mixeiliusქართველებმა ისტორია გადაწერეს – ჯამური 48 ქულა და MVP-ს ტიტულის მოლოდინი
თამამად შეგვიძლია ევროლიგის ტოპ-16-ის დასკვნით ტურს ქართული კალათბურთისთვის ისტორიული ვუწოდოთ. ამის მიზეზი საქართველოს ეროვნული ნაკრების წევრების მანუჩარ მარკოიშვილისა და გიორგი შერმადინის ჩინებული თამაში გახდა, რომელთაც “ბენეტ კანტუს” მიერ კაუნასში “ჟალგირისისთვის” ჩაგდებული 77 ქულიდან 48 საკუთარ ანგარიშზე ჩაიწერეს და იტალიური გუნდის მორიგ გამარჯვებაში ლომის წვლილი დაიდეს.
“ჟალგირიო არენაზე” გამართულ შეხვედრას 9150 მაყურებელი დაესწრო და დაძაბული დაპირისპირების მომსწრეც გახდა. აღსანიშნავია, რომ ლიტვურმა გრანდმა თამაშის პირველი და მესამე მეოთხედები მოიგო, მეორე და მეოთხე ათწუთეულები კი სტუმართა უპირატესობით წარიმართა და საბოლოო გამარჯვებაც მათ დარჩათ.
მატჩის უდავო გმირი მარკოიშვილი გახდა, რომელმაც ფაქტობრივად შეუსვენებლად ითამაშა და კანტუელთა თავკაც ანდრეა ტრინკიერის ნდობა სრულად გაუმართლა. მანუჩარმა მოედანზე 38:47 წუთი გაატარა და სტუმრებს 32 ქულა, 2 მოხსნა, 3 პასი და 2 ჩაჭრა შესძინა. ქართველმა მცველმა 7-დან 4 ორქულიანი, 10-დან 5 სამქულიანი და 9-ვე საჯარიმო ჩააგდო, ერთხელ დაუფარეს და ბურთი არცერთხელ დაუკარგავს.
აღსანიშნავია, რომ “მანუს” წინააღმდეგ თამაშის წესები ერთბაშად ცხრაჯერ დაირღვა (თავად 4 პერსონალური ფოლი მიიღო), შედეგად კი, ქართველის სარგებლიანობის კოეფიციენტმა 35-ს უწია, რაც ტურის უძვირფასესი მოთამაშის (MVP) ტიტულზე სერიოზული განაცხადია. ტოპ-16-ის მე-6 ტურის საწყისი დღის თავზე საუკეთესო მაჩვენებელი სწორედ მარკოიშვილს გააჩნია და ისიც ცხადია, რომ მისი მიღწევის დამხობა ძალიან ძნელი იქნება.
და ერთიც. მანუჩარ მარკოიშვილმა ქართველი კალათბურთელებისთვის საუკეთესო ევროლიგური მაჩვენებელი დააფიქსირა. აქამდე პირველი შედეგი ვლადიმერ ბოისას ეკუთვნოდა, რომელმაც 2004 წლის 9 დეკემბერს, რეგულარულ სეზონში, თელ-ავივის “მაკაბის” წინააღმდეგ 39:15 წუთში 28 ქულა მიითვალა, მისმა “უნიონ ოლიმპიამ” კი მეტოქე 93:81 დაამარცხა...
გასულ შეხვედრაში ჩინებულად გამოიყურებოდა საქართველოს ნაკრების ცენტრი გიორგი შერმადინიც, რომელიც შედეგიანობის მხრივ, მარკოიშვილის შემდეგ მე-2 გახლდათ, სარგებლიანობის კოეფიციენტით (21) კი, თანამემამულის გარდა, მხოლოდ ამერიკელ დორონ პერკინსს (22) ჩამორჩა. შერმადინი მარკოიშვილისგან განსხვავებით, კანტუელთა სასტარტო ხუთეულში არ ყოფილა, თუმცა, გადამწყვეტ ჟამს მოედანზე გახლდათ და 25:01 წუთში 16 ქულა, 8 მოხსნა და 1 დაფარება მოაგროვა.
გიორგიმ 8-დან 3 ორქულიანი და 11-დან 10 საჯარიმო ჩააგდო, ბურთი ორჯერ დაკარგა და 4 პერსონალური ფოლი მიიღო, მასზე კი მასპინძლებმა 8 ჯარიმა აიღეს, რისთვისაც შერმადინმა ისინი საჯარიმოს ხაზიდან საკადრისად დასაჯა. აღსანიშნავია, რომ ქართველ კალათბურთელთა გარდა, სტუმართა რიგებში 10-ქულიან ზღვარს ვერავინ გადასცდა, “ჟალგირისის” მხრიდან კი გამორჩეულნი ხორვატი მარკო პოპოვიჩი (15 ქულა) და სერბი მილოვან რაკოვიჩი (14 ქულა) იყვნენ.
საინტერესოა, რომ კაუნასელებმა ტოპ-16-ის H ჯგუფში ექვსივე მატჩი წააგეს, “ბენეტ კანტუ” კი მეოთხედფინალის მიღმა გაცილებით დასანან ვითარებაში დარჩა. იტალიურმა კლუბმა ასპარეზობა 3 მოგებითა და ამდენივე მარცხით დაასრულა და მართალია, დღეს ბარსელონაში თელ-ავივის “მაკაბის” წაგების შემთხვევაში, ებრაული კლუბის დარი მონაგარი ექნება, მაკაბელებს უერთიერთშეხვედრებში ჩამორჩება და შემდეგ ეტაპზე გასვლის თეორიული შანსიც აღარ გააჩნია.
· 
მაარკოოოზზზზზ შემეეხეეეეეეეეეეეეეეეეეეეეეეეეეეე
