ballack13
Super Crazy Member +
ჯგუფი: Members
წერილები: 13215
წევრი No.: 37602
რეგისტრ.: 3-July 07
|
#45287377 · 29 Jul 2015, 10:27 · · პროფილი · პირადი მიმოწერა · ჩატი
საქართველოს ნაკრების ყოფილი ფეხბურთელი ლევან კობიაშვილი ფეხბურთის ფედერაციის პრეზიდენტის არჩევნებისთვის ემზადება. უკვე ჩამოყალიბებული აქვს წინასაარჩევნო პროგრამა, რომელითაც იხელმძღვანელებს.
თუმცა, გამოცდილი ფეხბურთელი ჯერ არ ამხელს პროგარამას, სანამ არ არჩევნების თარიღი ცნობილი არ გახდება. მანამდე კი ლევან კობიაშვილი "რეზონანსთან" ინტერვიუში მოახლოვებულ არჩევნებზე და ქართულ ფეხბურთში არსებულ ვითარებაზე საუბრობს.
"ყოველთვის ვაცხადებდი, რომ ქართული ფეხბურთი ჩემთვის პრიორიტეტი იყო და რომ დავბრუნდებოდი და ახლა არჩევნებში ვიღებ მონაწილეობას. ის ადამიანები, რომლებიც მეორე მხარეს არიან და თუ თვლიან, რომ მე გამოუცდელი ვარ და არ მაქვს უფლება მონაწილეობა მივიღო - ეს მათი პოზიციაა. არანაირად არ ვაპირებ საწინააღმდეგო ქვების სროლას. მე მაქვს ჩემი ხედვა, ვიცი რა მინდა გავაკეთო და აბსოლიუტურად ამ მიმართულებით მივდივარ," - გვითხრა ლევან კობიაშვილმა.
"რეზონანსი": 2018 წლის მსოფლიო ჩემპიონატის წილისყრა შედგა, სადაც საქართველოს ნაკრები "ს" ჯგუფში მოხვდა და მეტოქეებიც ცნობილია. როგორ შეაფასებდით ჩვენს ჯგუფს და შანსებზე რას იტყვით?
ლ.კ: ერთი ფაქტია, რომ ჯგუფში გრანდი არ გვყავს, რაც ძალიან კარგია. სხვა კუთხით როგორ შევაფასებდი?! - ვერ გეტყვით, რომ ირლანდიის ნაკრები იოლია, ვიცით მათი თამაში, რადგან ახლაც ევროპის შესარჩევ ეტაპზე ჩვენთან ჯგუფში არიან. სერბეთს ძალიან ძლიერი ახალგაზრდული გუნდები ჰყავს, მაგრამ პირველი გუნდი ბოლო პერიოდში წარმატებას ვერ აღწევს. ბოლო დროს ავსტრიამაც განიცადა პროგრესი და ძლიერი გუნდი ჩამოყალიბდა. ასევე, უელსსაც ძალიან მომატებული აქვს იმ კუთხით, რომ ფიფას რეიტინგში მაღლა ავიდნენ და პირველ კალათში მოხვდნენ.
სიმართლე რომ გითხრათ, დღევანდელი ჩვენი პოზიციიდან, სადაც ქართული ფეხბურთი იმყოფება, რთულია ვიფიქროთ გავალთ თუ არ გავალთ. რადგან პრობლემა გვაქვს ფეხურთში და პირველ რიგში უნდა ვეცადოთ ეს როგორმე გამოვასწოროთ, რათა საბოლოო ჯამში რეალურად ვიფიქროთ იმაზე შევძლებთ თუ არა მსოფლიო ჩემპიონატზე გასვლას.
მგონი ერთადერთი ქვეყანა ვიქნებით, რომ მეექვსე კალათიდან ამოსულები ვსაუბრობთ იმაზე, რამდენად გვაქვს შანსი ჯგუფიდან გასვლის. ძალიან რთულია, მაგრამ მთავარია შემდეგ წლებში როგორ განვითარდება საქართველოში ქართული ფეხბურთის მდგომარეობა, რა შეიცვლება, რა იქნება - ამაზეა ძალიან ბევრი რამ დამოკიდებული.
"რ": რა უნდა შეიცვალოს კონკრეტულად, ამოსავალი წერტილი სად უნდა ვეძიოთ?
ლ.კ: სისტემას უნდა ცვლილება. ის რაც, დღეს ქართულ ფეხბურთშია, მიუღებელია. არის პატარ-პატარა პრობლემები, თუნდაც ფეხბურთელები და მათი კონტრაქტები. იგივე დამოკიდებულება ფეხბურთის მიმართ, ეროვნული ჩემპიონატისა თუ ბავშვთა ფეხბურთის მიმართ. ანუ, სისტემა საჭიროებს ცვლილებას. იმედი მაქვს, რომ ახლო მომავალში შევძლებთ სისტემის შეცვლას და დარწმუნებული ვარ, რომ მომავალი ბევრად უკეთესი იქნება, ვიდრე ახლა არის.
"რ": ანუ არჩევნებს გულისხმობთ?
ლ.კ: არჩევნები აუცილებელია. ის არის ერთ-ერთი საშუალება, სადაც შესაძლებელია შეიცვალოს ყველაფერი. პიროვნულად ვინმესთან პრობლემა არ მაქვს, უბრალოდ როგორც რიგითი გულშემატკივარი ვსაუბრობ. ჩემი აზრით ყველაზე დიდი პრობლემა სწორედ ამ კუთხითაა - ეს აუცილებელიცაა, თუ გვინდა, რომ მომავალში უკეთესობისკენ რამე ნაბიჯები გადავდგათ.
"რ": როდის დაიწყებთ წინასაპრეზიდენტო კამპანიას და რა არის თქვენი პროგრამა, რომლითაც იხელმძღვანელებთ წინასაარჩევნოდ?
ლ.კ: არჩევნებისთვის მზად ვართ. მსგავსი კითხვები ხშირად მესმის, მაგრამ დღეს ჩვენ იმაზე უნდა ვსაუბრებდეთ თუ რატომ არ ვიცით როდის იქნება არჩევნები - ეს არის პრობლემა.
უბრალოდ, ჩემი გულისტკივილია და ეს ყველაფერი ძალიან მაწუხებს. ადამიანები თავიანთი პირადი ინტერესებისთვის იყენებენ ყველაფერს, რაც საბოლოო ჯამში ქართულ ფეხბურთს არტყამს. არავინ არ უკრძალავთ, რომ არჩევნების თარიღი 3-5 თვით ადრე დაასახელონ და არა მაინცდამაინც 40 დღე გამოიყენონ, რომელიც მათივე წესდებაშია გაწერილი. რა თქმა უნდა, მათი გადასაწყვეტია როდის დანიშნავენ, რადგან ისინი არიან უპირატესობაში ამ კუთხით. რას ვიზავთ, ჩვენ სხვა შანსი არ გვაქვს, უნდა ვითამაშოთ იმ თამაშის წესებით, რასაც ისინი გვთავაზობენ.
"რ": თქვენი წინასაარჩევნო პროგრამა რა იქნება?
ლ.კ: ამაზე რომ საუბარი დავიწყო, ეს ჩემი საარჩევნო კამპანიის პრეზენტაცია გამოვა. ერთადერთი, რაც შემიძლია გითხრათ, რომ ყველაფერი ღია იქნება, ვისაც სურვილი ექნება, ყველას შეეძლება პროგრამის გაცნობა. კონკრეტულად რა მიმართულებები იქნება, დაველოდოთ პრეზენტაციას.
"რ": კონკურენტებზე რას იტყვით, რა პასუხს გასცემთ მათ კომენტარებს, რომელიც თქვენს მიმართ იქნა გაჟღერებული, თუნდაც იგივე მიხეილ ყაველაშვილისას...
ლ.კ: გულახდილად ვამბობ, პირადულად არავისთან მაქვს პრობლემა, უბრალოდ თუ ვინმე ჩემი მეგობარია, არ მაქვს უფლება ვთქვა, რომ არჩევნებში ვიღებ მონაწილეობას?! - ამას ხომ არავინ მიკრძალავს, ისევე როგორც მათ.
"რ": ენერგეტიკის მინისტრი კახა კალაძე ღიად გიჭერთ მხარს, ის რომ დღეს თქვენ ოლიმპიური ფესტივალის სოფლის მერი ბრძანდებით, საზოგადოებაში გაჩნდა ეჭვი, რომ ხელისუფლება თქვენი გაპრეზიდენტობის მომხრეა...
ლ.კ: მე არ მჭირდება მხარდაჭერა, ფეხბურთს სჭირდება. არ აქვს მნიშვნელობა ვინ იქნება პრეზიდენტი, მთავარია ფეხბურთს დაუდგება გვერდში და ამას მივესალმები. ყველა ვთანმხმდებით ერთ რამაზე, რომ სახელმწიფო უნდა დაეხმაროს ფეხბურთს. ვისწავლე სპორტული მენეჯმენტი და მაქვს იმის უფლება, რომ მივიღო ამ არჩევნებში მონაწილეობა.
თუ ვინმე გვერდში დამიდგება, დამეხმარება, რა თქმა უნდა გამიხარდება და მადლობასაც გადავიხდი. კითხვები ჩნდება ამ მიმართულებით და არ ისმის კითხვები ფეხბურთის ფედერაციის მიმართ, რომელიც არ ასახელებს არჩევნების რიცხვს.
35 სუბიექტიდან, 22 მის დაქვემდებარებაშია, აფინანსებს - ეს სამართლიანია?! და ის, რომ ლევან კობიაშვილის მეგობარია კახა კალაძე ეს უსამართლობაა?! და ეს ფაქტი ნეგატიურად უნდა ჩავთვალოთ?! მათ აქვთ ხელთ ძალაუფლება, მე ვიძახი, რომ მინდა, ამ არჩევნებში მივიღო მონაწილეობა. ვერ ნახავთ ადამიანს, ვინც არ იტყვის, რომ სახელმწიფო არ უნდა დაეხმაროს ფეხბურთს. სახელმწიფო უნდა დაეხმაროს და ეს აუცილებელიცაა. ყველა ჩვენთაგანი ვალდებულია, ქართულ ფეხბურთს დავეხმაროთ.
"რ": კონკრეტულად რა მხრივ უნდა იყოს სახელმწიფოს მხრიდან დამხარება?
ლ.კ: სახელმწიფოს ბევრი რესურსი გააჩნია იმისთვის, რომ ფეხბურთს დაეხმაროს. ძალიან კარგი რამ მოხდა, რომ ქონების გადასახადზე პროცენტი შემცირდა, ეს კერძო კლუბებისთვის დიდი შეღავათია. აქამდე თუ მილიონს იხდიდნენ, ახლა ათი ათასს გადაიხდიან და დარჩენილ თანხას კლუბს მოახმარებენ. რაღაც-რაღაც ნაბიჯები იდგმევა და დარწმუნებული ვარ, რომ მომავალშიც გაგრძელდება.
რა თქმა უნდა, არარეალურია იმაზე ფიქრი, რომ 16-ვე მუნიციპალური გუნდი მომავალ წელს კერძო გახდება. ეს ეტაპობრივად შესაძლებელია, რომ განხორციელდეს. არასწორია, რომ იძახიან, ფეხბურთს 7 მილიონი ხმარდება. 7 მილიონი კი არა, გაცილებით მეტი იხარჯება, თუ გავითვალისწინებთ მუნიციპალიტეტის გუნდებს, რომლის საშუალებითაც კლუბები ფინანსდებიან. ეს ხომ იგივე სახელმწიფოს ბიუჯეტია. ჯამში საკმაოდ სოლიდური თანხაა, სადღაც 40 მილიონია.
ჩემთვის ასევე მიუღებელია ის ფაქტიც, რომ გუნდები გავლენ ევროსარბიელზე, მოჰყავთ სამი თვით ფეხბურთელები, მუნიციპალიტეტებიდან იღებენ ფულს. ხოლო 3-4 თვის შემდეგ ამ ფეხბურთელების გაყიდვა ხდება და სატრანსფერო ფული საერთოდ არ ხვდება ბიუჯეტში და მიდის ვიღაცის ჯიბეში. ასეთი პატარ-პატარა დეტალებია, რომლის შესახებაც მთელი დღე შეგვიძლია ვისაუბროთ.
--------------------
www.soccerway.com
|
· 
სფფ-ს 2015 წლის არჩევნები, ჩვენი მოსაზრებები კანდიდატები და სხვანი
