ადამიანი რომ ამას წაიკითხავს ტავისუფლად და უშეცდომოდ,
ზორა̈კ ნა̈ჲ გარ ნა̄რ, ტიტიშე̄რას, ეშდარა̄მ მეზგა. მუჟღვერ აშხვ მიშლადა̈ღ
ხერასშვ ჲორი ხოშა ფიკვ ნა̄რ ლეჲსენი. სგვებნა̄ვ ზედა̈შს ი ფუკვა̈რს ჟი ხვა̈მზრიდ
ელს ი ეჩქანღო ჩუ ხვა̈ჲსენიდ. ლეჰრა̈ყის ჟი ხვაზვრიდ ი ჩუ მუჩვემ მეზგ'
ა̄ჰრა̈ყი. მეზგახა̈ნქა თვით სემი მა̄რე ხვიშდ მე̄ზი. ლა̈ჲსა̄̈ლს ჩუ ხვაშდბუნედ, ეჩქას
ღვესე̄მი კუბდა̄რა̈რს ხვანყა̄̈ლიდ ი ეჩნოვშ ჩუ ხვინცელა̄̈ლდ, ჰარყი მთრე ჰარა̈ყს
ხუთრედ. ეჩქანღო ლა̈ჲსა̄̈ლს ჩუ ხვა̈ჲსურედ ი სგა ხვაგემდ კარდალთე̄'სგა, ადო
იშგან ცხვადვა̈რთე დეშ ხასკდახ ამზუმა̄̈ში ფუკვა̈რ. ლეღვ იჯბი, ეჩი̄ზუმხა̈ნს ჰარყი
მთრა ჰარა̈ყს ითრეხ, ზურალა̄̈რ ლემზირს ანყეხ. ლეღვ ჩუ იჯა̈ბ, ეჩქას ზარვლა̈რ
ქა იკედხ ლალა̈ღვ ტაბგა̈რთექა ი ლილეღვს ხაშდბახ. წდჲა̈რ მარა̈ნხა̈ნქა ქა
ჴიდეხ დორჲარშვ ჰარა̈ყს ი ქა ხაჰვდიხ ხოშა̄̈ლს ჟი ლემზრიდ. ხოშა̄̈ლს ერხის
სტამა̄ნა̈რ ხუღვეხ ი ერხის _ ლემზრა̈რ. ქა ხეგნიხ ლა̈მზრს ლაჴვრაქა ი ამჟი̄ნ
ხემზირხ: "ო̄, დიდება̄ ღმერთს, დიდა̈ბნქა მა̄მგვეშ იშდი. დიდა̈ბუ აჯჴედა ელ ლენჯა̄̈რა̈შს.
ალ ლენჯა̄̈რა̈შ მა̈ლდია̈ნ, სი ლა̄ხეშდ ნიშგვეჲ ხოშა̄მ ი ხოხვრა̄მ ი მეცხა̈მს
მა̈ლდია̈ნ ელ ლენჯა̄̈რა̈შ! იმვა̄̈ჲ ისგუ ჰერ ქ'ა̄ნა̄̈ც, სი ლა̄ხეშდ ნიშგვეჲ ხოშა̄მ ი ხოხვრა̄მ,
მა̈ლდია̈ნ! თანღა̈შ ი ა̈გი̄ ნე̄სგა, მა̈ლდია̈ნ! ცხეკიშ ი ველი ნე̄სგა, ქორა̈შ ი
ქა̄̈მი ნე̄სგა, მა̈ლდია̈ნ! ი მა̈დილი ჟახე ჯე̄რი! ისგუ ჰელ ი ბლა̈ჲ ათქა̄ბვინ ნიშგვეჲ
და̈ბს ი ლა̄რა! ჩია̄̈გ სი ლა̈ნჴერ ლერსგვან ფოყხა̈ნ გზა̄̈ვს მა̈დილშვ გვეში სი მა̈ლდია̈ნ!
სი ჯეჴრა̄̈ლდ ნებიე̄რ ფუკვარშვ, ზედაშშვ ი სეფსკვერშვ, მა̈ლდია̈ნ ი ახსიპვინ
აშ სგვებდ ი ლერსგვანთე ნიშგვეჲ გვეშ, სი მა̈ლდია̈ნ! ამახვ ანქაბვინ, მა̈ლდია̈ნ!
ნიშგვეჲ ხოლა̄მ სი ლა̄ხეჭმ ისგვა მეხშვ ი ცხუვშ. ხოლ' ა̄ნქა̄ბვინ, ხოჩა გარ
ლანსტა̄̈რვინ, სი მა̈ლდია̈ნ ი მა̈დილშვ გვეში ჯე̄რა!"
ეჩქანღო ჟი ისპუნიხ ლერსგვანთე, სტამა̄ნხა̈ნქა მა̄დხვა̈ჲ ჰარა̈ყს ხა̈ბდეხ ლემასგვთე̄'სგა
ი ეჩქანღო ქა ხაჰვდიხ წდჲა̈რს. ლემზრა̈რს მერბიე̄ლას ხა̈ტხეხ.
მელღვა ლილეღვს ქ'ა̄ზგრეხ, ეჩქას ხოშა-ხოხვრა̄მშვ ჩუ ხვისგვრიდ. ზურალა̄̈რ
მე̄რმა ფოყხა̈ნ ისგვრიხ. ჩუ ხვიგა̄̈ლიდ ტაბგა̈რს. ზურალა̄̈რ დიჲა̈რს ნაჰვდა̄̈ლიხ,
მელღვა ლეღვს ნიდე̄სგიხ, მარე ეჩზუმ ლაგფა̈რ ხეფსიხ, ერე ეშხუ ლაგა̈ფ მა̄რა
სამ ლადა̈ღ ქა ხა̄რ. წდჲა̈რ ჰარა̈ყს ხა̈ჭმინა̄ლვნეხ. შომვა̄̈ჲ ლიდჲარა̄ლე დვრევ
ჴედნ', ე̄ჩქას ხოშა ყლე: "ჰე̄, ხი̄და̈რ! ათხე ისგვეჲ ნა̈შდვები ი ხოჩა, ჟ'ელნეკვდ
ტაბგა̈რს! " ეჩქას ჟი ხვიბნედ ლიდჲარა̄̈ლს. მა̄დხვა̈ჲს ჩუ ხვიდჲარა̄̈ლდ, ეჩქას წდჲა̈რ
კათხა̈რს აჰვდა̄̈ლიხ, ჟი ხვა̈მზრა̄̈ლიდ ი ჩუ ხუთრედ. მე̄სმა̄მ კათხჟი̄ნ ჯგრა̄̈გი
კათხს ხვა̈ჭმინედ ი ლიჴვა̄̈მჲე̄ლ ნა̄რ. ალ კათხა̈რ, ხაკუხ ერე ნათხუმშვ ი ჲედ ნატხანშვ
გვეში ლესვხ. ალ ლაჴვა̄̈მჲა̄ლ ქა ისრულ', ე̄ჩქას ჩა̄რი̄ნგ ხეჭმენი. ალა ქა
იზგრ' ე̄ჩქას _ სა̈რვა̈ში. სა̈რვა̈ში ლამზრა̄̈ლ ლი თვით ჲარვ მა̄რაჟი̄ნ. ალ ლა̈მზრა̄̈ლ
კაჩუშ ლეთრე ლი. მე̄სმე ლამზრა̄̈ლ სა̈რვა̈ში სა̈ყიჲა̄ნა კათხ ლი. ა̈ლჲა̈რ მა̈გ
ლჴმა̈შ ჰარაყშვ ლი წეს ი ეჩქანღო სერ იბნი ტოლუბაშობ. ესვა̄̈ჲ მო̄დ ხაკუჩ, ა̈გითე
ღრი ი ესვა̄̈ჲ _ ა̄დუ, ეჯჲა̈რ უშხვა̄რ ხემქარა̄̈ლხ. ჯვინალდ ტოლიბაშობ მა̄მ ნემთქვა̄ნ.
სა̈ხსიგლა̈რს ქა ხუთრად, ეჩქანღო იმვა̄̈ჲჟი ჲა̈ს ხეკვა̈დ, ეჩჟი̄ნ გარ ჲთრა
მა̈გ. ათხე ტოლიბაშობისგა ჟი ხეცლენი მა̈გ. ალ ზორა̈კ ნა̈ჲ დო̄სგუნღო ნა̄რ ჟი
ლუღვლა̈ჲე. ამი მიზეზ ლმარე̄ლი ჯვინელ უშხვა̄რ ნესგა̄̈ ბა̈კა̄რობ. ნა̈ჲ სამხუბ ი
თამა̈ნიშა ღვაჟა̈რ ხვა̈ბკე̄ნად უშხვა̄რ ი მასა̈რდ ფათრა̈კ ნა̄რა. ძაღუშე̄რ ლა̈ზგას
ლმღე̄შგა̄̈ლხვიშდ, აშვხა̈ნ ნა̈ი ი მე̄რმახა̈ნ მინ. თამა̈ნიშა ღვაჟა̈რ ჟ'ანცა̄დახ ძაღუშე̄რ
მურყვამთეჟი̄ნ ი ეჩხა̈ნქა ლოხბინახ ლითოფ. ნიშგვეჲ ღვაჟა̈რ მინე მურყვამ
ოთანთეჟი̄ნ ათცა̄დახ ი ეჩხა̈ნქა ჩ'ოხვშდენახ თამა̈ნიშა. ეჩქანღო თაკვა̈რ ოთხვიახ
ნიშგვეჲს ი მურყვმა̈ ლაგვბანდა̄̈რთეჟი̄ნ ლა̄ზა̈რ ჩ'ოთგორვახ. ჟიბე პილი შდურჟი̄ნ
გიე გარ ა̈მსედე̄ლი. ჟიბე პილი ლაგვბანდა̄ჲ ჩ'ოთგორვ', ე̄ჩქას თა̈კვ ოთბა
ი ეჯნოვშ ლიჴედ ლოხვბინა ჩუ, მარე ისგთეჩუ̄ნ მეჴდე გარ ლმა̄̈რ, ეჩქას თა̈კვ
სგ'ა̄თცხატა ბა̈ჩა̈რს ი გიე ჟი ხა̈წბე̄ნ' ა̄მჟი̄ნ. ეზარ ხა̈ნუნღო ნიშგვეჲ ღვაჟა̈რს
ჟ'ოხღულჲახ ზორა̈კი ლიჩვემ ელჲა̈ ჟახაჟი̄ნ ი ამ ჩიქქა თა̈კვი ჟ'ა̈მფეშვდე̄ლი. ეჩქანღო
ნაგა̈დ ნა̈ჲ ალ ზორა̈კ ჩი ზავისგა.
ლენჯა̄̈რ
ექნება ფრონაუნსი აბა რა?!
· 
სვანები ფორუმზე!, სვანებო აქეეეეთ! :)))
