სვიმნობა არ მაქვს, მაგრამ აღდგომას კი გადმოგიწერ ლენტეხურად
თანაფ
თანაფა̈ ხუნკვი ლიჴედ აღაბა̈ გვეშ ლი. აღაბ იმა̈ჲჟი ხოშა ჯოდი ლი, ეჯჟი თანაფ ხოგვიან ჴედენი ი აღვე აღაბ მეკვეშტე ლი, ეჩქა ხუნკვი ლი თანაფ ლა̈ჲდი. აშ თანაფ ჩიგარ ხეხოლი ჲედ მა̈რტისკა ი ჲედ აპრილისკა, მარე მჷჟელა̈დეღ ჩიგარ. თანაფ ჲედურ ძღჷდ ღჷნ ლი შვა̈ნისა (\ შვა̈ნისკა̈). ალ ლა̈დეღ ლოქ ალლუა̈რელი ჲესო ქრისტე.
თანაფა̈შვდ დოსკჷნდირ ხაყახ ხოჩა ხა̈მ ლამნად ი ალგუვა̈რიხ. ლამნა ხა̈მს ჩუ ა̈ზიენიხ თანაფა̈ სკვებ ლეთ, ლიზიენა̈ლ ლა̈დეღ. თხვიმ, ჭჷშხა̈რ ი ყვიჟე-პერეშტვა ლი უშედა.
თანაფ ლა̈დეღიშვდ დოსკჷნდირადჯნ აემარა̈ლხ მა̈გ ხოშა ი ხორვა. მა̈გ ეჯ ლა̈დეღიშვდ იყდიხ მა̈ხე ლერექვა̈ლს, ამარეხ ლეზვებორას ი ჩიმრიგს, იმა̈ჲ კა̈ნდღა ჩუ ხაწჷხხ. ალ ლა̈დეღიშვდ ჩუ ა̈ზიენიხ ყვიჩს ხოშა ნაღალდ, აშ ქათალა̈ლს ი კოშია̈ს ლა̈ჲდი. სკვებ ლა̈დეღ ჟი აჯა̈ბხ ლჷგრა̈ლს ი ჩუ აღა̈ფიხ წჷრა̈ნიდ. ნებოზს ქა ანა̈ყეხ ხოჩა ვახშა̈მს ი მა̈გ ხემარა̈ლ მერბა ლა̈დეღიშვდ. სკვებ ლეთ ჩი ქორს შონ ხარს, ერე მინე მჷთანაფოლ *. ლჷყარჟი ლოქ ა̈რი ი ძინა̈რს სკა ლოქ ანპერენი. თანაფ ლა̈დეღ ჩი ოჯახისკა სკა ლოქ პერენიხ მჷთანაფოლა̈ლ.
თანაფ ძინა̈რს ქორა̈ ხოშა ზურალ, ხედვა̈ჲს ერე ხოლა თეჲ ლიმეზრე ჩუ ხოხალ, ჟი იგენი ყვიჩე ტულჟი უშკუშუნდ (აღვე ამკა̈ლი ზურალ დესა ხაყა მეზგეს, ჴიდე სკვებნავ მერბა მეზგახენქა ლჷმხა̈ლ ზურალს). ალ ზურალ უჲეცხვნად თვითოლაჟი მევჟე ხა̈ლხს სკა ხეგენი შიხვშ, გა̈ჩშვ ი ა̈შკი ქიპშვ. სჷმინ ხომეზრე ხოლა თეჲ ლიმეზრეს თვითჟი ჩიჲს. შომას ლიმეზჷრს ქა აგათვე, ლერთენ მაჯაქა ქა სა̈ბემ ა̈შკი ქიპს. ალ ქიპს ხაჟახა მჷთანაფოლ. მჷთანაფოლა̈ ქა ლიფშკე აშხვ ნაგაზა მა̈დ შიდ. მჷმეზრე ზურალდ და̈რს ხეკვეს ლახარაგა̈დნას, ვოდ ჩიმე ლიმეზჷრს დემ ადაგათვი.
ალ ძინა̈რს ქორხენქა ეშხუ მარე უშკუშუნდ ჟი იგენი ი ღგრი ბარძგა̈ნი ლა̈ჴდად, ღოშკმავ უსკდინად ი უშკუშუნდ ჴედენი ეჯ ხეკისა (\ ცხეკისკა), იმა̈ჲჩუ ბარძგა̈ნ ითხი. ჟი იქცურე ეშხუ ნაჭთხეხოქა ი ღჷრი ა̈გიხო. ა̈გის თვით აშხალს ჩი ასმას სკა ხა̈ცყე, ფედია̈ჲ ა̈ზვ-ლაგა̈მისკა ი დაბა̈რისკა თვით აშხალს ჩუ ხა̈ცყე, იმა̈ჲჩუ ლი ლჷჴა̈ნ ი ლჷლა̈შ. დაბა̈რისკა ლჷბორჩხა̈ლ ჲებრას ხა̈ცყეხ, ეჩეჟი მჷქოხს ჷდესკხ. ა̈გის ამკა̈ლი მჷქოხა̈რს ჷდესკხ ქორა̈ მუხვირმოყ ქილიქა̈რჟი ი ხოჩა ლა̈სკდი ა̈გის. ამკა̈ლი მუქოხა̈რ შვანა̈რე ქორვა̈ლჟი ზაობვშ (\ ზაობით) ა̈რიხ. ბარძგა̈ნს ი მუქოხა̈რს ეჯნა̈რ ჷდესკხ ქორჟი ი დაბისკა, ერე ალე ხოლა თეხენ ლოქ ილეჩე მინე ნამშავს. ბარძგა̈ნი აშხალა̈ლ ჩუ ა̈რიხ შიხა̈რეში ცა̈შხოქა, ხედვა̈ჲ ლი თანაფჷნღო ერე მერბე ცა̈შ ანჴედენი. ალ ლა̈დეღ ლი ორიახოკვიარხო.
თანაფ ლა̈დეღ ჩი ოჯა̈ხისკა ხარს ძღჷდ ლჷწიანობ. შომას ბაპა̈რ არდახ, მა̈გ ასხვრდა წირხო ლაჴვა̈მხო. წირხენისკა ერ ანტეხენხ, ჩუ ისკვროლხ სვიფისკა ი სკარობ ხადახ. ალ ლა̈დეღ ბოფშა̈რ ი მა̈გ მა̈ხიამეზია̈რ ღჷრიხ კუმა̈ში ლალდაღხო. ეჩეხენისკა მჷლდეღა ჟი ითშიხ (\ იჩშიხ) ლამარგ ჭყჷნტა̈რს ი ავზის ა̈გიხო ზვერი ლა̈ზვერიდ. ალეს ზორობ ხაჟახა. ა̈გიხენ ჩი ბეფში ქორა̈ მარე მა̈გ ხოვზიხ მინე-მინე ბოფშა̈რს ხოჩა ლეზვებორას ი ლეთრეს. იმა̈ჲჟი ხოჩილ ი ხოშილ ლეზვებორას ათოუზიხ, ეჯჟი ხოშა ჟა̈ხე ლი. ზვერი ლიზვერი კვითხობშ ლი. თვით კვითხე ბოფშა̈რ აშხუმდ ისკვრიხ. ჩუ ხარხ ლითრე, ლიზვებ, ლიღარა̈ლ ი ლიშუშპარა̈ლ. ჟი ითშიხ ტოლიბაშვილს ი მა̈გ ჩუ იშტმიხ. ჩიჲს შიდ ხუღვეხ წჷრა̈ნი ლჷგრა̈ლ ი ა̈შიალნეხ. ა̈გის ლა̈იდი ჩიჲს შიდ ხუღვეხ წჷრა̈ნი ლჷგრა̈ლ ი უშხვა̈რ ერ ხეხოლიხ, ამჟი ხატულიხ: "ქრისტე აღსდგა". ეჩქა მერბე ხა̈ტხე: "ჭეშმარიტად აღსდგა" ი ჩუ ა̈შიალნეხ ალ ჲერბი ლჷგრა̈ლს. ხუნკვი მჷქვისკდ ხეკვეს ჟი ხაჴჷდეს ლჷგრე ი მერბად ხეკვეს ჩვასოგას. აღვე ჟი მჷტყა̈ციჲ ლჷგრე აკვეშენი, ეჩქა ალ მარად მეკვეშე ლჷგრე ჩუ ხეკვეს ა̈სცურეს. აღვე მერბემი ლჷგრე აკვეშენი, ეჩქა ქა ხეკვეს ლახოცადას მეკვეშე ლჷგრე უკვიშა̈ჲსკა.
ალ ლა̈დეღ მა̈გ უშხვა̈რ ხომეზრე თანაფა̈ ხოჩამ ჟი ლია̈ლს. ჲარბ ლა̈დეღ ჩიაგვ ძღჷდ ლითრე ი ლიხიადა̈ლ ხარხ. ამოვშ ქა იგათვითანაფ ი ხემარა̈ლხ მა̈ხე ღჷნეშვდ.
*- მჷთანაფოლ კვა̈სელა̈ჲ მაჯონ ნეპოლ ლი. ყვითელ გუგუფ ხუღვა, ჯოდი აკვატ, ღაღა̈ლ ი თხვიმ-შიყ ფა̈რვ ხარ. ხოხალ ლიცე პილ ლეჟა ი მალფხა̈რ დაბისკა ლირდე. ლა̈ცინდოლას რიყისკა ბა̈ჩ ჩუქან ისყეჲ ი ლჷგრა̈ლს ლა̈ჲდი ეჩეჲსკა ჷდესკ. ალ ნეპოლ ჩიჲს ხალა̈ტ. მჷთანაფოლა̈ ლიდგრა̈ლს ლა̈ჲდი ეჩეჲსკა ჷდესკ. ალ ნეპოლ ჩიჲს ხალა̈ტ. მჷთანაფოლა̈ ლიდგა̈რი მა̈დ ლოქ შიდ.
This post has been edited by Chkoni on 6 Jun 2007, 16:09 
· 
სვანები ფორუმზე!, სვანებო აქეეეეთ! :)))
