როცა ხუთი ცოტაა...20 იანვარი. 15 საათი. ქუთაისი. „ტორპედოს“ საწვრთნელი ბაზა. ხელოვნურსაფარიანი მოედანი. 100 მაყურებელი
საკონტროლო მატჩი
"ტორპედო" (ქუთაისი) – "კოლხეთი" (ხობი) 5:1(3:0)
"ტორპედო": პირველ ტაიმში: ქვილითაია, ნიკონოვი, ნერგაძე, ქიმაძე, ხვადაგიანი, კლიმიაშვილი, კუხიანიძე (კ), გოგუაძე, წილოსანი, ტუღუში, კვერნაძე
მეორე ტაიმში: ხაინდრავა, ნაცვლიშვილი, მირცხულავა, ტაბატაძე, ბრეგვაძე, მამასახლისი, ბაბუნაშვილი (კ), საღრიშვილი (ბურჯანაძე, 70), შინდაგორიძე, კვარაცხელია, კაპანაძე
მთ. მწვრთნელი: ალექსანდრ შტელინი
"კოლხეთი": გელაშვილი, ონიანი, ვართაგავა, გოგენია, ფირცხელავა, ჭანტურიძე, რუხაია, მეფიშვილი, ბაკურაძე, ჭედია, თევზაძე
შეცვლაზე შევიდნენ: ქაჯაია, წურწუმია, ჭკადუა, ლატარია, ლოლუა, გიორგაძე, კვირტია, ბერაია
მთ. მწვრთნელი: გია გურული
გოლები: 1:0 კვერნაძე (26), 2:0 წილოსანი (27), 3:0 ტუღუში (41), 4:0, 5:0 კაპანაძე (53,59) 5:1 ჭკადუა (82, პენ)
მსაჯი: გ.დოგრაშვილი
ამ დილით ქუთაისში გვარიანად თოვდა, სათამაშო მოედანი უმალ თეთრ საბურველში გაეხვა, თუმცა საკონტროლო მატჩის გამართვა ეჭვქვეშ არ დამდგარა. ტორპედოელთა დამრიგებელი ალექსანდრ შტელინი კატეგორიული იყო - რაც არ უნდა მოხდეს, მაინც ვითამაშებთო... მართალია, თოვა დიდხანს აღარ გაგრძელებულა, მაგრამ მოედნის გასაწმენდათ სპეცტექნიკის გამოყენება მაინც საჭირო გახდა. ქუთაისელებისათვის ეს მესამე საკონტროლო მატჩი იყო. მარტვილის „მერანთან“ გასვლითი 1:0 და 1:1 შემდეგ მათ ეროვნული ჩემპიონატის პირველლიგელ ხობის „კოლხეთს“ უმასპინძლეს და ერთობ დამაჯერებლად - 5:1 სძლიეს. ალექსანდრ შტელინმა ისევ ორი შემადგენლობით აბურთავა ტორპედოელები. მასპინძელთა უპირატესობა ორივე ტაიმში აშკარა იყო. არადა პირველი საგოლე მომენტი მე-9 წუთზე ხობელებმა შექმნეს, ბექა ბაკურაძე მაქსიმე ქვილითაიას პირისპირ აღმოჩნდა, მაგრამ მეტად უხეიროდ დაარტყა. „ტორპედომ“ თანდათან იგდო ხელთ თამაშის სადავეები და უკვე შესვენებისათვის სამბურთიანი ჰანდიკაპი შეიქმნა. პირველი გოლი ვანო წილოსანის ფლანგური გადაცემის შემდეგ თავურით ოთარ კვერნაძემ გაიტანა. სულ რაღაც წუთში მასპინძელთა მძლავრი იერიში გოლით თავად წილოსანმა დააგვირგვინა, ხოლო ტაიმის დასრულებამდე 4 წუთით ადრე თავი ბექა ტუღუშმა გამოიჩინა. მე- 2 ნახევრში ტორპედოელებს ყველა საგოლე მომენტი რომ გამოეყენებინათ, ორნიშნა ანგარიშით გაიმარჯვებდნენ, თუმცა გატანის უამრავი შესაძლებლობიდან მხოლოდ ორით ისარგებლეს და ორივე შემთხვევაში თორნიკე კაპანაძემ იყოჩაღა. ჯერ იყო და „ელვამ“ მცველებს მოპარა ბურთი, კარისკენ გაიჭრა და ზუსტად დაარტყა, მერე კი ლაშა შინდაგორიძის გადაცემა შეირგო და ახლოდან აიღო ხობელთა კარი. „მშრალი“ ანგარიშით მარცხს სტუმრებმა 11-მეტრიანით დააღწიეს, რომელიც ზუსტად მამუკა ჭკადუამ შეასრულა. 24 იანვარს „ტორპედო“ საკონტროლო შეხვედრას ქობულეთში „შუქურასთან“ გამართავს. თამაში 15 საათზე დაიწყება.
https://www.facebook.com/media/set/?set=a.9...79596840&type=3
· 
ს.კ. ტორპედო ქუთაისი | FC Torpedo Kutaisi
