შიდსი საქართველოში, ის სულ ახლოსაა, გაფრთხილდით

საქართველოში შიდსის ვირუსმა უკვე 435 ადამიანის სიცოცხლე იმსხვერპლა

2009 წლის 18 05, ორშაბათი - 14:42
"ცოტა ხნის წინ მეგობარი დაგვეღუპა შიდსით. იგი სულ ახალგაზრდა წავიდა ჩვენგან. სამწუხარო ისაა, რომ მას შეეძლო კიდევ ეცოცხლა, დროზე რომ მიემართა ექიმებისთვის და ემკურნალა. მაგრამ, ჩვენ საზოგადოებაში დამკვიდრებული სტიგმისა და დისკრიმინაციის გამო, მან თავისი დაავადების დამალვა არჩია," _ ამბობს ფსიქო-სოციალური ინფორმაციისა და კონსულტაციის ცენტრის თანამშრომელი მარინა ასათიანი
სწორედ მისი ხსოვნის საპატივსაცემოდ ვაჟა-ფშაველას 6 ნომერთად 17 მაისს ხე დაირგა.

"ეს მისი საბედისწერო შეცდომა იყო. ჩვენს ქვეყანაში ყველა აივ ინფიცირებულს აქვს საშუალება, მიიღოს უფასო, ეფექტური მკურნალობა: გაიხანგრძლივოს სიცოცხლე და იცხოვროს სრულფასოვანი ცხოვრებით. ყველამ უნდა შეიგნოს, რომ არაა სირცხვილი თუკი შიდსითაა ადამიანი დაავადებული. არც სხვისი აზრია მნიშვნელოვანი. მნიშვნელოვანი ჩვენი სიცოცხლეა," - ამბობს "ახალი გზის" ხელმძღვანელი დალი უშარიძე.


17 მაისს შიდსით გარდაცვლილთა ხსოვნის დღე აღინიშნა. ჯანდაცვის მსოფლიო ორგანიზაციის ინფორმაციით, ამ დაავადებით მსოფლიოში ყოველ 15 წუთში ერთი ადამიანი შიდსით ინფიცირდება და ყოველ 5 წუთში ერთი ადამიანი იღუპება. 1983 წელს მსოფლიო საზოგადოებამ და ჯანმრთელობის დაცვის გლობალურმა პროგრამამ საფუძველი ჩაუყარა შიდსით დაავადებულთა ხსოვნის დღის კამპანიას. 1996 წლიდან შიდსით დაავადებულთა ხსოვნის დღეს საქართველოშიც აღნიშნავენ. ამ აქციას დღეს უკვე 115-ზე მეტი ქვეყანა და 1200 ორგანიზაცია უერთდება. მათი მიზანია გლობალური საზოგადოების შექმნა, რომელშიც გაერთიანებული იქნება საზოგადოების ყველა ფენა აივ-ინფექციის შიდსის წინააღმდეგ. თბილისში ამ ღონისძიებასთან დაკავშირებით 18-22 მაისს (10-დან 13 სთ-მდე) უფასო გამოკვლევების კვირეულია შიდსის ცენტრში.

საქართველოში შიდსის ვირუსმა უკვე 435 ადამიანის სიცოცხლე იმსხვერპლა. 2009 წლის 15 მაისის მონაცემებით ინფექციური პათოლოგიის, შიდსის და კლინიკური იმუნოლოგიის ცენტრში რეგისტრირებულია შიდსის ვირუსით ინფიცირების 2005 შემთხვევა. 1504 - მამაკაცი, 501 _ ქალი. პაციენტთა უმრავლესობა 29-დან 35 წმალდეა, შიდსი განუვითარდა 1035 პაციენტს. არვ მკურნალობას იტარებს 489 პაციენტი, მათ შორის 25 ბავშვია. თუმცა სპეციალისტთა განცხადებით, ეს ციფრები არ ასახავს საქართველოში შიდსის გავრცელების რეალურ დონეს. ექსპერტთა ვარაუდით, დღეს საქართველოში დაახლოებით 4 000-მდე აივ ინფიცირებული და შიდსით დაავადებულია. 2009 წლის 15 მაისისი მონაცემებით გამოვლინდა 154 ახალი შემთხვევა.

რეგისტრირებულია დაავადების სხვადასხვა გზები, მათ შორის ყველაზე მაღალი პროცენტი 59,7 % ნარკოტიკების ინექციური მომხმარებელია; 33,4% დაინფიცირდა ჰეტეროსექსუალური კონტაქტის შედეგად, ხოლო 2,7% ჰომო/ბისექსუალური კონტაქტით. 2,3% დაინფიცირდა ვერტიკალური გადაცემის გზით. 0,6% სისხლის რეციპიენტია. 1,3% გადაცემის გზა დაუდგენელია.

უკანასკნელ წლებში გაიზარდა დაავადების შემთხვევები ჰომოსექსუალურ და ხშირი შემთხვევით სქესობრივი კავშირის მქონე პირებს შორის, ასევე იზრდება აივ ინფიცირებულ ორსულ ქალთა რაოდენობაც, რაც ნარკოტიკების ინექციური მომხმარებლებიდან ვირუსის მეუღლეებსა და სქესობრივ პარტნიორებზე გადაცემის შედეგია.
აივ ინფიცირების ყველაზე მეტი შემთხვევა თბილისშია რეგისტრირებული (709), შემდეგ სამეგრელოში (317, აქედა ზუგდიდში -237), აჭარაში (280), იმერეთში (254), აფხაზეთში (108), კახეთში (82), ქვემო ქართლში (74), შიდა ქართლში (51), გურიაში (43) ფოთში (32), სამცხე-ჯავახეთში _ 168.
საერთო სურათი, საგანგაშოა, თუმცა დაავადების დამალვით პრობლემა არ მოიხსნება. საზოგადოებაში არსებული სტიგმის გამო, არ უნდა შეუქმნას დაავადებულმა ადამიანმა თავის სიცოცხლეს საფრთხე.


"უნდა ვაჯობოთ შიშს და სირცხვილს, გავაკეთოთ არჩევანი სიცოცხლის სასარგებლოდ",- ამბობენ "ახალი გზის" წარმომადგენლები.

lexa
გათხოვებას რო დავაპირებ ქმარს ვეტყვი სათანადოდ გამოიკვლიოს თავი ვოოტ