http://www.worldsport.ge/Read.aspx?news=42784&lang=1მოულოდნელია ეს შედეგი? ცხრილიდან და ფეხბურთელთა კონტინგენტიდანაც გამომდინარე, რა თქმა უნდა, მოულოდნელია, მაგრამ თამაშმა სხვა რამ გვაჩვენა: "ვიტ ჯორჯია" მწყობრად თამაშობდა, მეტოქეს არაფერი დაუთმო და გამარჯვებაც მიითვალა. პირველი ტურის შემდეგ, ვიტელებს მოგება არ ჰქონდათ და გემო გაიხსენეს.
მე-60 წუთი იყო, როცა კონტრშეტევაზე დავით ხურცილავა მარჯვნიდან გაიჭრა, მშვენიერი გადაცემა მიიღო და მეკარის ბაქანთან გააკეთა პასი, იქ კი ბესიკ ჩიმაკაძემ ყველას დაასწრო და თითქმის კარის ხაზიდან გაიტანა - 0:1.
მალევე, 64-ე წუთზე, სტუმართა მცველმა ოთარ ჯავაშვილმა შორიდან ხარიხას გაარტყა ბურთი, გადმოვარდნილს კი, ჯემალ გოგიაშვილი დაუხვდა და ზუსტადაც დაარტყა - 0:2.
ამ გოლებით იმარჯვა "ვიტ ჯორჯიამ", ზოგადად კი, სანახაობრივად კარგი თამაში ვერ გამოდგა. ბევრი იყო უზუსტო პასი, ჩაშლილი კომბინაციები, წუნი კარში დარტყმისას. საინტერესოა, რომ "ვიტ ჯორჯიამ" 3 ცენტრალური მცველით ითამაშა, ხოლო ორნი ფლანგებზე ჰყავდა. ამ ახალმა ტაქტიკამ გაამართლა.
პირველ ტაიმში გამოვარჩევდით რუსთაველი ირაკლი სიხარულიძის თავურს (მეკარემ აიღო) და ხურცილავას გარღვევას, რომელმაც “ცხრიანში” დაუმიზნა და მასპინძელთა მეკარე ივან ჰოსმანმა აკრობატულ ნახტომში გადააგდო ბურთი კუთხურზე.
ტემპი დაბალი იყო და ასე გაგრძელდა მე-2 ტაიმშიც, მანამდე, სანამ ანგარიში 0:1 არ გახდა. რუსთაველთა მწვრთნელმა, კობა ჟორჟიკაშვილმა თავდასხმას დიმიტრი ტატანაშვილი დაამატა და გიორგი თექთურმანიძეც შეიყვანა, თუმცა, ამან შედეგი ვერ გამოიღო.
ორი გაშვებული გოლის შემდეგ, "მეტალურგს" მეტი სიმძაფრე მართებდა შეტევაში, მაგრამ სივრცე ვერ მონახეს. იყო ირაკლი მაისურაძისა და ტატანაშვილის უზუსტო დარტყმები... მთლიანობაში, "ვიტ ჯორჯია" აკონტროლებდა სიტუაციას და მესამეც გაიტანა (ჩიმაკაძემ თავით), თუმცა, თამაშგარე დაფიქსირდა.
ბოლო წუთებში, გუნდებმა თითო მომენტი გაცვალეს: გიორგი მიქაბერიძის დარტყმული რიკოშეტით წავიდა კარისკენ და ოდნავ უზუსტო გამოდგა, ხოლო ბექა ზაქრაძე თითქმის ერთი-ერთზე იყო და ჰოსმანმა იყოჩაღა.
მატჩის საუკეთესო ფეხბურთელად ხურცილავას დავასახელებდით. გარდა იმისა, რომ სტუმართა მარჯვენაფლანგელმა შეტევაში იაქტიურა და საგოლე გადაცემაც გააკეთა, დაცვაშიც დიდი სამუშაო შეასრულა.
"მეტალურგი" მე-6 ადგილზე დაქვეითდა. აკი, ჟორჟიკაშვილმაც თქვა, გუნდის შემადგენლობა დასუსტდა და ეს შედეგზეც ისახებაო.
მატჩის შემდეგ:
მერაბ კოჭლაშვილი: "მე-2 ნომრად თამაში ვარჩიეთ და პირველ ტაიმში მთავარი ამოცანა კარის მშრალად შენახვა იყო. ვიცოდით, რომ მეტოქე ძლიერია, თანაც ყოველ მეოთხე დღეს თამაში ძნელია. მითუმეტეს, სულ ისეთ გუნდებს ვხვდებით, რომლებმაც სათასო მატჩებისგან დაისვენეს. ჩვენ წინა მატჩშიც ("ზესტაფონთან" 2:3) კარგად ვითამაშეთ, მაგრამ იყო უიღბლობის მომენტი. დღეს კი, გარკვეულწილად გაგვიმართლა, პირველი გოლი რომ ჩვენ გავიტანეთ".
კობა ჟორჟიკაშვილი: "მეტოქე დაცვით ფაზაში მჭიდროდ თამაშობდა და გასაქანს არ გვაძლევდა. მათ 3 ცენტრალური მცველი ჰყავდათ და ამასთან, ფლანგელებიც. პირველი ტაიმის შემდეგ, შეცვლებით შევეცადეთ სიმწვავე შეგვემატა თამაშისთვის, მაგრამ იყო შეცდომები და ერთ-ერთი, პირველ გაშვებულ გოლად დაგვიჯა: ჩავარდა დაცვის ცენტრი და მარცხენა ფლანგი, რაც "ვიტ ჯორჯიამ" კარგად გამოიყენა.
...გეთანხმებით, რომ მებრძოლი სული აკლდა გუნდს. სამწუხაროდ, ჩვენი შემადგენლობა დასუსტდა, გუნდიდან წავიდნენ კვარაცხელია, სეთურიძე, ჯაფარიძე... სამწუხაროდ, ეს აისახება კიდეც".
"მეტალურგი" (რუსთავი) - "ვიტ ჯორჯია" (თბილისი) 0:2 (0:0)
30. 09. 16:00. რუსთავი. "ფოლადი". 600 მაყურებელი
მეტალურგი: ჰოსმანი, დობროვოლსკი, მახვილაძე, ინწკირველი, სუხიაშვილი, რაზმაძე (განუგრავა 69), მიქაბერიძე, გეწაძე (თექთურმანიძე 46), მაისურაძე, ქავთარაძე (ტატანაშვილი 46), სიხარულიძე.
მწვრთნელი: კობა ჟორჟიკაშვილი.
ვიტ ჯორჯია: დაუშვილი, ხურცილავა, გოგიაშვილი, ადამაძე (ღიბრაძე 77), გეთიაშვილი, ჯავაშვილი, კასრაძე, ვასაძე, გურამ გურეშიძე (ზაქრაძე 90+1), დავლაშელიძე (ტეტუნაშვილი 83), ჩიმაკაძე.
მწვრთნელი: მერაბ კოჭლაშვილი.
გოლები: 0:1 ჩიმაკაძე (60), 0:2 გოგიაშვილი (64).
გაფრთხილება: ხურცილავა (43), მახვილაძე (66).
არბიტრი: თემურ ხუჯავა.
1. დინამო (თბ) 8 6 1 1 24:6 19
2. ტორპედო 8 5 1 2 18:6 16
3. ჩიხურა 8 4 2 2 10:8 14
4. დილა 8 4 1 3 11:7 13
5. ზუგდიდი 8 3 4 1 9:5 13
6. მეტალურგი 8 4 0 4 6:11 12
7. ზესტაფონი 8 3 2 3 8:6 11
8. მერანი 8 3 0 5 5:14 9
9. დინამო (ბთ) 8 2 2 4 10:15 8
10. ვიტ ჯორჯია 8 2 2 4 6:11 8
11. სიონი 8 1 4 3 9:15 7
12. კოლხეთი 8 0 3 5 4:16 3
ბომბარდირები:
6 – მიხეილ ჯორბენაძე (“დინამო” ბათუმი), ჯაბა დვალი (“დინამო” თბილისი)
5 - რევაზ ჯიქია (“სიონი”)
4 – ჩისკო (2, პენ) (“დინამო”), გიორგი მერებაშვილი (“დინამო” თბილისი), ალვარო (“დინამო” თბილისი)
3 – დავით ოდიკაძე (“ჩიხურა”, 1), დიმიტრი ტატანაშვილი (“მეტალურგი”), გიორგი კუხიანიძე (1), ნიკა საბანაძე (“ტორპედო”), ლევან ხმალაძე (“დინამო” თბილისი), ბესიკ ჩიმაკაძე (“ვიტ ჯორჯია”)
2 – ლევან კუტალია (1), ირაკლი ქობალია, შოთა ლომია (“ზუგდიდი”), რევაზ გოცირიძე, ნიკო კვასხვაძე (“ჩიხურა”), ლაშა შერგელაშვილი, გიორგი დათუნაიშვილი (“ტორპედო”), რატი წინამძღვრიშვილი (“ზესტაფონი”), გიორგი მიქაბერიძე (“მეტალურგი”) ირაკლი მოდებაძე, რომან ახალკაცი (“დილა”), პაატა ცხვიტარია (“კოლხეთი), საბა ლომია (“მერანი”), მათე ვაწაძე (“დილა”/ “ორჰუსი” დანია)
1 – თორნიკე აფციაური, თორნიკე გორგიაშვილი, პატრიკ მილხრაუმი, შოთა ბაბუნაშვილი, ოთარ კვერნაძე, მიხეილ სარდალიშვილი (“ზესტაფონი”), გიგა ამბროლაძე, გიორგი რეხვიაშვილი, ნოდარ ნოზაძე (“მერანი” მარტვილი), რობერტინიო, გიორგი კვარაცხელია, ვლადიმირ ვოსკობოინიკოვი (“დინამო” თბილისი), გელა გოგიტიძე, ამირან მუჯირი, თორნიკე ბერიძე, ალექსანდრ ტიმჩიშინი (“დინამო” ბათუმი), ჯაბა უგულავა, გიორგი ქუცურუა, დავით სვანიძე, გიორგი მანწკავა (“სიონი”), ედიკ საჯაია, ბესო დეკანოიძე, ვაჟა ლომაშვილი (“ჩიხურა”), ალექსანდრე კვახაძე, ელგუჯა გრიგალაშვილი, ზაზა ჭელიძე, გიორგი ბერიაშვილი, ვალერი ბოლქვაძე, გრიგოლ დოლიძე, მერაბ გიგაური, გიორგი ფანცულაია (“ტორპედო”), გიორგი ვასაძე, ელგუჯა ლობჟანიძე, ჯემალ გოგიაშვილი (“ვიტ ჯორჯია”), პავლე დათუნაიშვილი, დავით გამეზარდაშვილი, გიორგი გაბედავა, დაჩი ფოფხაძე (“ზუგდიდი”), ვალერი კაციტაძე, სანდრო გურული (1), გიორგი კახელიშვილი, დათო კვირკველია, გიგა ბეჭვაია (“დილა”), ირაკლი სიხარულიძე (“მეტალურგი”), შალვა კვანტალიანი (“კოლხეთი”)
საქართველოს ფეხბურთის ფედერაციის დებულების თანახმად, უმაღლეს, პირველ და დუბლების ჩემპიონატებში თანაბარი ქულების დაგროვების შემთხვევაში, ადგილები შემდეგი პრიორიტეტული პრინციპით გაირკვევა:
ჩემპიონატში უშუალოდ ურთიერთშეხვედრების შედეგები (ქულათა რაოდენობა და შემდეგ ბურთების უკეთესი სხვაობა. ბურთების ერთნაირი სხვაობის შემთხვევაში, უპირატესობა მიენიჭება გუნდს, რომელსაც ერთმანეთთან შეხვედრებში სტუმრად მეტი გოლი აქვს გატანილი);
-ჩემპიონატში მოგებათა მეტი რაოდენობა;
-ჩემპიონატში გატანილი და მიღებული ბურთების უკეთესი სხვაობა;
-ჩემპიონატში გატანილი გოლების მეტი რაოდენობა;
-ჩემპიონატის განმავლობაში, გუნდის მიერ მიღებული წითელ-ყვითელი ბარათების რაოდენობა (წითელი 3 ქულა, ყვითელი – 1 ქულა. თანაბარი ქულების დაგროვების შემთხვევაში, უპირატესობა მიენიჭება ნაკლებ წითელ ბარათს);
-თუ გუნდებს ეს მაჩვენებელიც თანაბარი აღმოაჩნდებათ, ადგილების გამოსავლენად მოეწყობა კენჭისყრა
ილია ნანობაშვილი
· 
საფეხბურთო კლუბი ვიტ ჯორჯია, V ნაწილი
