კარგი უნდა გამოვიდეს, ისეთი პროპორციები წერია.
მომზადებასთან დაკავშირებით ჩემ გამოცდილებას გაგიზიარებ:
- მოზელის დაწყების წინ ფინჯანში ვყრი მშრალ საფუარს -3 ჩაის კოვზს (გათვალისწინებული მაქვს 6 ჭიქა ფქვილზე), ვამატებ 1 ჩ/კოვზ ფქვილს და 1ჩ/კოვზ შაქარს+ თბილ (არავითარ შემთხვევაში ცხელ) რძეს, გავხსნი ერთმანეთში და ვაცლი ამოფუებას - სოკოსავით ამოიწევს ხოლმე ქუდს. ამ მასას ვამატებ მერე თბილის რძის და ფქვილის ნაზავში და ვზელ ცომს სხვა ინგრედიენტებთან ერთად. მალე ამოდის.
- კარაქს (მარგარინს) არ ვუკეთებ გულში. ბოლოს, უკვე შეკრულ ცომს გამღვალ ცხიმში დასველებული ხელით ვზელ მანამდე, სანამ ჯამის კედლებს არ მოსცილდება.
- გაფუებულ ცომს რომ გუნდებად მოჭრი და საცხობ ფურცელზე ერთმანეთისგან ცოტა მოშორებით გადაიტან, უბრალოდ მოთმინება გამოიჩინე და კარგად აფუება აცალე. იცი, როგორი უნდა გახდეს? გვერდებით ერთმანეთს შეეწებოს და მთელი ფურცელი შეავსოს! სიმაღლეც კარგად აწეული აქვს ხოლმე ასეთ დროს, გამოცხობისას თავებიც არ უსკდება. ღუმელში შედგმამდე გადაუსვი კვერცხის გული და გამოაცხე.
- ხშირად საღამოს ვზელ, ცელოფანის პარკში ვახვევ და მაცივრის დაბლა თაროზე ვათავსებ. მეორე დღეს სამსახურიდან რომ მივალ, გამოვიღებ და თბილ ადგილას დავდებ. მერე სანამ შევჭამ, მოვაწერიგებ ყველაფერს, კიდეც აფუებული მხვდება და ვიწყებ ხოლმე გუნდების მოჭრას. მერე დავდებ ისევ თბილად თიოგადაფარებულს და ისევ ჩემ საქმეებს ვაკეთებ. ასე, 1 საათში, კარგად არის ხოლმე ამოფუმფულებული და შევდგამ გამოსაცხობად.
ხო, მართლა, წერისას კიდევ ერთი ვერსია გამახსენდა:
დავტესტე და საუკეთესო იყო იუზერ LUTA-ს პან ბრიოშის ცომი.
გიკოპირებ.
250 გ ფქვილი.
40 გრამი რძე,
7გრამი დაწნეხილი (კარაქივით როა, ცოცხალი) საფუარი, (მე, პირადად, მშრალი საფუარი გამოვიყენე და არაფერი დაშავებულა. ასე მგონია
)
90 გრამი კვერცხი (მთლიანი)
1 ჩ/კ შაქარი
7 გრამი თაფლი
90 გრამი კარაქი
მწიკვი მარილი.
მოზადება: ფქვილი და შაქარი ჩავყაროთ ჯამში, მოვაყაროთ საფუარი და დავამატოთ რძე. დავიწყოთ ზელვა. ნელ–ნელა დავამატოთ კვერცხი (ნახევარ პორცია კვერცხს რო შევურევთ, მეორე ნახვეარი ცოტ–ცოტა დავამატოთ, რომ ცომი არ გაგვითხელდეს), თაფლი, მარილი და კრემივით დარბილებული კარაქი. (მეორე ინგრედიენტი არ ემატება, სანამ პირველი კარგად არ იქნება შერეული). კარაქი კარგად უნდა იყოს დარბილებული, ნელ–ნელა ხელებზე ისვამდე და თან ცომის ზელვას აგრძელებდე. ცომი უნდა იყოს წებვადი, მაგრამ არა თხელი (პასკის ცომის, დაახლოებით). მოზელილი ცომი გავახვიოთ ცელოფანში და მთელი ღამით დავდოთ მაცივარში. შემდეგ გამოვიღოთ და 2 საათი ოთახის ტემპერატურაზე გავაჩეროთ. გადავზილოთ მსუბუქად. გავაბრტყელოთ და მოვჭრათ პატარა ოთხკუთხედები, გავახვიოთ შიგნით გულსართი (ციცქნა რულეტები) და დავაწყოთ გასაფუებლად. გამოცხობის წინ გადავუსვათ ზევიდან კვერცხის და რძის ნაზავი. ცხვება მაღალ ცეცხლზე–180–200 გრადუსზე.
მასალის წონებმა არ დაგაბნიოს. სამზარეულოს სასწორი დაგეხმარება
მე ამ ცომს ვჭრი, ვშლი ხინკლის მოსახვევი ცომის მსგავსად (ცოტა სქლად, რა თქმა უნდა), და რადგან თითქმის არ არის ტკბილი, ვდებ შიგნით ჯემს, ან ნიგვზისა და შაქრის ნაზავს, ან შოკოლადს და ვუკრავ თავს. მოხვეულით ქვემოთ ვდებ საცხობ ფურცელზე, გაფარებ ტილოს და ველოდები კარგად ამოფუვდეს, მერე ვაცხობ.
სცადე, ძალიან კმაყოფილი დარჩები. ეს იდეაში ღვეზელის ცომია. შეგიძლია გააკეთო ყველით, ლობიოთი, ფარშით, კომბოსტოთი, ბრინჯით, სოკოთი და ა.შ. ლუტას, ამ რეცეპტის წარდგენისას ფორუმზე, გულსართად ისპანახი ჰქონდა გამოყენებული. გახვევის სიმარტივეც ძალიან ორიგინალურ სახეს აძლევდა ღვეზელებს.
უჰ, რამდენი ვწერე?!
· 
დღეს გავაკეთე, N°44, რომელი ქვეყნის სამზარეულო უფრო მოგწონთ ?
