ეკა ბესელია და დავით დარჩიაშვილი ერთმანეთს არჩევანს უწუნებენ. "ქართული ოცნების" წარმომადგენელი ქალბატონი მიიჩნევს, რომ დარჩიაშვილი უდავოდ, ნიჭიერი ადამიანია, უბრალოდ მას არასწორი პოზიცია აქვს არჩეული და იმ ძალას ემსახურება, რომელმაც ქვეყანას დიდი ზიანი მიაყენა. ეკა ბესელიას პროფესიონალიზმით "ნაციონალი" დავით დარჩიაშვილიც მოხიბლულია, მაგრამ ამბობს, რომ პოლიტიკური ძალა, რომელსაც ეს ქალბატონი წარმოადგენს, ეროვნული ინტერესების წინააღმდეგ მოქმედებს. "ეკა ნეტავ, ისევ ადვოკატი იყოს", - ამბობს ბატონი დავითი და იმედოვნებს, რომ მას, ადრე თუ გვიან, თვალები აეხილება...
- რატომ გადაწყვიტეთ პოლიტიკაში მოსვლა?
ეკა ბესელია:
- პოლიტიკა თავად შემოვიდა ჩემს ცხოვრებაში. უნივერსიტეტის დამთავრების დღიდან საადვოკატო საქმიანობას ვეწეოდი, მაგრამ სასამართლო იმდენად პოლიტიზებული გახდა, რომ მივხვდი, პოლიტიკური ვითარების შეცვლის გარეშე ადამიანის უფლებებს ვერ დავიცავდი. პოლიტიკაში ყოფნა საშუალებას მაძლევს, ქვეყანაში სამართლიანობის აღდგენისთვის ვიბრძოლო.
დავით დარჩიაშვილი:
- შესაძლოა, ჩემი ნათქვამი მაღალფარდოვნად მოგეჩვენოთ, მაგრამ ეს სიმართლეა... ერთხელ არისტოტელე წავიკითხე... ის წერდა, პოლიტიკა უმაღლესი სიქველეაო. მაშინ მივხვდი, რომ ბინძური მხოლოდ პოლიტიკოსი შეიძლება იყოს და არა - თვით პოლიტიკა. ადამიანები კოლექტიური ცხოველები ვართ, რომლებიც საზოგადოებას ვქმნით. იქ, სადაც საზოგადოებაა, პოლიტიკაც უსათუოდ უნდა იყოს. პოლიტიკაში ყოფნა ძალაუფლების ფლობის სურვილს ნიშნავს. მთავარია, ეს ძალაუფლება საკუთარი კომფორტის შესაქმნელად კი არა, საზოგადოებრივი პრობლემების გადასაწყვეტად გამოიყენო.
- თუ გააკეთეთ საზოგადოებრივი პრობლემების მოსაგვარებლად რაიმე ისეთი, რაც თქვენს პოლიტიკაში ყოფნას ამართლებს?
ეკა ბესელია:
- კი, გამიკეთებია. საკუთარ თავზე ლაპარაკი მიჭირს, მაგრამ ბოლო ხუთი წლის განმავლობაში არაერთ ადამიანს დავეხმარე. ზოგისთვის კონკრეტული პრობლემა მომიგვარებია, ზოგისთვის მორალურად დამიჭერია მხარი. პოლიტიკაში ყოფნა პირადად ჩემთვის აღმოჩნდა რთული, თორემ სხვებს ნამდვილად დავეხმარე.
დავით დარჩიაშვილი:
- ჩემი შეხედულებები მაქვს ქვეყნის წარსულზე, აწმყოსა და მომავალზე. ვეცადე, მომეძებნა ისეთი პოლიტიკური ჯგუფი, რომლის წევრებიც ჩემს შეხედულებებს გაიზიარებდნენ და ქვეყნის, ჩვენი შვილების საკეთილდღეო საქმეს ერთად გავაკეთებდით. ვცდილობ, ქვეყნის აღმშენებლობაში ჩემი წვლილი შევიტანო, თუნდაც - ოპონენტებთან პაექრობით.
- ოპონენტი თქვენთვის მტერია თუ უბრალოდ, განსხვავებული იდეებისა და პოზიციების ადამიანი?
ეკა ბესელია:
- ადამიანებს მტრად იოლად ვერ ვრაცხავ. ხელისუფლებაში მყოფ ადამიანებს პოლიტიკურ მოწინააღმდეგეებად მივიჩნევ, მაგრამ მათ შორის რამდენიმე ისეთი ადამიანია, რომელიც ჩვენს ქვეყანას მტრობს.
დავით დარჩიაშვილი:
- პირადად მე, კონკრეტული ადამიანის მტრად მიჩნევა არ შემიძლია, მაგრამ რადგან საზოგადოებრივ ცხოვრებაში ვარ ჩაბმული, ზოგჯერ ესეც მიწევს. ის, რაც ნათია მიქიაშვილმა გააკეთა, ქვეყნის მტრობის ტოლფასია. ასეთი ადამიანი ჩემი მტერია. იმედი მაქვს, რომ თავისი საქციელის გამოსწორებას შეძლებს. რას ვგულისხმობ? თავის გადაცემაში, რომელშიც საკუთარ ხელისუფლებას ორი ურთიერთგამომრიცხავი რამ დააბრალა, - ომის დაწყება და რუსეთთან ჩაბარების სურვილი.
- ღირსეულ მეტოქედ თუ მიიჩნევთ ვინმეს?
ეკა ბესელია:
- "ნაციონალებიდან" ღირსეული მეტოქის დასახელება გამიჭირდება. ისინი უღირსი მეთოდებით იბრძვიან. სხვა ვინ დაგისახელოთ? ალბათ - ინგა გრიგოლია. ამ ადამიანს განსაკუთრებულ პატივს ვცემ.
დავით დარჩიაშვილი:
- დიდი სურვილი მაქვს, რომ ღირსეული მეტოქეები გვყავდეს, მაგრამ იმ ოპოზიციურ პარტიებს შორის, რომლებიც არჩევნებში ბარიერს სავარაუდოდ, გადალახავენ, ღირსეულ ოპონენტს ვერ ვხედავ.
- პოლიტიკური ოპონირება მამაკაცთან გირჩევნიათ თუ ქალბატონთან?
ეკა ბესელია:
- მამაკაცთან - იმიტომ, რომ ქალების მიმართ უფრო ტოლერანტული და შემწყნარებელი ვარ; მამაკაცებთან ბოლომდე ვამბობ სათქმელს.
დავით დარჩიაშვილი:
- მთავარია, ოპონენტი გონიერი იყოს, სქესს მნიშვნელობა არა აქვს. ჩემი აზრით, "ლეკვი ლომისა სწორია, ძუ იყოს თუნდა ხვადია".
- მთლიანად იზიარებთ თუ არა იმ პოლიტიკურ კურსს, რომელიც თქვენს ლიდერს აქვს?
ეკა ბესელია:
- მე სრულიად ვიზიარებ "ქართული ოცნება - დემოკრატიული საქართველოს" პოლიტიკურ კურსს და ჩვენი ლიდერის, ბიძინა ივანიშვილის ხედვას ქვეყნის მოწყობასთან დაკავშირებით.
დავით დარჩიაშვილი:
- "ერთიანმა ნაციონალურმა მოძრაობამ" საქართველოს ისტორიაში პირველად გაბედა და კონკრეტული გეგმა დასახა ორგანიზებული დანაშაულისა და კორუფციის წინააღმდეგ საბრძოლველად. შეგახსენებთ, რომ ჩვენი ქვეყანა კრიმინალურ, ეთნოგრაფიულ ოაზისად იყო ქცეული, სადაც მხოლოდ ხაჭაპური და ღვინო ფასობდა, თუმცა ღვინო ფალსიფიცირებული გახლდათ. დღეს სიტუაცია რადიკალურად შეიცვალა და შესაბამისად, ღვინოც უკეთესი გახდა.
- ფიქრობთ თუ არა, რომ ზოგჯერ შესაძლოა, თქვენი ლიდერიც ცდებოდეს?
ეკა ბესელია:
- შეუცდომელი მხოლოდ უფალია. შეცდომებს ნებისმიერი ადამიანი უშვებს. თუმცა ხშირად იცით, როგორ სიტუაციაში აღმოვჩენილვარ? ბატონი ბიძინას ამა თუ იმ ნაბიჯზე მიფიქრია, - ნეტავ, ეს შეცდომა ხომ არ არის-მეთქი? - მაგრამ მერე ისე წარმართულა პროცესი, რომ ჩვენი ლიდერის გადაწყვეტილების სისწორეში საბოლოოდ დავრწმუნებულვარ.
დავით დარჩიაშვილი:
- რა თქმა უნდა, ვფიქრობ. "უშეცდომო და იდეალური დიმიტრი იყო გელოვანი და მოკვდა". არ უარვყოფ, რომ სიჩქარისა თუ გაუთვლელობის გამო, შეცდომებიც დავუშვით. თუმცა ერთხელ არჩეული კურსიდან არ გადაგვიხვევია.
- თქვენი გუნდის ყველაზე დიდ შეცდომად რას მიიჩნევთ?
ეკა ბესელია:
- კონკრეტულ შეცდომას ვერ დავასახელებ. ბატონ ბიძინას თავად უთხოვია ჩვენთვის, რომ მის მიღებულ გადაწყვეტილებაზე განსხვავებული აზრი გამოგვეთქვა, მაგრამ ახლა კონკრეტულ საკითხებზე ვერ ვისაუბრებ. მთლიანობაში, ის შეცდომებს თითქმის არ უშვებს.
დავით დარჩიაშვილი:
- ყველაზე დიდ შეცდომად მივიჩნევ იმას, რომ ქვეყნის აღმშენებლობის, სუვერენიტეტის დაბრუნებისთვის ბრძოლისას ვიღაც-ვიღაცებმა დანაშაული ჩაიდინეს. გირგვლიანის საქმე ნამდვილად, დიდი ტრაგედია იყო. თუმცა ისიც უნდა გვახსოვდეს, ორგანიზებული დანაშაულის წინააღმდეგ ბრძოლას ორმოცი პოლიციელი შეეწირა. ტრაგედია კი მოხდა, მაგრამ რას ვიზამთ, ბრძოლა უნდა გავაგრძელოთ. მერწმუნეთ, ეს უფრო რთულია, ვიდრე წმინდანის როლის მორგება, თეთრი ხელთათმანების ჩაცმა და სხვისი კრიტიკა.
- ქვეყნის ინტერესებისთვის საკუთარი სიცოცხლის საფრთხის ქვეშ დაყენება თუ შეგიძლიათ?
ეკა ბესელია:
- კი, ამაზე არც დავფიქრდები. სხვათა შორის, დღეს სააკაშვილის ოპოზიციაში ყოფნა თავისთავად ნიშნავს სიცოცხლის საფრთხეში ჩაყენებას. ოპოზიციაში ქვეყნის ინტერესებიდან გამომდინარე აღმოვჩნდი, თორემ პირადად მე ამ ხელისუფლებასთან არანაირი პრობლემა არ მქონია. ბევრი სხვა ოპოზიციონერისგან განსხვავებით, გაბრაზებული არ ვარ, უბრალოდ, "ნაციონალების" მიერ ქვეყნის მართვის სტილი მიუღებლად მიმაჩნია.
დავით დარჩიაშვილი:
- წინასწარ არავინ იცის, ექსტრემალურ სიტუაციაში როგორ მოიქცევა. მე იმის თქმა შემიძლია, რომ პირადი ინტერესები და კეთილდღეობა ხშირად სასწორზე დამიდვია.
- ტყუილის თქმა ხშირად გიწევთ?
ეკა ბესელია:
- ხშირად კი არა, საერთოდ არ ვცრუობ, იმიტომ, რომ ყველაფერი სახეზე მეტყობა. არ გამომდის; უწყინარი ტყუილის თქმაც კი არ შემიძლია. ალბათ იმიტომ, რომ ემოციური ვარ და ჩემი განცდები სახეზე მეხატება.
დავით დარჩიაშვილი:
- ვინ განსაზღვრავს, რა არის ტყუილი და რა - მართალი? შესაძლოა, ვიღაცას ტყუილად მოეჩვენოს ის, რაც ნახევრად სიმართლეა.
- დაპირების შესრულებას რამდენად ხშირად ახერხებთ?
ეკა ბესელია:
- არ შემიძლია, ადამიანს სიტყვა მივცე და არ შევასრულო. ძალიან თავმოყვარე ვარ და არ მინდა, ჩემმა სიტყვამ ფასი დაკარგოს. არასდროს ვიტყვი ისეთ რამეს, რისი გაკეთებაც არ შემიძლია.
დავით დარჩიაშვილი:
- რა ვიცი, ნორმალურ ქვეყანაში თითოეული პოლიტიკოსი მთელი გუნდის საქციელზე აგებს პასუხს ან - პირიქით. რაც შეეხება ჩემს გუნდს: ჩვენ თავად გვეგონა, რომ ქვეყნის აღმშენებლობის ტემპი უფრო ჩქარი იქნებოდა, მაგრამ გაუთვალისწინებელი რაღაცებიც მოხდა. მართალია, 100 საავადმყოფოს აშენება 2007 წლისთვის ვერ მოვასწარით, მაგრამ ახლა 100 საავადმყოფოზე ბევრად მეტი გვაქვს. ჩვენ ისიც გვეგონა, რომ ნატოს წევრი ქვეყანა მალე გავხდებოდით, მაგრამ ამ გზაზე იმაზე ბევრად მეტი წინააღმდეგობა შეგვხვდა, ვიდრე წარმოგვედგინა. ეს ჩვეულებრივი პროცესია. XIX საუკუნის ერთ-ერთმა მკვლევარმა თქვა, ნებისმიერ ომში (პოლიტიკაც ომია) არსებობს ნისლი და ზოგჯერ ისეთი ვითარება, რომლის წინასწარმეტყველებაც შეუძლებელიაო. ასეთი მოულოდნელობები ზოგჯერ ჩვენს გეგმებს ცვლის, თუმცა ერთხელ არჩეულ კურსს არასდროს ვიცვლით.
- ზეწოლის ან შანტაჟის მსხვერპლი თუ გამხდარხართ?
ეკა ბესელია:
- ალბათ მე ერთადერთი პოლიტიკოსი ქალი ვარ, რომელიც რეპრესიებში მოჰყვა: ალბათ გახსოვთ, ჩემი შვილისა და ძმის ისტორია... ასეთი სასტიკი ანგარიშსწორება ხელისუფლებას არც ერთი პოლიტიკური ლიდერის მიმართ არ განუხორციელებია.
დავით დარჩიაშვილი:
- არა, არანაირ ზეწოლას და შანტაჟს არ ვექვემდებარები.
- დიდი თანხა რომ მოიგოთ, პირველ რიგში, რას გააკეთებდით?
ეკა ბესელია:
- ყველა იმ ადამიანს დავეხმარებოდი, ვინც ვიცი, რომ ცუდ დღეშია. ბოლო დღეების განმავლობაში ძალიან ბევრი გაჭირვებული ოჯახი ვნახე, მათი სახელები, გვარები და საცხოვრებელი ადგილებიც კი ვიცი. მათი დახმარებით, საკუთარ თავს მოვგვრიდი სიმშვიდეს.
დავით დარჩიაშვილი:
- მაინც რამდენი? მილიონი? თუ ასეა, პირველად იმ ადამიანებს გავუუმჯობესებდი ცხოვრების პირობებს, რომლებზეც პასუხს ვაგებ ანუ - ცოლ-შვილს. მერე იმათზეც ვიფიქრებდი, ვის წინაშეც პასუხისმგებელი არ ვარ, - რაიმე ეკონომიკურ ან ჰუმანიტარულ პროექტებს დავაფინანსებდი.
- ყველაზე მეტად რისი გეშინიათ?
ეკა ბესელია:
- უფლის. ამიტომ ვცდილობ, ისეთი ცოდვა არ ჩავიდინო, რომლის გამოსწორებასაც ვერ შევძლებ. დანარჩენი არაფრის მეშინია.
დავით დარჩიაშვილი:
- ყველას სიკვდილის გვეშინია, მაგრამ ამწუთას ამაზე არ ვფიქრობ... იცით, რა?.. სიყვარულის დაკარგვის მეშინია. იმედია, ეს არ მემუქრება.
წყარო/Source:
http://www.ambebi.ge/politika/59988-qrepre...l#ixzz25Ffp4LP5რომელი უფრ ისააა
თქვენ გადაწყვიტეთ
"რეპრესირებული" ეკა ბესელია და დავით დარჩიაშვილი,, რომელსაც სიყვარულის დაკარგვის ეშინია
