33 წლის მცველ აკაკი ხუბუტიას ქართველი გულშემატკივრის წინაშე წარდგენა ნამდვილად არ სჭირდება. სხვადასხვა დროს ასპარეზობდა "გაზ მეთანში", "სამსუნსფორში", "მორდოვიაში", "კერკირაში", "მიხალოვცეში", თბილისის "დინამოში", "ტიმიშოარაში", "რუსთავსა" და "ვიტებსკში". საქართველოს ნაკრების შემადგენლობაში მან 2010 წლიდან 20 მატჩი ჩაატარა. რაც ითამაშა, კარგადაც ითამაშა, საიმედოდ იდგა ჩვენი უპირველესი გუნდის დაცვის ცენტრში...
ხუბუტიამ სეზონი ბელარუსში ჩაამთავრა. იმთავითვე ვიცოდით: ის ჭკვიანი, დაკვირვებული ფეხბურთელია და ბელარუსის ნაკრებზე სასაუბროდ, რომელიც ჩვენი უახლოესი მეტოქეა ევროპის ჩემპიონატზე მოსახვედრ პლეი ოფში, ძნელად თუ ვიპოვიდით უკეთეს რესპონდენტს. ჩვენი მოლოდინი სრულად გამართლდა.
თავიდა, საუბარი მისი კარიერული სიახლეებით დავიწყეთ და მერე სანაკრებო თემაზე გადავედით...
- ჯერ თქვენს საკლუბო კარიერაზე უნდა გკითხოთ. როგორც ვიცით, ბელარუსული "ვიტებსკის" დატოვების გადაწყვეტილება მიიღეთ. რა გახდა ამის მიზეზი?
- დიახ, "ვიტებსკიდან" წასვლა გადავწყვიტე. ჩემთან ერთად გუნდიდან კიდევ არაერთი ფეხბურთელი წავიდა. დღესდღეობით "ვიტებსკი" საშუალო დონის გუნდია ბელარუსის მასშტაბით. შარშან წარმატებები გვქონდა, გუნდი მეოთხე ადგილზე გავიდა და თასის მეოთხედფინალშიც ითამაშა. თქვენ იცით, შარშანწინდელ სეზონში ცოტა ვითამაშე, ამიტომ, როცა "ვიტებსკიდან" მივიღე წინადადება, დავთანხმდი. ამ შემთხვევაში ჩემთვის წინა პლანზე იყო სპორტული მხარე და არა ფინანსები. ახლა გუნდმა ისევ შემომთავაზა ახალი კონტრაქტი, ოღონდ, იმავე ანაზღაურებით, რაც ადრე მქონდა და უკვე აღარ დავთანხმდი. მით უმეტეს, აქცენტი ახალგაზრდა ფეხბურთელებზე გაკეთდა და ლიდერებმა გუნდი დატოვეს. მაგალითად, დაცვაში ჩემმა მეწყვილემ, ბელარუსის ნაკრების მცველმა რუსულ პრემიერლიგას მიაშურა და ახლა "ურალის" ღირსებას დაიცავს.
- სად ითამაშებთ, ჯერ არ არის გადაწყვეტილი?
- არის რაღაც წინადადებები და ვნახოთ. ჯერჯერობით, მოლოდინის რეჟიმში ვარ. გასულ სეზონში, თუ "რუსთავში" ჩატარებულ მატჩებსაც ჩავთვლით, სტაბილურად ვითამაშე. სულ 31 მატჩი გამომივიდა. ასე რომ, არჩევანს უსათუოდ გავაკეთებ.
- რას იტყვით ბელარუსის ჩემპიონატზე? რამდენად ძლიერია ის? ვიცით, რომ ნაკრები ძირითადად ადგილობრივი ჩემპიონატის მოთამაშეებით მარაგდება, პლუს ამას, არის რამდენიმე ლეგიონერიც...
- ძლიერი ჩემპიონატი აქვთ, ძალიან კარგი გუნდები არიან ბრესტის "დინამო", ბატე, სოლიგორსკის "შახტიორი", მინსკის "დინამო"... ამასთან, ჩემპიონატი თანაბარია, თამაშების უმეტესობაში დიდი ბრძოლაა.
- ...და ფინანსებს რაც შეეხება?..
- ცხადია, ფინანსურად ძლიერ კლუბებს უკეთესი პირობები აქვთ და ეს გასაკვირი არ უნდა იყოს. ყველანაირი პირობაა იმისთვის, რომ ფეხბურთელმა მხოლოდ ფეხბურთზე იფიქროს. ინფრასტრუქტურაზეც გეტყვით. მაგალითად, "ვიტებსკი" ხომ საშუალო დონის გუნდია, მაგრამ აქვს ერთი მინდორი, სადაც გუნდი თამაშობს და კიდევ სამი - სავარჯიშო. რა თქმა უნდა, ყველა არის ბუნებრივსაფარიანი.
- რას იტყვით ბელარუსის ნაკრების თაობაზე?
- ჩემი აზრით საქართველოს ნაკრების ფეხბურთელები ინდივიდუალური თვალსაზრისით უფრო ძლიერები არიან, ვიდრე ბელარუსის ნაკრების მოთამაშეები. უბრალოდ, ბელარუსი სხვანაირი სტილის ნაკრებია. პირდაპირ უნდა ვთქვა, რომ რთულია მათთან თამაში და აქვთ სხვა კოზირები. როგორც იტყვიან, ყველაფერს შრომით აღწევენ და აკეთებენ. მინდორზეც უაღრესად მშრომელები არიან. ჩვენ უფრო ახალგაზრდული გუნდი გვყავს და უფრო ნიჭიერი. მათ აქვთ გამოცდილება და ბელარუსის ნაკრების ფეხბურთელთა უმეტესობას არ აკლია სათამაშო პრაქტიკა. ძალიან თავისებური გუნდია, ბოლომდე მებრძოლი...
- ფაქტია, ალექსანდრ გლები აღარ ითამაშებს საქართველოს ნაკრების წინააღმდეგ. მის არყოფნაში ვის დაასახელებდით ბელარუსის ნაკრების ლიდერად?
- დავასახელებდი "კრასნოდარის" გამოცდილ მცველ მარტინოვიჩს, ამასთან - საიმედოსაც. ასევე დავასახელებ ბატე-ს ერთ-ერთ ლიდერ სტასევიჩს, რომელიც რამდენიმე წელია, ბელარუსის ჩემპიონატის საუკეთესო ფეხბურთელად სახელდება. მარტო ბელარუსის ჩემპიონატში არა, სტასევიჩმა ბატე-ს შემადგენლობაში ევროთასებზეც ითამაშა დასამახსოვრებელი მატჩები.
- საინტერესოა თქვენი აზრი ბელარუსის ნაკრების მთავარ მწვრთნელ მიხაილ მარხელზე. როგორი მწვრთნელია და რას ფიქრობენ მასზე ბელარუსში?
- როცა მარხელი მოვიდა ნაკრების მთავარი მწვრთნელის პოსტზე, მან მაშინვე თქვა, რომ შესარჩევი ციკლის დარჩენილ შეხვედრებს საქართველოს ნაკრებთან თამაშისთვის უკეთ მოსამზადებლად გამოიყენებდა. მოგეხსენებათ, ის ბელარუსის სხვადასხვა ასაკობრივ ნაკრებში მუშაობდა, კარგად იცნობს იქაურ ახალგაზრდა ფეხბურთელებს და ამიტომაც დაიწყო ეროვნულ გუნდში გაახალგაზრდავების პროცესი. ხალხი მოლოდინის რეჟიმშია - ბევრი რამ იქნება დამოკიდებული იმაზე, შეძლებს თუ არა ბელარუსის ნაკრები ევროპის ჩემპიონატზე გასვლას.
- საინტერესოა, რას ამბობენ პირად საუბრებში ბელარუსი ფეხბურთელები საქართველოს ნაკრების თაობაზე?
- ბელარუსი ნამდვილად არაა იდეთი დონის ნაკრები, რომ რომელიმე მოწინააღმდეგეს ზემოდან გადმოხედოს. ვთქვათ, გამორჩეული ვარსკვლავებიც რომ ჰყავდეთ, მაინც არ იზამენ ამას. საერთოდაც, არ არის ქედმაღალი ხალხი. მათ იციან, რომ მოედანზე უნდა გავიდნენ და იბრძოლონ.
- თქვენს წარმოდგენაში, როგორი თამაშია თბილისში მოსალოდნელი?
- ერთ თამაშში წყდება ყველაფერი და თავისთავად, ეს ართულებს სიტუაციას. ჩემი აზრით, ძალიან ბევრი რამ იქნება დამოკიდებული საქართველოს ნაკრების ლიდერებზე - როგორ ფორმაში იქნებიან, როგორ წარმოაჩენენ თავიანთ შესაძლებლობებს... ჩამოვა თბილისში ბელარუსი და იბრძოლებს ბოლომდე - ეს ყველამ ვიცით, რადგან მათ დასაკარგი არაფერი აქვთ... ბრძოლა კი ამ გუნდს ნამდვილად შეუძლია.
- ახლა ბევრს ლაპარაკობენ ბელარუსის ჩემპიონატის საუკეთესო ბომბარდირ ილია შკურინზე. მას ბევრი არ იცნობდა, არადა, შესანიშნავი სეზონი ჩაატარა და მოსკოვის ცსკა-სგან დაიმსახურა მიწვევა. მარხელი ალბათ გაითვალისწინებს საფეხბურთო საზოგადოების აზრს და მას ნაკრებში დაუძახებს. როგორც მცველს, თუ მოგიწიათ მის წინააღმდეგ თამაშმა და, ზოგადად, რა შეგიძლიათ, გვითხრათ მასზე?
- სხვათა შორის, ამ სეზონის წინა სეზონში ეს ბიჭი "ვიტებსკში" თამაშობდა. ძირითადად, დუბლშემადგენლობაში იყო და ხშირად გაჰქონდა გოლები. ეტყობოდა თავიდანვე, რაც შეეძლო. მერე მოხდა ისე, რომ ახალი სეზონის დაწყების წინ ჩვენი გუნდის საუკეთესო თავდამსხმელი მინსკის "დინამოში" წავიდა. მწვრთნელს ჰკითხეს აზრი - თუ გინდა, დაიტოვე და ათამაშე, თუ არა და, გაუშვი სხვა გუნდშიო. მწვრთნელმა თქვა, რომ არ სჭირდებოდა და გაუშვეს "ენერგეტიკში" და რაც გააკეთა იქ, ყველამ ერთად ვნახეთ. სახიფათო ფორვარდია, აქვს კარგი საგოლე ალღო, ახალგაზრდაა და კიდევ შეუძლია მომატება. თან იმ "ენერგეტიკს" სულ ახალგაზრდა ფეხბურთელები ჰყავდა, გამოუცდელი მოთამაშეები... ორჯერ ვითამაშე მის წინააღმდეგ და შემიძლია ვთქვა - კარგი და პერსპექტიული ბიჭია.
* * *
აქვე ინტერვიუ ში ნახსენები სტასევიჩის ვიდეო
https://youtu.be/LCBvIYKis3E 
· 
საქართველო - ბელარუსი | 26.03.2019 |, ერთად დავწეროთ ისტორია! 
