2007 წელს, საქართველოში კომერციულ საქმიანობას "Beeline”-ის ბრენდით კომპანია "ვიმპელკომი” დაიწყებს. რუსეთის ერთ-ერთმა უდიდესმა ფიჭური კავშირის ოპერატორმა საქართველოში მობილური საკომუნიკაციო მომსახურების ლიცენზია რამდენიმე დღის წინ შეიძინა. ეს კი შემდეგნაირად მოხდა: "ვიმპელკომმა” ქართული კომპანია "მობიტელის” აქციათა 51% შეისყიდა და დანარჩენი 49%-ის შეძენის უფლება დაიტოვა. კომპანია "მობიტელი” კი საქართველოს მთელ ტერიტორიაზე GSM-1800 სიხშირულ დიაპაზონში მობილური საკომუნიკაციო მომსახურების ლიცენზიას ფლობდა.
"მობიტელის” აქციათა 51% "ვიმპელკომს” 12,6 მილიონი აშშ დოლარი დაუჯდა. სამაგიეროდ, ამით მან მიიღო შესაძლებლობა საქართველოში ფიჭური კავშირის მომსახურება GSM-1800 სიხშირულ დიაპაზონში განახორციელოს. საქართველოს კომუნიკაციების ეროვნული კომისიის მონაცემებით, ლიცენზიას მოქმედების ვადა 2013 წლის 23 ივლისამდე აქვს. თუმცა როგორც "ვიმპელკომის” საზოგადოებასთან ურთიერთობის სამსახურის წარმომადგენელმა იულია ოსტროუხოვამ გაზეთ "ნავიგატორთან” საუბარში აღნიშნა, კომპანიას იმედი აქვს, რომ 2012 წლისთვის ის უკვე ქართული ბაზრის 20%-ის ათვისებას შეძლებს. "ჩვენ ვერ ვიტყვით, რომ ეს ზუსტად ასე იქნება, თუმცა ეს არის ჩვენი მოლოდინი და ის მიზანი, რომელსაც ვისახავთ. შეიძლება ამ ციფრს გადავაჭარბოთ კიდეც. ყოველ შემთხვევაში ვგეგმავთ ამაში მთელი ძალისხმევა ჩავდოთ.”-აღნიშნა იულია ოსტროუხოვამ. კომპანიის მონაცემებით, დღეს საქართველოში 4,7 მილიონი ადამიანი ცხოვრობს. ქართულ ბაზარზე დღეისათვის მოქმედ ორ ოპერატორს (მაგთიკომი და ჯეოსელი) კი ამ ბაზრის მხოლოდ 30% უკავია. შესაბამისად, დარჩენილი 70% საკმაოდ პერსპექტიულად გამოიყურება.
არადა "ვიმპელკომის” ხელში GSM-1800 სტანდარტის მოხვედრა საკმაოდ საინტერესოდ მოხდა. ოფიციალურად კომპანია "მობიტელმა”, რომელიც საქართველოში 2003 წლის ნოემბერში დაფუძნდა, 2005 წელს კომპანია "მეგაკომის” ლიცენზიის ნაწილი შეიძინა. თუმცა, შეგახსენებთ, რომ "მეგაკომი” ამ დროს არა GSM-1800, არამედ CDMA-800 ლიცენზიას ფლობდა. შესაბამისად, "მობიტელსაც” იმ დროს მხოლოდ CDMA-800 ლიცენზია გააჩნდა. გავრცელდა ისეთი ინფორმაციაც, თითქოს "ვიმპელკომმა” ის ლიცენზია იყიდა, რომელიც 2006 წლის თებერვალში 72 მილიონ ლარად მარეგულირებელ კომისიაში გამართული აუქციონის შედეგად კომპანია "ბლუმფინ ლიმიტედმა” შეიძინა. არადა, სინამდვილეში "ვიმპელკომის” შენაძენს "ბლუმფინ ლიმიტედთან” არანაირი კავშირი არ აქვს. მართალია, "ბლუმფინ ლიმიტედიც” ფლობს "მეგაკომის” სიხშირის ნაწილს, თუმცა "მობიტელის” შემთხვევაში მოხდა შემდეგი: 2006 წლის 14 თებერვალს "მობიტელმა” მარეგულირებელ კომისიაში შეიტანა განცხადება 1800 მგჰც რადიოსიხშირულ დიაპაზონში აუქციონის გამოცხადების შესახებ. როგორც მაშინ "მობიტელში” განმარტეს, აღნიშნულ დიაპაზონში როუმინგული მომსახურების განსახორციელებლად კომპანიას ესაჭიროებოდა 2 ‘ 5.6 მგჰც რადიოსიხშირული ზოლით სარგებლობის ლიცენზიის მოპოვება. თუმცა აღმოჩნდა, ვინაიდან თავისუფალი რადიოსიხშირეების გეგმის შესაბამისად, 1800 მგჰც-იან რადიოსიხშირულ დიაპაზონში დარჩენილი იყო მხოლოდ 2 ‘ 14.6 მგჰც რადიოსიხშირული ზოლი. ეს არ იყო საკმარისი ორი დამოუკიდებელი ოპერატორის უზრუნველსაყოფად და თუ რადიოსიხშირული დიაპაზონის თავისუფალ 14.6 მგჰც რადიოსიხშირულ ზოლს გამოაკლდებოდა "მობიტელის” მიერ მოთხოვნილი 2 ‘ 5.6 მგჰც სიგანის რადიოსიხშირული ზოლი, 1800 მგჰც რადიოსიხშირულ დიაპაზონში თავისუფალი დარჩებოდა მხოლოდ 2 ‘ 9 მგჰც სიგანის რადიოსიხშირული ზოლი. ამიტომაც, კომისიამ "მობიტელს” შესთავაზა 1800 მგჰც-იან დიაპაზონში 2 ‘ 5 მგჰც სიგანის ზოლის სანაცვლოდ, დააბრუნოს მის საკუთრებაში არსებული 800 მგჰც რადიოსიხშირული დიაპაზონიდან რადიოსიხშირული ზოლების გარკვეული ნაწილი.
კომპანია "მობიტელი” მარეგულირებლის ამ შემოთავაზებაზე დათანხმდა. ამის შემდეგ, მისი ლიცენზიით გათვალისწინებული რადიოსიხშირული დიაპაზონი დაიყო 6 რადიოსიხშირულ ზოლად. ექსპერტების შეფასებით, აქედან CDMA ტექნოლოგიით მობილური საკომუნიკაციო მომსახურების განსახორციელებლად კომპანიისთვის სრულიად საკმარისი იქნებოდა მხოლოდ 2 რადიოსიხშირული ზოლი, ამიტომაც, კომისიამ უკან დაიბრუნა 4 მგჰც სიგანის რადიოსიხშირული ზოლი და ამის სანაცვლოდ, "მობიტელს” როუმინგული მომსახურების განსახორციელებლად 1800 მგჰც-იან დიაპაზონში 2 ‘ 5 მგჰც სიგანის რადიოსიხშირული ზოლი მიანიჭა.
სწორედ ამის შემდეგ, "მობიტელის” ხელში აღმოჩნდა ლიცენზია შემდეგი რადიოსიხშირული ზოლებით: 827.955, 831.645 მგჰც; 872.955, 876.645 მგჰც; 1775.2, 1780.2 მგჰც; 1870.2, 1875.2 მგჰც. თუმცა "მობიტელის” საქმე ამით არ დასრულებულა. 2006 წლის 21 მაისს "მობიტელმა” მის საკუთრებაში დარჩენილი CDMA-800-ის რადიოსიხშირული ზოლები "ასპენვუდ გრუპ კორპ.”-ს მიყიდა. შესაბამისად, ამ დროისთვის "მობიტელის” ხელში მხოლოდ GSM-1800-ის სიხშირეები დარჩა, რომელთა მფლობელიც ცოტა ხნის წინ კომპანია "ვიმპელკომი” გახდა.
2006 წლის 1 ივნისის მონაცემებით, "ვიმპელკომს” უკვე 50 მილიონზე მეტი აბონენტი ჰყავს. "Beeline”-ის ბრენდით ეს კომპანია მუშაობს რუსეთის, ყაზახეთის, უკრაინის, ტაჯიკეთის და უზბეკეთის ტერიტორიაზე. აქედან, კომპანიის ხელში არსებული ლიცენზიების მოქმედების არეალი მოიცავს ტერიტორიებს, სადაც ცხოვრობს, დაახლოებით, 237 მილიონი ადამიანი. 2006 წლის პირველი კვარტლის, ანუ 31 მარტამდე მიღებული ფინანსური და ოპერაციული შედეგების მიხედვით, მისმა სუფთა ოპერაციულმა ამონაგებმა შეადგინა 936,2 მილიონი აშშ დოლარი, ანუ ერთი წლის მანძილზე მან 46%-ით მოიმატა. ამასთან, სუფთა მოგებამ 150,2 მილიონი აშშ დოლარი შეადგინა და ერთი წლის მანძილზე 37%-ით მოიმატა. იულია ოსტროუხოვას თქმით, იქიდან გამომდინარე, რომ კომპანიის აქციები გატანილია ნიუ-იორკის საფონდო ბირჟაზე, მათ არ აქვთ უფლება გამოაქვეყნონ ფინანსური პროგნოზები და, შესაბამისად, "ვიმპელკომი” არ აცხადებს, თუ რა მოცულობის ინვესტიციების დაბანდებას გეგმავს ის საქართველოში. თუმცა კომპანია აღნიშნავს, რომ თითოეული ახალი აბონენტის ქსელში ჩასართავად ის მზად არის 100-120 აშშ დოლარი ჩადოს.
მარეგულირებელი კომისიის მონაცემებით, პრაქტიკული საქმიანობა საქართველოში "ვიმპელკომმა” უკვე ამ წლის დეკემბრამდე უნდა დაიწყოს. როგორც იულია ოსტროუხოვამ აღნიშნა, მანამდე კომპანია გეგმავს შეისწავლოს ტერიტორია და დაიწყოს ქსელის აგება. ასევე უახლოეს მომავალში, სავარაუდოდ, გამოცხადდება ტენდერი აპარატურის შესაძენად, დეკემბრიდან კი უკვე ტექნიკის შეძენა და ქსელის აგება დაიწყება. ამასთან, მართალია, თავდაპირველად ქსელის აგებას კომპანია ძირითადი დასახლებული პუნქტებიდან დაიწყებს, თუმცა მომავალში "ვიმპელკომს” საქართველოს მთელი ტერიტორიის დაფარვა აქვს განსაზღვრული. ერთადერთი, სადაც კომპანია ჯერ-ჯერობით არ გეგმავს საქმიანობის დაწყებას, ეს არის საქართველოს კონფლიქტური ტერიტორიები. კერძოდ, აფხაზეთი და სამხრეთ ოსეთი.
ამასთან, მოსალოდნელი არის, რომ მომავალში კომპანია არ დასჯერდება მარტო ამ ერთ ლიცენზიას და სხვა სიხშირულ დიაპაზონში სამუშაოდ ლიცენზიების მიღებასაც შეეცდება. იულია ოსტროუხოვას თქმით, კომპანიამ თავისი გამოცდილებიდან იცის, რომ ყოველთვის უმჯობესია განსხვავებულ სტანდარტებში მუშაობა. მაგალითად, სადღაც შეიძლება უფრო მოსახერხებელი GSM-1800, სადღაც კი GSM-900 იყოს. ანუ იმ შემთხვევაში, თუ კომპანიას ექნება სხვა ლიცენზიების მიღების შესაძლებლობა, ის მათ მიღებას აუცილებლად შეეცდება. თანაც, არ არის გამორიცხული სხვა კომპანიებთანაც თანამშრომლობა აპარატურული თუ სიხშირული სიმძლავრეების გამოყენებასთან დაკავშირებით, თუმცა კომპანიისთვის პრიორიტეტულია საკუთარი ლიცენზიების მიღება. სხვათა შორის, იგივე ეხება მესამე თაობის მობილური კავშირის ლიცენზიასაც. ანუ იმ შემთხვევაში, თუ საქართველოში გამოცხადდება კიდევ ერთი აუქციონი 3G ლიცენზიის მისაღებად, მოსალოდნელია, რომ "ვიმპელკომი” ამ აუქციონში მონაწილეობას მიიღებს. "ჩვენი კომპანია მიმართულია ტექნოლოგიების განვითარებაზე არა მარტო რუსეთში, არამედ დსთ-ს იმ ქვეყნებშიც, სადაც ამჟამად ვმუშაობთ. მაგალითად, ტაჯიკეთში "ვიმპელკომი” უკვე ფლობს სხვადასხვა სტანდარტის და თაობის ლიცენზიების პაკეტს და დღეს უკვე ის "ვიმპელკომისთვის” არის არა მარტო ქვეყანა, სადაც უახლოეს მომავალში დაიწყება კომერციული საქმიანობა, არამედ ეს არის მოედანი, სადაც იგეგმება იმ ახალი ტექნოლოგიების გამოცდა, რომელთა დანერგვასაც ჩვენი ქსელის დაფარვის მთელ ტერიტორიაზე ვგეგმავთ.”-აღნიშნა იულია ოსტროუხოვამ.
ამასთან, კომპანიაში არ გამორიცხავენ რომელიმე ქართულ კომპანიასთან მჭიდრო თანამშრომლობასაც. უფრო სწორედ კი, კომპანიას დაგეგმილი აქვს ადგილობრივი პარტნიორები მოიზიდოს. ასეთი მუშაობის გამოცდილება "ვიმპელკომს” უკვე აქვს ყაზახეთში. კერძოდ, იულია ოსტროუხოვას თქმით, ახლა კომპანია უფრო დეტალურად სწავლობს საქართველოში არსებულ საბაზრო მდგომარეობას და გეგმავს ისეთი ადგილობრივი პარტნიორი მოძებნას, რომელიც უკეთესად იცნობს ადგილობრივ ბაზარს, ბიზნეს გარემოს და ზოგადად, ნაციონალურ თავისებურებებს. ბუნებრივია, ზოგადად პარტნიორობა ბაზრის სხვადასხვა სუბიექტს შორის იარსებებს (თუმდაც, ტრაფიკის გაცვლის მხრივ), თუმცა გააჩნია პარტნიორობასაც. იულია ოსტროუხოვას შეფასებით, ბაზრის რომელიმე მონაწილესთან მჭიდრო თანამშრომლობა უმეტეს შემთხვევაში ძალიან ეხმარება ბიზნესის წარმატებულ განვითარებას.
ანალოგიურად თანამშრომლობას "ვიმპელკომი” ქართულ კონტენტ-პროვაიდერებთანაც აპირებს. კერძოდ, თბილისში ისევე როგორც "Beeline”-ის მთელ ქსელში, ჩაირთვება კონტენტ-პროვაიდერებისთვის განკუთვნილი "ინფორმაციულ-გასართობი პარტნიორობის” პროგრამა. ისე კი, ქართველი მომხმარებლისთვის "Beeline”-ის ყველა ის სერვისი იქნება ხელმისაწვდომი, რომელიც კომპანიას სხვა ტერიტორიებზე აქვს დანერგილი. "საქართველოში, რა თქმა უნდა, არ შემოვიფარგლებით მხოლოდ ერთი სატარიფო პაკეტით. ჩვენი სტრატეგიული განვითარება გულისხმობს ყველა ჩვენი აბონენტისთვის ერთიანი სერვის-პაკეტის მიწოდებას. ანუ ეს ძალიან ჰგავს "მაკდონალდსის” მიდგომას: რომელ ქალაქშიც არ უნდა ჩახვიდე "მაკდონალდსი” ყველგან ერთნაირია. იგივე მიდგომა აქვს "ვიმპელკომსაც”: სადაც არ უნდა იმყოფებოდეს ჩვენი აბონენტი, მისთვის ჩვენს ქსელში არსებული ყველა სერვისი უნდა იყოს ხელმისაწვდომი. გარდა ამისა, გვინდა გავითვალისწინოთ ადგილობრივი სპეციფიკაც და ამიტომ ძალიან დაინტერესებულები ვართ ადგილობრივ კონტენტ-პროვაიდერებთან თანამშრომლობით.”-აღნიშნავს იულია ოსტროუხოვა.
მართალია, "Beeline”-ის ბრენდით კომერციულ საქმიანობას "ვიმპელკომი” საქართველოში მხოლოდ 2007 წელს დაიწყებს. თუმცა წარმომადგენლობის გახსნა აქ, ალბათ, უახლოეს მომავალში მოხდება. სხვათა შორის, სწორედ ახლა საქართველოშო იმყოფებიან კომპანიის წარმომადგენლები და აქ არსებულ სიტუაციას სწავლობენ. შესაბამისად, ქართულ ფიჭური კავშირის ბაზარზე კიდევ ერთი მობილური ოპერატორი ძალიან მალე გაჩნდება.
FROM WANEZ.GE This post has been edited by temuxa on 24 Jan 2007, 19:53
მიმაგრებული სურათი
· 
ბილაინის FAQ, მობიტელის FAQ
