http://worldsport.ge/Read.aspx?news=14699&lang=1"მანჩესტერ სიტის" საწვრთნელ ბაზაზე ჩხუბების სერია გრძელდება. ამჯერად, კონფლიქტი "არსენალის" ყოფილ ფეხბურთელებს - კოლო ტურესა და ემანუელ ადებაიორს შორის მოხდა. შეგახსენებთ, რომ გასულ თვეში, ჯერომ ბოატენგმა და მარიო ბალოტელიმაც იჩხუბეს. ინგლისურ პრესაში კი პერმანენტულად ჩნდება ინფორმაციები "ქალაქელთა" შორის დაძაბული ურთიერთობების შესახებ.
უფროსი ტურე და ადებაიორი ერთმანეთს სამშაბათის ვარჯიშზე წაეკიდნენ. კონფლიქტი შელაპარაკებით დაიწყო, რასაც შემდეგ, ფიზიკური დაპირისპირებაც მოჰყვა. თანაგუნდელებს მოჩხუბართა დასაშოშმინებლად საკმაო ძალისხმევა დასჭირდათ. ვარჯიში დაახლოებით 10 წუთით შეწყდა, თუმცა, კონფლიქტის ამოწურვის შემდეგ, საწვრთნელი პროცესი ექსცესების გარეშე გაგრძელდა.
აღსანიშნავია, რომ კოლო ტურესა და ადებაიორს მანჩესტერში არცთუ კარგი პრესა აქვთ. "ქალაქელთა" ხელმძღვანელები მათგან გაცილებით მეტს ელოდნენ. უფროსი ტურე თავიდან კაპიტნადაც კი დანიშნეს, მაგრამ გაუთავებელი ტრავმიანობისა და არადამაჯერებელი თამაშის გამო, სამკლავური მალევე დაკარგა. ინგლისელი ჟურნალისტები ირწმუნებიან, რომ რობერტო მანჩინი აქტიურად ეძებს მის შემცვლელს და არ არის გამორიცხული, კოტდივუარელმა მცველმა "სიტი" იანვარშივე დატოვოს.
კიდევ უფრო რთულადაა ადებაიორის საქმე. ბრიტანული მედიის მტკიცებით, მანჩესტერში 2009 წელს 25 მილიონ ფუნტად შეძენილი ტოგოელი თავდამსხმელის დღეები დათვლილია. ბოლო პერიოდში, აფრიკელი ისედაც ვერ ხვდებოდა ძირითად შემადგენლობაში და ახლა, როცა "ქალაქელებმა" ედინ ჯეკოს ტრანსფერი შეათანხმეს, ადებაიორის საკითხი შეიძლება გადაწყვეტილად ჩავთვალოთ. მანჩესტერელებს ტოგოელი გასაყიდად ჰყავთ გამზადებული და როგორც კი შესაფერის წინადადებას მიიღებენ, აფრიკელს აუცილებლად გაასხვისებენ.
მანამდე კი, საკითხავი ის რჩება, რომელ "ქალაქელებს" შორის მოხდება მორიგი კონფლიქტი.
· 
Manchester City FC, Feel The Power Of The Dollar [vol.8]
