acdachi
Super Crazy Member +++
ჯგუფი: Members
წერილები: 55830
წევრი No.: 35873
რეგისტრ.: 3-June 07
|
#24850821 · 7 Apr 2011, 18:15 · · პროფილი · პირადი მიმოწერა · ჩატი
დღეს, მიხეილ მესხის სახელობის სტადიონზე გამართულ პრესკონფერენციაზე, საქართველოს ფეხბურთის ფედერაციის პრეზიდენტმა, დომენტი სიჭინავამ ღიად განაცხადა, რომ საფეხბურთო კლუბ “ზესტაფონის” მიმართ არავითარი პრეტენზია არ აქვს და არც უპირისპირდება.
მისი ნათქვამიდან გაირკვა, რომ მასმედიასთან შეხვედრა იმიტომ გადაწყვიტა, რომ “ზესტაფონის” პრეზიდენტის, ილია კოკაიას მიერ წაყენებულ პრეტენზიებზე გაეცა პასუხი – საქმე ეხება კოკაიას ინტერვიუს, რომელიც მან “მსოფლიო სპორტს” სამშაბათს მისცა. სხვათა შორის, სიჭინავას ხსენებული ინტერვიუ ფურცლებზე ჰქონდა ამობეჭდილი და ამის მიხედვით ხელმძღვანელობდა. აღსანიშნავია, რომ “მიხეილ მესხის” საპრესკონფერენციო დარბაზში ლამის ფეხბურთის ფედერაციის მთელი შემადგენლობა იყო შეკრებილი, ხოლო პრეზიდენტის გვერდით, გენმდივანი რეზო არველაძე, ასევე, ვიცე-პრეზიდენტები ალექსანდრე ჩივაძე და გია ფირცხალავა ისხდნენ.
“მე რაიმე პრეტენზიას ვუყენებ “ზესტაფონს”? რაიმეთი დაიჩაგრა "ზესტაფონი”? ყველგან ვამბობ, რომ ეს ერთადერთი კლუბია, რომელიც ყველაფრითაა უზრუნველყოფილი. ქვეყნის პრეზიდენტთან შეხვედრის დროსაც ვთქვი, რომ ყველაზე მაგრად საქმეს “ზესტაფონი” აკეთებს და მივესალმები ასეთ ინვესტორებს. “ზესტაფონთან” არაა დაპირისპირება, საქმე ეხება ილია კოკაიას კომენტარს – ქაოსია ქართულ ფეხბურთშიო, რომ ამბობს. კაცი ფიქრობს, რომ მხოლოდ მისი იურისტები არიან იურისტები და სხვას არ აქვს განათლება. ფედერაციაში ქაოსი არაა, ქაოსი იყო. ამაზე მეტი ქაოსი რაა, როდესაც მილიონები გაქვს და წელიწადში კიდევ რამდენიმე სესხს იღებ. “ზესტაფონს” არ ვუპირისპირდები. ამ ქალაქში ყოველთვის სიამოვნებით ჩავდიოდი და კიდევ ჩავალ, თუ დამპატიჟებენ. მაშინ ფედერაციიდან მთელი ჯგუფი ვიყავით წასული და სტადიონზე ადგილები არ მოგვცეს. თქვენ რომ ფედერაციაში მოხვიდეთ და კარი მოგიჯახუნოთ, მეორედ ხომ აღარ მოხვალთ. არავის ვებრძვი. ჟურნალისტებთან შეხვედრა იმიტომ მინდოდა, რომ მოვაწოდო კოკაიას ინფორმაცია, რომ დაპირისპირება არაა” – განაცხადა სიჭინავამ.
ყველა ვრცელი განხილვის საგანი, ნოდარ ახალკაცი-უმცროსის დროინდელი სფფ-ს მიერ 2008 წლის 29 დეკემბერს, “პრივატბანკიდან” (მაშინდელი “ტაოპრივატბანკი”) 300000 ევროს ოდენობით აღებული სესხი გახდა. კოკაიამ ინტერვიუში განაცხადა, რომ ფედერაციის ამჟამინდელმა ხელმძღვანელობამ ხსენებული ვალის გასტუმრების დროს ქართული ფეხბურთის მმართველი ორგანო 100000 ევროზე მეტი თანხით აზარალა. ხსენებულ თემაზე განმარტება, როგოც სიჭინავამ, ასევე, სფფ-ს იურისტმა კესო ჩხიკვაძემ და ბუღალტერმა ნარგიზა ჩხიკვაძემ გააკეთეს.
დომენტი სიჭინავა: “რატომ დასჭირდა ფედერაციას ამ ბანკიდან ვალის აღება? ვინ მდიდრდებოდა? სწორედ ამას გვინდა ნათელი მოვფინოთ. ჩვენ ბანკის მაშინდელ დირექტორს ვუთხარით, რომ მზად ვიყავით, რომ სათავო თანხასთან ერთად, დარიცხული პროცენტებიც გადაგვეხადა და 399000 ევრო გაგვესტუმრებინა. 20000-20000 ევროიანი ტრანშები გავაკეთეთ კიდეც. საქმე ისააა, ვისი პირადი ანგარიში იყო ჩადებული გირაოდ. მე კი ვიცი და ალბათ, თქვენც ხვდებით, ვინ არის ეს პიროვნება, მაგრამ ვიდრე სასამართლო ამ საბუთს არ დადებს, თქმა არ მინდა. ჩვენ თავიდანვე ვთქვით, რომ ვალს ვაღიარებთ, მაგრამ 2009 წლის ივნისიდან 2010 წლამდე, ყოველდღე ჯარიმის სახით 266 ევრო რომ გვერიცხებოდა, ამის გადახდა არ გვინდა. ჩვენ ვითხოვთ, რომ როდესაც დაიდება საბუთი, იმისა თუ ვისი ანგარიშის გირაოდ აიღეს სესხი, ის ფული, რომლითაც დაგვაჯარიმეს, უკან დაგვიბრუნდეს, ხოლო აღმასრულებლის თანხაც ბანკმა გადაიხადოს. კოკაია რომ ამბობს, საქმის ასეთი გახმაურების შემდეგ, ფეხბურთის ფედერაციასთან არც ერთი ბანკი აღარ დაიჭერს ურთიერთობასო, ესაა ბათილი ხელშეკრულება და სანამ ფედერაციის პრეზიდენტი ვიქნები, ბანკისგან მსგავს ვალს აღარ ავიღებთ. ამჟამად, მხოლოდ “საქართველოს ბანკის” ვალი გვაქვს - 500000 ევრო. ავიღეთ კრედიტი, რომ “პრივატბანკის” ვალი გაგვესტუმრებინა”.
კესო ჩხიკვაძე: “საქართველოს ფეხბურთის ფედერაციამ 2008 წლის 29 დეკემბერს, “ტაობანკთან” გააფორმა ხელშეკრულება და სესხის სახით 300000 ევრო აიღო. აღნიშნული სესხი დაფარულია. გასული წლის ბოლოს, “პრივატბანკმა” ფეხბურთის ფედერაციის ანგარიშებს ყადაღა რომ დაადო და მისი პარალიზება მოხდა, ბანკის მხრიდან ვლინდებოდა სუბიექტური ქმედება. არსებობს გარკვეული ეჭვი და ამიტომ, ეს ხელშეკრულება ბათილად უნდა სცნონ. სასამართლო უახლოეს პერიოდში დაინიშნება”.
ნარგიზა ჩხიკვაძე: “2008 წლის დეკემბერში, ფეხბურთის ფედერაციამ 300000 ევრო აიღო სესხად. ფედერაციას 2009 წლის დასასრულს უნდა გადაეხადა 348000 ევრო. მივმართეთ ბანკს, რომ სესხის რეფერენსი მოეხდინა და ვუთხარით – თქვენ როგორი გრაფიკითაც გსურთ, იმ გრაფიკით გადაგიხდიდითო. თუ 2009 წელს ვალის 16 პროცენტი უნდა გადაგვეხადა, ხოლო 2010-ში 32 პროცენტი, არადა, საქართველოში ნებისმიერ ბანკში სესხის პროცენტი თვრამეტ პროცენტს არ აღმატება. ბანკი დაინტერესებული იყო, რომ 92000 ევრო გადაგვეხადა. ბანკის პროცენტი და საურავები საქართველოს ფეხბურთის ფედერაციამ გადაიხადა. მოვითხოვეთ გამოძიება, რათა დავადგინოთ, ვინ არის პიროვნება, რომლის პირადი ანგარიშიცაა ჩადებული გირაოში ამ სესხის აღების დროს. იმის გამო, რომ ბევრი საკითხი გაურკვეველი იყო და ჩვენი აზრით, ფედერაციის უფლებები დაირღვა, რაც არ მოგვწონს, სასამართლოს მივმართეთ. საერთო ჯამში, ფედერაციამ “პრივატბანკს” 430000 ევრო გადაუხადა, ხოლო აღმასრულებელს - 45000 ევრო”.
“მე რეკლამას არ ვიკეთებ, რადგან მონიკა ბელუჩი არ ვარ და “მის საქართველოს” კონკურსის მოგებას არ ვაპირებ. ის პრობლემა, რომელიც “ვიტ ჯორჯია”-“ზესტაფონის” თამაში დროს წარმოიშვა, მართლაც არ ვიცოდი. ვკითხე ნოდარ კაკულიას და ლევან ფანიაშვილს, რომლებმაც ყველაფერი დეტალურად მითხრეს. სხვათა შორის, მსაჯებმა ეს ეპიზოდი განიხილეს და დარტყმამდე მეორე სასტვენი მართლაც იყო. იმ მომენტში, დათო მინაშვილთან რომ ვიყავი სტუდიაში სტუმრად, მომხდარის შესახებ არ ვიცოდი. რაც შეეხება “ზესტაფონის” განცხადებას - წერილი გვქონდა შეტანილიო, ეს სიცრუეა. წერილი იყო მხოლოდ ერთ რამეზე, რომ იმ ფეხბურთელებისთვის, ვისი ბარათებიც წაღებული იყო, მომდევნო ტურში თამაშის უფლება მიეცათ. ამბობენ, სიჭინავას “დინამოს” ჩემპიონობა უნდაო. დამიჯერეთ, ყველაზე მეტად გამეხარდება ჩემი მშობლიური ზუგდიდის გუნდის “მგლების” ჩემპიონობა, მაგრამ ამას რომ არ ვაკეთებ, ეტყობა ამ მხრიდან ვერ მომიდგნენ. ჩემპიონი ღირსეული გახდება. 4000 ევროს გადახდაზე უარი არ გვითქვამს. ეს ფული რამდენიმე დღის წინ გავისტუმრეთ. რასაც “ზესტაფონისგან” ვითხოვთ, ესაა 15000 ლარი - გრუიცას ტრანსფერის სანაცვლოდ. რაც შეეხება პროფლიგას, ის არ გაუქმებულა. მაისში კლუბების წარმომადგენლებთან ერთად შევიკრიბებით პროფლიგის ახალი ფორმატის განსახილველად. როგორც იცით, საქართველოს პრეზიდენტთან შეხვედრის შემდეგ გადაწყდა, რომ ეროვნული ჩემპიონატის მატჩების ტრანსლაცია იქნება. ეს სამომავლოდ პროფლიგას საქმეს გაუადვილებს და არათუ ვალების გასტუმრებაზე იფიქრებს, არამედ პირიქით, შემოსავალზე. რაც შეეხება მენთეშაშვილის ტრანსფერს, ფედერაციამ სურვილი გამოთქვა რომ კლუბს დახმარებოდა – ირაკლი ნაკაიძეს საერთოდ არ ევალებოდა ეს საქმე, მაგრამ ყველაფერს აკეთებდა, რომ “ზესტაფონს” დახმარებოდა. ან რა ფედერაციის გენმდივნის საქმეა ორ კლუბს შორის კომერციული ურთიერთობა? თუმცა, რეზო არველაძემ ევა პასკიეს სთხოვა, რომ მენთეშაშვილის საქმე ფიფას წარმოებაში კიდევ ერთხელ მიეღო. კოკაია რომ აცხადებს, არ ვაღიარებ არბიტრაჟს, რომელიც ფეხბურთის ფედერაციის დაფუძნებულიაო, გაჩვენებთ მემორანდუმს არბიტრაჟის შექმნის შესახებ, რომელსაც ხელს “ზესტაფონიც” აწერს. თავად ჰქონდა კოკაიას იმ არბიტრაჟის მიმართ პრეტენზია – არ ვიცი, ის არბიტრაჟი ვისი არისო. თან ფიფას და უეფას მოთხოვნაა, რომ არბიტრაჟი ფეხბურთის ფედერაციის მიერ იყოს დაფუძნებული. მე არასოდეს მითქვამს, რომ კლუბები ვალდებულნი არიან, რომ სოლიდარობის თანხა - 5 პროცენტი გადამიხადონ. როდესაც “ჯვაროსნების აკადემიას” გავაკეთებთ, იქ აღზრდილი ბავშვები ისევ კლუბებს დარჩებათ. ამ პროექტის განხორციელებისას, სახელმწიფოს დახმარება მუდმივი ხომ არ იქნება. ამიტომ, სოლიდარობის მიზნით, კლუბებს შეუძლიათ დაეხმარონ ამ ინტერნატებს” – უპასუხა სიჭინავამ კოკაიას.
მისი თქმით, ფეხბურთის ფედერაციაში პირველი პრობლემა მაშინ შეიქმნა, როდესაც საქართველოს მთავარი მწვრთნელის პოსტიდან ფრანგი ალენ ჟირესი დაითხოვეს.
“ფედერაციაში პირველი პრობლემა როდის შეიქმნა? ეს ეხება ალენ ჟირესის გაშვებას. მაშინ ფედერაციის სპონსორი “ფერო” იყო და ჟირესის ხელფასის თანხა არ გადაიხადა. ალექსანდრე ჩივაძემ “ფეროს” წერილი გაუგზავნა – დაგვეხმარეთ, ჟირესის ხელფასს ვერ ვიხდით და დაგვაჯარიმებენო. პასუხად მიიღო – დაგეხმარებითო. შემდეგ მეორე წერილი მოვიდა – გაიოზ დარსაძე და კობა ჟორჟიკაშვილი “ზესტაფონის” მწვრთნელები არიან, თუ ეს ფედერაციას პრობლემას უქმნის, ჩვენ გადახდას შევაჩერებთო. “ფერომ” თანხა არ გადაიხადა და უეფამ ფედერაცია 108000 ევროთი დააჯარიმა. არადა, კონტრაქტით თანხა “ფეროს” გადასახდელი იყო და დღემდე არ გადაუხდია. რატომ არ შემაქვს საქმე სასამართლოში ამ საკითხთან დაკავშირებით? იმიტომ, რომ მას შემდეგ “ფეროში” ყველაფერი შეიცვალა. ეს იყო პირველი ფაქტი, შემდეგ იყო კარგი თანხები და ბევრი კრედიტები. მე არავის ვადანაშაულებ, არც კოკაიას და არც სხვა ვინმეს. ნოდარ ახალკაცი რომ არ წასულიყო, “პრივატბანკის” ვალსაც გადაიხდიდნენ – აიღებდნენ “ოლიმპის”,“დინამოს”, “ზესტაფონის” და “ვიტ ჯორჯიას” ევროთასებზე მონაწილეობის თანხებს, რომელსაც მერე დაფარავდნენ. უბრალოდ, მოხდა კაზუსი და ახალკაცი გადადგა. რაც ფედერაციის პრეზიდენტი ვარ, მანეთი არ აგვიღია ვალად და მარტო ვალებს ვისტუმრებთ. ამაში სახელმწიფო დაგვეხმარა, ინვესტორები, ბილეთებიდან შემოსული ფულიდან გადავიხადეთ ვალის ნაწილი, ცოტა უეფამ და ფიფამ გვაჩუქა”.
კოკაიას ინტერვიუსთან დაკავშირებით, პრესკონფერენციაზე საკუთარი განმარტებები რევაზ არველაძემაც გააკეთა:
“სტატიაში ბევრი რამ არის შეურაცხმყოფელი და მიუღებელი. თურმე, ფიფასთან და უეფასთან ურთიერთობა არ გვივარგა. ნეტა, ისე გვივარგოდეს რომელიმე საერთაშორისო ორგანიზაციასთან ურთიერთობა, როგორც ფიფა-უეფასთან. გრუიცას თამაშის უფლება იმიტომ მოვეცით, რომ შევედით ფეხბურთელის მდგომარეობაში და პატივი ვეცით. ისე რამდენი თამაში ჩაატარა მან “ზესტაფონში”? არც ერთი. რაც შეეხება მენთეშაშვილის თემას, კლუბები ხან რაზე ვერ თანხმდებოდნენ და ხან რაზე. 10 დღე დასჭირდა მენთეშაშვილის ტრანსფერს, კლუბები 28 თებერვალს, ღამის თერთმეტ საათზე მორიგდნენ. შემდეგ, ფიფამ ეს ტრანსფერი არ დაარეგისტრირა. რეზო შენგელიამ მითხრა, რომ ამ საქმეში ჩავრეულიყავი. ჩვენმა თანამშრომლებმა მაქსიმალურად ყველაფერი გააკეთეს, რომ მენთეშაშვილის საქმე ხელმეორედ ყოფილიყო წარმოებაში. იმედი გვაქვს, რომ ის ამ სეზონში ითამაშებს, მაგრამ როგორც ვიცი, ჯანმრთელობასთან დაკავშირებით პრობლემები აწუხებს”.
პრესკონფერენცია სიჭინავას ემოციური გამოსვლით დასრულდა:
“ამომივიდა ყელში. შესაძლოა, ბევრს უთქვამს, რომ დებილიაო და შეიძლება დებილი ვარ, მაგრამ სანამ ფედერაციაში ვარ, რამდენიმე მოედანს გავაკეთებ და ბავშვებს 10000 ბურთს მივცემ. სანამ ვარ, გავაკეთებ, რომ ვინმემ დედა არ შემაგინოს. 45 წელია ასე ვცხოვრობ და დედის გინება ჩემთვის ყველაზე დიდი შეურაცხყოფაა. არ ვიცი, კოკაიას რა არ მოეწონა, შესაძლოა, ჩემი “პრიჩოსკა”, რადგან სამი კვირაა “მასტერთან” არ ვყოფილვარ. წავალ და გავიკრიჭავ. არც ერთ ქვეყანაში არაა ყველა ასაკის ნაკრები. 2000000 ლარი, რომელიც გამოყოფილია, ამ ნაკრებებზე იხარჯება. ყველა ბავშვს აქვს თავისი სათამაშო ფორმა და სამედიცინო შემოწმებას გადის ყაზახეთში, ტურნირზე 17-წლამდელთა ნაკრები მიდიოდა და ერთი ცნობა ვერ მომიტანეს, ბავშვს შარდის ანალიზი ჩაბარებული აქვს, თუ არა. მერე დადგებიან კლუბები და გაიძახიან, ფეხბურთელი გავზარდეთო. მათხოვრებივით ველაპარაკები ჩვენ სპონსორებს. “ქართუმ” ხვალ რომ ყველაფერი შემიჩეროს, რა უნდა ვქნა მერე. უეფას პრეზიდენტის არჩევნებზე რომ ვიყავით მე და არველაძე ჩასული, ერთ-ერთი დეპარტამენტის უფროსს ვთხოვდი, ბურთები მოგვეცით-მეთქი”.
სხვათა შორის, ფედერაციის თავკაცმა “მსოფლიო სპორტის” მისამართითაც თქვა რეპლიკა – გერმანიაში ტელეფონით 5-გვერდიანი ინტერვიუს აღება 300-400 ევრო დაუჯდებოდათ და ფული არ დაენანათო.
--------------------
I Love Dinamo Tbilisi......
მე მიყვარს თბილისი...
Ribo #1
AC MILAN
|
სიჭინავა VS კოკაია
