პოლიტიკა
14:11 / 03-08-2011
რა დაუჯდა საქართველოს აშშ-ის სენატის რეზოლუცია?
საქართველო-რუსეთის 2008 წლის აგვისტოს ომის მესამე წლისთავზე ამერიკის შეერთებულმა შტატებმა თავის სტრატეგიულ პარტნიორს პოლიტიკური საჩუქარი უძღვნა. მიუხედავად იმისა, რომ ბოლო დღეების განმავლობაში ამერიკული პოლიტელიტა აშშ-ის მოსალოდნელი დეფოლტის თავიდან აცილებაზე იყო გადართული, სენატმა საქართველოსთვის "მოიცალა" და 29 ივლისს ერთხმად მიიღო რეზოლუცია, რომელიც მხარს უჭერს საქართველოს ტერიტორიულ მთლიანობას და სეპარატისტულ აფხაზეთსა და სამხრეთ ოსეთს "რუსეთის ფედერაციის მიერ ოკუპირებულ" რეგიონებად აღიარებს.
რეზოლუცია, S. RES. 175, დემოკრატმა სენატორმა ჯინ შაჰინმა და რესპუბლიკელმა სენატორმა ლინდსი გრეჰემმა წარადგინეს. ორივე პიროვნება ვაშინგტონში მოქმედი საერთაშორისო პოლიტიკის კვლევით ცენტრ "ატლანტიკურ საბჭოში" საქართველოს საკითხებზე მომუშავე სპეციალური ჯგუფის თანათავმჯდომარეა. საგულისხმოა, რომ ჯინ შაჰინი გახლდათ 2010 წლის დეკემბერში საქართველოს მხარდამჭერი ანალოგიური რეზოლუციის ინიციატორი. შაჰინის განცხადებით, რეზოლუცია არის "ნათელი გზავნილი საქართველოსა და რუსეთის ფედერაციისადმი".
როგორც ცნობილია, საქართველოს ხელისუფლება "დეოკუპაციის პოლიტიკის" ჭრილში ვაშინგტონსა და სხვა დასავლურ დედაქალაქებში აქტიურად ლობირებს ამგვარი რეზოლუციების მიღებას, სადაც აფხაზეთი და ცხინვალის რეგიონი ოკუპირებულ ტერიტორიებად იქნება მოხსენიებული.
საქართველოს მხარდასაჭერად სენატორ შაჰინის ასეთ თავგამოდებულ აქტიურობაშიც, სავარაუდოდ, დიდი წვლილი მიუძღვის იმ ლობისტურ კომპანიებს, რომლებიც სააკაშვილის ხელისუფლებამ პოზიციების გასამყარებლად აშშ-ში დაიქირავა. 28 ივლისს The Washington Diplomat-სთვის მიცემულ ინტერვიუში საქართველოს ხელისუფლების მიერ აშშ-ში ლობისტური ფირმების დაქირავების შესახებ კითხვის პასუხად აშშ-ში საქართველოს ელჩმა თემურ იაკობაშვილმა განაცხადა, რომ "საქართველო ლობისტურ საქმიანობაში ყოველწლიურად 1 მილიონ დოლარზე მეტს არ ხარჯავს". მისი თქმით, თავისთავად ასეთი ფირმების დაქირავება არც ცუდია და არც უცნაური, რადგან "თანამედროვე მსოფლიოში თუ შენი ხმა არ ისმის, ესე იგი, არ არსებობ".
სენატის წინანდელ რეზოლუციაში სოხუმის და ცხინვალის ხელისუფლებების მიმართ გამოყენებული ტერმინი "დე ფაქტო", ახალი რეზოლუციის ტექსტში შეცვლილია ტერმინით "მაკონტროლებელი ძალაუფლება" - სწორედ ასე იხსენიებს სეპარატისტულ რეჟიმებს საქართველოს მთავრობის სახელმწიფო სტრატეგია ოკუპირებული ტერიტორიების შესახებ. როგორც წინა, ისე ამჟამინდელი რეზოლუცია რუსეთს მოუწოდებს, თავისი შეიარაღებული ძალები 2008 წლის აგვისტოს ომამდე არსებულ პოზიციებზე დააბრუნოს.
რეზოლუცია მოუწოდებს მოსკოვს, ცხინვალსა და სოხუმს, რომ იძულებით გადაადგილებულ პირებს ღირსეული დაბრუნების საშუალება მისცენ, საქართველოს ხელისუფლებას კი - "სამხრეთ ოსეთისა და აფხაზეთის მაკონტროლებელ ძალაუფლებებთან" დამატებითი კონტაქტებისკენ.
რეზოლუციაში ხაზგასმულია პოზიცია, რომ "კონფლიქტის მშვიდობიანი მოგვარება კავკასიის რეგიონში ამერიკის შეერთებული შტატების მთავარი ამოცანაა და რომ ხანგრძლივი რეგიონული სტაბილურობის მიღწევა მხოლოდ მშვიდობიანი და მხარეებს შორის გრძელვადიანი დიპლომატიური და პოლიტიკური დიალოგის გზითაა შესაძლებელი," ეს კი იმის მანიშნებელია, რომ აშშ-ის მხარდაჭერის იმედი კონფლიქტების სწრაფ და, მით უმეტეს, ძალისმიერი მეთოდებით მოგვარებაში თბილისს არ უნდა ჰქონდეს. 2008 წლის აგვისტოში კი აშშ-ის ასეთი მხარდაჭერის იმედი სააკაშვილის ხელისუფლებას ჰქონდა და როგორც ცალკეული ამერიკელი მიმომხილველები აღნიშნავენ, თბილისში მიაჩნდათ, რომ ამ მხარდაჭერის ფასი უკვე გადახდილია.
სკეპტიკოსთა აზრით, ამგვარი რეზოლუციები არც უახლოეს და არც თვალსაწიერ მომავალში, კონფლიქტის მოგვარების თვალსაზრისით, სიტუაციას კარდინალურად ვერ შეცვლის, ვიდრე აშშ სიტყვიდან საქმეზე არ გადავა და რუსეთზე რეალურ ზემოქმედებას არ განახორციელებს. ამჟამინდელი შიდა თუ საგარეო კონიუნქტურის გათვალისწინებით კი აშშ-ს ამისათვის რაიმე სერიოზული ბერკეტები ან მოტივაცია არ აქვს.
რუსეთს მიაჩნია, რომ მას შემდეგ, რაც მოსკოვმა ამ რეგიონების დამოუკიდებლობა აღიარა და მათთან სამხედრო თანამშრომლობაზე ოფიციალური ხელშეკრულებაც გააფორმა, აშშ-ის სენატის მიერ აფხაზეთისა და სამხრეთ ოსეთის ოკუპირებულ ტერიტორიებად გამოცხადებას არც ფაქტობრივი საფუძვლები აქვს და არც სამართლებრივი. კრემლში მიიჩნევენ, რომ ამგვარი დოკუმენტები თბილისში "რევანშისტულ განწყობებს ასაზრდოებს". სენატის ახალ რეზოლუციას სკეპტიკოსები თბილისშიც გამოუჩნდნენ. სახელისუფლებო ექსპერტების აღტაცებული კაკოფონიის ფონზე დამოუკიდებელი ანალიტიკოსები აღნიშნავენ, რომ რეზოლუციას არ შეუძლია კონფლიქტის ზონებში სიტუაციის შეცვლა თბილისისთვის სასურველი სცენარით. აფხაზი სეპარატისტების ხელისუფლებამ კი რეზოლუციის პასუხად ამერიკელი სენატორები აფხაზეთში მიიწვია რეალური სიტუაციის გასაცნობად და ობიექტური დასკვნების გასაკეთებლად.
ქართველ საზოგადოებას ისღა დარჩენია, დაელოდოს, რას მოიტანს სენატორთა აქტიურობა რუსეთის მიერ საქართველოს ოკუპირებულ ტერიტორიებთან დაკავშირებით.
ზაზა შანიძე
ყოველკვირეული გაზეთი "ყველა სიახლე"
(გამოდის ოთხშაბათობით)
წყარო/Source:
http://www.ambebi.ge/politika/39682-ra-dau...l#ixzz1U0dauL59 
მსოფლიო დაღალა ქართული მთავრობის, ფიქსაციამ რუსების ჯაშუშობაზე
