ანატოლი ბოისა: “ყოველთვის ჩემი ძმის გვერდით ვიქნები”
2.07.2012 21:35
ლაშა კუპრაშვილის ფოტო
მართალია, ნაკრების მიღმა დარჩენილ ვლადიმერ ბოისას ძმა, ანატოლი ბოისა, საქართველოს ვაჟ კალათბურთელთა ეროვნული ნაკრების ევრობასკეტ-2013-ის შესარჩევი ტურნირისათვის დაწყებულ შეკრებაზე გამოცხადდა, მაგრამ არ უვარჯიშია.
ამ ფაქტმა კიდევ უფრო გაამყარა ეჭვი, თითქოს, ანატოლიმ მის ძმას, ვლადიმერს სოლიდარობა გამოუცხადა და ნაკრების წევრობის კანდიდატთა გაფართოვებული შემადგენლობა დატოვა.
თუ რა გახდა ანატოლის უვარჯიშებლობის მიზეზი, ამას მასთან ინტერვიუს შემდეგ შეიტყობთ.
- გავრცელდა ინფორმაცია, თითქოს, ანატოლიმ ნაკრების მიღმა დარჩენილ უფროს ძმას ვლადიმერს, სოლიდარობა გამოუცხადა და საქარტველოს ეროვნული ნაკრების წევრობის კანდიდატთა გაფართოვებული შემადგენლობა დატოვა. რამდენად სწორია ეს ინფორმაცია?
- რა თქმა უნდა, ჩემი ძმის გვერდით ვარ და სოლიდარობას ვუცხადებ, მაგრამ ჩემს მიერ ნაკრების დატოვებით არაფერი შეიცვლება და ამ გადაწყვეტილებას რა აზრი აქვს.
- თქვენს ძმასთან თუ გქონდათ თქვენი ნაკრებიდან წასვლის შესახებ საუბარი?
- გადავწყვიტე, მეც დამეტოვებინა ნაკრები, მაგრამ ვოვამ მითხრა ეს არ გამეკეთებინა. ამის შემდეგ გადავწყვიტე გუნდში დავრჩე, ბიჭებს გვერდით ამოვუდგე და ევრობასკეტ-2013-ის ფინალური საგზურის მოპოვებაში დავეხმარო.
- თუ პროტესტის ნიშნად ნაკრებს არ ტოვებთ, მაშინ რით გამოიხატება თქვენი სოლიდარობა თქვენი ძმის მიმართ?
- სოლიდარობა იმაში გამოიხატება, რომ ჩემი ძმის მოსაზრებას მეც ვიზიარებ, კონკრეტულად ვეთანხმები, რომ ამ ფორმით არ იყო ლამაზი, მისი დამსახურებიდან გამომდინარე, ვოვას ნაკრებიდან გაშვება.
- კონკრეტულად რა გაქვთ მხედველობაში?
- ნაკრებისა და ფედერაციის ხელმძღვანელობა ტელეფონით, შეკრების დაწყებამდე ორი დღით ადრე დაუკავშირდა ვოვას და აცნობეს, რომ ნაკრებისთვის საჭირო აღარ იყო. უმჯობესი იქნებოდა, ეს ყველაფერი პირისპირ საუბრის დროს მომხდარიყო. თუ გავითვალისწინებთ, რომ კოკოშკოვი ტრევიზოს (იტალია) კემპს ესწრებოდა, ამის გაკეთება ძალიან ადვილი იყო. ტრევიზო სულ რაღაც 2-3 საათის სავალზეა სლოვენიიდან, სადაც ჩემი ძმა ცხოვრობს. კოკოშკოვი თუ მოისურვებდა, თვითონ ვოვა ჩავიდოდა ტრევიზოში და ყველაფერი ცივილურად მოგვარდებოდა. სამწუხაროდ, ასე არ მოხდა და ამიტომ ვართ ნაწყენი.
- თუ ნაკრებში თამაშზე უარს არ ამბობთ, მაშინ რატომ არ ვარჯიშობთ?
- მოვიწამლე და დღეს დასვენება ვამჯობინე, ხვალიდან ვარჯიშს ვიწყებ.
- 2011-12 წლების საკალათბურთო სეზონი თქვენ “არმიაში” გაატარეთ. ისევ ამ კლუბში რჩებით?
- კარიერას ისევ “არმიაში” გავაგრძელებ.
- “არმიას” ძველი შემადგენლობიდან, კიდევ ვინ აგრძელებს კარიერას ამ გუნდში?
- უმჯობესია, ამ კითხვით “არმიას” ხელმძღვანელობას, ან მის ყოფილ კალათბურთელებს მიმართოთ.
http://worldsport.ge/Read.aspx?news=38203&lang=1კარგი კითხვებია
· 
ნძრევა კალათბურთში!, რა ხდება ეს?
