“მგლები” ლიგაში ადგილის შესანარჩუნებლად იბრძოლებს
ზუგდიდის “მგლები” გასული ჩემპიონატის ერთ-ერთი აღმოჩენა გახდა. გუნდი, რომლისგანაც ყველა “მზის ქვეშ” ადგილისთვის ბრძოლას მოელოდა, 14-გუნდა გათამაშებაში საბოლოოდ მე-7 საფეხურზე გავიდა. კლუბის დაფინანსების საქმეც კარგად იყო დაყენებული, თუმცა, ბიზნესმენ ლაშა დარასელიას შესაძლებლობები განუსაზღვრელი არ აღმოჩნდა.
ახალ, რიგით მე-20 ჩემპიონატში, “მგლებს” ბიზნესმენთან ერთად ზუგდიდის რაიონული გამგეობა დააფინანსებს. ლაშა დარასელიას, სეზონისთვის მზადების დასაწყისში ჰქონდა მცდელობა, პირველ ლიგაში მოასპარეზე თანაქალაქელი “ბაია” უმაღლესის საგზურით დაეინტერესებინა, თუმც უშედეგოდ.
ლაშა დარასელია (ზუგდიდის “მგლების” დამფუძნებელი): გუნდი პრაქტიკულად არ გაჩერებულა, ვარჯიშობს. ურეკში გავიარეთ ათდღიანი შეკრება. ზუგდიდში კახათის სტადიონზე ვემზადებით, სადაც ყველა პირობაა ნორმალურად მზადებისთვის. გუნდი ფეხბურთელებითაც შეივსო და სეზონს სრულ მზადყოფნაში ვხვდებით.
- ერთ-ერთი სერიოზული დამატება ვალტერ გუჩუას სახით მიიღეთ. მისი სათამაშო ფორმით თუ ხართ კმაყოფილი?
- იგი ყველაზე უკეთ გამოიყურება. შუა კვირაში დავიმატეთ თავდამსხმელი გია თოდუა და მეკარე ზურაბ მამალაძე. მანამდე, კვიპროსიდან დაგვიბრუნდა კონსტანტინე დარსანია, თბილისის “ნორჩი დინამოელიდან” კახა გოგოხია მოვიდა, “ოლიმპიდან” ვინათხოვრეთ გიორგი მიქაბერიძე, მარტვილიდან დაგვემატა შოთა ლომია. მოკლედ, მზადების გვიან დაწყების მიუხედავად, რაღაც დონეზე მისვლა შევძელით. დანარჩენს ჩემპიონატის მიმდინარეობა გვიჩვენებს.
- გუნდს რა მიზანს უსახავთ?
- შევინარჩუნოთ ადგილი უმაღლეს ლიგაში.
- იყო საუბარი “მგლებისა” და მეორე ზუგდიდური გუნდის “ბაიას” შესაძლო შეერთებაზე. მაინც ვისი ინიციატივით ჩაიშალა ეს საქმე?
- ძნელი სათქმელია. თითქმის ბოლომდე იყო მისული გარიგება. მე თანახმა ვიყავი, რომ “ბაიას” ყოველგვარი კომპენსაციის გარეშე წაეღო ჩვენგან უმაღლესი ლიგის ადგილი. საბოლოო პასუხი ასეთი იყო - ჩვენ ისეთი ბიუჯეტი გვაქვს, რომ უმაღლესი ლიგის ხარჯებს ამ ეტაპზე ვერ გავწევთო.
- თქვენ რაში გაწყობდათ “ბაიასთან” შეერთება?
- ერთი ქალაქის გაერთიანებული გუნდი შეიქმნებოდა, ძლიერი დაფინანსებით.
- გაერთიანების შემდეგ, თქვენ წილობრივ დაფინანსებაში რჩებოდით?
- იყო ორი ვარიანტი – ერთი, ვრჩებოდი, მეორე კი, საერთოდ გავდიოდი. მარტომ რომ ვერ შევძელი გუნდის უმაღლეს ლიგაში მონაწილეობის უზრუნველყოფა, იმიტომაა სახელმწიფო რომ გვეხმარება.
- “მგლებს” საკუთარი ინფრასტრუქტურა აქვს, თუ ვინმესგან ქირაობთ.
- ოფიციალურ თამაშებს “ბაიას” სტადიონზე გავმართავთ. მათთან არენდის ხელშეკრულება გვაქვს გაფორმებული და ფულს ვიხდით. სავარჯიშო ინფრასტრუქტურას რაც შეეხება, ის ჩვენი საკუთარია, გვყავს ავტობუსი, რომლითაც თამაშებზე და ვარჯიშებზე გადავაადგილდებით.
http://www.msofsport.com/more.aspx?id=11774 
ზუგდიდის "მგლები", ქართული ფეხბურთის აღორძინება სამეგრელოდან დაიწყება
