კი ფული იშოვნონ ჩვენი ჯანმრთელობისა და სიცოცხლის ხარჯზე.
- იპოდრომის ტერიტორიას ხშირად უწოდებენ თბილისის ფილტვებს. რას დაკარგავს დედაქალაქი იქ არსებული მწვანე საფარის მოსპობით?
- მე, როგორც ეკოლოგი, სრული პასუხისმგებლობით ვაცხადებ, რომ იპოდრომის ტერიტორიას აქვს უდიდესი მნიშვნელობა თბილისის ჰაერის გაწმენდისათვის. ყველამ ვიცით, რომ თბილისი განთავსებულია ბუნებრივ ქვაბულში და მისი განიავება სერიოზული პრობლემაა. თბილისში ძალიან ცოტაა, ასე ვთქვათ, სავენტილაციო არხი, რომელთა დახმარებითაც დაბინძურებული ჰაერის გაწმენდა ხდება. დედაქალაქის ცენტრში ასეთი სავენტილაციო არხი მხოლოდ ორია:
მდინარე ვერეს ხეობა, რომლის დიდი ნაწილიც ავტომაგისტრალად გადააქციეს, მეორე კი ხევი, რომელიც გასდევს ვერეს ხეობას ქალაქის ფარგლებში უნივერსიტეტის მაღლივი კორპუსიდან მოყოლებული და რომლის გაგრძელებაც არის იპოდრომის ტერიტორია. სწორედ ამ გზით შემოდის სუფთა ჰაერი თბილისის ცენტრში. იპოდრომის ტერიტორიაზე მრავალსართულიანი სახლების აშენება და მწვანე ნარგავების გაჩეხვა უაღრესად მავნე ზეგავლენას მოახდენს ქალაქის ეკოლოგიაზე. სამწუხაროა, რომ სააკაშვილმა, რომელიც ყველაზე მეტს ლაპარაკობდა ეკოლოგიაზე, შევარდნაძესთან შედარებით, ათჯერ მეტი ბაღი და პარკის ტერიტორია გაყიდა, გაჩეხა და მათ ადგილას პოლიციისა და გამგეობის შენობები, რესტორნები და მაღაზიები ააშენა.
შეგვიძლია, გავიხსენოთ, როგორ გაიჩეხა "მზიური", ვაკის პარკი, გავიხსენოთ ჭადრების ბარბაროსული ჩეხვა აღმაშენებლის გამზირზე, ჯანაშიას ქუჩის კუთხეში არსებული სკვერი, ჭავჭავაძის 51-ე ნომერში არსებული ულამაზესი ბაღი, დიღმის პარკი და სხვა მრავალი... ხელისუფლებაში მოკალათებულმა ადამიანებმა უდიდესი ზიანი მიაყენეს თბილისსაც და მის მკვიდრებსაც. ამის დასტურია ისიც, რომ ბოლო ხუთი წლის განმავლობაში საშუალოდ სამჯერ გაიზარდა სიმსივნურ დაავადებათა მაჩვენებელი.
თბილისის ტყე-პარკების დიდი ნაწილი უკვე გაჩეხილია, დარჩენილი ნაწილის გაჩეხვა კი მომავალში იგეგმება. აუცილებლად უნდა გავამახვილო მკითხველის ყურადღება იმ პროექტზეც, რომლის მიხედვითაც მერია აპირებს თბილისის ბაღებისა და პარკების იჯარით გადაცემას კერძო პირებზე, ბუნებრივია, ამ ტერიტორიებზეც შენობა-ნაგებობები აშენდება, მაგალითად, მუშთაიდი უკვე გაიცა 49-წლიანი იჯარით კომპანიაზე, რომელშიც საკრებულოს "ნაციონალური მოძრაობის" დეპუტატის ალექსანდრე ნიკოლაიშვილის ფინანსური ინტერესებია.
- როგორ ფიქრობთ, შეინარჩუნებს იპოდრომი თავის სახეს და დანიშნულებას?
- ლისის ტბაზე სიმბოლურად აშენებული რანჩო ნამდვილად არ არის იპოდრომი, არც თავისი ადგილმდებარეობით და არც სხვა სტანდარტებით. საბურთალოზე მდებარე იპოდრომის ტერიტორიას კი აქვს ყველა მახასიათებელი, რაც უნდა ჰქონდეს იპოდრომს. აღსანიშნავია, რომ იპოდრომის ტერიტორიის ერთი, საკმაოდ დიდი ნაწილი ბიძინა ივანიშვილმა გადაარჩინა, რომელმაც 2009 წელს შეისყიდა, ასობით მცენარე დარგო და ამით დაიცვა ეს ფართობი სახლების მშენებლობისაგან. რაც შეეხება იპოდრომის მეორე ნაწილს, იქ მრავალწლიან ხეებს ჩეხენ და იქაურობას ანადგურებენ. ამჟამინდელმა მფლობელებმა იპოდრომი, სავარაუდოდ, კორუფციული გარიგებით ჩაიგდეს ხელთ. დარწმუნებული ვარ, მოვა დრო, როცა მათ ეს ქონება სასამართლოს გზით ჩამოერთმევათ და თბილისელები დაიბრუნებენ მათთვის უმნიშვნელოვანეს პარკსა და სპორტულ ობიექტს.
P.S. მერიის პრესსამსახურის წარმომადგენლის, თეა შათირიშვილის თქმით, იპოდრომის ტერიტორია კარგა ხანია კერძო პირებს გადაეცათ, თუმცა მერიის არქიტექტურის სამსახურიდან გაცემულია ნებართვა მხოლოდ ღობის მოწყობაზე და არა - მშენებლობაზე. რაც შეეხება იპოდრომს, ის გადატანილია ლისის ტბაზე და ახალი იპოდრომი საკმაოდ კომფორტულად არის მოწყობილი.
ცნობისათვის
იპოდრომი ბერძნული სიტყვაა: ჰიპპოს - ქართულად ნიშნავს ცხენს, დრომოს - სარბიელს, რბენას. იპოდრომებს საბერძნეთსა და რომში უძველესი დროიდან აგებდნენ. ძველბერძნული ისტორიული წყაროების მიხედვით, ძველ კოლხეთში, არესის ველზე, ვრცელი იპოდრომი იყო გადაშლილი და გარს მოაჯირი ერტყა. თბილისში იპოდრომის გახსნის შესახებ არსებობს წერილობითი წყარო: იოანე შავთელის "აბდულმესიანში" თამარ მეფის სამეფოში მომხდარ მნიშვნელოვან ამბავთა შორის საბურთალოზე იპოდრომის გახსნაა მოხსენიებული. თამარ მეფის დროინდელი იპოდრომი საბურთალოს უმეტეს ნაწილს მოიცავდა, გაცილებით მეტს, ვიდრე 21-ე საუკუნის დასაწყისში არსებულ საზღვრებში მოქცეული თბილისის სახელმწიფო იპოდრომი. ტოპონიმი "საბურთალოც" იპოდრომს უკავშირდება და ცხენბურთის სათამაშო ადგილს ნიშნავს.
1840 წელს თბილისის იპოდრომი დიდუბის ტერიტორიაზე აშენდა. წერეთლის გამზირზე დღემდე შემორჩენილია მისი კვალი. 1954 წელს, როდესაც დღის წესრიგში ახალი იპოდრომის მშენებლობის საკითხი დადგა, საჭირო ტერიტორია ვერეს ხეობასა და დელისის დასახლებას შორის შეირჩა. 1998 წელს თბილისის სახელმწიფო იპოდრომი 57 ჰექტარ მიწის ფართობს მოიცავდა. 2004 წლის მონაცემებით კი, იპოდრომის ფართობი 62 ჰექტარი იყო.
|
იპოდრომის მომავალი...
