http://www.worldsport.ge/ge/page/dila222#comments"ხერხი სჯობია ღონესა..."
"დილა" დანიას დანასავით ესობა
შარშან ამ დროს: გორის "დილამ" გასვლაზე მოუგო დანიურ "ორჰუსს", შემდეგ შინაც სძლია და საერთო ჯამში, 5:2 დაამარცხა. წლეულს, ევროპის ლიგის ასევე II საკვალიფიკაციო ეტაპზე, შარშანდელისგან სახეშეცვლილმა "დილამ" დანიის მორიგი გუნდი, "ოლბორგი" დაიბრიყვა - შინ 3:0 მოუგო და დიდი ნაბიჯი გადადგა III ეტაპისკენ. საქართველოს ერთი პატარა ქალაქის გუნდი, დანიელებს დანასავით ესობა.
ერთი გემრიელი სიტყვა, რითაც გორის "დილას" თამაში შეიძლება შეფასდეს - მადლობა! მადლობა იმ თამაშისთვის, რაც გუნდმა 5 წლის წინ ჩემპიონთა ლიგაში ნათამაშებ "ოლბორგთან" აჩვენა და მოდით, ნუ დავაკნინებთ გორელთა გამარჯვებას და ნუ ვიტყვით, რომ "ოლბორგი" სუსტი გუნდია. არც ისე სუსტია, როგორც ამ შეხვედრაში გამოჩნდა - უბრალოდ, გიორგი დევდარიანის გუნდმა, ტექნიკისა და იმპროვიზაციის ხარჯზე პირწმინდად დაჩაგრა.
ეს, ის შემთხვევაა, როცა ქართული ანდაზა გახსენდება: “ხერხი სჯობია ღონესა, თუ კაცი მოიგონებსა”. აშკარად ჩანდა, რომ "ოლბორგი" ფიზიკურად უფრო ძლიერი იყო, ათლეტურად აღემატებოდა ქართულ გუნდს, რაც უდავოდ მნიშვნელოვანი კომპონენტებია, თუმცა... ფეხბურთს მარტო კუნთები არ იგებენ.
დევდარიანმა 3 ცენტრალური მცველით თამაში არჩია: ოდნავ ფლანგებზე იყვნენ კობახიძე და თომაშვილი, შუაში კი გამოცდილი ხიზანეიშვილი დადგა. მთლიანად ფლანგებზე ალადაშვილი და გურული თამაშობდნენ, თუმცა ისინი ხან მცველებად, ხანაც ნახევარმცველებად გვევლინებოდნენ. ანუ, როცა "ოლბორგი" უტევდა, ქართველთა დაცვა 5 კაციანი ხდებოდა.
ნახევარდაცვის ცენტრში გვალია და ბოლქვაძე მოქმედებდნენ, წინ კი - ილურიძე და მოდებაძე, თუმცა ილურიძე უფრო სიღრმიდან და მარცხნიდან. ალადაშვილს კი მარჯვენა ფლანგზე დოლიძე უბამდა მხარს.
პირველი სახიფათო მომენტი მასპინძლებმა შექმნეს, როცა მე-3 წუთზე დოლიძის ჩაწოდებულს, ილურიძემ თავური შეაგება და მეკარემ იმარჯვა. ტემპს დაბალი ეთქმოდა, რადგან ცხელოდა და ჩანდა, რომ გუნდები მეორე ტაიმისთვის ძალას ზოგავდნენ. დანიელთაგან ფრედერიკსენი იყო სახიფათო - ერთხელ რევიშვილმა მოიგერია მისი დარტყმული, თუმცა, ნუკრის უფრო რთული ბურთის აღება კურტის თავურის შემდეგ მოუხდა.
მეორე ნახევარში სანახაობრივმა მხარემ იმატა, რადგან, ჯერ ერთი, აგრილდა და მეორეც, "დილამ" თამამად შეუტია. რაც დრო გადიოდა, დევდარიანის გუნდი სიმწვავეს უმატებდა. 53-ე წუთზე ირაკლი მოდებაძემ თავით მოიგო ორთაბრძოლა და ილურიძე მეკარესთან პირისპირ დარჩა, გიორგიმ წინ გამოსულ მეკარეს თავზე გადაუგდო ბურთი და... ოდნავ ააცილა - პირველი 100-პროცენტიანი მომენტი იყო მატჩში.
ანგარიში 61-ე წუთზე გაიხსნა, როცა დოლიძემ მარჯვნიდან დაბალი ბურთი ჩააწოდა, ხოლო მოდებაძემ კარისკენ ზურგით მდგომი მოტრიალდა და როგორც იტყვიან, მცველის ფეხიდან დაარტყა - 1:0. ორ წუთში "დილა" გადარჩა, მამუკა კობახიძე შეცდა და შეტევას ფრედერიკსენის ახლოდან დარტყმა მოჰყვა - ოდნავ უზუსტო.
შეხვედრის ერთ-ერთი სანახაობრივი მომენტი, რომელიც სამწუხაროდ, გოლით არ დასრულდა, ილურიძის გარღვევა იყო. ახალგაზრდა შემტევმა, ლამის, ნახევარი "ოლბორგი" მოატყუა და მეკარეს რომ არ ემარჯვა, სუპერგოლს ვიხილავდით. ლარსენმა კარგად არ დაარტყმევინა ილურიძეს.
"დილას" შეტევა კიდევ უფრო გააძლიერა მიხეილ გორელიშვილის შემოსვლამ. ამ ბიჭმა ახალი თავსატეხი გაუჩინა დანიელებს და შედეგი ტაბლოზეც წერია - 3:0, აქედან ორი ბურთი გორელიშვილმა გაიტანა.
72-ე წუთზე ლაშა გვალიამ დაიწყო შეტევა, გორელიშვილმა გააგრძელა და დავით ბოლქვაძეს დაუგორა ბურთი. ბოლქვაძის საჯარიმოს მისადგომებიდან დარტყმული მცველმა მოიგერია, თუმცა გორელიშვილი იქვე გაჩნდა, დაამატა და 2:0.
დანიელებს სხვა არფერი დარჩენოდათ, თუ არა ვა-ბანკზე წასვლა. დიდი ძალებით, ჯანით, ფლანგზე გაქცევითა და ჩაწოდებებით ცდილობდნენ სანუკვარი გოლის გატანას. ჰქონდათ კიდეც ერთი იდეალური შანსი (ისევ კურტმა ააცილა ახლოდან) და გამოჩნდა, რომ "დილა" დაიღალა. გახშირდა წუნი პასებში და კიდევ კარგი, დანიელებიც სცოდავდნენ, როცა ბურთი უკვე საჯარიმოს მისადგომებთან ჰქონდათ.
ბოლოს, სანამ მსაჯი 6 წუთს დაამატებდა, მშვენიერი გოლი ვიხილეთ: გვალიამ საკუთარი ნახევრიდან წაიღო ბურთი, გორელიშვილს გადააწოდა, მან კი შეცვლაზე შესულ გიორგი აბურჯანიას მისცა და თავად მეტოქის საჯარიმოში შეირბინა. ყოჩაღ აბურჟანიას - მშვენიერი ბოლო პასი გააკეთა და გორელიშვილი მეკარესთან პირისპირ დატოვა, მან კი მეკარეს აუღებელი დაურტყა - 3:0.
მადლობა "დილას" და გიორგი დევდარიანს. ვშიშობდით, მოკლე დროში გუნდი შეთამაშებას ისე ვერ შეძლებდა, "ოლბორგთან" გამარჯვებისთვის საკმარისი რომ ყოფილიყო, თუმცა ამ თამაშმა ყველაფერს პასუხი გასცა. იმედია, "დილა" არც დანიაში მოდუნდება.
ევროპის ლიგა. II საკვალიფიკაციო ეტაპი. I მატჩი.
შესაშურად იასპარეზა ჭეშმარიტმა ოსტატმა მაიკლ ჯორდანმა...
· 
გორის "დილა" ვიცე-ჩემპიონია! VOL.4 , "დილას" ვერცხლის მედლები 2012-2013 ჩემპიონატში
