პრევენციული ზომები - სადისციპლინომ ეჭვმიტანილი კლუბები დასაჯა
დღეს, სფფ-ის სადისციპლინო კომიტეტმა განიხილა სფფ-ის სპორტული სამართლიანობის ჯგუფის შუამდგომლობა 2010/11 და 2012/13 წლების სეზონების მატჩების შესახებ, რომლებზეც უეფას თაღლითური ფსონების ამოცნობის სისტემიდან მიღებულ იქნა პატაკები.
სპორტული სამართლიანობის ჯგუფმა, სადისციპლინო კოდექსის 126-ე მუხლის შესაბამისად, მოითხოვა პრევენციული ხასიათის სადისციპლინო სანქციის გატარება იმ კლუბებზე, რომელთა შესახებ უეფას თაღლითური ფსონების ამოცნობის სისტემიდან მიღებულ იქნა პატაკები, რომ ადგილი ჰქონდა ამ მატჩების შედეგების თუ მათი მიმდინარეობის მანიპულირებას ტოტალიზატორებში მოგების მიღების მიზნით.
პარალელურად, ეს მატჩები გადაეცემა საეჭვო თამაშების შემსწავლელ კომისიას და შინაგან საქმეთა სამინისტროს.
სადისციპლინო კომიტეტის დღევანდელ სხდომაზე კი, სფფ-ის მოქმედი სადისციპლინო კოდექსის 126-ე მუხლის თანახმად, სადისციპლინო კომიტეტმა დააწესა პრევენციული ხასიათის სანქციები შემდეგი კლუბების მიმართ:
„მეტალურგი“ (რუსთავი) – 20 ათასი ლარი
„კოლხეთი 1913“ (ფოთი) – 20 ათასი ლარი
„დილა“ (გორი) – 23 ათასი ლარი
„მერანი“ (მარტვილი) – 23 ათასი ლარი
„სიონი“ (ბოლნისი) – 25 ათასი ლარი
განმარტების სახით გეტყვით, რომ კლუბებს ფულადი სანქციები დაუწესდათ უეფას თაღლითური ფსონების ამოცნობის სისტემიდან მიღებული პატაკების რაოდენობის მიხედვით. შესაბამისად, მეტი ჯარიმა აქვს იმ გუნდს, რომელიც უეფას პატაკში ყველაზე მეტჯერ მოხვდა - „მეტალურგი“ და „კოლხეთი“ სამ-სამჯერ, „დილა“ და „მერანი“ ოთხჯერ, ხოლო ბოლნისის „სიონი“ - ხუთჯერ.
უეფას თაღლითური ფსონების ამოცნობის სისტემიდან მიღებული პატაკები კონფიდენციალურია და კონკრეტული, საეჭვო მატჩების გასაჯაროება არ ხდება.
სფფ-ის სპორტული სამართლიანობის ჯგუფის განცხადებით, დღეის მდგომარეობით, არსებობს ინფორმაცია საეჭვო მატჩებისა და მასში მონაწილე სხვა კლუბების შესახებ, რომელზეც აქტიური მუშაობა მიმდინარეობს. ახლო მომავალში, ამ მატჩების მონაწილე კლუბების წინააღმდეგ აღიძვრება სადისციპლინო პროცედურები სფფ-ის შესაბამის სადისციპლინო ორგანოებში.
სფფ-ის პრესსამსახური
Bookmark and Share
http://gff.ge/%E1%83%A1%E1%83%90%E1%83%93%...aspx?newid=3113
გარიგებული მატჩებისთვის 5 ქართული კლუბი დაისაჯა
