დასტოინად
* * *
“კორინთიანსი” და ნანატრი ლიბერტადორესი
5.07.2012 12:18
ბრაზილიურმა სან პაულუს “კორინთიანსმა” ისტორიაში პირველად მოიგო კოპა ლიბერტადორესი. უცნაურია, მაგრამ ასეთი დიდი გუნდი სამხრეთ ამერიკის უპრესტიჟულესი საკლუბო ტიტულის ფინალშიც არასოდეს ყოფილა, თუმცა გავიდა და პირველივე ცდა ტრიუმფით დაასრულა.
ტიტეს გაწვრთნილმა გუნდმა სახელოვან “ბოკა ხუნიორსთან” გასვლითი 1:1-ის შემდეგ, შინ 2:0 იმარჯვა.
ორივე გოლი 33წლის ფორვარდმა ემერსონ შეიკმა გაიტანა. მან 53-ე წუთზე დანილოს ეფექტური ქუსლური პასის შემდეგ ახლო მანძილიდან დაარტყა ზუსტად, ხოლო 72-ეზე სკიავის შეცდომით ისარგებლა, საკმაოდ ბევრი გაირბინა ბურთიანად და შორეულ კუთხეში დარტყმით 2:0 გახადა ანგარიში.
სხვათა შორის, ემერსონ შეიკს ბრაზილიის ეროვნულ ნაკრებში არასოდეს უთამაშია, თუმცა ყატარის ნაკრებში 3 მატჩი ჩაუტარებია. ემერსონ შეიკს მხოლოდ ერთი სეზონი ჩაუტარებია ევროპაში, ფრანგულ “რენში” გახლდათ 2007-2008 წლებში და მხოლოდ 3 შეხვედრა ჩაატარა.
თამაშის მიხედვითაც, “კორინთიანსმა” გამარჯვება ნამდვილად დაიმსახურა, უფრო გამართულად თამაშობდა წინ და დაცვაშიც მშვენივრად იდგა. თანაც, პირველ ტაიმში “ბოკას” მეკარე ორიონი შესაცვლელი გახდა - თანაგუნდელ ლეანდრო სომოსას შეეჯახა და დაშავდა.
ბევრს ცდილობდა არგენტინელთა ცნობილი გამთამაშებელი რიკელმე. ის და ერვიტი ცენტრის გარღვევას ცდილობდნენ, თუმცა მუჩესა და სოსას მიმართ გაკეთებული პასები მეტწილად არაზუსტი იყო.
და ერთიც: “ბოკა ხუნიორსს” ეს თასი 6-ჯერ აქვს მოგებული, რეკორდსმენი კი ასევე არგენტინული “ინდეპენდიენტეა” - 7-ჯერ გაუმარჯვია.
კოპა ლიბერტადორესი. ფინალი. II მატჩი. 2:0 (I მატჩი - 1:1)
“კორინთიანსი” (სან პაულუ) - “ბოკა ხუნიორსი” (ბუენოს-აირესი) 2:0 (0:0)
კორინთიანსი: კასიო, ფაბი სანტუში, ჩიკაუ, ალესანდრო, კაშტანი, დანილო, ალექსი (დუგლასი 88), პაულინიუ, რალფი, ჟორჟე ენრიკე (ლიდსონი 90+1), ემერსონ შეიკი (უოლესი 90+2).
მწვრთნელი: ტიტე.
ბოკა ხუნიორსი: ორიონი (ა. სოსა 33), კარუცო, სკიავი, როდრიგესი, ფ. სოსა, რიკელმე, სომოსა, ლედესმა (ცვიტანიჩი 66), ერვიტი, მუჩე (ვიატრი 82), სანტიაგო სილვა.
მწვრთნელი: ხულიო ფალჩიონი.
გოლები: 1:0, 2:0 ემერსონ შეიკი (53, 72).
გაფრთხილება: მუჩე (5), ჩიკაო (5), სანტიაგო სილვა (44), სკიავი (52), კარუცო (55), ჟორჟე ენრიკე (58), კაშტანი (71).
მსაჯი: როლდანი (კოლუმბია).
ერთიც: “კორინთიანსმა” კოპა ლიბერტადორესი წაუგებლად განვლო. ისე, აქამდე ბრაზილიის 8 კლუბს ჰქონდა ეს თასი მოგებული: “სან პაულუს” (3-ჯერ), “სანტოსს” (3), “გრემიოს” (2), “კრუზეიროს” (2), “ინტერნასიონალს” (2), “პალმეირასს”, “ფლამენგოსა” და “ვასკო და გამას”.
ილია ნანობაშვილი
http://worldsport.ge/Read.aspx?news=38340&lang=1 
Copa Libertadores, სამხრეთ-ამერიკული ჩემპიონთა ლიგა
