საქართველოს საპატრიარქოში კათოლიკოს-პატრიარქის 78 წლის იუბილესთან დაკავშირებული მიღება დასრულდა.
დილიდან საპატრიარქოში სტუმართა ნაკადი არ წყდებოდა. სრულიად საქართველოს კათოლიკოს-პატრიარქმა, უწმინდესმა და უნეტარესმა ილია II-მ სტუმრებს მიმართა.
"მთავარი ის კი არ არის, რომ დღეს ჩემი დაბადების დღეა, მთავარია, რომ ჩვენი ერი სულიერად ძლიერია; მთელი ერი ერთად არის და ვერავითარი შინაგანი თუ გარეშე მტერი ვერაფერს დააკლებს ჩვენს ერს",-ბრძანა პატრიარქმა.
მან კიდევ ერთხელ გადაუხადა მადლობა საპატრიარქოში მისულ სტუმრებს მილოცვისათვის და ყველას ბედნიერი შობა-ახალი წელი უსურვა.
საპატრიარქოში უწმინდესის იუბილესთან დაკავშირებით იმყოფებოდნენ სასულიერო პირები, საზოგადო მოღვაწეები, პოლიტიკოსები, ჩოხოსნები, მშობლები ბავშვებთან ერთად, რათა უწმინდესისათვის იუბილე მიელოცათ.
შეხვედრაზე იმყოფებოდნენ სხვადასხვა მუსიკოს-შემსრულებლები. ისმოდა გალობა, შესრულდა კლასიკური ნაწარმოებები.
დღესვე კონსერვატორიის საკონცერტო დარბაზში სრულიად საქართველოს კათოლიკოს-პატრიარქის, უწმინდესისა და უნეტარესის ილია II-ის 78 წლის იუბილესთან დაკავშირებით კონცერტიც გაიმართება, სადაც შესრულდება საგალობლები და კლასიკური ნაწარმოებები. კონცერტს უწმინდესიც დაესწრება.