http://worldsport.ge/Read.aspx?news=41385&langდრო იყო, ბათუმის "დინამო” სათასო გუნდის რეპუტაციით სარგებლობდა. თავად განსაჯეთ, პირველ 9 გათამაშებაში ზღვისპირულმა კლუბმა ხუთჯერ უწია ფინალს და ერთხელ (1998 წ.) გამარჯვებაც იზეიმა. მაგრამ ის ხანა ისტორიას ჩაბარდა. ახლა "დინამოს” თასზეც და ჩემპიონატშიც დაკარგული ტრადიციების აღდგენაზე უფრო უწევს ფიქრი.
ერთი შეხედვით, ბათუმელებს სათასო წილისყრაზე გაუმართლა, გათამაშების სტარტზე მათ მეტოქედ პირველლიგელი "ჩხერიმელა” ერგოთ. თუმც მთლად ასეც არ ყოფილა. შეიძლება ითქვას, დღეს ამ წყვილში ფავორიტის საკითხი დიდი კითხვის ნიშნის ქვეშ დადგა. პირველლიგელმა გუნდმა საშინაო მატჩში, ფაქტობრივად, ყველა კომპონენტში დაჯაბნა უმაღლესლიგელი და თუ ხარაგაულელები ასეთივე შემართებით იბრძოლებენ საპასუხო შეხვედრაში, "დინამოს” ძალიან გაუჭირდება ორბურთიანი ჰანდიკაპის გაბათილება.
ხარაგაულში დინამოელთა ორი ახალწვეულის დებიუტი შედგა. ლვოვის "კარპატიდან” განათხოვრებით წამოსული კიპერი, ივან პიცანი და ფორვარდი ალექსანდრ ტიმჩიშინი გია გურულმა შეუცვლელად ათამაშა. ერთი თამაშით უკრაინელთა სიძლიერეს თუ სისუსტეს ნამდვილად ვერ განვსაზღვრავთ, ერთს კი ვიტყვით, თავი მაინცდამაინც არც ერთს გამოუჩენია.
"ჩხერიმელამ” არ დაახანა და თავიდანვე შეუტია მეტოქეს. მართალია, მასპინძლები მალე, მე-15 წუთზე დაწინაურდნენ, მაგრამ მანამდე გატანის 3 შესაძლებლობა გაუშვეს ხელიდან. მე-6 წუთზე, დაჩი კოსტავამ მარჯვენა ფლანგზე სწრაფად ჩამოიცილა მეურვე, სტუმართა საჯარიმოში შეიჭრა და კარისკენაც დაარტყა, თუმც პიცანი ადგილზე დახვდა ბურთს. ორიოდ წუთში "ჩხერიმელას” ვეტერანმა, 39 წლის გიორგი თურმანიძემ საუცხოო გადაცემით მეტად ხელსაყრელ პიზიციაზე გაიყვანა კოსტავა, რომელიც ოდნავ შეყოვნდა და მცველებმა მოახერხეს მისთვის ბურთის ართმევა. მე-11 წუთზე, კოსტავამ ისევ გაინავარდა მარჯვენა ფლანგზე და სტუმართა საჯარიმოს შორეულ კუთხესთან ვილენ ჭრელაშვილს ჩაუწოდა, ამან შეუჩერებლივ და ძლიერად დაარტყა, მაგრამ ხარიხას გადააცილა.
როგორც ვთქვით, "ჩხერიმელა” მე-15 წუთზე გავიდა წინ. ჭრელაშვილმა ზუსტი პასით პიცანთან პირისპირ დატოვა გიორგი ცაგარეიშვილი, რომელსაც არ გასჭირვებია კიპერთან გამკლავება.
რამდენადაც გასაკვირი არ უნდა იყოს, ბათუმელები ვერა და ვერ ახერხებდნენ თამაშის დალაგებას. მასპინძლები დაწინაურების შემდეგაც დომინირებდნენ მოედანზე. მე-18 წუთზე, კოსტავამ დაახლოებით 10 მეტრიდან ააცილა "დინამოს” კარის ჩარჩოს. ამ ეპიზოდიდან ორ წუთში, პიცანმა თურმანიძის მიერ შორი დისტანციიდან გასროლილი დაიჭირა.
25-ე წუთზე, ცაგარეიშვილი იოლად გასცდა ნიკა ხუხიას და ზუსტად ჩაუწოდა კართან ახლოს მყოფ ჭრელაშვილს, რომელსაც მიზანმა უმტყუნა.
30-ე წუთზე, მასპინძლებმა ულამაზესი კომბინაცია გაითამაშეს, მასში თურმანიძე, კოსტავა და ცაგარეიშვილი მონაწილეობდნენ, ამ უკანასკნელს გატანა მართებდა, მაგრამ კარს ააცილა.
ამის შემდეგ სტუმართა კარს რეალურად კოსტავა, ოთარ გიორგობიანი და ჭრელაშვილი ემუქრებოდნენ.
აი, ასე, მასპინძელთა იერიშებში მიმდინარეობდა პირველი ტაიმი. ბათუმელები შესვენებამდე რამდენიმე წუთით ადრე გამოცოცხლდნენ და "ჩხერიმელას” კართან 2 სახიფათო მომენტი შეიქმნა - დავით კაკულიას მიერ მახვილი კუთხიდან დარტყმული იორამ კუჭუხიძემ მოიგერია, მერე ტიმჩიშინი ტექნიკურად, ერთი შეხებით გზავნიდა კარისკენ ბურთს, მაგრამ მაღლა მოუვიდა.
თამაშის განახლებიდან ხუთ წუთში, "ჩხერიმელამ” ორბურთიან უპირატესობას მიაღწია. თურმანიძემ მარცხენა ფლანგიდან წამოიწყო იერიში და ცენტრისკენ ჭრელაშვილს უპასა, ამან მარჯვნივ კოსტავა მოძებნა, რომელმაც მოხდენილი, დიაგონალური დარტყმით უშანსოდ დატოვა უკრაინელი კიპერი.
მასპინძლებმა სოლიდური ფორა მიიღეს და მეტოქეს სულის მოთქმის საშუალება მისცეს. მე-2 ტაიმის შუაწელში სტუმრებმა ასე თუ ისე გამოასწორეს თამაში და ანგარიშის გაქვითვაც მოახერხეს. არჩილ ბაჯელიძემ "ჩხერიმელას” მცველებს ნაკუთხურალზე დაასწრო და თავით გაიტანა. მერე კი, დათა სიჭინავამ უნაკლოდ შეასრულა საჯარიმო - დაახლოებით 20 მეტრიდან მეკარისგან მარცხენა კუთხეში გაახვია ბურთი.
ბევრი ფიქრობდა, რომ "ჩხერიმელა” საბოლოოდ გატყდებოდა, მაგრამ გუნდმა ისევ იძალა და მატჩის უკანასკნელი თხუთმეტწუთეული გამუდმებით უტევდა მეტოქეს. ხარაგაულელების გარჯას უნაყოფოდ არ ჩაუვლია. 77-ე წუთზე, კოსტავას მიერ მარჯვნიდან საჯარიმოსკენ გაჭრილი, პიცანმა უხეიროდ მოიგერია და ცაგარეიშვილმა აღარ აპატია შეცდომა.
სამ წუთში, ბაჯელიძემ საკუთარ საჯარიმოში ცაგარეიშვილთან ბრძოლაში 11-მეტრიანი `გამოიმუშავა”, რომელიც გოლად ჭრელაშვილმა გარდასახა.
მასპინძლებს შემდეგაც, სულ მცირე, სამჯერ შეეძლოთ ანგარიშის გაზრდა, მაგრამ იღბალი მეტოქის მხარეს იყო.
გია გურული: "ძალიან ცუდად ვითამაშეთ. პატივს ვცემ და არანაირად ვაკნინებ მეტოქეს, მაგრამ ჩვენ უფრო საკუთარ თავთან დავმარცხდით, მოწინააღმდეგე ვერ შევაფასეთ და დავისაჯეთ. თამაშის დაწყებამდე ვაფრთხილებდი გუნდს, რომ ასეთი დამოკიდებულებით საკუთარ თავს ვერაფერს ვარგებდით. ჩემი სიტყვები გამართლდა - "ყოჩაღ ბიჭებს”.
მამუკა ხუნდაძე: "რთული თამაშის მოლოდინში ვიყავით, რაც არ უნდა იყოს უმაღლესი ლიგის გუნდთან გვქონდა საქმე. შეტევაზე გავაკეთეთ აქცენტი. ბიჭებმა თავდაუზოგავად იბრძოლეს და დამსახურებულად გაიმარჯვეს. დარწმუნებული ვართ, საპასუხო მატჩში დიდი ჯაფა დაგვადგება, მაგრამ სათამაშოდ უიმედოდ არ გავალთ”.
დ. ყიფიანის სახელობის საქართველოს თასი. 1/16-ფინალი. პირველი მატჩი
"ჩხერიმელა”(ხარაგაული) - "დინამო” (ბათუმი) 4:2 (1:0)
ხარაგაული. "ცენტრალური”. 29 აგვისტო. 16 სთ. 45 წთ. 500 მაყურებელი
"ჩხერიმელა”: კუჭუხიძე (კ), ც. ხარაბაძე, ქაშაკაშვილი, დოღონაძე, მეტრეველი, კოსტავა, ნ. ხარაბაძე, გიორგობიანი (ქათამაძე, 84), თურმანიძე (ზაქარაშვილი, 65), ცაგარეიშვილი (მ. თევდორაძე, 89), ჭრელაშვილი.
მთავარი მწვრთნელი: მამუკა ხუნდაძე
"დინამო”: პიცანი, ზოიძე, ხუხია, ა. ბაჯელიძე, რამიშვილი, დიასამიძე (ვ. თევდორაძე, 55), კაკულია, ცანავა (ჯორბენაძე, 55), სიჭინავა, ტიმჩიშინი, აბუსელიძე (კლოვისი, 86).
მთავარი მწვრთნელი: გია გურული
გოლები: 1:0 ცაგარეიშვილი (15), 2:0 კოსტავა (50), 2:1 ბაჯელიძე (61), 2:2 სიჭინავა (70), 3:2 ცაგარეიშვილი (77), 4:2 ჭრელაშვილი (80, პენალტიდან).
გაფრთხილება: რამიშვილი (26), ნ. ხარაბაძე (79), ბაჯელიძე (80), მ. თევდორაძე (90).
მსაჯები: ხ.გაგნიძე, კ. ტეფნაძე, დ. კურტანიძე, თ. გვანცელაძე
იუზა კაციტაძე ხარაგაულიდან
მატჩის ფოტოები This post has been edited by ჩხერიმელა on 5 Sep 2012, 22:33
მიმაგრებული სურათი
ს.კ. ხარაგაულის "ჩხერიმელა", 1983
