ცხოვრებით საქართველოს მოსახლეობის მხოლოდ 10%–ია კმაყოფილი
13:34 29.04.2011
Commersant.ge
საკუთარი ცხოვრებით საქართველოს მოსახლეობის მხოლოდ 10%–ია კმაყოფილი. ამას ადასტურებს კვლევის შედეგები, რომელიც ამერიკის სოციოლოგიურმა ინსტიტუტმა „გელაპმა“ ჩაატარა.
კვლევის მიხედვით საქართველოს მოსახლეობა, მისივე საკუთარი შეფასებით, უფრო ცუდად ცხოვრობს, ვიდრე იემენში, ტუნისსა და ავღანეთში, თუმცა უფრო უკეთ, ვიდრე ტაჯიკეთში, კამბოჯასა და კამერუნში.
„გელაპმა“ 124 ქვეყანა შეისწავლა და სამ კატეგორიად – „ბედნიერ“, „საშუალო სიმძიმის ცხოვრების“ და „ღარიბ“ ქვეყნებად დაყო. ცხრილი სოციოლოგიური 10 საფეხური კიბის მიხედვით შედგა. აღმოჩნდა, რომ 124 ქვეყნიდან „ბედნიერი“ მხოლოდ 19 ქვეყანაა, რადგან ამ ქვეყნების მოსახლეობის ნახევარზე მეტი საკუთარ თავს წარმატებულად მიიჩნევს.
67 ქვეყანა „საშუალო სიმძიმის ცხოვრების“ კატეგორიაში მოხვდა. ამ ქვეყნების მოსახლეობის მხოლოდ 12–დან 50%–მდეა ცხოვრებით კმაყოფილი. „ღარიბი“ კი 38 ქვეყანა აღმოჩნდა. ამ ქვეყნებში წარმატებულად თავს მოსახლეობის 12%–ზე ნაკლები თვლის.
საკუთარი ცხოვრებით ყველაზე მეტად კმაყოფილი დანიის მოსახლეობაა. აქ წარმატებულად თავს მოსახლეობის 72% მიიჩნევს. შემდეგ მოდის შვედეთი, კანადა და ავსტრალია 65%–ით. ასევე წარმატებულად მიიჩნევს საკუთარ ცხოვრებას ფინეთის მოსახლეობის 65%, ისრაელის 63 და აშშ–ს 59%.
„საშუალო სიმძიმის ცხოვრების“ ქვეყნების კატეგორიაში მოხვდა ხორვატია, რუსეთი და ეკვადორი, ცხოვრებით კმაყოფილი მოსახლეობის 24%–ით. უკრაინა 16%–ით, სამხრეთ აფრიკა, უზბეკეთი, ლიბია, პორტუგალია, ყირგიზეთი, ტუნისი და უნგრეთი 14%–ით.
„გელაპის“ ცხრილის მიხედვით, განსაკუთრებულად ღარიბი ქვეყნის კატეგორიაში მოხვდა იემენი, ეგვიპტე, ჩინეთი, ავღანეთი და სომხეთი. აქ ცხოვრებით 12%–ია კმაყოფილი. ცოტა უფრო ქვედა საფეხურზე დგას საქართველო, აზერბაიჯანი და მაკედონია, 10%–ით.
ყველაზე ბოლო საფეხურზეა ტაჯიკეთი, კამბოჯა, კამერუნი და სუდანი, ზიმბაბვე, უგანდა და ჩადი 1%–ით, ამასთან ამ ქვეყნების მოსახლეობას არ აქვს იმედი, რომ უახლოეს წლებში სიტუაცია უკეთესობისაკენ შეიცვლება.
სოციოლოგ გაგა ნიჟარაძის განცხადებით, „გელაპის“ ცხრილში საქართველოს დაბალ მაჩვენებელს რამდენიმე მიზეზი აქვს. პირველი ისაა, რომ საქართველოს მოსახლეობა ცხოვრების უფრო მაღალ დონესაა შეჩვეული.
საბჭოთა კავშირის დროს ითვლებოდა, რომ საქართველოს მოსახლეობა ყველაზე უკეთ ცხოვრობდა. დღეს კი სიტუაცია შეიცვალა. მისი თქმით, ასევე ერთერთ მიზეზად შეიძლება ჩაითვალოს კულტურული ფაქტორიც – საქართველოში ლამის ცუდ ტონად ითვლება, როცა საკუთარი ცხოვრებით ვინმე კმაყოფილებას გამოხატავს.
ამასთან არც ქვეყნის ეკონომიკა იძლევა იმის თქმის საფუძველს, რომ საქართველოს მოსახლეობა ცხოვრებით კმაყოფილი უნდა იყოს.
http://www.presage.tv/?m=bp&NID=8660 ვასილი ასპარეზს გითმობ, გააბათილე, მე კომენტარი არ მაქვს
ამერიკელთა გამოკითხვა, მხოლოდ 10%-იოოოოოოოოოოოოოოო კმაყოფილიო
