Presa.ge
აფხაზები თავშესაფრის საძებნელად ენგურს აქეთ გადმოდიან[”რეზონანსი”]
აფხაზები ქართულ მხარეს თავშესაფარს სთხოვენ. აფხაზეთის მთავრობის თავმჯდომარის გიორგი ბარამიას განცხადებით, აფხაზეთში შექმნილი ვითარებიდან გამომდინარე, ასეთი შემთხვევები ბოლო დროს მეტად გაიზარდა. ბარამიას თქმით, ენგურზე გადმოსვლისა და საქართველოს ხელისუფლების დახმარების თხოვნისათვის აფხაზეთში დარჩენილ ეთნიკურ აფხაზებს მრავალი მიზეზი აქვთ.
კონფლიქტების დარეგულირების საკითხებში სახელმწიფო მინისტრის ყოფილი მოადგილე გია ვოლსკი აცხადებს, რომ აფხაზების მიერ თავშესაფრის თხოვნის შემთხვევები ამ თანამდებობაზე მისი მუშაობის დროსაც იყო, თუმცა მაშინ ამის აფიშირება არ ხდებოდა. ვოლსკის თქმით, დღევანდელი ხელისუფლება ასეთ შემთხვევებს პიარისათვის იყენებს, რაც აფხაზეთიდან გადმოსვლის მსურველ აფხაზებს სერიოზულად აფრთხობთ.
გია ბარამია კი აცხადებს, რომ ახლო მომავალში იგი ოფიციალურ და დეტალურ ინფორმაციას გამოაქვეყნებს იმ აფხაზების შესახებ, რომელთაც დახმარება და თავშესაფარი ოფიციალურ თბილისს სხოვეს. ასევე დაწვრილებით ისაუბრებს იმაზე, თუ რას სთავაზობს ხელისუფლება ენგურს აქეთ გადმოსულ აფხაზებს.
- “რამდენიმე აფხაზმა, ვისაც ვიცნობ, ჩემი განცხადებით შემდეგ დამირეკა და მითხრა - ნუთუ მართლა გვთავაზობენ შერიგებასო. ჩვენ გვაინტერესებს აფხაზი ხალხის აზრი. ერთი გზა არის ევროპისკენ, ცივლიზაციისკენ - ე.ი. საქართველოსკენ და მეორე მონობისკენ, უფრსკულიკენ - ე.ი. რუსეთისკენ”, - აცხადებს ბარამია.
მისივე თქმით, აფხაზეთში ვითარება დღითი დღე უარესდება. რუსი ოკუპანტები არა მხოლოდ ეთნიკურ ქართველებს, ასევე ეთნიკურ აფხაზებსაც ავიწროვებენ.
- “სწორედ ამიტომ, აფხაზებმა თავშესაფრის თხოვნით არაერთხელ მომმართეს. უახლოეს მომავალში მათ შესახებ დეტალურ ინფორმაციას გავაჟღერებთ.
- “თქვენ იცით ლაკირბაიას შემთხვევა. აფხაზეთში შექმნილი გაუსაძლისი პირობების გამო ეს ადამიანი გადმოვიდა საქართველოს მიერ კონტროლირებად ტერიტორიაზე. დღეს, როგორც არასდროს, საჭიროა კონსოლიდაცია და საერთო ძალისხმევა. დღეს აფხაზი ხალხის ყოფნა-არყოფნის საკითხი დგას.
- “საქართველოს შემადგენლობაში აფხაზმა ხალხმა შინარჩუნა საკუთარი სახე, ავტონომია, ენა, კულტურა და ეროვნული თვითმყოფადობა. დღეს კი დგას კითხვა, რა ელოდება აფხაზ ხალხს რუსეთის ფედერაციის შემადგენლობაში. აშკარაა, რომ რუსეთის ხელმძღვანელობის მთავარ მიზანს წარმოადგენს აფხაზეთის უნიკალური ბუნებრივი სიმდიდრეების ხელში ჩაგდება და არა აფხაზ ხალხზე ზრუნვა”, - აცხადებს ბარამია.
მისივე თქმით, აფხაზები დარწმუნდნენ, რომ დამოუკიდებლობა, რომელსაც მათ რუსეთი ?პირდებოდა, საბოლოო ჯამში აღმოჩნდა ბლეფი.
- “ჩვენ გვაქვს ფაქტები, როგორ ირღვევა აფხაზი მოქალაქეების უფლები. არსებობს დაპირისპირება აფხაზებსა და რუსებს შორის. დღეს აფხაზეთში სიტუაციას ვერ აკონტროლებს სოხუმის სეპარატისტული ხელისულება, ისინი იქ არიან სტუმრის სტატუსით. არის უმძიმესი ეკონომიური, სოციალური, კრიმინოგენური ფონი შექმნილი. ხალხი სოფლებში გადაბარგდა.
- “ომის შემდგომ პერიოდში ის აფხაზები, რომლებიც ცხოვრობდნენ სოფლებში, ქართველების ქონების დასაკუთრების მიზნით გადასახლდნენ ქალაქებში. ქართველების მიტაცებული ქონება მხოლოდ 4-5 წელი ეყოთ. როდესაც სამსახური ვერ იშოვეს, პირისპირ დადგნენ სოციალური პრობლემების წინაშე. ამიტომაც დაიწყეს სოფლებში გადასახლება.
- “თვითონ ლაკირბაიამ ჩემთან საუბარში განაცხადა, რომ ბევრი აფხაზი ბრუნდება სოფელში, ამუშავებს მიწას და ამით ირჩენს თავს. კონტაქტები მაქვს აფხაზებთან და ისინი აცნობიერებენ, რაც ხდება. დაძაბულობა არის და არა მარტო გალში, არამედ სოხუმში, გუდაუთაში, გაგრაში”, - აღნიშნა “რეზონანსთან” საუბრისას გიორგი ბარამიამ.
ის, რომ აფხაზების გარკვეული კატეგორია საქართველოში თავშესაფარს ითხოვს, ამ ინფორმაციას კონფლიქტების დარეგულირების საკითხები სახელმწიფო მინისტრის მოადგილე, გია ვოლსკიც ადასტურებს.
- “როდესაც სახელმწიფო მინისტრის მოადგილედ ვმუშაობდი, ჩვენთან მოვიდა ერთი ახალგაზრდა აფხაზი კაცი, რომელიც გადმოსული იყო საქართველოში. მან მოითხოვა თავშესაფარი. მაშინ ჩვენ დავეხმარეთ მას, სამსახურშიც კი მოეწყო. ასეთი რამდენიმე შემთხვევა იყო. ასეთი ფაქტები კიდევ უფრო მეტი იქნებოდა, ჩვენი პოზიცია უფრო რბილი და პიარზე ნაკლებად გათვლილი რომ ყოფილიყო. საქმეზე ორიენტირებული რომ იყოს, ვფიქრობ, რომ ასეთი ფაქტიები მეტი იქნება”, - ამბობს ვოსკი.
მისივე თქმით, აფხაზების პროტესტის მიზეზია როგორც პოლიტიკური ვითარება, ასევე უმძიმესი სოციალური ფონი, რომელიც დღეს აფხაზეთშია შექმნილი.
- “ძალიან რთული სიტუაციაა. მაგრამ ამ მიმართულებით მუშაობაა საჭირო. ნაკლები პიარი და ნაკლები პროპაგანდა. მათ არ უნდათ, რომ პროპაგანდისთვის მოხდეს მათი გამოყენება. რომ არა ეს პრობლემა, მერწმუნეთ, რომ უფრო მეტი შემთხვევა გვექნებოდა. ხმამაღლა უნდა ვთქვათ, რომ მათ გადმოსვლას არ მო?ყვება ინფორმაციის გავრცელება, რომ ისინი გამოიქცნენ აფხაზეთიდან, ვინაიდან იქ რჩებიან მათ ახლობლები და იქნება პრობლემები. საფუძველი გამოსაქცევად აფხაზებს საკმაოდ ბევრი აქვთ და შეიძლება ამ მიმართულებით გეგმა-ზომიერი პოლიტიკის წარმოება”, - აღნიშნა “რეზონანსთან” საუბრისას გია ვოლსკიმ.
აფხაზეთში არსებულ პრობლემებზე საუბრობს ექსპერტი, კონფლიქტოლოგი გიორგი ხუციშვილი, თუმცა მისთვის უცნობია გადმოდიან თუ არა საქართველოს კონტროლირებად ტერიტორიაზე საცხოვრებლად ეროვნებით აფხაზები.
- “ამ ინფორმაციას ვერ დაგიდასტურებთ. საერთოდ დაძაბული ვითარებაა აფხაზეთში, ბევრი პრობლემაა და ძალიან ბევრია უკმაყოფილო ხალხია. მაგალითად, გალის რაიონის მოსახლოება უკმაყოფილოა იმით, რომ რუსი საოკუპაციო ჯარი აწუხებს მათ.
- “მაგრამ იქით უკვე რა ხდება, მაგალითად სოხუმში, ხალხი რა განწყობაზეა, ეს მოითხოვს დალაპარაკებას. ამ წუთში მე ახალ ინფორმაციას არ ვფლობ. ორი კვირაა, რაც აფხაზებთან შეხვედრა არ მქონია და ვერაფერს ვიტყვით”, - აღნიშნა “რეზონანსთან” საუბრისას გიორგი ხუციშვილმა.
http://presa.ge/index.php?text=news&i=11040 14:45 25.11.2009
აფხაზები ენგურს აქეთ
